1 KORINTUS 3:6 - KITAB NU TUMPU ALLA LELE MA'IMAI'

⁶ Aku na monsu'an, lantas i Apolos na nondudu'i, panyo posi Tumpu na mompotimbali pomulaonnyo tumuu'.

1 KORINTUS 3:6 ပူးပေါင်းရင်းမြစ်များ

MAZMUR 127:1

Nyanyian i Salomo. De misa' Tumpu na mompotinjo laigan, palasuma na to tuka-tukangnyo anu mokalajamo. De misa' Tumpu na monjagai kota' palasumo na to mia-mian anu monjagai lewa' balajaga-jaga.

MAZMUR 62:11

Boli montaha'imani anu ola o humpak kalana opakisa hi mian, ka' boli montakabunakon balang anu opahuhuakon. Ka' mule' de kakaya'an nu belemiu mompaka pintuangmo, boli kinyonyoa nu belemiu me saja' kiijo' i halata'.

MAZMUR 62:9

O, bansaku, sabole-boleh Tumpu na bau kataha'imanan sansina-sinaa; bee'mo iwi-iwi' naisi nu kinyonyoa nu belemiu hi Ia, kalana olamo hi Ia na tampat pihohungan.

AMSAL 11:25

Mian anu mombee'i manjoo' panyo saidi mae ola ahi' da molabi-labi nu humpak, mian anu mongka'ima'i montulungi saidi mae suele otulungi.

YESAYA 61:11

Mimbalu-balu' bine' anu sinaumo tumuu'mo timbali pomulaon, sumo atina'mo na Tumpu mompotokamae kasalamatan ka' iwi-iwi' na bansa mompuji'mo Ia.”

SISIKON NU TO RASUL-RASUL 11:18

Lapas nohongo aijo', aha madi'mo daagi' nonggagakon. Lantas aha nompuji'mo Tumpu. Aha notatae, “Desumo atina', to mia-mian misa' Yahudi suele obee'i tempo' nu Tumpu da balatobat bolimo mombau to dosa-dosa'nyo ka' mongoa'i kantumuu'an ma'ima'!”

SISIKON NU TO RASUL-RASUL 14:27

Salatan tinokamo i Antiokhia, aha momposihukmo to mia-mian lengkat i jama'at aijo', lantas nonsisikakonmo iwi-iwi' anu binaumo nu Tumpu anu pinotokakonmo nu aha. Aha suele nonsisikakonmo mosia na Tumpu nombaumo jalan da to mia-mian misa' Yahudi palesayamo hi Yesus.

SISIKON NU TO RASUL-RASUL 16:14

Samian anu lengkat aijo' hi aha, aijo'mo na anu lewa' mompobaluk hude mingkamumu', sanggonyo i Lidia nolengkat mae i Tiatira. Ia mongkalibosi Tumpu, sahingga Tumpu nohenggoakon kinyonyoanyo da ia montalima apaa na anu no ajanakon i Paulus hi ia.

SISIKON NU TO RASUL-RASUL 18:24

Hau-haunyo aijo', tinokamo nokiijo' i Efesus samian na Yahudi kinahampeannyo i Aleksanderia, sanggonyo i Apolos. Ia pande na motatae ka' mangalati' hondo mongkona isi nu Kitab nu Tumpu,

SISIKON NU TO RASUL-RASUL 19:1

Hau-haunyo i Apolos kiijo' i Korintus, i Paulus nambamo nolajangi to kampung-kampung anu ise' i tano' aijo' anu majo'on i Korintus, lantas tinoka i Efesus. Kiijo' mae ia nompahakabotmo tiba to pia-piangkuka na mian anu pinalesayamo hi Yesus.

SISIKON NU TO RASUL-RASUL 21:19

Noko tabea'i aha, i Paulus nonsisikakonmo hi aha iwi-iwi' na apaa anu binaunyomo nolengkat mae hi Tumpu toka hi to mia-mian anu misa' Yahudi.

ROMA 15:18

Aku baani basisik sumo aijo' ola mongkona apaa na anu binaumo i Kristus hi belengku da mompotimbali to mia-mian anu misa' Yahudi mohongo-hongo Tumpu. Aku nompojalan aijo' tiba potatae, kabai mule' tiba hahan anu binaungkumo,

1 KORINTUS 1:12

Anu nukona nu potataengku aijo'mo saba' itina' hi komiu daagi' ko anu notatae, “Aku mombatuki i Paulus,” daagi' mule' ko anu notatae, “Aku mombatuki i Apolos,” sangga'at notatae, “Aku mombatuki i Petrus,” ka' sangga'at mule' notatae, “Aku mombatuki i Kristus.”

1 KORINTUS 1:30

Posi Tumpu na nompotimbali sahingga kita Utus nosa'angu' tiba i Kristus Yesus. Ola kalana i Kristus, sahingga kita pinotimbali pande. Ka' mule' ola kalana Ia, Tumpu nompotimbalimo kita po'ule' nompaha ima' tiba butong-Nyo, nompotimbali kita samata-mata mian-Nyo anu palesayamo, ka' nompobebas kita.

1 KORINTUS 3:22

I Paulus, i Apolos, i Petrus, dunia aiya, kantumuu'an tiba kasilakan, tempo' uuka, kabai tempo' anu tokaje mae, iwi-iwi' beleyumo na tumpunyo.

1 KORINTUS 3:7

Jadi anu penting, aijo'mo Tumpu, kalana Ia na mompotumuu'. Anu monsu'an tiba anu mondudu'i madi' penting;

1 KORINTUS 9:1

Te misa' aku mian anu bebas? Te misa' aku rasul? Te aku ma'isa toho' nontoa i Yesus, Tumpunto? Te komiu misa' hasin nu kalajangku da palesaya hi Tumpu?

EFESUS 3:17

Ku'amalakon kalana komiu pinalesayamo hi Kristus, i Kristus jojoongmo i uno nu kinyonyoa miu, ka' kantumuu'an miu mompintoongimo ka' nu kuasaimo nu kalibosan.

1 TESALONIKA 1:5

Kalana kami mompotokakon Lele Ma'ima' hi belemiu misa' ola potatae, panyo mule' tiba kuasa ka' tiba Roh nu Tumpu, ka' kami palesaya hondo na kahondoan lengkat i Lele Ma'ima'. Osumbu' miu mosia na kami tinumuu' nombaumo kapentingan miu tempo'nyo kami jinojoong itina' hi komiu.