1 PETRUS 1:19 - KITAB NU TUMPU ALLA LELE MA'IMAI'

¹⁹ panyo anu ko angga'nyo hondo; aijo'mo posi butong i Kristus anu tinimbalimo salaku domba, anu kinolobanakon hi Tumpu anu madi' ko panyakitnyo kabai ko kakulangannyo.

1 PETRUS 1:19 ပူးပေါင်းရင်းမြစ်များ

NOSABATMO 12:5

Belemiu timbali mompile'i domba kabai mee' panyo tionyo ahi' mo'anenyo, umunnyo sataunmo ka' anu madi' ko panyakitnyo.

YESAYA 44:22

Kasala'an nu beleyum Ku laa'mo da mamba susumo kundom, dosa' nu beleyum Kusikaimo da mamba susumo sehu'. Pinsusule'mo mae hi beleng-Ku, kalana pinobebas-Kumo na beleyum!”

YESAYA 53:7

Talalo ahi' pinoko idek na nombau ia, panyo tinanggung nyomo ahi' nu sabaan. Ia madi' nombuka' nganga'nyo susumo anak nu domba anu oboamo i pongkolotan kabai tina nu domba anu okiismo na bulunyo.

DANIEL 9:24

Pimpitun lipat na pitumpulu' na taun, aijo'mo na tempo' anu pinotataapmo nu Tumpu mompobebas bansa nu belemiu tiba kota' nu belemiu anu susi' aijo' da bolimo baladosa' ka' bolimo mombau palabuatan anu ma'idek. Iwi-iwi' na dosa' o'ampunimo ka' mule' ka adilan anu sampe toka sidu-sidutu' aijo' sabole-bolemo ahi' opake sahingga anu lewa' tinoa ka' mule' anu lewa' okila-kila aijo' onyata'mo ahi', ka' Laigan nu Tumpu anu susi' aijo' po ule'mo ahi ponsomban Tumpu.

IMAMAT 1:10

De anu osombahkon sa'angu' na domba kabai mee', binatang aijo' tionyo ahi' lakinyo ka' madi' ko panyakitnyo.

IMAMAT 22:20

Boli monsombahkon binatang anu ko panyakitnyo kalana Tumpu madi' montalima.

ZAKHARIA 13:7

Tumpu Anu Daka' na kuasanyo notatae, “Tinjomo mae o, bajak ka' tumbuhimo na polaya' potuu'on anu mokalaja hi beleng-Ku! Pateimo na Ia sahingga to domba-domba mosungke-sungkehetmo. Kutumbuhimo na mian anu palesayamo hi beleng-Ku,

MATIUS 20:28

Pokakana sumo Anak nu Mian aijo' suele Ia toka misa' da okalibosi, panyo da mongkalibosi, ka' mombee' nyawa-Nyo bau pompobebas mian da'isan.”

MATIUS 26:28

Kalana aiyamo na baso'-Ku anu mompokododo apaa na anu jinanji'mo nu Tumpu – baso' anu binubusakon bau kapentingan nu mian da'isan da bau pongampuni dosa' nu aha.

YOHANES 1:29

Dodododopnyo, i Yohanes nontoa i Yesus namba mae hi ia. Lantas i Yohanes notatae, “Toa, aijo'mo na Anak Domba nu Tumpu Allah anu mongalini dosa' nu dunia.

YOHANES 1:36

Salatan tinoanyo na i Yesus notulu, ia notatae, “Toa! Aijo'mo na Anak Domba nu Tumpu.”

SISIKON NU TO RASUL-RASUL 20:28

Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

ROMA 3:25

Tumpu nongkolobanakonmo i Yesus Kristus, da kalana Ia sinilaka aijo' mian natantumo pinobebasmo i kasala'an de aha palesaya hi Ia. Tumpu nombau sumo aijo' da mompotoa ka'adinan-Nyo. Kalana tempo' anu i hikuhakonmo Tumpu nonsabalakonmo dosa-dosa' nu mian, sahingga Ia madi' nohukum aha.

EFESUS 1:7

Kalana i Kristus sinilakamo, kita pinobebasmo nu Tumpu Allah, alati'nyo Ia nongampunimo kita i to dosa-dosa'to.

KOLOSE 1:14

Kalana Anak-Nyo aijo', sahingga kita pinobebasmo; alati'nyo dosa'to iwi-iwi' ingampunanmo.

1 PETRUS 3:18

Kalana i Kristus sinilaka ola minsan sampe toka sidu-sidutu' kalana dosa' nu manusia – samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.

1 YOHANES 1:7

Panyo de kita tumuu'mo i uno nu jingka susumo Tumpu i uno nu jingka, saba' kita suele ahi' tumuu' sambukumo, mompaha dame-damemo samian ka' samian, ka' baso' i Yesus, Anak-Nyo, na mompolomasmo dosa'to iwi-iwi'.

1 YOHANES 2:2

I Yesus Kristus na mombolosakon da iwi-iwi' na dosa'to o ampuni. Ka' misa' ola dosa'to panyo suele tiba dosa' nu iwi-iwi' mian.

ANU PINOTO'I HI YOHANES 1:5

ka' lengkat mae hi Yesus Kristus, sakisi anu mohongo-hongo. Iamo na anu sinilaka po'ule' pinotumuu' momona, ka' Iamo na anu mongkuasai to tomu-tomundo nu dunia. I Yesus mongkalibosi kita, ka' kalana Ia sinilakamo aijo' sahingga Ia nompobebasmo kita da madi'mo o hukum kalana dosa'to, haha aijo'.

ANU PINOTO'I HI YOHANES 14:1

Lapas aijo' aku nontoamo, Anak nu Domba aijo' tinjo-tinjo aita' i Bungkutnyo nu Sion. Tiba Ia, daagi' mule' ko 144.000 na mian ka' i siakan nu aha toto samian bubu' tinulis na sanggo-Nyo ka' sanggo nu Tuuma-Nyo.

ANU PINOTO'I HI YOHANES 14:5

Madi' toho' aha baleko'; ka' madi' ko anu opisala'i sangkiding pe'e hi aha.

ANU PINOTO'I HI YOHANES 5:6

Lapas aijo', aku nontoa sa'angu' na Anak nu Domba tinuminjo aijo' i totonga' nu kasuhangan aijo', tinikubanmo nu malaikat opat ka' iwi-iwi' na to pola-polaya' haha aijo'. Anak nu Domba aijo', otoa sumo anu kinolotmo. Ia ko tanduknyo popitu' ka' popitu' na matanyo: Aijo'mo popitu' na Roh lengkat mae hi Tumpu anu sinaimo mae mamba i songko-songko na dunia.

ANU PINOTO'I HI YOHANES 5:9

Aha nonyanyiakonmo sa'angu' na nyanyian anu sala'je aitu na i nyanyi: “Belento pantas mongala kitab aijo' ka' mombeak segen haha aijo'. Kalana Belento pinateanmo, ka' kalana Beleyum sinilakamo, mian i iwi-iwi' na tulunan, sisik, negara, ka' bansa ingolimo nu Belento da timbalimo anu nu Tumpu.

ANU PINOTO'I HI YOHANES 7:14

“Aku madi' monsumbu', Tuan. Posi i Tuanmo na monsumbu',” tinaamanku. Sahingga ia notatae hi belengku, “Aiyamo na to mia-mian anu sinalamatmo anu noko lapasmo na nongoa'i kasansala'an anu daka' hondo. Aha nombaso'imo juba' nu aha nu baso' nu Anak nu Domba aijo' da mopute'.