1 SAMUEL 1:19 - KITAB NU TUMPU ALLA LELE MA'IMAI'

¹⁹ Dodododopnyo i Elkana tiba aha salaigan nobulaamo subu-subu ka' salatan noko sombahmo Tumpu, aha ninsusule'mo i Rama. Sahingga i Elkana noduhusmo tiba i Hana bengkele'nyo aijo' ka' pinopo ii'mo nu Tumpu na do'a i Hana aijo'.

1 SAMUEL 1:19 ပူးပေါင်းရင်းမြစ်များ

KAJADIAN 21:1

Tumpu nombalakatimo i Sara, susumo anu jinaji'-Nyomo.

KAJADIAN 30:22

Lantas inginau'mo nu Tumpu Allah na i Rahel; Tumpu Allah nompopo'i'mo do'anyo ka' mombee'i mule' ia mohampeakon anak.

KAJADIAN 4:1

Lapas aijo' i Adam noduhusmo tiba i Hawa, bengkele'nyo, lantas pinoboamo na bengkele'nyo aijo'. Ia nompohampemo samian na anak mo' ane ka' notatae, “Tumpu na nontulungi mae aku sahingga nohumpakmo samian na anak mo' ane.” Sahingga sinanggohannyomo i Kain.

KAJADIAN 8:1

Tumpu Allah madi' mongkolilimi i Nuh ka' binatangnyo iwi-iwi' anu daagi' hi ia i uno nu kapan aijo'. Tumpu Allah nompotobungmo mombun, sahingga uee nontampu'unimo tinolo tutus.

2 TOMU-TOMUNDO' 4:17

Panyo' memang ahi' totu'u apaa na anu tinaloakonmo i Elisa. Taunnyo anu nolunduakonmo kila-kila kinonamo i tempo'nyo apaa na anu memang pinoto'imo, boune aijo' nompohampemo samian na anak mo'ane.

MAZMUR 119:147

Subu-subu aku mobulamo ka' momoita tulung; aku montaha'imanimo aku jinanji'mo nu Belento.

MAZMUR 136:23

Ia madi' mongkolilimi kita, tempo'nyo kita pinatundu'mo; kalibosan-Nyo sampe toka sidu-sidutu'.

MAZMUR 25:7

Ampuniakon mae na dosa' ka' kasala'an tempo'nyo aku daagi' olitau, inau'akon mae na aku i uno nu kalibosan ka' kanonongan nu Belento.

MAZMUR 5:3

De timbali talimakon na anu ku kakase aiya ka' tulungiakon mae na aku, O Tomundo'ku ka' Tumpu-ngku.

MAZMUR 55:17

Panyo aku mongkakasemo hi Tumpu, Tumpuje na momposalamat aku.

MARKUS 1:35

Dodododopnyo, daagi' subu-subu hondo i Yesus nobula ka' nompala'i laigan. Ia namba nokiijo' i tampat anu liing i sambiha' nu kota, ka' binalado'a i kiijo' mae.

LUKAS 23:42

Lantas ia notatae, “Yesus, inau' mae na aku, de Kita po'ule'mo tokamo mae sumo Tomundo!”

YOSUA 18:25

Ka' suele sampulu' ka' opat na kota aiya tibamo kampu-kampung anu kiijo' i da'erahnyo: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (aijo'mo Yerusalem), Gibea tiba Kiryat-Yearim. Aijo'mo na tano' iwi-iwi' anu binee'mo hi to utu-utus tulunan nu bansa Benyamin da timbalimo anu nu aha.

1 SAMUEL 1:1

Daagi ko samian na mo'ane sanggonyo i Elkana minsoop tulunan nu bansa Efraim. Ia jojoong i kota Rama i da'erah Efraim anu mabungkut. I Elkana anak i Yeroham, makumpu mae i Elihu. Ia monsoop poto'utusan mae i Tohu, gampanyo mae nu aha tulunan i Zuf.

1 SAMUEL 1:11

Lapas aijo' i Hana nonjanji'mo, ia notatae, “O Tumpu Anu Daka'na kuasanyo, toakon mae na posaihon nu belento aiya! Toakon mae na kasusa'anku aiya. Inau'akon mae na aku ka' boli mae okolilimi na aku! De belento Tumpu mombee'i mae hi belengku aiya samian na anak mo'ane, aku mojanji ku bee'je na anak aijo' hi belento Tumpu na kantumuu'annyo sidu-sidutu'. Aku mojanji' mule' da ubaknyo madi' timbali ogunting.”

1 SAMUEL 15:34

Lapas aijo' i Samuel nambamo i Rama ka' i Tomundo' Saul suele ninsusule'mo i laigannyo kiijo' i Gibea.

1 SAMUEL 16:13

Lia-lia' na i Samuel nongala lanya' nu zaitun aijo' ka' nohangkatmo ka' nombalakatimo i Daud, lanya' aijo' na pinipi'akon hi ia i ahop nu to utu-utusnyo tu'a. Tempo'nyo aijo' i Daud kinuasanmo nu Roh nu Tumpu. Sinaa aijo' Roh nu Tumpu saja'mo lewa' nongkuasai ia. Lapas aijo' i Samuel ninsusule'mo namba i Rama.

1 SAMUEL 19:18

Salatan i Daud noko popalaimo, ia nambamo hi laigan i Samuel kiijo' mae i Rama ka'pinoto'inyomo iwi-iwi' apaa na anu binaumo i Saul hi ia. Lapas aijo' i Daud tiba i Samuel hingga-hinggat nambamo i Nayot ka'jinojoongmo kiijo' mae.

1 SAMUEL 2:11

Lantas ninsusule'mo na i Elkana tiba aha salaigan nambamo i Rama, panyo i Samuel anak ai-aijo' na jinojoongmo ahi' i Silo ka' lewa'mo mombau apaa na anu nu palentahkon nu Tumpu i uno nu atulan anu nu pojalan i Imam Eli.

1 SAMUEL 25:1

Madi' pinin sinilakamo na i Samuel. Iwi-iwi na mian nu aha Israel sinihukmo ka' nohangimo. Lapas aijo' ilamunmo kiijo' i Rama. Lapas aijo' i Daud nambamo kiijo' mae i padang anu mateges anu kiijo' i Paran.

1 SAMUEL 7:17

Saja' sumo aijo' na nu bau, ka' de lapasmo ia minsusule'mo ilaigannyo kiijo' i Rama. Ikiijo' mae ia tinimbalimo mian kopian nu aha mian Israel, ka' mule' nompotinjomo sa'angu' na mezbah ponsomban Tumpu.

1 SAMUEL 8:4

Kalana aijo' to pola-polaya' nu aha Israel iwi-iwi' nogombumo ka' nangadap hi Samuel kiijo' i Rama,

1 SAMUEL 9:26

lantas ia ihoyotmo. Salatan sinaa binete'mo, i Samuel nolagamo i Saul anu kiita i bangkala' ka' notatae, “Pobulamo, imbo' da ku boamo na beleyum minsusule'mo.”