YAHYA 15:11 - KITABI HABARI MOPIOHE

¹¹ Ngoa̒amilalo botie poo̒taa-U̒ mai olimongoli, alihu owengahu-U̒ woluo todelomo hilaa limongoli, wau owengahi mongoli mowali wimu-wimumuto ngoa̒amilalo.

YAHYA 15:11 ပူးပေါင်းရင်းမြစ်များ

YESAYA 53:11

Sababu uito Eeya lotahuda, “Lapatio mao̒ modutolo sikisa, tio masanangi tutu wau olulia lohilao. Wato-U̒ boito, tamopo sanangi hilaa-U̒, malomanta mao̒ hukuumani lotaa dadaata; domi tio Wau̒ mamo ngambungu mai olimongolio.

YESAYA 62:4

Tanggulumu diilalo ‘Taa Tilolaa’, lipumu diilalo ‘Taa Iloliiloa’. Yio̒ mau̒nteelo, ‘Taa Pilonua lo Allaahu Taa̒ala’, wau lipumu unteelo, ‘Taa Malo Nika,’ sababu Eeya motuhatawa to olemu, Eeya debo odelo dile talolai̒ ode lipumu.

YEREMIA 32:41

Wau̒ masanangi mohutu u mopiohu ode limongolio, wau mohutu mai olimongolio motitatapu tolipu botie u ohiheo-hiheolo mao̒.

YEREMIA 33:9

Yerusalemu mamowali moe̒engahe wau moo̒bangga ola-U̒. Totoonulalo bangusa todunia mamowali moohe wau humuhela wau mohulumati ola-U̒, wonubolo moo̒dungohe pasali lo totoonulalo mopiohu u pohutuwo-U̒ ode ulipu lo Yerusalemu, wau pasali lo omaa̒amulu u wohi-U̒ mai ode kota boito.”

JEPANYA 3:17

Timongoli diluo̒la lo Eeya Allahu Taa̒ala limongoli tamolotolo suukali olaahe boli buheli. Timongoli moo̒haama sababu kawasaa-Lio. Eeya meengahe wau sanangi sababu timongoli, todelomo ponu-Lio timongoli yilohia-Lio tutumulo bohu.

LUKASI 15:23

Lapatao̒ uito podedea̒i sapi kikiio̒ u molingohu wau olota mao̒. Ito mamolamela wau motiwengahu.

LUKASI 15:32

Bo ito wajibu mohutu potihunggu wau motiwengahu, sababu wutatumu tawali-yali boito mailate, bo botia luli tilumumulai; tio mailooli, bo botia luli lotapu mai.’ ”

LUKASI 15:5

Wau wonu muli motapulio mai himba boito, tio mameengahe daa̒ tilinggula himba boito mapotaalio to binggungio,

LUKASI 15:9

Tou̒ motapulio mai doi boito, tio motianga mongo tamanilio wau mongo tiheedio, tulusi moloi̒ya mao̒, ‘Wau̒ sanangi daa̒ maluli loo̒dungga doiu̒ uilooli. Dulo ito motiwengahu!’

YAHYA 16:24

Tunggula tosaaa̒ti botie timongoli diipo lohile mola wolo-wolo to tanggulu-U̒. Pohileaalo mola, yi timongoli mamo lolimo, alihu owengahumu wimu-wimumuto ngoa̒amilalo.”

YAHYA 16:33

Ngoa̒amilalo botie polele-U̒ mai alihu timongoli moo̒toduo mai moa̒ahu sababu motituwau wola-U̒. To dunia timongoli mamodutolo. Bo poo̒toheeta mola hilaamu! Dunia maa ilolaahe-U̒!”

YAHYA 17:13

Botia Watia monao̒ mai odeli Paapa. Ngoa̒amilalo botie tilahuda mao̒ lo Watia tou̒ donggo todunia; alihu timongolio wolo tio̒otutua moo̒laasa owengahu lo Watia.

YAHYA 3:29

Bulentiti taabua yito hakuulio libulentiti talolai̒. Sahabati libulentiti talolai̒ boito wambao̒ tihutihula totili wau modungohe, wau tio sanangi wonu modungohe suala libulentiti talolai̒. Odito olo wolaatia. Masaatia watia sanangi daa̒.

ROMA 15:13

Allahu Taa̒ala yito tambati potiwunela mola limongoli. Pohileaala dua̒ Tio mopoo̒polu mai hilaamu wolo ngoa̒amilalo wengahu wau salaamati sababu timongoli palacaya o-Lio, alihu wolo kawasa lo Rohullah timongoli lebe mao̒ motiwunela mola to Allahu Taa̒ala.

2 KORINTUS 1:24

Watia diila momakusa olimongoli tomimbihu wolo u musi palacaya limongoli, sababu timongoli malo malacaya tio̒otutua toli Almasi. Watia bo mohuuyula woli mongoli alihu timongoli helebe sanangi tutu.

EPESUS 5:18

Diila mao̒ potihuwoo̒ lo angguru timongoli, sababu uito mamoo̒luusa olimongoli. Bolii̒o mao̒, mamusi timongoli kiluwaasa lo Rohullah.

PILIPI 1:25

Watia yakini tosua̒li boito. Uito sababuulio otaawa lowatia deu̒ watia madebo motibiluloa̒ wolo Wutato ngoa̒amilalo, alihu moo̒ tulungi olimongoli mowali helebe molotolo wau helebe sanangi todelomo palacaya to Eeya.

1 TESALONIKA 5:16

Mamusi timongoli laito motiwengahu,

1 PETRUS 1:8

Timongoli motolia̒nga o-Lio, eleponu muloololio mai timongoli diila loo̒onto o-Lio. Wau timongoli palacaya to o-Lio eleponu botia timongoli diila moo̒onto olio. Uito sababuulio timongoli motiwengahe, wau molaasa hilaa meengahe u udaa̒ wau diilalo mowali loi̒yaalo.

1 YAHYA 1:4

Amiaatia loluladei utie alihu hilaanto tio̒otutua meengahe.

2 YAHYA 1:12

Dadaata daa̒ upalalu poo̒taa mai lowatia olimongoli, bo lasaalio lebe mopiohu diila mao̒ moli tuladu. Watia mohalapu moo̒ biilohe wau mobisala lohihilao woli mongoli, alihu hilaa limongoli tio̒otutua meengahe.