1 KORINTUS 3:5 - KITAB NU TUMPU ALLA LELE MA'IMAI'

⁵ De o'ala i hondonyo, ihe na i Apolos aijo'? Ka' ihe na i Paulus? Kami ola to posa-posaihon nu Tumpu, anu nompotiju'mo hi komiu da palesaya hi Kristus. Kami ola mompojalanakon kalaja anu pinotoong nu Tumpu hi kami toto samian.

1 KORINTUS 3:5 ပူးပေါင်းရင်းမြစ်များ

MATIUS 25:15

Hi toto samian na posaihon aijo' binee'annyo iya na anu opoko ala nu aha toto samian. Hi samian binee'annyo olima' na madala doi mosoni'. Hi sangga'atan binee'annyo ohua' na madala doi mosoni'. Ka' hi samian mule' binee'annyo samadala na doi mosoni'. Lantas ia namba.

LUKAS 1:2

Aha nontulis sosok tiba apaa na anu sinisikakon hi kita nu to mia-mian anu pinosi toanyo na hahan aijo' lengkat pe'e i momonanyo, ka' lapas mae nompolele lelenyo.

YOHANES 3:27

I Yohanes nontaami, “Mian madi' moko ala montumpui apa-apaa, de madi' nubee' nu Tumpu hi ia.

SISIKON NU TO RASUL-RASUL 18:24

Hau-haunyo aijo', tinokamo nokiijo' i Efesus samian na Yahudi kinahampeannyo i Aleksanderia, sanggonyo i Apolos. Ia pande na motatae ka' mangalati' hondo mongkona isi nu Kitab nu Tumpu,

SISIKON NU TO RASUL-RASUL 19:1

Hau-haunyo i Apolos kiijo' i Korintus, i Paulus nambamo nolajangi to kampung-kampung anu ise' i tano' aijo' anu majo'on i Korintus, lantas tinoka i Efesus. Kiijo' mae ia nompahakabotmo tiba to pia-piangkuka na mian anu pinalesayamo hi Yesus.

ROMA 15:16

Ia nompotimbalimo aku posaihon i Kristus Yesus da osai hi to bansa-bansa anu misa' Yahudi. Ka' aku nompojalanmo sumo salaku imam, anu mompolele Lele Ma'ima' lengkat mae hi Tumpu, da to mia-mian anu misa' Yahudi timbalimo salaku anu osombahkon hi Tumpu Allah anu timbali Nutalima. O amalakon da Roh nu Tumpu mompotimbali aha da timbali salaku anu osombahkon samata-mata hi Tumpu.

1 KORINTUS 12:28

Sumo aitumo i uno nu jama'at, Tumpu nontantukanmo tampat hi ngangahan nu mian: Momonanyo to rasul-rasul; ko ohua'nyo to nabi-nabi, ko totolu'nyo to gulu-gulu', lantas aha anu mombau hahan anu okabangangi, lapas aijo' aha binee'anmo balakat da nompa'alin mian, kabai montulungi mian sangga'at, kabai anu mongatun, kabai mule' da basisik tiba ngangahan nu basa' anu okabangangi.

1 KORINTUS 16:12

Mongkona utusto i Apolos, saja'mo kupoto'i na ia, da ia tiba to Utu-utusto sangga'at mamba molenga komiu. Panyo ia ma'isa talalo junjuhi' na mamba uuka aiya. Panyo de ko tempo'mo tantu ia tokaje itina'.

1 KORINTUS 3:10

Tiba kapandean anu binee'mo nu Tumpu, aku salaku anu pande mombau gudang, aku nombaumo mesen bau pompotinjoan gudang aijo', ka' mianje sangga'at na mompotinjo gudang i bawo nu mesen aijo'. Toto samian tionyo montoa ima-ima' mosia na ia mompotinjo i bawo nu mesen aijo'.

1 KORINTUS 3:22

I Paulus, i Apolos, i Petrus, dunia aiya, kantumuu'an tiba kasilakan, tempo' uuka, kabai tempo' anu tokaje mae, iwi-iwi' beleyumo na tumpunyo.

1 KORINTUS 3:7

Jadi anu penting, aijo'mo Tumpu, kalana Ia na mompotumuu'. Anu monsu'an tiba anu mondudu'i madi' penting;

1 KORINTUS 9:17

Bisuannyo aku mompojalan kalaja aijo' ola posi kahanda'ku, tantu aku timbali montaha'imani da mohumpak tambo. Panyo aku mompolele Lele Ma'ima' aijo' ola ahi' kalana pinokaumo nu Tumpu Allah da mompojalan kalaja aijo'.

2 KORINTUS 11:23

To posa-posaihon i Kristus ugaat na aha? De ohongo aku sumo anu i ningkotmo na pikilan, panyo aku memang posaihon anu lebe ma'ima' molingkudui aha iwi-iwi'! Aku mokalaja lebe makeke, aku lebe saja' oposoop i uno nu talungku', aku lebe saja' hondo sinakisa, ka' toto minsan mompai patemo.

2 KORINTUS 3:3

Posi aha timbali montoa saba' komiu Utus pokakanamo sulat anu tinulis i Kristus, anu pinakatunyo ka' pinotokakon mami. Sulat aitu misa' tinulis nu tinta, panyo Roh nu Tumpu anu tumuu'; misa' mule' i batu tulis, panyo i kinyonyoa nu mian.

2 KORINTUS 3:6

Iamo na nompotimbali kami da moko ala timbali posaihon i palajanjian anu bu'ou; palajanjian anu lengkat hi Roh nu Tumpu Allah, misa' anu tuli-tulis i atulan. Kalana anu tuli-tulis aijo' momboa kapatean, panyo Roh nu Tumpu aijo' mombee'i kantumuu'an.

2 KORINTUS 4:1

Kami nombau kalaja aiya kalana kanonongan nu Tumpu. Mokonyo aijo' kami madi' ma'osa.

2 KORINTUS 4:5

Lele anu opotokakon mami aijo' misa' lele mongkona posi butong mami. Lele aijo' te lele mongkona i Yesus Kristus; saba' Iamo aijo' na Tumpu; ka' kami te to posa-posaihon miu kalana Ia.

2 KORINTUS 4:7

Panyo halata' nu rohani anu ma'ima' hondo aijo' oboa i butong mami anu madi' ko olinyo aiya anu tano' na binau. Jadi desumo aijo' nyata'mo taalu' kakuasa'an anu daka' aijo' una-una' hi Tumpu misa' hi kami.

2 KORINTUS 5:18

Iwi-iwi' aijo' binau nu Tumpu. Ninjalan hi Kristus, na Tumpu nompotimbali kita nompo'ule'mo na'ima' tiba Ia, lantas nompalentah kita da to mia-mian sangga'at timbali mompo'ule' ma'ima' suele tiba Tumpu.

2 KORINTUS 6:1

Kalana kami mokalaja hingga-hinggat tiba Tumpu, mokonyo aijo' opoita mami sabole-bole boli komiu monsia-siakon ka'ima'an nu kinyonyoa nu Tumpu aijo'.

2 KORINTUS 6:4

Panyo ola ahi' i uno nu iwi-iwi' na han, kami mompotoa saba' kami te to posa-posaihon nu Tumpu. Kalana sagala lupa na kasansala'an anu ingoa'an sinabaanakonmo mami:

EFESUS 3:7

Tumpu nombee'imo balakat aku – aiyamo kalaja – da mompolele Lele Ma'ima' aijo'. Aku nontalima balakat aijo' nontului kuasa nu Tumpu anu nokalaja i uno nu butongku.

KOLOSE 1:23

Panyo tantu komiu tataap ahi' saja' palesaya, ka' tuminjo hoso-hoson i kapalesaya'an miu. Boli saidi' mae komiu molapasakonmo anu otaha'imani, anu binee'mo hi komiu salatan komiu nontalimamo Lele Ma'ima' lengkat mae hi Tumpu. Lele aijo' pinokalebamo hi toto samian i songko-songko na dunia. Ka' kalana aijo' suele aku, i Paulus, tinimbalimo posaihon.

KOLOSE 1:25

Tumpu nonsaimo aku da timbali posaihon hi jama'at-Nyo bau kapentingan miu. Aku tionyo mompotokakon lele lengkat mae hi Tumpu, iwi-iwi';

1 TIMOTIUS 1:12

Aku mompoita talima kase hi Kristus Yesus Tumpunto. Ia nombee'imo mae kahosonan hi belengku da mombau apaa na anu Nu palentahkon, ka' Ia nonanggapmo aku timbali mombau kalaja aijo',

1 PETRUS 4:10

Belemiu toto samian nohumpakmo taju anu madi' pokakana lengkat mae hi Tumpu. Kalana aijo' salaku mian anu nonggunakonmo ima-ima' apaa na anu binee'mo nu Tumpu, ogunakon ahi' na kahosonan aijo' bau kapalaluan hingga-hinggat.