YAHYA 5:39 - KITABI HABARI MOPIOHE

³⁹ Timongoli mopoo̒olato kitabi sababu helantobu limongoli deu̒ wolo dudelo boito timongoli otutumulo ututuulio tutu wau ohiheo-hiheolo mao̒.

YAHYA 5:39 ပူးပေါင်းရင်းမြစ်များ

JABURU 1:2

bo taa ohilaa moponao̒ Palenta lo Eeya wau motoloe̒ela mola hui wau dulahu.

JABURU 119:11

Pongaajali lo Eeya tilahu lowatia todelomo hilaa lowatia, alihu watia diila odusa to Eeya.

JABURU 133:3

Meaalo debo odelo wambulo to Hui̒dee Hermon, u tilumolohe mola ode huhuu-luduwaalo Sion. Mola teto Eeya lopo tuhutai balakati lo Eeya, tutumulo u ohiheo-hiheolo mao̒.

JABURU 16:11

Pobilohe mai lo Eeya olo watotia dalalo dulu-dulunga ode tutumulo; to Eeya watotia heloo̒tapu wengahu daato-daatalo mao̒ wau osanangi tutu u ohiheo-hiheolo mao̒.

JABURU 21:4

Eeya lonao̒ mai ode olio wolo balakati udiila o eenggade, wau lophuli makuta hulawa to lunggongio.

JABURU 36:9

Timongolio olulia lohilao wolo ua̒alo laba-labaalo daata to Bele lo Eeya, wolo minumani monto dutulaa lo Eeya umopowali nyaamani.

POHUMAYA 6:23

Totoonulalo potuhata lomongo dulaa̒amu debo odelo tohe u mobaango; diidini limongolio mopoi̒laalo olemu dudelo lo tutumulo u mopiohu.

YESAYA 34:16

Lolohelo wau pobacailo todelomo kitabi lo Eeya: Diaaluo penu boli tuwau mao̒ monto ngoa̒amila mahaluku boito mamooli meaambo diila opangelio. Sababu odieelo mola palenta lo Eeya, wau Eeya lohihilao tamalo himoa̒a mahaluku boito.

YESAYA 8:20

Tameta mao̒ odie, “Dungohilo pongaajali lo Eeya! Taa udiila mobisala motuhatawa wolo pongaajali boito, diila o halaapani.”

YEREMIA 8:9

Tahitootawa tohuungi mongoli mapoo̒o-litolio. Timongolio mao̒olia lo aakali wau ohentobe. Timongolio diila mohuto mololimo nasehati-U̒; botia otinepo wolo u donggo woluo toli mongolio?

DANIALI 12:2

Dadaata to wolota limongolio taa maa yilate maa muli mobongu mai; ngotayade mamoo̒lasa tutumulo u kakaali, wau ngotayade poli maa moo̒rasa ohiihina wau oliliheela hapato u kakaali olo.

MATIUSI 22:29

Ti Isa lolametao̒, “Timongoli matilala daa̒, sababu timongoli diila mongalati lo Kitabi, meaanto kawasa lo Allahu Taa̒ala.

MARKUSI 10:3

Ti Isa lolametao̒, “Tei Musa lomalentai wolo olimongoli?”

MARKUSI 12:10

Timongoli tantuulio malo pobaca ayati odie todelomo Kitabi, ‘Botu udiila ilopomakea lo papaa-niyaalo hudungu malowali botu ulaba-labaalo mopiohu.

LUKASI 16:29

Tei Abraham lolameto, ‘Timongolio mao̒ kikii-tabiyaalo lei Musa wau kitabi lomongo nabi! Huliilo mao̒ timongolio moduduo̒ wolo u tulatulade todelomo kikii-tabiyaalo boito!’

LUKASI 16:31

Bo tei Abraham loloi̒ya, ‘Wonu timongolio diila momandungi palenta lei Musa wau mongo nabi, matantulo mao̒ timongolio diila tapalacaya olo, openu boli woluo taamate tamuli tumumulai.’ ”

LUKASI 24:25

Lapatao̒ ti Isa lotahuda mao̒ olimongolio, “Timongoli memangi mohulodu! Mailaba pomboyongi mongoli u momalacaya ngoa̒amila u mailoi̒ya lomongo nabi!

LUKASI 24:27

Lapatao̒ ti Isa lotombangao̒ olimongolio wolo u tulatuladu todelomo ngoilanggubu Kitabi tomimbihu batanga-Lio tumulalo mai monto bubuu-kuwaalo lei Musa wau bubuu-kuwaalo lomongo nabi.

LUKASI 24:44

Lapatao̒ uito Tio lotahuda mao̒ olimongolio, “Utieelo susuu-aliyaalo umaa piloo̒taa-U̒ mai olimongoli tou̒ Wau̒ donggo pee̒-pee̒enta woli mongoli; deu̒ timii̒du sua̒li u tulatuladu tomimbihu tanggulu-U̒ todelomo Bubuu-kuwaalo lei Musa, lomongo Nabi, wau Jaburu, musi motoduo mai.”

YAHYA 1:45

Tei Pilipus lodunggaya wolei Natanael wau loloi̒ya mao̒ olio, “Ami maloo̒ dungga tahe untee lei Musa todelomo Buku Butoo̒ lo Allahu Taa̒ala, wau tapilo habari mai lomongo nabi. Tio boito ti Isa talonto Najaret, Walae̒e Yusu.”

YAHYA 5:32

Bo woluo taawewo tamongohi sakusi tomimbihu ola-U̒, wau otaawa-U̒ deu̒ u silakusialio boito otutu.

YAHYA 5:36

Bo u silakusiya-U̒ lebe udaa̒ mao̒ lou̒ silakusia lei Yahya. Wolo u masaatia pilohutu-U̒ botie, deu̒ito-yito kalaja u pilotuugasi mai li Paapa ola-U̒, u mopobukuti deu̒ ti Paapa malolao mai ola-U̒.

YAHYA 5:40

Bo timongoli diila motohilaa monao̒ mai ode ola-U̒ u moo̒tapu tutumulo ohiheo-hiheolo mao̒.

YAHYA 5:46

Humayaalio timongoli palacaya olei Musa, timongoli mapalacaya to ola-U̒, sababu pasali-U̒lo tunggula tio loluladei.

YAHYA 7:52

“Wolo yio̒ olo lonto Galilea?” tametao̒ limongolio, “Palakisai mao̒ Kitabi! Yio̒ mamoo̒onto deu̒ diaaluo nabi taa̒saliilio mai lonto Galilea!” [

WUNGGULI LOMONGO RASULU 13:27

Sababu tahi biluloa̒wa to Yerusalemu wau mongo tau̒wa limongolio diila mongalati deu̒ Tiolo tamoo-poa̒ahua boito. Timongolio diila mongalati pongaajali lomongo nabi u hepo bacaalio timii̒du Saabati, tilinggula timongolio malo hukuumani li Isa. Bo tumbao̒ wolo helohutu u odito boito timongolio maloo̒ sababu deu̒ wolo upilo nubuwati lomongo nabi boito lotoduo mai.

WUNGGULI LOMONGO RASULU 17:11

Tau-tauwalo to Berea lebe lohuo̒ hilaa limongolio wolo tau-tauwalo to Tesalonika. Wolo sanangi lohilao timongolio helo dungohe habari pasali li Isa, wau timii̒du dulahu timongolio hemotulete Kitabi alihu motota mao̒ wolo u hepo ngaajali lei Paulus boito otutu.

WUNGGULI LOMONGO RASULU 26:27

Taa Lailaio̒ Baginda Agripa, tingga ti Baginda palacaya uiloi̒ya mai lomongo nabi? To pongolaasa lowatia ti Baginda palacaya!”

ROMA 1:2

Habari mopiohe boito mapilo danti lo Allahu Taa̒ala tojamani muloololio mai lotimbulude tomongo nabi-Lio wau malei tuladu todelomo Kitabi.

ROMA 3:2

Tantulo mao̒ dadaata hunalio! Bohu-bohulio, sababu totaulo Yahudilo Allahu Taa̒ala lopo palacaya mao̒ tataa-hudaalo Allahu Taa̒ala.

TINGULI 18:15

Bolii̒o mao̒ monto bangusanto lohihilao Tio mamolao mai ode limongoli ngotaalio lo nabi debo odelo watia botie, wau timongoli musi modungoheo̒ olio.

TINGULI 18:18

Monto bangusa limongolio lohihilao Wau̒ mamolao mai ode limongolio ngotaalio lo nabi debo odelo yio̒. Wau̒ mamo tahuda mai olio wolo umusi loi̒yaalio, lapatao̒ tio mamopo tunggulao̒ ode bangusa boito totoonulalo upilo malentaa-U̒.

TINGULI 29:29

Woluo dengolo sua̒li u hiluli lo Eeya Allahu Taa̒alanto; bo buto-I̒o mapilo ilaalo-Lio mai to olanto, wau ito wau walinto mola musi modungoheo̒ u ohiheo-hiheolo mao̒.”

TINGULI 32:47

Pongaajali boito diila bo loi̒ya toongi, bo ode tutumuli mongoli. Dungohi mao̒ ngoa̒amila palenta boito, alihu humayao̒ umulu limongoli tolipu udiilalo mohiheo potibiluloa̒ limongoli to ngotuali lo Dutulaa Yordan.”

KOLOSE 3:16

Mamusi totoonulalo pongaajali li Almasi u polupolu lobalakati meitahu ode delomo hilaa limongoli. Mamusi timongoli moa̒aa̒jalia wau tinggai mongohi nasehati wolo molinepo daa̒. Popolahua mola Jaburu wau puji poloi̒laalo momuji wau lalaahuwala lorohu; Popolahua mola ode Allahu Taa̒ala wolo pongo laasa sukuru to delomo hilaa limongoli.

IBRANI 11:16

Bo malo ilaalo, timongolio mooloolo lipu tuwau ulebe mopioheo̒, deu̒ito-yito lipu u tosologa. Uitolo sababuulio Allahu Taa̒ala diila moolito wonu timongolio mongunte o-Lio Allahu Taa̒ala limongolio, sababu Allahu Taa̒ala malo podapato kota tuwau olimongolio.

IBRANI 11:35

Sababu o iimani, yi mongobua luli loo̒tapu mao̒ tau-taulio tamailate. Woluo olo ta iloheela lohilao silikisaa tunggula yilate, wau diila mololimo u lopatolo, sababu ohilaa muli potumulolo duo̒lo tutumulo tuwau ulebe mopioheo̒.

YOSUA 1:8

Buku lo butoo̒ botie musi laito pobacaamu mao̒ to umati-U̒. Poo̒olaata mao̒ buku boito hui wau dulahu, alihu laito yio̒ moponao̒ ngoa̒amila utula-tuladee todelomio. Wonu yio̒ moponao̒ mao̒ ngoa̒amilalo boito, tutumulumu maa maa̒amulu wau otilapulo.

WAHI 19:10

Watia leidambao̒lo mola totalu lo malai̒kati boito wau ohilaa molubo olio, bo tio loloi̒ya mai olaatia, “Diila! Diila polubo olau̒, tubowalo Allahu Taa̒ala sababu wau̒ olo wato tutuuwauwa debo odelo yio̒ wau debo odelo ngoa̒amila wutatumu tadihu-dihu tio̒otutua to ososakusi li Isa!” Sababu ososakusi li Isa boitolo u loi̒lihami mai totau-tauwalo tahipo nubuwatia.