1 KORINTUS 4:6 - KITAB NU TUMPU ALLA LELE MA'IMAI'

⁶ To Utu-utus! Bau kapentingan miu pinokonangkumo iwi-iwi' aijo' hi Apolos ka' i posi butongku. Kahanda'nyo da sonto' lengkat hi kami aijo' komiu timbali monggulu'i apaa na alati'nyo nu anu tinaloakonmo, “Otoongi na atulan anu daagi'.” Desumo aitu yo madi' ko samian pe'e atina' hi komiu na mombuulakon toto samian, lantas mompopo'ambang sangga'at.

1 KORINTUS 4:6 ပူးပေါင်းရင်းမြစ်များ

MAZMUR 146:3

Boli montaha'imani anu ko kakuasa'an, hi mian anu madi' moko ala momposalamat.

MAZMUR 8:4

De ku sinda mokiita' na langit anu pinotimbalimo nu Belento bitu'on ka' to manda-mandala' anu pinokonamo aita' mae nu Belento,

YESAYA 2:22

Jadi boli montaha'imani mian anu madi' tumuu' batu kalana ia madi' ko angga'nyo.

SISIKON NU TO RASUL-RASUL 18:24

Hau-haunyo aijo', tinokamo nokiijo' i Efesus samian na Yahudi kinahampeannyo i Aleksanderia, sanggonyo i Apolos. Ia pande na motatae ka' mangalati' hondo mongkona isi nu Kitab nu Tumpu,

SISIKON NU TO RASUL-RASUL 19:1

Hau-haunyo i Apolos kiijo' i Korintus, i Paulus nambamo nolajangi to kampung-kampung anu ise' i tano' aijo' anu majo'on i Korintus, lantas tinoka i Efesus. Kiijo' mae ia nompahakabotmo tiba to pia-piangkuka na mian anu pinalesayamo hi Yesus.

ROMA 12:3

Tumpu nombee'imo balakat hi belengku. Mokonyo aijo' aku mompokinde'i to Utu-utus iwi-iwi': Boli mongoa'i butong lebe matangkas molingkuduimo anu sahondo-hondonyo. Ola ahi' butong miu na otutugi ka' boli kobubuun; toto samian montoa butongnyo iya na anu opoko ala obau anu binee'mo nu Tumpu hi ia, kalana ia pinalesayamo hi Yesus.

1 KORINTUS 1:12

Anu nukona nu potataengku aijo'mo saba' itina' hi komiu daagi' ko anu notatae, “Aku mombatuki i Paulus,” daagi' mule' ko anu notatae, “Aku mombatuki i Apolos,” sangga'at notatae, “Aku mombatuki i Petrus,” ka' sangga'at mule' notatae, “Aku mombatuki i Kristus.”

1 KORINTUS 1:19

Kalana i uno nu Kitab nu Tumpu, Tumpu notataemo, “Kapandean nu mian pande Ku potambuntala'mo ka' anu nusumbu' nu to mia-mian anu ko ilimu' Ku ideimo.”

1 KORINTUS 1:31

Jadi, sumo anu tinulismo i uno nu Kitab nu Tumpu, “Mian anu mongka'oho' mombubuulakon, ola ahi' mombuulakon apaa na anu binaumo nu Tumpu.”

1 KORINTUS 13:4

Mian anu mongkalibosi to mia-mian sangga'at, sabaan ka' ma'ima' na kinyonyoa. Ia madi' pangka'ideki mian, madi' malambubut, madi' kobubuun.

1 KORINTUS 3:19

Kalana anu osangka pande nu dunia, aijo' ponga' de Tumpu Allah na montoa. I uno nu Kitab nu Tumpu tinulismo, “Tumpu Allah mohakop to mia-mian pande i kapandean nu aha.”

1 KORINTUS 3:21

Kalana aijo', boli ko samian pe'e lewa' mompuji-puji' mian, kalana iwi-iwi' binee'mo, beleyumo na tumpunyo:

1 KORINTUS 5:2

Mau mule' sumo aijo', kita Utus daagi' kobubuun. Ola ahi' kita Utus sabenannyo susa', ka' monsabatakon anu itina' hi komiu Utus mian anu nombaumo han aijo'.

1 KORINTUS 5:6

Madi' pantas na komiu saja' kobubuun. Ugaat komiu nonsumbu'mo ande-andeon aiya, “Ragi mau ola sangkiding de ogalo'akon i labu, labu aijo' mo'insu'!”

1 KORINTUS 8:1

Uuka aiya mongkona anu okaan anu obee' salaku osombahkon hi pilogot. Memang totu'u sumo anu tinaloakonmo nu mian, “Kita iwi-iwi' pinandemo.” Panyo kapandean monsaduakon mian da kobubuun, panyo kalibosan mombau da mian timbali ma'ima'.

1 KORINTUS 9:23

Iwi-iwi' aijo' kubau kalana Lele Ma'ima' lengkat mae hi Tumpu aijo', da aku suele nu balakati.

2 KORINTUS 10:12

Memang ahi' kami madi' baani na momposukatakon kabai montampatakon butong mami pokakana tiba to mia-mian anu mongoa'i butongnyo pande hondo. Ponga' hondo na aha! Aha mosi bau sukatan ka' mosi angga'i butongnyo nu sukatan aijo'.

2 KORINTUS 10:15

Kami madi' mompuji' posi butong mami i pokalajan nu mian sangga'at anu daagi' i sambiha'nyo nu batas anu tiniju'mo nu Tumpu Allah hi kami. Ola ahi' kami tataap i batas-batas anu tiniju'mo nu Tumpu hi kami ka' montaha'imani da komiu mompaka palesaya hi Kristus, da kami timbali mombau kalaja anu lebe daka' hi komiu.

2 KORINTUS 10:7

Sinsu-sinsumbu'mo ahi' na komiu i han anu sahondo-hondonyo. De toto samian palesayamo tukoonyo, ia anumo i Kristus, yo tutugimo ahi' na posi butong, ka' sinsumbu'mo ahi' saba' kami singkona anumo i Kristus pokakana sumo ia.

2 KORINTUS 11:4

Kalana lupanyo komiu ola sanang na montalima mian anu toka hi komiu ka' mompogulu' mongkona Yesus sangga'at – misa' i Yesus anu pipinoto'i mami hi komiu. Ka' komiu mongka'oho' mule' montalima roh ka' “lele ma'ima'” anu mompahasala' hondo tiba Roh nu Tumpu ka' Lele Ma'ima' anu toho'mo tinalima miu hi kami.

2 KORINTUS 12:19

Kugantang komiu monsangka kami sumo uukamo na kopinnyo na binala usaha mompototu'u butong i ahop miu? Komiu madi' monsumbu' hondo! Tumpu monsumbu' saba' iwi-iwi' na anu tinaloakonmo mami aijo' mombatuki pongka'oho' i Kristus. Ka' iwi-iwi' na anu binaumo mami aijo', mombee'i pikilan da kapalesaya'an miu ko pintu-pintuangnyo.

2 KORINTUS 12:20

Aku bata-bata de aku mamba molenga saidi' mae, ku tokai na komiu madi' sumo anu tinahaimanankumo. Boli-boli saidi' mae daagi' ko anu mahantuda', anu sumpu, anu buhingison, anu mompentingkan kapalaluan nu posi butong, anu ola lewa' mompobau-bau, anu ola monsale'i da mombau gau' ma'idek, anu ola kobubuun, ka' anu ola momposubali pikilan.

2 KORINTUS 12:6

Bisuannyo aku ka'oho' suele mombuulakon apa-apaa, aku madi' mongka'oho' bau kalubatannyo nu anu madi' totu'u; anu totu'u na ku taloakon. Panyo aku momohokot, da madi' ko mian anu monsangka aku molingkudui apaa na anu tinoanyomo binaungku kabai anu i hongonyomo tinaloakonku.

2 KORINTUS 4:15

Iwi-iwi' aijo' bau kapentingan. Kalana lebe manjoo' na mian mongoa'i kalibosan nu Tumpu, mompaka lebe manjoo' mule' suele na do'a pontalima kase anu opotoka hi Tumpu; jadi desumo aijo' Tumpu opopodaka'mo.

KOLOSE 2:18

Boli komiu mompojohok butong opolugi' nu mian anu mimpula-pula mati aluk, ka' anu monsombah to mala-malaikat. Mian aijo' mongkabubuulakon pikilannyo anu mombatuki dunia, ka' mompopodaka' anu saja' nutoa,

1 TESALONIKA 1:5

Kalana kami mompotokakon Lele Ma'ima' hi belemiu misa' ola potatae, panyo mule' tiba kuasa ka' tiba Roh nu Tumpu, ka' kami palesaya hondo na kahondoan lengkat i Lele Ma'ima'. Osumbu' miu mosia na kami tinumuu' nombaumo kapentingan miu tempo'nyo kami jinojoong itina' hi komiu.

2 TIMOTIUS 2:10

Mokonyo aijo', aku sabaan na montanggung iwi-iwi' aijo' kalana kapentingan nu to mia-mian anu pinile'anmo nu Tumpu, da suele aha mohumpak kasalamatan anu obee' kalana palesayamo hi Kristus Yesus tiba mule' talasanggomo sampe toka sidu-sidutu'.