1 KORINTUS 15:10 - KITAB NU TUMPU ALLA LELE MA'IMAI'

¹⁰ Panyo kalana balakat nu Tumpu aku tinimbalimo susumo tinuu'ku uuka aiya. Ka' madi' pinalasuma na Tumpu nongampunimo aku. Pakalaus aku ahi' na mokalaja lebe makeke molingkudui rasul kanjoo'annyo sangga'at. Panyo sabenannyo aijo' misa' usahangku; aijo' usaha nu Tumpu anu mongkalibosi aku ka' mokalaja hingga-hinggat ka' aku.

1 KORINTUS 15:10 ပူးပေါင်းရင်းမြစ်များ

MATIUS 10:20

Kalana anu motatae tempo'nyo aijo' misa' komiu, panyo Roh nu Tuuma i suluga' na montaloakon hi komiu.

MATIUS 25:16

Posaihon anu nontalima olima' na madala doi mosoni' aijo' lia-lia' namba binadagang, lantas nohumpak ka'untungan olima' na madala doi mosoni' mule'.

ROMA 11:1

Aku mompokilawa: Apaa Tumpu nongalinmo mian-Nyo anu pinalesayamo? Tantu madi'! Aku pe'e mian nu Israel lee' mae i Abraham anu tinonsoop i bansa Benyamin.

ROMA 12:3

Tumpu nombee'imo balakat hi belengku. Mokonyo aijo' aku mompokinde'i to Utu-utus iwi-iwi': Boli mongoa'i butong lebe matangkas molingkuduimo anu sahondo-hondonyo. Ola ahi' butong miu na otutugi ka' boli kobubuun; toto samian montoa butongnyo iya na anu opoko ala obau anu binee'mo nu Tumpu hi ia, kalana ia pinalesayamo hi Yesus.

1 KORINTUS 15:11

Singkop, mau mule' pa' hi he na pohumpakan miu Lele Ma'ima' aijo' – pa' aijo' lengkat hi belengku kabai lengkat mae hi to rasul-rasul sangga'at – aijo' madi' mongkuka. Anu penting aijo'mo kami mompolele Lele Ma'ima' aijo' ka' kita Utus palesayamo.

1 KORINTUS 15:2

De komiu montoongi dodo-dodo apaa na anu pinolelengkumo aijo', yo Lele Ma'ima' aijo' momposalamat komiu; asan ahi' boli ola kita Utus palesaya padahan madi' mangalati'.

1 KORINTUS 3:10

Tiba kapandean anu binee'mo nu Tumpu, aku salaku anu pande mombau gudang, aku nombaumo mesen bau pompotinjoan gudang aijo', ka' mianje sangga'at na mompotinjo gudang i bawo nu mesen aijo'. Toto samian tionyo montoa ima-ima' mosia na ia mompotinjo i bawo nu mesen aijo'.

1 KORINTUS 3:6

Aku na monsu'an, lantas i Apolos na nondudu'i, panyo posi Tumpu na mompotimbali pomulaonnyo tumuu'.

1 KORINTUS 4:7

Ihe na nompotimbali kita Utus molingkudui mian sangga'at? Te misa' iwi-iwi' apaa na anu i humpak nu kita Utus, lengkat hi Tumpu Allah? Jadi, kadaka' kahanda' mombuulakon butong, au'aitu apaa na anu daagi' hi kita Utus, aijo' misa' anu binee'?

2 KORINTUS 12:11

Aku totu'u timbalimo sumo mian ponga' – panyo komiumo na nonsaduakon aku tinimbali sumo aijo'. Sabenannyo komiu ahi' na tionyo mompuji' aku. Kalana mau mule' aku madi' ko kaliangannyo apa-apaa, aku madi' hondo-hondo mahungku' hi to “rasul-rasul” anu madi' ko anu mongkakanai aijo'!

2 KORINTUS 3:5

Kami madi' ko apa-apaa moko ala momponyata' au'aitu kami moko ala mombau kalaja aiya, panyo Tumpu na nombee'i kahosonan aijo' hi kami da moko ala mombau.

2 KORINTUS 6:1

Kalana kami mokalaja hingga-hinggat tiba Tumpu, mokonyo aijo' opoita mami sabole-bole boli komiu monsia-siakon ka'ima'an nu kinyonyoa nu Tumpu aijo'.

GALATIA 2:8

Kalana Tumpu na nombee' i kamampuan hi Petrus da moko ala timbali rasul nu mian Yahudi, suele nombee'imo hi belengku kamampuan da moko ala timbali rasul nu mian misa' Yahudi.

FILIPI 2:13

kalana Tumpu na mokalaja i uno nu butong miu da mompotimbali komiu halala' ka' moko ala momposanang kinyonyoa nu Tumpu.

FILIPI 4:13

Tiba kuasa anu binee'mo i Kristus hi belengku, aku ko kahosonanmo mongahopi iwi-iwi' na ngahan nu soba'an.

1 TESALONIKA 5:12

To Utu-utus, opoita mami da sabole-bole komiu mongangga'i to mia-mian anu mokalaja itina' hi komiu; aijo'mo aha anu pinile'anmo nu Tumpu da molaya' ka' mompokinde'i komiu.

1 TIMOTIUS 4:10

Aijo' na sababnyo kita mompagala ahi' bala usaha mokalaja totu-totu'u, kalana kita montaha'imani ahi' totu-totu'u hi Tumpu Allah anu tumuu'; Iamo na anu Momposalamat iwi-iwi' na mian, ka' anu talalo hondo to mia-mian anu pinalesayamo.