YOSUA 17:4 - KITABI HABARI MOPIOHE

⁴ Timongolio lonao̒ odeli Iimamu Eleajar, odelei Yosua walae̒e Nun wau ode mongo tau̒wa, wau loloi̒ya, “Eeya malo tahuda mai odelei Musa deu̒ amiaatia olo musi pee̒-pee̒enta moo̒tapu mao̒ huta debo odelo mongo wutato lamiaatia mongo lolai̒.” Sababu uito, lotuuu̒de wolo palenta lo Eeya, mongo walao̒ tabua lei Jelapehad boito wohiyalo huta pee̒-pee̒enta wolo mongo wutati mongolio talolai̒.

YOSUA 17:4 ပူးပေါင်းရင်းမြစ်များ

YIA̒APO 27:1

Tei Jelapehad owalao̒ mongobua limolota, deu̒yto-yito ti Mahla, Noa, Hogla, Milka, wau Tirja. Tiyamo lei Jelapehad yito tei Heper, tiyamo lei Heper yito tei Gilead. Tiyamo lei Gilead yito tei Makhir, tiyamo lei Makhir yito tei Manasye, wau tiyamo lei Manasye yito tei Yusu.

YIA̒APO 27:4

Bo yilongola tanggulio musi mooli monto bangusa lo Isirai̒lu bo kalana tio diila o wali mai walao̒ talolai̒? Wohia mai amiaatia huta pusaka pee̒-pee̒enta wolo mongo ilaato liyamo lami.”

YIA̒APO 36:10

Oditolio tutuuu̒de wolo palenta mai lo Eeya odelei Musa, olimo lowalao̒ taabua lei Jelapehad boito, deu̒yito-yito ti Mahla, Tirja, Hogla, Milka woli Noa monika wolo tau-tauwalo tadonggo wutato monto ambahu liyamolio.

GALATIA 3:28

Todelomo sua̒li botie diilalo pilopo woluo polohiheede towolota taulo Yahudi wau taa diila Yahudi, towolota lowato wau taa lolopato, towolota talolai̒ wau taabua. Wutato ngoa̒amilalo tuwau sababu ti Isa Almasi.

YOSUA 14:1

Wumbutio mola botie yito wungguli tomimbihu woloolo mola lipu lo Kanaa̒n to ambahu otolopo lo Dutulaa Yordan hetila-tilayadio towolota umati lo Isirai̒lu. Tahe lolaya-layadeo̒ huta boito ode umati lo Isirai̒lu yito ti Iimamu Eleajar, tei Yosua walae̒e Nun, wau mongo tau̒wa lou̒ ngaalaa̒ todelomo susuu-kuwaalo bangusa lo Isirai̒lu.

YOSUA 17:5

Oditolio, diila bo wali mai mongo lolai̒ lei Manasye tamoo̒tapu tayadu huta, bo olo wolo waliilio mongobua. Uito sababuulio yilongola bo suku Manasye tailohia mopuulo tayadu, ngopohia huta Gilead wau Basan to ambahu tiimuru lo Dutulaa Yordan. Huta Gilead wohi mao̒ ode wali mai lei Manasye wewolio.

YOSUA 21:1

Todulahee tuwau mongo tau̒wa lou̒ ngaalaa̒ losuku Lewi lonao̒ mota ode Silo tolipu lo Kanaa̒n, wau lodudulao̒ odeli Iimamu Eleajar, wolei Yosua walae̒e Nun, wau mongo tau̒wa ngaalaa̒ lo ngoilanggubu susuu-kuwaalo bangusa lo Isirai̒lu. Timongolio loloi̒ya mao̒, “Lotimbuludei olei Musa, Eeya malo poa̒hu alihu to olamiaatia, wau tau-tauwalo Lewi, wohiyalo kokoo-tawaalo u mowali potibiluloa̒ lamiaatia wau huhuu-tawaalo huta datahu wau luasi topalito kokoo-tawaalo boito ode bibiahu lamiaatia.”