YAHYA 11:25 - KITABI HABARI MOPIOHE

²⁵ “Wau̒lo tamongohi mai tutumulo wau mopobongu mai taa mate,” tahuda mao̒ li Isa odeli Marta “Taa u palacaya ola-U̒ matumumulo, eleponu tio mailate.

YAHYA 11:25 ပူးပေါင်းရင်းမြစ်များ

JABURU 36:9

Timongolio olulia lohilao wolo ua̒alo laba-labaalo daata to Bele lo Eeya, wolo minumani monto dutulaa lo Eeya umopowali nyaamani.

YESAYA 26:19

Umati lo Eeya tamailate mamuli tumumulai, mimii-lateyaalo limongolio mamuli mobongu mai. Taa u mailobungo todelomo huta mamobongu mai wau motingalaa̒ meengahu. Debo odelo wambulo u moposeehati dunia, Eeya mopo tumulai umati lo Eeya tamalo hiiheo yilate.

YESAYA 38:16

Yaa Eeya, wohiyalo mai watotia tutumulo wolo tahuda wau huhutu lo Eeya, poluliaalo mai watotia tumumulo duo̒lo Eeya wambai̒o.

LUKASI 23:43

“Pomalacayalo,” tahuda mao̒ li Isa olio, “Dulahee botie yio̒ mapee̒-pee̒enta wola-U̒ to Pirdaus.”

YAHYA 1:4

Tahuda boito bungo lo tutumulo, wau tutumulo boito mongohi mai tilango tomanusia.

YAHYA 14:19

Bolo ngopee̒ mola dunia diilalo moo̒onto ola-U̒. Bo timongoli mamoo̒onto ola-U̒. Wau sababu Wau̒ tumutumulo, timongoli olo matumumulo.

YAHYA 14:6

Tametao̒ li Isa, “Wau̒lo dalalo u pongo taawalo Allahu Taa̒ala wau poo̒tapulalo tutumulo. Diaaluo penu boli ngotaa mao̒ tamowali monao̒ ode Allahu Taa̒ala, wonu diila moli ola-U̒.

YAHYA 3:16

Sababu Allahu Taa̒ala odito momonu mai manusia todunia botie, tilinggula Allahu Taa̒ala longohi mai Wala-I̒o tatuwa-tuwaulo, alihu timii̒du taa palacaya o-Lio diila binasa, bo moo̒tapu tutumulo ututuulio tutu wau ohiheo-hiheolo mao̒.

YAHYA 3:36

Taa palacaya to Walao̒ boito mamoo̒tapu tutumulo ututuulio tutu wau ohiheo-hiheolo mao̒. Bo taa diila modungohe to Walao̒ boito diila moo̒tapu tutumulo. Tio hukuumanio lo Allahu Taa̒ala u ohiheo-hiheolo mao̒.

YAHYA 5:21

Allahu Taa̒ala boito mopobongu mai taamate, wau mongohi olimongolio tutumulo ututuulio tutu wau ohiheo-hiheolo mao̒; odito olo Walao̒ mongohi mai tutumulo u ohiheo-hiheolo mao̒ totaa mohuto wohia-Lio tutumulo.

YAHYA 5:26

Debo odelo Allahu Taa̒ala lohihilao bungo lo tutumulo, yi Tio olo mopowali mai wala-I̒o bungo lotutumulo.

YAHYA 6:35

“Wau̒lo roti tamongohi mai tutumulo,” tahuda mao̒ li Isa olimongolio. “Taa u monao̒ mai ode ola-U̒ diila tapolaangolo poli u ohiheo-hiheolo mao̒.” Wau taa u palacaya ola-U̒ diila tamotoa̒ngo poli u ohiheo-hiheolo mao̒.

YAHYA 6:44

Diaaluo penu boli ngotaa tamowali monao̒ mai ode ola-U̒, wonu Allahu Taa̒ala talolao ola-U̒, diila modelo mai olio ode ola-U̒; wau tatoonu tamonao̒ mai ode ola-U̒, mabongulo-U̒ to Dulahu Kiama.

WUNGGULI LOMONGO RASULU 3:15

Mongo wutato lomate o-Lio yila-yilateelo mao̒, lebe-lebe pomao̒ tumbao̒ Tiolo bungo lo tutumulo duo̒lo taa ngoa̒amila. Wau Allahu Taa̒ala maluli lopo tumulai o-Lio lonto opopate. Masilakusia lami lohihilao sua̒li boito.

ROMA 4:17

Sababu Allahu Taa̒ala lotahuda odie odelei Abraham, “Wau̒ malo powali olemu tiyamo ode dadaata bangusa.” Odieelo mola Allahu Taa̒ala longohi mai danti boito odelei Abraham, wau tei Abraham palacaya to o-Lio. Tiolo Allahu Taa̒ala tamopo tumulai taa mate; Tiolo olo Allahu Taa̒ala u wolo tahuda-Lio wambao̒ helohutu mai wolo udipo pee̒enta woluo lowali woluo.

ROMA 8:2

Sababu butoo̒ lo Rohullah ulohutu mai olanto tilumumula lotituwau woli Isa Almasi tamalo lopatai olaatia lonto hukuumani uloo̒ sababu dusa wau opopate.

1 KORINTUS 15:18

Uito boliilio olo deu̒ tau-tauwalo Nasara tamailate, olo diila ohalaapani.

1 KORINTUS 15:29

Wonu taamate diilalo pilopo tumu-Lio mai, yilongola woluo tailihua duo̒lo taamate? Pongoola timongolio mohutu mao̒ sua̒li boito? Wonu memangi taamate sama-samaata diilalo pilopo tumu-Lio mai, pongoola timongolio mohutu mao̒ sua̒li boito?

2 KORINTUS 4:14

Amiaatia yakini deu̒ Allahu Taa̒ala tamaaluli lopotumulai li Isa Eeya, mamopo tumulai olamiaatia olo woli Isa, wau modelo olimongoli wau olamiaatia ode talu-Lio.

PILIPI 1:23

Watia bilantangalio monto mohu-mohuwalia. Otohilaa daa̒ lowatia mololaa mao̒ dunia botie wau mola motibiluloa̒ woli Almasi, sababu uitolo ulaba-labaalo mopiohu;

PILIPI 3:10

Tuwa-tuwaulo u otohilaa lowatia yito alihu watia motota li Almasi, wau moo̒toduo kawasa u mopotumula o-Lio monto opopate. Otohilaa lowatia modudua̒ modutolo wo-Lio wau mowali tutuuwauwa debo odelo Tio todelomo sua̒li lo opopate-Lio.

1 TESALONIKA 4:14

Ito palacaya deu̒ ti Isa mailate wau luli tilumumulai. Uito sababuulio ito palacaya olo deu̒ Allahu Taa̒ala mamuli mopo tumulai ngoa̒amila taa palacaya li Isa wau tamailate, alihu timongolio tumumulo pee̒-pee̒enta wo-Lio.

WAHI 1:18

Wau̒lo Tio tatumu-tumulo! Wau̒ mailate, bo bilohilo, Wau̒ tumutumulo u ohiheo-hiheolo mao̒. Wau̒ okawasa to opopate, wau todunia lotaamate.

WAHI 20:5

Uti-utieelo bohulo tahapu tau-tauwalo mate muli bongulo-Lio mai. (Bo tau-tauwalo mopoowate wewolio diilalo potumulo-Lio mai ngotilonggadu wakutu ngolihu lotaunu mola boito.)

WAHI 21:4

Tio mamomaide ngoa̒amilalo ponu monto mato limongolio. Opopate madiduu̒; osuukali, hiyongo, meaalo penu boli moo̒laasa ngongoto olo madiduu̒. Susuu-aliyaalo udeedelo mailooli.”

WAHI 22:1

Malai̒kati boito olo lopo bilohei olaatia dutula u taluhio mongohi tutumulo. Dutula boito hei̒nta-intaawa debo odelo Kristali, wau tolo-tolohei lonto tambati huhuloa̒ lo Allahu Taa̒ala wau Walao̒ Himba boito,

WAHI 22:17

Rohullah wau Bulentiti Taabua lotahuda mai, “Duloolo!” Timii̒du taa u modungohe utie musi olo moloi̒ya, “Duloolo!” Tatoonu tamo totoa̒ngo, mamusi tio monao̒ mai! Wau tatoonu tai̒lo hilao, mamusi mohama taluhu u mongohi tutumulo boito wolo beebasi.