PILOTIMUA̒TA 32:7 - KITABI HABARI MOPIOHE

⁷ Yi Eeya lotahuda odelei Musa, “Hua̒a potuhutolo mola, sababu bangusaamu tadilelomu mai yilumualao̒ lonto Masiri malohutu u moleeto.

PILOTIMUA̒TA 32:7 ပူးပေါင်းရင်းမြစ်များ

OLUO TAWARI 27:2

Tei Yotam heloo̒ sanangi hilaa lo Eeya, debo odelo tei Ujia tiyamolio. Bo tio diila helomobu dupa to Bele lo Eeya, debo odelo u hepilohutu liyamolio. Penu boli odito, ulipu debo tulusi hipohutua dusa.

JABURU 78:36

Bo timongolio helo himbulo to Eeya, tataa-heyaalo limongolio wimbulo ngoa̒amilalo.

PILOTIMUA̒TA 19:24

Tahuda mai lo Eeya, “Potuhutolo mola, wau lapatao̒ muli pohualingai odia pee̒-pee̒enta wolei Haruna. Bo mongo iimamu wau ulipu diila mowali molaodeo̒ siipati u monao̒ mai ode ola-U̒. Wonu timongolio molaodeo̒ uito, yi timongolio mahukuu-maniyo-U̒.”

PILOTIMUA̒TA 32:1

Tou̒ bangusa lo Isirai̒lu loo̒onto deu̒ Tei Musa lohiheo daa̒ diila lotuhutai lonto hui̒du, bo debo donggo teto mola olo, timongolio helo tia̒mbu mai odelei Haruna wau malo loi̒ya olio, “Diila otaawanto wolo ulowali to olei Musa, taa u malodelo mai olanto yilumualai lonto Masiri; oditolio pohutua mai olami ila umodelo olami.”

PILOTIMUA̒TA 32:11

Tei Musa malo molohone ode Eeya Allahu Taa̒alaalio, ualio mao̒, “Eeya, ambunguolo yilongola Eeya musi mohutu mao̒ odito ode limongolio? Diila maa Eeya tamalo poa̒ahu olimongolio lonto Masiri wolo okokawasa wau olootolo daa̒?

PILOTIMUA̒TA 32:4

Tei Haruna lohama mao̒ ante-ante boito. Lapatao̒ pilopo didiilio wau tiluwatio mao̒ ode delomo paisaka tuwau wau pilohutulio bui̒ losapi tuwau. Bangusa boito loloi̒ya mao̒, “Wuu Isirai̒lu uti-utieelo ilaanto talo depitai olanto yilumualao̒ lonto Masiri!”

PILOTIMUA̒TA 33:1

Lapatao̒ Eeya lotahuda odelei Musa, “Tolailo mao̒ tambati boito wau ponao̒lo pee̒-pee̒enta wolo bangusa tadilelomu mai lonto Masiri boito odelipu u pilodanti-U̒ odelei Abraham, Isihaka wau Yako wau wali mai limongolio.

YESAYA 1:4

Matopotala timongoli bangusa tao̒dusa, tau-tauwalo tahi luusawa wau moleeto. Timongoli malodehu ode delomo duduu-sawaalo limongoli. Timongoli malo potouli to Eeya wau mailulea limongoli Allahu Taa̒ala Laba-labaalo mantali tamusi tuboo limongoli.

DANIALI 9:24

Poo̒opitu piu̒wa pitu lopulu lotaunu mola yito maasa u tilantu lo Allahu Taa̒ala u molopato bangusaamu wau kotamu umantali boito monto dusa wau ololeeto. Totoonulalo dusa maa ambunguolo wau oa̒adili u ohiheo-hiheolo mao̒ mapotihulolo, tilinggula bibilohe wau laamalani boito mamowali moi̒laalo, wau Bele lo Eeya umantali boito mamuli motaa̒luku wau mohulumati to Eeya.

HOSEA 9:9

Mailaba leetio huhutuumu debo odelo u pee̒enta pilohutu lotau to Gibea. Allahu Taa̒ala mamoe̒ela totalamu, wau mohukuumani mai olimongoli sababu dusaamu.

TINGULI 31:29

Otaawa lowatia deu̒ lapatao̒ watia mate mao̒, tau-tauwalo boito mamowali moleeto wau diila mololimo wolo u mapilo ngaajali mao̒ lowatia ode limongolio. Wau de timongolio odungga lobaala, sababu lopomuluka to Eeya helohutu wolo u dilini-Lio.”

TINGULI 32:5

Bo timongoli yito bangusa tadiila tatapu wau molotolo hilao, wau diilalo patuti mowali umati-Lio, bangusa tapolu-polu lou̒ diila juujulu wau dusa.

TINGULI 4:16

Oditolio poo̒dahai mao̒ alihu timongoli diila bolo moo̒tapu dusa sababu mohutu duo̒lo batangamu lohihilao bui̒ u tuboolo todelomo modeli penuboli woloolo mola wambai̒o, talolai̒ meaalo taabua,

TINGULI 9:12

Lapatao̒ Eeya lotahuda mai olaatia, ‘Hua̒a potuhutolo mola, sababu bangusaamu tadilelomu mai yilumualao̒ lonto Masiri malohutu u moleeto. Timongolio malo bolia̒ lonto papaa-lentaa-U̒, wau helohutu bui̒ u hetuboo limongolio.’

TINGULI 9:8

Tumbao̒ to Hui̒dee Sinai timongoli helohutu to Eeya lomuluka daa̒, tilinggula Eeya ohilaa mopobinasa olimongoli.

MONGO HAKIMU 2:19

Bo wonu bolo tau̒wa boito mailate, bangusa boito owatade lebe moleetao̒ wolo hilaide tadipo-dipolulio mai. Timongolio hemotiwato to ila-ila wewo wau molubo ila-ila boito. Timongolio hemonguli to obobiasa limongolio u moleeto wau diila mohuto molomelo watade limongolio.