YAHYA 16:10 - KITABI HABARI MOPIOHE

¹⁰ deu̒ Wau̒ otutu, sababu Wau̒ mohualinga mola odeli Paapa wau timongoli diilalo moo̒onto ola-U̒;

YAHYA 16:10 ပူးပေါင်းရင်းမြစ်များ

YESAYA 42:21

Eeya motuhatawa mopoa̒ahu; Eeya motohilaa buto-I̒o hulumatiyolo wau pou̒daa̒alo.

DANIALI 9:24

Poo̒opitu piu̒wa pitu lopulu lotaunu mola yito maasa u tilantu lo Allahu Taa̒ala u molopato bangusaamu wau kotamu umantali boito monto dusa wau ololeeto. Totoonulalo dusa maa ambunguolo wau oa̒adili u ohiheo-hiheolo mao̒ mapotihulolo, tilinggula bibilohe wau laamalani boito mamowali moi̒laalo, wau Bele lo Eeya umantali boito mamuli motaa̒luku wau mohulumati to Eeya.

YAHYA 16:28

Memangi asalii-U̒ lonto li Paapa-U̒, wau malei dungga mai ode delomo dunia. Bo botia Wau̒ mamololaa mao̒ dunia u mohualinga mola odeli Paapa-U̒.”

YAHYA 16:5

Bo botia Wau̒ mamo hualinga mola ode o-Lio talolao mai ola-U̒; wau diaaluo penu boli ngotaa mao̒ monto olimongoli tamohintu mai ode utoonu ponao̒wa-U̒.

YAHYA 3:14

Tutuuwauwa debo odelo tei Musa malopo botula mola tulidu tombaha tobatango ayu ngoputu tohuta datahu u luasi daa̒ wau delita, odito olo Walao̒ Manusia paatuti pobotulolo,

YAHYA 5:32

Bo woluo taawewo tamongohi sakusi tomimbihu ola-U̒, wau otaawa-U̒ deu̒ u silakusialio boito otutu.

YAHYA 7:33

Ti Isa lotahuda mao̒ totaa dadaata boito todelomo Bele lo Eeya, “Bo ngopee̒ mola wambao̒ Wau̒ donggo pee̒-pee̒enta woli mongoli. Lapatao̒ uito Wau̒ mamuli mohualinga mola ode talolao mai ola-U̒.

WUNGGULI LOMONGO RASULU 17:31

Sababu Tio malolantu mai wakutu tuwau u momutoo̒ ngoilanggubu dunia botie wolo aadili. Tuugasi boito mapohutuo lo ngotaalio tamaa tilulaoto Allahu Taa̒ala u mohutu mao̒ sua̒li boito. Wau alihu ngoa̒amila tau yakini losua̒li boito, Allahu Taa̒ala maluli lopo tumulai tau boito lonto opopate!”

WUNGGULI LOMONGO RASULU 2:32

Ti Isa botieelo taluli pilo tumulai lonto opopate lo Allahu Taa̒ala. Ami ngoa̒amila malo sakusi lohihilao sua̒li boito.

WUNGGULI LOMONGO RASULU 3:14

Tio mantali boli mopiohu bo timongoli lotehengi o-Lio wau helo huntulo alihu tei Pilatus molopatao̒ ngotaalio lo tamoomatea mate-mateelo mao̒ ode limongoli.

WUNGGULI LOMONGO RASULU 7:52

Wolo woluo nabi tadiila ilalinaya linenemoya limongoli? Timongolio helomate mongo utolia lo Allahu Taa̒ala yila-yilateelo mao̒ u muloololio mai daa̒ malopo malalumu deu̒ Wato lo Allahu Taa̒ala tao̒tutu boito madungga-dungga mai. Wau botia timongoli lohiyanati wau lomate yila-yilateelo mao̒ Wato lo Allahu Taa̒ala boito.

ROMA 1:17

Sababu wolo Habari Mopiohe boito Allahu Taa̒ala mopo bilohei woloolo mola pohuliilio wumbuta lomanusia wolo Allahu Taa̒ala muli mowali mopiohu; pohuliilio yito palacaya to Allahu Taa̒ala monto bohulio tunggula pulitio. Uito tutuuwauwa debo odelo u leituladu todelomo Kitabi, “Taa palacaya to Allahu Taa̒ala tilinggula wumbutalio wolo Allahu Taa̒ala muli mowali mopiohu, tau boito matumumulo!”

1 KORINTUS 1:30

Allahu Taa̒ala lohihilaolo tamohutu mai tilinggula Wutato motituwau woli Isa Almasi. Lotimbulude li Isa Almasi, ito pilowali molinepo. Wau lotimbulude o-Lio olo Allahu Taa̒ala lohutu mai olanto luli mopiiohe wolo batanga-Lio, lopowali olanto tolomodu umati-Lio, wau lolopato olanto.

2 KORINTUS 5:21

Ti Almasi diila odusa, bo Allahu Taa̒ala lohutu mai o-Lio lomanta dusanto, alihu ito muli mopiiohe wolo Allahu Taa̒ala sababu lotituwau woli Almasi.

GALATIA 5:5

Bo olamiaatia, amiaatia motiwunela deu̒ wolo polo tulungi lo Rohullah wau patopatoa̒ topalacaya lamiaatia li Almasi, Allahu Taa̒ala lopoluasi mai olamiaatia lopiiohe wo-Lio.

1 TIMOTIUS 3:16

Diaaluo penu boli ngotaa mao̒ mowali momaahu, malo odito udaa̒alio hitua-tuawua u milakusudu hetuuo̒ lo agamaanto; Tio lopo bilohei batanga todelomo rupa lomanusia, wau piloi̒laalo otutu lo Rohullah, wau iloontonga lo mamaa-lai̒katiyalo. Habarilio pilopo toliyongo towolota lo babaa-ngusawalo, wau Tio pilalacaya to ngoilanggubu dunia wau bilinta-I̒o mola ode sologa.

1 PETRUS 3:18

Sababu ti Almasi lohihilao yilate bo pee̒enta wambao̒, u ohiheo-hiheolo mao̒ sababu dusa lomanusia – ngotaalio tadiila ototala, yilate ode taa ototala. Ti Almasi lohutu uito alihu Tio mowali modelo olimongoli ode Allahu Taa̒ala. Tio pilatelio yila-yilateelo mao̒ delo pohuli lobatanga, bo luli pilotumulai delo pohuli lo rohu.