1 KORINTUS 5:11 - KITAB NU TUMPU ALLA LELE MA'IMAI'

¹¹ Kahanda'ku aijo'mo da komiu boli mosangalu tiba mian anu mangaku butongnyo mian Kristen, panyo mian aijo' saja' masala' kabai mangoa kabai motunde pilogot, kabai saja' mombusi-busiki mian sangga'at, kabai saja' malangu, kabai mule' pambuling. Sumuhang mongkaan tiba mian aijo' pe'e boli!

1 KORINTUS 5:11 ပူးပေါင်းရင်းမြစ်များ

MAZMUR 10:3

Mian anu ma'idek na kinyonyoanyo sinombongmo nu tanga'annyo anu ma'i-ma'idek, miana nu mangoa nontotobi'akonmo ka' madi'mo nontalima Tumpu.

MAZMUR 101:5

Mian anu lewa' mompobau-bau anu madi' totu'u maumo nu pohowini hi mian sangga'at ku pateimo. Mian anu mombuulakon butongnyo ka' saja' mingkinyonyoa da molingkudui sangalu madi' ola ku pojohok.

YEHEZKIEL 22:12

Daagi' mule' ko anu tinimbalimo mian topo patei sola-sola' obayan, mian anu talalo ahi' molio kantungan ka' saja' mongkelo aha mian anu bubuu' sangko bansanyo. Aha iwi-iwi' nongkolilimimo mae Aku. Aku, Tumpu Anu Matangkas na Kuasanyo notataemo.

MATIUS 18:17

De ia madi' montalima pokinde' nu to mia-mian aijo', poto'i na han aijo' hi jama'at. Ka' kahimpusannyo de ia madi' mongka'oho' montalima pokinde' nu jama'at, anggapmo na ia sumomo anu montage hasin, ka' samian anu madi' monsumbu' Tumpu Allah.”

MATIUS 23:25

Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To mangko-mangko' ka' to lea-lean miu, o baso'i miu bele-belesi' na sambiha'nyo, padahan i unonyo koton hondo tiba to hahan anu i humpak miu ola pinakisa ka' pinalanguesan.

LUKAS 18:11

Mian nu Farisi aijo' tinuminjo posi sausa'nyo, ka' binalado'a, ‘O Tumpu, aku mompotoka talima kaseh hi kita, kalana aku madi' sumo sangga'at, mangoa, tageo'kabai masala'. Aku montalima kaseh, kalana aku madi' sumo topo tage hasin aijo'.

LUKAS 21:34

“Ojagai na butongum, boli komiu talalo mongka'ima'i mombau bau-bauon ka' lewa' monginum inumon anu moko langu, kabai talalo mompotutugakon kapalaluan nu kantumuu'anum, sahingga komiu madi' mosadia sampe toka sinaanyo aijo' anu nu potolokengkeng mae.

SISIKON NU TO RASUL-RASUL 1:15

Kinosansinaan aitu, tempo'nyo aha hau-haunyo sinilimu'mo – daagi' kila-kila sa'atu ka' uampulu' na mian anu tinoka – i Petrus tinuminjomo mongka'oho' motatae. Ia notatae,

SISIKON NU TO RASUL-RASUL 9:17

Sahingga i Ananias namba i laigan aijo' ka' nompotiik limanyo i buan nu ubak i Saulus. “Utusku Saulus,” koonyo i Ananias, “Tumpu Yesus anu tinoa nu kita Utus i totonga' nu jalan tempo'nyo kita Utus mo'ukamo mae, Iamo na nonsai mae aku toka da kita Utus timbali moko ala montoa mule' ka' nu kuasai nu Roh nu Tumpu.”

ROMA 13:13

Kita tionyo mombau anu ko adatnyo sumo anu biasanyo obau sinaa; boli mompopodaka' bau-bauon moliu-liumo anu madi' opoko ala obaunto, kabai malangu. Boli masala', kabai kalakuan anu madi' ko atulannyo. Boli mahantuda' kabai pusa na kinyonyoa.

ROMA 16:17

To Utu-utus! Kupoita sabole-boleh: Obala'ingati na to mia-mian anu monsaduakon poga'a-ga'atan ka' mompotabuntala' kapalesaya'an hi Tumpu. Anu susumo aijo' mompaha kea' tiba anu pinogulu'mo hi komiu. Opolilit na mian sumo aijo'.

1 KORINTUS 10:14

Mokonyo aijo', to Utu-utus anu ku ku kalibosi, tionyo ahi' komiu mongka'ideki monsombah pilogot.

1 KORINTUS 11:21

Kalana de mongkaanmo, komiu toto samian gago'mo mongala posi kaanonnyo, sahingga daagi' ko anu madi' mohumpak apa-apaa, panyo sangga'at malangumo.

1 KORINTUS 6:10

anu buling, anu mangoa, saja' malangu, anu saja' mongalu mian sangga'at, tiba anu mompolugi' mian sangga'at – iwi-iwi' na mian anu sumo aijo' madi' timbali mian anu palesayamo hi Tumpu Allah.

1 KORINTUS 6:6

Panyo ola mule' ko mian Kristen anu mamba hi anu misa' Kristen kahanda' mongkalaak palakalanyo mongkona Utusnyo anu Kristen!

1 KORINTUS 6:9

Osumbu' miu na to mia-mian anu madi' montuluti pongka'oho' nu Tumpu madi' timbali mian anu palesayamo hi Tumpu? Boli o akali! To mia-mian anu masala', to mia-mian anu bapilogot, anu masala', anu mombau anu moko ambang hi sangko gampanyo bubuu' mo'ane, kabai bubuu' boune,

1 KORINTUS 7:12

Hi sangga-sangga'atnyo pokinde'ku sumo uuka: – aiya posi pokinde'ku, misa' Tumpu – de samian na Kristen ko bengkele'nyomo samian na boune anu madi' palesaya hi Kristus, ka' bengkele'nyo setuju jojoong mogalum tiba ia, mian aijo' madi' timbali mongga'atakon bengkele'nyo.

1 KORINTUS 7:15

Panyo de mian anu madi' palesaya aijo' mompala'i bengkele'nyo kabai langkai'nyo anu Kristen, boli montewa' ia. Han aijo' kita Langkoyang kabai Olitau aijo' bebas, kalana pongka'oho' nu Tumpu da kita Utus tumuu' mompaha hongo-hongo ka' ma'i-ma'ima'.

1 KORINTUS 8:11

Jadi kalana aijo', sahingga palesaya nu kita Utus monsaduakonmo mian anu palesayanyo madi' mahoson aijo' timbalimo madi' ma'ima'. Padahan i Kristus sinilaka kalana mian aijo' suele.

GALATIA 2:12

Momonanyo ia sinumuhang mongkaan hingga-hinggat tiba to Utu-utus anu misa' Yahudi. Panyo salatan to mia-mian anu sinai mae i Yakobus tinokamo, ia madi'mo nosangalu tiba to Utu-utus anu misa' Yahudi ka' madi'mo mongka'oho' mongkaan tiba aha, kalana nabuhukmo hi to mia-mian anu mongka'oho' da iwi-iwi' na mian o sunat.

EFESUS 5:18

Boli komiu malangu nu anggur, kalana aijo' mongidei komiu. Ola ahi' maunyo komiu nukuasai nu Roh nu Tumpu.

EFESUS 5:5

Palahatikan ima-ima': mian anu ko gau' masala' kabai anu madi' mingkona, kabai mangoa, (kalakuan sumo aijo' sumomo monsombah pilogot), mian aijo' madi' timbali minsoop mian anu palesayamo, anu nu palentah i Kristus ka' Tumpu.

KOLOSE 3:5

Mokonyo aijo' bolimo monginde'i hahan anu nu kamilui nu dunia anu mompigalapi butong miu, sumo masala', hahan anu madi' pantas, napisu nu kinyonyoa, mongkamilui anu ma'idek, ka' mangaluk, (kalana mangaluk sumomo palesaya hi pilogot).

2 TESALONIKA 3:14

Kugantang daagi' ko mian anu madi' mongka'oho' montuluti apaa na anu tinaloakonmo mami i uno nu sulat aiya. Obalaingati na mian anu sumo aijo', ka' boli mosangalu tiba ia da ia ma'ambang.

2 TESALONIKA 3:6

To Utu-utus, kalana kuasa i Tumpu Yesus Kristus, kami mompalentah da komiu matijo'on hi to Utu-utus iwi-iwi' anu tumuu' to lulu-luluk, ka' madi' mombatuki aja-ajalan anu obee' kami hi aha.

1 TIMOTIUS 3:3

boli mian anu saja' malangu, kabai anu mongka'ima'i mahantuda'. Sumo aitu mule' ia tionyo ahi' boli buhingison ka' mongka'ima'i baladame. Ia madi' timbali mompopodaka' doi.

1 TIMOTIUS 6:5

ka' po'uwalian anu madi'mo ko kamingkotannyo. Jalan pikilan nu mian haha aijo' pinu'otmo ka' madi'mo daagi' totu'u. Aha monsangka de bala agama moko timbali kaya.

2 YOHANES 1:10

Kalana aijo' de daagi' ko mian toka ka' mompolele hi belemiu pangajalan anu madi' ingajanakon i Kristus, boli montalima mian aijo' i laigan miu kabai monsalan do'ai ia.

ANU PINOTO'I HI YOHANES 2:14

Mau mule' sumo aitu daagi' ko to pia-piangkuka na han anu madi' Ku ka'ima'i hi belemiu: Daagi' ko sambahagian na mian atina' hi belemiu anu nontulutimo apaa na anu ingajanakonmo i Bileam. I Bileam nompogulu'mo i Balak mosia na monabu'akon mian nu Israel i uno nu dosa'; aijo'mo pagala monsale'i aha mongkaan kaanon anu sinombahkonmo hi pilogot ka' mombau hahan masala'.

ANU PINOTO'I HI YOHANES 2:20

Panyo aiya na Ku poto'i hi belemiu: Belemiu nongkanonongimo i Izebel, boune anu mongakui butongnyo pokauhon nu Tumpu aijo'. Manjoo'mo na to posa-posaihon-Ku anu ingakalannyomo ka' ingajannyo da masala', da mongkaan kaanon anu sinombahkonmo hi pilogot.

ANU PINOTO'I HI YOHANES 21:8

Panyo mian anu madi' sabaan, geguan, mian anu palaganta pampatei, mian masala', mian anu ko ajimat, monsombah pilogot, ka' iwi-iwi' na anu baleko' o'alin i uno nu apu anu sumo ndalangon ka' belelang anu lewa' moak, aijo'mo na kapatean anu kopinduannyo.”

ANU PINOTO'I HI YOHANES 22:15

Panyo to mia-mian anu mombau han anu mahumimi', anu mompake to aji-ajimat, to mia-mian anu mombau to kala-kalakuan masala'; anu mompatei, anu monsombah pilogot, ka' to mia-mian anu baleko', mau anu otaloakon, mau apa-apaa na palabuatan ma'idek, iwi-iwi' na mian aijo' tampatnyo i sambiha' nu kota aijo'.