1 PETRUS 4:1 - KITAB NU TUMPU ALLA LELE MA'IMAI'

¹ Kalana i Kristus nongoa'imo kasansala'an salaku butongnyo, belemiu suele tionyo ahi' mompohoson butong nu belemiu nu tanga'an anu sumo aijo'. Kalana mian anu nongoa'imo kasansala'an salaku butong madi'mo mombau dosa'.

1 PETRUS 4:1 ပူးပေါင်းရင်းမြစ်များ

YESAYA 1:16

Baso'i na butong nu belemiu sampe belesi'. Iwi-iwi' na palabuatan ma'idek aijo' bolimo ahi' obau nu belemiu,

YEHEZKIEL 16:41

Nu papuimo nu aha na laigan nu belemiu iwi-iwi' ka' mompokaumo to bou-boune monsakisi hukuman anu opokonamo hi belemiu. Sumo aijo' na Aku mompobelenti palabuatan nu belemiu sasaja' masala'. Beleyum madi'mo daagi' sola' mombagi-bagiakon palasen hi to sinta-sinta nu beleyum.

MARKUS 3:3

I Yesus notatae hi mian anu lupe na limanyo sambiha' aijo', “Imbo' tuminjo i aiya, i ahop.”

ROMA 6:11

Komiu tionyo suele mangaku butongum silaka kalana dosa', panyo tumuu' iuno nu pompahasumbu'an anu madodo tiba Tumpu aijo' ohumpak hi Kristus Yesus.

ROMA 6:2

Tantu madi'! Dosa' madi'mo mongkuasai kita, jadi, te toho' kita saja'mo tumuu' mombau dosa'?

ROMA 6:7

Kalana de batu-batu mian anu silakamo mian aijo' opobebasmo i kakuasa'an nu dosa'.

GALATIA 2:20

Uuka misa'mo aku na anu tinumuu', panyo i Kristusmo na tinumuu' i uno nu butongku. Kantumuu'an aiya anu ku oa'i uuka aiya aitumo tumuu' palesaya hi Anak nu Tumpu anu mongkalibosi aku ka' anu nongkulubanakonmo butong-Nyo kalana aku.

GALATIA 5:24

To mia-mian anu i Kristus Yesusmo na tumpunyo, mian haha aijo' nompateimo sipatnyo salaku manusia tiba iwi-iwi' na napisunyo ka' apaa na anu nu ka'ima'i.

EFESUS 6:13

Mokonyo aijo' tempo' uuka, pakemo iwi-iwi' na poguhaton mahampate anu sukup nu Tumpu, da sinaa anu ma'idek komiu moko ewa pontumbuhi mae nu sampo bali'. Ka' de lapasmo na komiu mahampate toka i mihinyo, komiu daagi' sabole-bole mahoson ka' baani.

PO'ULE' INGULIT 27:10

Kalana aijo' otuluti na Tumpu Allah nu belemiu ka' bau iwi-iwi' na palentah-Nyo anu binee'kumo hi belemiu sinaa aiya.”

FILIPI 2:5

Tionyo ahi' komiu mingkinyonyoa sumo i Yesus Kristus:

IBRANI 12:3

Soba potutugakon mosia na kosakisanyo na i Yesus nongahopimo to mia-mian baladosa' anu nongka'idekimo hondo ka' nongewamo Ia. Kalana aijo' boli ise-ise' na kinyonyoa ka' boli bata-bata.

IBRANI 4:10

Kalana mian anu nohumpakmo pingkainan anu jinanji'mo nu Tumpu hi ia aijo', mingkain ahi' suele, ka' iwi-iwi' na pakalaja'annyo bolimo obau pokakana sumo hi Tumpu.

1 PETRUS 2:21

Aijo' na kahanda'nyo Tumpu nolagamo belemiu. Kalana posi Kristus nongoa'imo sansala kalana bau kapentingan miu, tiba jalan anu sumo aijo' Ia nombee'imo belemiu sa'angu' na sonto', da belemiu mombatuki sonto' i uno nu kantumuu'an-Nyo.

1 PETRUS 3:18

Kalana i Kristus sinilaka ola minsan sampe toka sidu-sidutu' kalana dosa' nu manusia – samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.