1 KORINTUS 14:3 - KITAB NU TUMPU ALLA LELE MA'IMAI'

³ Panyo mule' mian anu mompotokakon lele lengkat mae hi Tumpu Allah, mompotoka hi mian da bau pompohoson aha, da bau pongkakeha aha, ka' da bau pomposanang kinyonyoa nu aha.

1 KORINTUS 14:3 ပူးပေါင်းရင်းမြစ်များ

LUKAS 3:18

Sumo aiya na i Yohanes nompokinde'i to mia-mian tiba ngangahan nu jalan, tempo'nyo ia nompolele Lele Ma'ima'.

SISIKON NU TO RASUL-RASUL 13:15

Salatan Kitab i Musa ka' Kitab nu to nabi-nabi binasa'akon, to pola-polaya' i laigan pogalejaan aijo' nonsai mian mompokilawa hi Paulus ka' to sanga-sangalunyo, “To utu-utus, de kita utus ko pokinde apa-apaa hi to mia-mian aiya, ku poita da mompotokamo pokinde' aijo'.”

SISIKON NU TO RASUL-RASUL 14:22

I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'.

SISIKON NU TO RASUL-RASUL 15:32

I Yudas ka' i Silas anu suele nabi, pinin na notatae tiba to Utu-utus anu palesayamo kiijo' i Antiokhia kalana mongkakeha'i da baani na aha.

SISIKON NU TO RASUL-RASUL 4:36

Sumo aitumo mule' na i Yusuf. Ia suele nompobaluk tano'nyo, lantas doi oli nu anu pinobaluknyo aijo' binoanyo ka' binee'nyo hi to rasul-rasul. I Yusuf aiya samian na lee' mae nu bansa Lewi lengkat mae i Siprus; to rasul-rasul suele monsanggohi ia i Barnabas (alati'nyo Pontundu).

SISIKON NU TO RASUL-RASUL 9:31

Sahingga jama'at i songko-songko na Yudea, Galilea ka' i Samaria madi'mo binata-bata. Roh nu Tumpu na nontulungi da nabuhuk hi Tumpu, sahingga to jama-jama'at aijo' nompaka majumo ka' nompaka da'isanmo.

ROMA 12:8

Mian anu ko balakat mongkakeha'i mian sangga'at, tionyo totu-totu'u mongkakeha'i mian sangga'at. Mian anu ko balakat mombee'i mian sangga'at apaa na anu daagi' hi ia, tionyo obau na aijo' nu kinyonyoa manonong ka' pantas. Mian anu ko balakat mongatun, tionyo totu-totu'u mongatun. Mian anu ko balakat mompotoa kalibosan hi mian sangga'at, tionyo obau nu kinyonyoa sanang.

ROMA 14:19

Mokonyo aijo' apaa na anu okahanda'i obaunto tionyo ahi' saja' hahan anu mompotimbali posa'angu'an ka' mompaha bango-bangonakon.

ROMA 15:2

Ola ahi' kita toto samian tionyo momposanang sangko utusto da bau ka'ima'annyo, da mompaka pahoson na ia palesaya.

1 KORINTUS 10:23

Koonyo nu mian, “Kita timbali mombau mau mule' apaa na okahanda'into.” Totu'u! Panyo madi' iwi-iwi' na oka'oho'to aijo' mingguna. “Kita timbali mombau mau mule' apaa na oka'oho'to” – panyo madi' iwi-iwi' na oka'oho'to aijo' mombangonakon kantumuu'anto.

1 KORINTUS 14:12

Mongkona ola posi komiu, kusumbu' komiu mongka'oho' hondo mohumpak to bala-balakat anu lengkat mae hi Roh nu Tumpu. Panyo anu penting hondo, tionyo ahi' komiu bala usaha da mompake kasanggupan anu montulungi jama'at da timbali mahoson.

1 KORINTUS 14:17

Mau mule' do'a pontalima kaseum aijo' hi Tumpu talalo ma'ima', panyo do'a aijo' madi' ko gunanyo hondo-hondo hi mian sangga'at.

1 KORINTUS 14:26

Jadi to Utu-utus, apaa na alati'nyo iwi-iwi' aijo'? De komiu silimu' monsombah Tumpu, daagi' ko anu manyanyi, daagi' ko anu mompogulu', daagi' ko anu mompoto'i apa-apaa lengkat mae hi Tumpu Allah, daagi' ko anu basisik nu basa' anu okabangangi, ka' daagi' mule' ko anu montalangkan apaa na anu tinaloakonmo aijo'. Panyo iwi-iwi' aijo' tionyo ahi' obau da bau pompogulu' ka' da bau ka'ima'an nu mian iwi-iwi'.

1 KORINTUS 14:31

Tiba jalan anu sumo aijo', to Utu-utus iwi-iwi', samian ka' samian moko ala mompotoka lele lengkat mae hi Tumpu; da iwi-iwi' timbali mohumpak pokinde' ka' mompaka palesaya.

1 KORINTUS 8:1

Uuka aiya mongkona anu okaan anu obee' salaku osombahkon hi pilogot. Memang totu'u sumo anu tinaloakonmo nu mian, “Kita iwi-iwi' pinandemo.” Panyo kapandean monsaduakon mian da kobubuun, panyo kalibosan mombau da mian timbali ma'ima'.

2 KORINTUS 1:4

Ia mompohoson kinyonyoa mami i uno nu kasusa'an anu o'oa'i mami, da kahosonan anu otalima mami lengkat hi Tumpu aijo', kami suele timbali mompohoson kinyonyoa nu iwi-iwi' mian anu i uno nu kasusa'an.

2 KORINTUS 2:7

Uuka aiya komiu tionyo mongampuni ia ka' po'ule' mongkakeha'i ia da boli talalo molibos na kinyonyoanyo dumo talalomo susa' na ia.

EFESUS 4:29

De komiu basisik, boli montaeyakon potatae anu mahenyu. Anu otaeyakon potatae anu mompokopiani ka' anu montulungi mian sangga'at. Potatae sumo aijo' mompodaagi' ka'ima'an hi to mia-mian anu mohongo.

EFESUS 6:22

Mokonyo aijo' aku nonsaimo ia namba hi belemiu da momposumbu' kantumuu'an mami hi belemiu iwi-iwi', da binan na kinyonyoa miu.

KOLOSE 4:8

Aku nonsaimo ia namba hi komiu, da komiu monsumbu' han mami, sahingga komiu madi'mo molibos.

1 TESALONIKA 2:11

Komiu monsumbu' saba' kami mombau apa-apaa hi komiu sumomo samian na tuuma kona hi to ana-anaknyo.

1 TESALONIKA 2:3

Kami monsale'i komiu misa' pa' sinangkalinga; ka' misa' mule' ko kahanda' anu madi' ma'ima' kabai ola mongakali.

1 TESALONIKA 3:2

hau-haunyo aijo' kami nonsaimo utusto i Timotius. Ia samian na posaihon nu Tumpu anu bakalaja tiba kami, da mompolele Lele Ma'ima' mongkona i Kristus. Kami nonsai i Timotius hi komiu, da ia mompohosonakon komiu ka' mongkakeha' komiu da lebe palesaya mule' hi Kristus.

1 TESALONIKA 4:1

Ahennyo to Utu-utus kami nombee'imo sonto' hi komiu, mosia na komiu tionyo tumuu' da momposanang kinyonyoa nu Tumpu. Memang komiu tinumuu'mo sumo aijo'. Panyo uuka aiya kalana kuasa nu Tumpu Yesus opoita mami totu-totu'u hi komiu da mompaka bala usaha mule' i han anu sumo aijo'!

1 TESALONIKA 4:18

Kalana aijo' tionyo ahi' komiu mompaha poho-pohoson kinyonyoa ka' mompake potatae haha aijo' sumo uuka.

2 TESALONIKA 3:12

Kalana kuasa nu Tumpu Yesus Kristus, sahingga kami mompalentahmo mian haha aijo' da mombee'i pokinde' da aha mokalaja ma'i-ma'ima' ka' molio anu bau pontumuu' nu aha.

1 TIMOTIUS 1:4

Taloakon hi aha da bolimo daagi' mompajuli to sisi-sisik anu baleko', ka' to sisi-sisik anu pinolengkatannyo madi' ko kamingkotannyo. Iwi-iwi' aijo' ola saja' molubatakon painggagan, ka' madi' mompopodaka' makisut nu Tumpu anu ola timbali osumbu' de palesayamo hi Ia.

1 TIMOTIUS 4:13

Hau-haunyo aijo', sampeje de aku po'ule'mo toka, beleyum tionyo ahi' totu-totu'u saja' mombasa'akon Kitab nu Tumpu hi to mia-mian, ka' mongkakeha'akon tiba mule' mongajan aha.

1 TIMOTIUS 6:2

To posa-posaihon anu tuannyo mian Kristen, madi' timbali monte tuannyo kalana aha bubu' mian Kristen. Ola ahi' aha tionyo mohongo-hongo palentah nu tuan nu aha aijo' tiba lebe mule' ma'ima', kalana tuan anu ohongo-hongo ma'ima' na palentahnyo aijo' bubu' mian palesaya anu okalibosi. Iwi-iwi' aiya tionyo ahi' beleyum mongajanakon ka' opokinde'akon.

2 TIMOTIUS 4:2

Tionyo ahi' beleyum saja' mompolele lele lengkat mae hi Tumpu Allah aijo', ka' sabole-bole opoita da mian mohongo pa' aha mongka'oho', kabai madi'. Tionyo ahi' beleyum bala usaha da mian palesaya totu-totu'u, mompoto'i kasala'an ka' mongkakeha'i aha. Pagala osabalakon na mongajan mian.

TITUS 1:9

Ia tionyo montoongi hoso-hoson pangajalan anu timbali opalesaya, sumo anu ingajanakonmo hi ia. Tiba jalan anu sumo aijo' ia moko ala mompokinde'i mian kalana montoongi pangajalan anu totu'u, ka' momponyata' kasala'an nu to mia-mian anu mompisala'i ia.

TITUS 2:15

Ajanakon na iwi-iwi' aijo', ka' opokinde'i, ka' otewa' na anu ma'idek hi batu-batu mian anu mohongo beleyum ka' da nupajuli nu aha. Boli mompojohok samian pe'e montoa beleyum madi' ko angga'nyo.

TITUS 2:6

Sumo aitu mule', pokinde'i na to oli-olitau da aha timbali sinsumbu'.

TITUS 2:9

To posa-posaihon tionyo ahi' tulu-tulutan hi tuannyo, ka' momposanang kinyonyoanyo i iwi-iwi' na han. Aha madi' timbali monggagakon,

IBRANI 10:25

Kita tionyo ahi' saja' sihuk hingga-hinggat, ka' boli moluluk susumo mian sangga'at. Ka' kita tionyo ahi' saja' mompaha poho-pohoson kinyonyoa, kalana osumbu'to madi'mo daagi' pin na Tumpu tokamo.

IBRANI 13:22

Ku poita da komiu sabaan na mongintomakon pokinde' haha aijo' iwi-iwi' aiya, kalana sulatku aiya madi' talalo mantan.

IBRANI 3:13

Jadi, da madi' ko samian pe'e anu itina' hi komiu na nu akali nu dosa' sahingga panggagamo hi Tumpu, tionyo ahi' komiu mompaha poki-pokinde'i sansina-sinaa de kita daagi' tumuu' i uno nu tempo' anu sinanggo-Nyo “Sinaa Aiya” i uno nu Kitab nu Tumpu.

1 PETRUS 5:12

Sulatku anu ola kodo-kodo' aiya tinulisku toka hi belemiu tinulungan i Silas, anu ku anggap samian na utus Kristen, anu mohongo-hongo. Aku kahanda' mongkakeha' belemiu, ka' mompohoson kinyonyoa nu belemiu, kalana apaa na anu tinuliskumo aiya lele anu totu'u aijo'mo balakat nu Tumpu. Opai-pai lio da komiu mintoong ahi' hoso-hoson i balakat aijo'.

YUDAS 1:20

Panyo komiu, to Utu-utusku, saja' ahi' opokopiani na kantumuu'an miu mintoong i kapalesaya'an miu hi Yesus Kristus. Iman nu belemiu atina' talalo hondo susi'. Ka' suele balado'a ahi' i uno nu kuasa nu Roh nu Tumpu,