1 KORINTUS 5:8 - KITAB NU TUMPU ALLA LELE MA'IMAI'

⁸ Jadi imbo' da kita molame'akon bau-bauonto aijo' nu roti anu madi' ko raginyo, aijo'mo roti anu monggambanakon kabelesi'an ka' iwi-iwi' anu nuka'ima'i nu kinyonyoa nu Tumpu. Boli kita molame'akon bau-bauon nu Paskah aijo' nu roti anu ko raginyo pininmo, aijo'mo ragi nu dosa' tiba ka'idekan.

1 KORINTUS 5:8 ပူးပေါင်းရင်းမြစ်များ

MAZMUR 32:2

Mohumpak ka'ima'an na kantumuu'an nu mian anu palabuatannyo ma'i-ma'idek madi'mo nu palahatikan nu Tumpu ka' suele anu madi' ka'oho' mongakali.

MAZMUR 42:4

Sinaa pihi aku sola'mo humang, me mongkaan lolu'ku. Sansina-sina na sampobali'ku mompokilawa mae, “Iyamo mae na Tumpu nu beleyum?”

NOSABATMO 12:15

Tumpu notatae, “Pitun sinaa na kopinnyo, belemiu madi' timbali mongkaan roti anu ko raginyo. I sinaa anu momona iwi-iwi' na ragi anu itina' i laigan nu belemiu tionyo ahi osabatakon, kalana de pitun sinaa na kopinnyo aijo' daagi' ko mian anu mongkaan roti anu ko raginyo, ia madi'mo timbali mian anu osanggohi mian anu pinalesayamo hi beleng-Ku.

NOSABATMO 12:8

Pihi-pihimo aijo' ahi' na antoknyo o tunui ka' okaan tiba utan anu mapakat ka' roti anu madi' ko raginyo.

NOSABATMO 13:6

Pitun sinaa na kopinnyo belemiu tionyo ahi' mongkaan roti anu madi' ko raginyo, ka' i sinaa ko ipitunnyo tionyo ahi' obaumo na lamean bau pongadati Tumpu.

NOSABATMO 13:7

Pitun sinaa na kopinnyo aijo' belemiu madi' timbali mongkaan roti anu ko raginyo, ka' i songko-songko na lipu' nu belemiu madi' timbali ko ragi kabai pa' apa-apaa na anu ko raginyo.

YESAYA 25:6

I Puge'nyo nu Sion, Tumpu Anu Daka' na Kuasanyo momposadiamo anu okaan i bau-bauon nu aha iwi-iwi' na bansa i dunia aiya. Nu tatuakonmo na kaanon anu toto ima-ima' hondo tiba anggur anu memang pinile'anmo.

YESAYA 30:29

Panyo belemiu mian anu palesayamo Tumpu, saidi' mae lame'mo ka' lewa'mo manyanyi susumo pihi de molame'akon agama. Belemiu saidi' mae bilahimo susumo to mia-mian lumajang mojajalan tiba mian anu mompuhi puloit mamba i Laigan nu Tumpu, anu monsangaja'i Israel.

IMAMAT 23:6

Dodopnyo sinaa tangganmo sampulu' ka' olima', montampu'unimo Molame'akon Roti anu madi' ko Raginyo ka' kopinnyo pitun sinaa aijo' belemiu madi' timbali mongkaan roti anu binau ko raginyo.

MATIUS 16:12

Kahimpusannyo anu saja' mombatuki Yesus aijo' nangalati'mo saba' i Yesus nonsai ahi' aha, bala'ingati misa' ragi anu opake pombau roti, panyo mongkona to panga-pangajalan nu to mia-mian Farisi ka' Saduki!

MATIUS 16:6

I Yesus notatae hi aha, “Bala'ingati mae na ragi nu to mia-mian Farisi ka' Saduki.”

MARKUS 8:15

“Obala-bala'ingati na ragi nu to mia-mian Farisi ka' ragi i Herodes,” koo-Nyo i Yesus hi aha.

LUKAS 12:1

Momada-madala na mian nompaha genso-gensotmo sampe ko anumo pinahampeja'akon na tengkenyo. Hau-haunyo mian haha aijo' gombu-gombu, i Yesus notatae hi anu saja' mombatuki Ia, “Obala'ingati na ragi nu mian Farisi, patu nu potataeng-Ku, kageguanan nu aha.

YOHANES 1:47

I Yesus nontoa i Natanael tinoka, lantas notatae mongkona ia, “Toa, aijo' mian nu Israel totu-totu'u. Madi' ko baleko'nyo hi ia.”

1 KORINTUS 3:3

kalana komiu daagi' tumuu' mombatuki sipat miu salaku mian. Kalana de komiu daagi' mongka'ideki tiba mahantuda' hi samian ka' samian, te misa' aijo' mompotiju' taalu' komiu daagi' tumuu' mombatuki sipat nu mian, sumo to mia-mian anu madi' monsumbu' Tumpu?

1 KORINTUS 5:1

Aku sabenannyo nohumpakmo lele daagi' ko anu nonsisik, tukoonyo itina' hi komiu daagi' ko anu nombaumo anu mahenyu, anu talalomo hondo: Daagi' ko anu itina' hi komiu Utus anu nasala'mo tiba bengkele' nu tuumanyo te silabo'nyo. To mia-mian pe'e anu madi' monsumbu' Tumpu, madi'mo mombau sumo aijo'!

1 KORINTUS 5:6

Madi' pantas na komiu saja' kobubuun. Ugaat komiu nonsumbu'mo ande-andeon aiya, “Ragi mau ola sangkiding de ogalo'akon i labu, labu aijo' mo'insu'!”

2 KORINTUS 1:12

Kami sanang kalana kinyonyoa mami na mompohoson kami, saba' kantumuu'an mami i dunia aiya – anu talalo hondo pompahasumbu'an mami tiba kita Utus – pinojalanmo mami ma'i-ma'ima' ka' sahondo-hondonyo. Kami nombau aijo' misa' kalana kapandean nu mian, panyo kalana kahosonan anu binee' nu Tumpu Allah.

2 KORINTUS 2:17

Kami madi' sumo mian da'isan anu mompotimbali lele lengkat mae hi Tumpu ola sumo balu-balukon. Pongka'oho' mami anu sahondo-hondonyo, kalana kami binee'anmo kalaja nu Tumpu. Ka' Tumpu na nosi toamo saba' kami nompotokamo lele aijo' susumo to posa-posaihon i Kristus.

2 KORINTUS 8:8

Aku madi' mompoto'i aijo' sumo sa'angu' na palentah. Panyo kalana mompotoa mosia na kokekenyo na mian sangga'at montulungi sangalunyo, aku suele mongka'oho' monsumbu' toka iya na kalibosan miu.

EFESUS 6:24

O amalakon da Tumpu mombalakati kita Utus iwi-iwi' anu mongkalibosi Tumpunto i Yesus Kristus, nu kalibosan anu madi' ko kapopoho'annyo. Tabea' mami, I Paulus

PO'ULE' INGULIT 16:16

Iwi-iwi' na to momo'ane nu aha Israel tionyo ahi' toka mae monsombah Tumpu Allah nu belemiu i tampat anu pinile'an-Nyomo sataun pintolun aijo'mo i Sinaa Lamean nu Paskah, i Lamean Monsawe' gandum, tiba Lamean Tahop o atopi nu Hon nu kau'. Batu-batu mian tionyo ahi' momboa palasombahan.

PO'ULE' INGULIT 16:3

Palasombahan i Paskah aijo' tionyo ahi' okaan tiba roti anu madi' ko raginyo. Pitun sinaa na kopinnyo na belemiu tionyo ahi' mongkaan roti anu madi' ko raginyo susumo tempo'nyo belemiu nompala'imo mae tano' nu Mesir anu nolosia'mo mae hondo. Kaanmo na roti aijo', roti anu osanggohi roti nu kasansala'an, da i uno nu kantumuu'an nu belemiu, saja' belemiu tonginau' i sinaa tempo'nyo belemiu nompala'imo mae Mesir, tampat miu nongoa'i kasansala'an.

YOSUA 24:14

“Jadi, uuka aiya,” koonyo mule' i Yosua, “o'adati na Tumpu. Opalesaya ka' o hongo-hongo na Ia nu kinyonyoa anu totu-totu'u ka' boli panggaga. Bolimo mompalesaya to pilo-pilogot sangga'at anu sinombah nu mompolee' miu naipuan mae tempo'nyo i Mesopotamia ka' i Mesir. Anu opalesaya ka' o hongo-hongo ola samata-mata Tumpu.

1 PETRUS 4:2

Kalana aijo', saja' ahi' komiu tumuu' i dunia aiya mombatuki pongka'oho' nu Tumpu, ka' misa' mombatuki pongka'oho' nu manusia.