MIKHA 5:7 - KITABI HABARI MOPIOHE

⁷ Taulo Isirai̒lu tadonggo hibiluloa̒wa towolota lo babaa-ngusawalo madebo odelo singa tohuungo lo bibii-natangiyalo to oa̒ayua meaalo to huungo himbala himba tohuta datahu wau luasi u pilobutua lo huo̒yoto. Singa boito tilumuwota tohuungo himbala himba boito sambela lolumbe-lumbetaa̒ wau longanta-ngantanga; diaaluo taa lowali lolopata hihii-mbawaalo boito.

MIKHA 5:7 ပူးပေါင်းရင်းမြစ်များ

OLUO LO SAMUEL 17:12

Ito mamoo̒ dungga olei Dauda penu boli tou̒toonu tio woluo, wau tuhuwonto tio tou̒ tio diipo mongalati wolo umamo toduo. Diaaluo tamaa moo̒ teteo̒, mopio tio meaambo tahidudua̒ olio.

JABURU 110:3

To dulahu yio̒ meidungga wolo kawasa, to huludu umantali, ulipumu momaju wolo iloheela lohilao. Debo odelo wambulo tou̒ dimodupo, mongo bohulotau monao̒ mai ode olemu.

JABURU 133:3

Meaalo debo odelo wambulo to Hui̒dee Hermon, u tilumolohe mola ode huhuu-luduwaalo Sion. Mola teto Eeya lopo tuhutai balakati lo Eeya, tutumulo u ohiheo-hiheolo mao̒.

JABURU 72:6

Pohileaala dua̒ tio debo odelo didi u motuhutai tahuta datahu wau luasi, debo odelo didi moo̒ohuu̒ u mopotolohe taluhu to hahaa-laboluwalo.

POHUMAYA 19:12

Muluka li olongia debo odelo heuwanga losinga; opopiohu li olongia debo odelo wambulo u mopobata pipii-lomulowalo.

YESAYA 32:15

Bo pee̒entapo Allahu Taa̒ala mamei dungga wolo kawasaa-Lio. Yi huta datahu wau luasi daa̒ u mohengu mamowali hahaa-laboluwalo molomiodu, wau hahaa-laboluwalo madebo odelo oa̒ayua.

YESAYA 44:3

Sababu Wau̒ mobangguatai didi ode huta u mohengu, wau mopotolohe duduu-tulaalo tohuta mohengu wau diila molomiodu. Wau̒ mamongohi mai kawasa ode walimu mola, wau mobalakati walao̒ wau wombumu.

YESAYA 55:10

Debo odelo didi motuhutai monto hulungo, wau diilo monguli mola, bo mopobata dunia, mopo molomiodeo̒ wau mopobutu mai pipii-lomuwaalo, mongohi tilapulo u pumoa̒yadu wau polamelo,

YESAYA 66:19

Wau̒ mamopodutu tuoto tuwau tohuungi mongolio. Ngotayade kikiio̒ towolota limongolio mopoa̒ahuwo-U̒. Timongolio malaolo-U̒ ode babaa-ngusawalo to lilii-puwaalo molamingo u diipo pee̒enta mao̒ loo̒dungohe pasalii-U̒ meaambo loo̒onto odudaa̒ wau kawasaa-U̒: ode Spanyol, Libia, wau Lidia wolo tahi pomanaalio tamoolato, ode Tubal wau Yunani. Timongolio mamopo habari odudaa̒a-U̒ towolota lo babaa-ngusawalo boito.

YEREMIA 14:22

Dedeewaalo babaa-ngusawalo diila moo̒ potuhutai didi ode dunia. Penu boli hulungo diila mowali olo moluwatai didi wolo kawasaalio lohihilao. Bo Eeyaalo halapani lamiaatia. Eeya lohutu mai ngoa̒amila boito lotoduo.

YEHESKIEL 14:22

Humayaalio mao̒ woluo taa moo̒ lahi wau mopoa̒ahu mongo walai̒o, poo̒tuotilo timongolio wonubolo timongolio monao̒ mai ode olemu. Bilohiilo woloolo mola ololeeti mongolio, yi timongoli maa mongalati deu̒ lotuhataalo huhutuu-U̒ u lohukuumani Yerusalemu.

YEHESKIEL 47:1

Talolai̒ boito luli lodelo olaatia ode huhebu potuwotalo Bele lo Eeya. Iloontonga lowatia taluhee tolo-tolohe lonto walungo huhebu boito ode tiimuru, debo odelo Bele lo Eeya olo talutalu ode tiimuru. Taluhee boito tolo-tolohe monto walungo koosengi lohuhebu Bele lo Eeya wimbihu huliaalio loli biihu huliaalio lomesba.

YEHESKIEL 5:5

Eeya Taa Laba-labaalo molanggato lotahuda mai, “Bilohi, uti-utieelo Yerusalemu. Kota botie pilopo tambati-U̒ to pilobutua mai lo dunia, wolo lilii-puwaalo wewo to palitio.

DANIALI 11:32

Yi wolo wimbulo hidala-dalaala ti olongia boito mamomiyo tau-tauwalo tamaa lololaa agama limongolio, alihu mohuto momantu olio. Bo tau-tauwalo tamodungohe to Allahu Taa̒ala mabuheli moluwali olio.

HOSEA 14:5

Eeya lotahuda mai, “Umati-U̒ taa maa lolahi, muli hamaa-U̒ wau ponuo-U̒ wolo lea-leaatu lo hilao; timongolio diila taa oingowa-U̒ poli.

HOSEA 6:3

Sababu uito duloolo ito motolopani u tio̒otutua motota to Eeya. Tio tantu mamei dungga mai ode olanto debo odelo u mapobutua mai mato lodulahu, wau debo odelo didi u mopobata mai huta to pulito sembo lo polodidi.”

YOEL 2:32

Bo titaalo tita tamo molohone mei̒ tulungi to Eeya, mapo aahuwolo. Eeya lotahuda, “To Yerusalemu tau-tauwalo tahe tilulaotu-U̒ mamoa̒ahu.”

AMOS 5:15

Lonui̒ilo u moleeto wau tolia̒ngiilo u mopiohe, wau potihulaalo u aadili. Otanu Eeya modehu hilao totau-totauwalo tahe ilolabita monto bangusa lo Isirai̒lu.

MIKHA 2:12

Eeya luli lotahuda mai, “Wuu umati lo Isirai̒lu tadonggo ilolabita! Timongoli tantu maa̒mbuwo-U̒ wau potuwauwo-U̒ debo odelo himba u lohualingai ode lantungalio. Debo odelo huta luasi u pilobutua lo huo̒yoto upolu-polu wolo himba, oditolo olo lipumu mamuli mopolu mai wolo taa dadaata.

MIKHA 4:13

Eeya lotahuda, “Wuu u lipu lo Yerusalemu, ponao̒olo wau lumbetai̒ mao̒ musu-musumu! Wau̒ maa mopowali mai olimongolio molotoolo debo odelo sapi u o tunge wate wau o luo̒be tombaha. Timongoli maa mopoa̒antulu dadaata bangusa, wau okokaya umotapu mao̒ limongolio monto yilambato maa podewo limongoli ola-U̒, Eeya ngoilanggubu aalamu.”

MIKHA 4:7

Timongolio mapilopo lupuhu-Lio wau molamingo monto kambungu pilohuluta loduhulio. Bo, monto tau-tauwalo tahe ilolabita boito Wau̒ mamo lumulao̒ tuwaulio lowali mai u bohu. Timongolio mamowali bangusa u leidaa̒ wau molotolo. Wau̒ mamo malenta olimongolio to Huludu Sion tunggula ohiheo-hiheolo mao̒.”

MIKHA 5:3

Wonu bolo takaawasa boito meidungga, Tio mamo malenta umati-Lio wolo olootolo wau okokawasa monto Eeya Allahu Taa̒alaalio lohihilao. Umati-Lio matumumulo wolo aamani, sababu ngoa̒amila tau to ngoilanggubu dunia mamo toloa̒kuo odudaa̒a-Lio,

MIKHA 5:8

Isirai̒lu mamopo olaaheo̒ mumuu-suulio wau mopoa̒ntulu olimongolio ngoa̒amila.

MIKHA 7:18

Diaaluo Allahu Taa̒ala debo odelo Eeya, yaa Eeya, tamo ngambungu dusa lo umati tilulaoto Eeya u ilolabita. Diila u ohiheolo mao̒ Eeya muluka; bolii̒o mao̒, Eeya sanangi mopobilohei ponu lo Eeya udiila o eenggadelio boito.

JEPANYA 3:13

Taulo Isirai̒lu tadonggo ilolabita, diila tamohutu u moleeto poli penu boli ode olita; timongolio diilalo mohimbulo wau diila olo mongaakali. Timongolio maa maa̒mulu wau moa̒ahu, wau diila molaasa moohe penu boli ode olita.”

JAKARIA 14:8

To dulahee boito, taluhu seehati matumolohe monto Yerusalemu; ngotayadu monto taluhee boito matumolohe ode Lau Mati wau ngotayadio poli ode Lau Tenga. Taluhee boito matumolohe ngohilayaa̒ lotaunu, mopio tosembo lodidi meaalo tosembo lo polodulahu.

JAKARIA 9:13

Yehuda mapomake-U̒ odelo pana lo pahalaawani, wau Isirai̒lu odelo walao̒ pana u dapadapato polentude. Ulipu lo Sion pomake-U̒ odelo wamilo; wolo wamilo boito tau-tauwalo Yunani matuhuwo-U̒.”

MATIUSI 28:19

Sababu uito ponao̒lo ode ngoa̒amilalo bangusa to ngoilanggubu dunia, pohutua mao̒ timongolio mowali muri-U̒. Wau lihua mao̒ timongolio lou̒ molanggula tangguli Paapa, wau Walao̒, wau Rohullah.

WUNGGULI LOMONGO RASULU 11:15

Wau tou̒ watia malo lumula lobisala odito,” odie mola tei Petrus lopo tolonga mola lo wunggulilio, “Rohullah dungga-dungga mai odeitaati mongolio, tutuuwauwa debo odelo u malotoduo mai to olanto muloololio mai tou̒ bohulio.

WUNGGULI LOMONGO RASULU 13:46

Tumbao̒ bo lebe buheli tei Paulus wolei Barnabas helo bisala lou̒ juujulu. Timongolio loloi̒ya, “Tahuda lo Allahu Taa̒ala memangi wajibu potunggulopo ode limongoli. Bo sababu timongoli diila mohuto mololimo uito, timongoli malolantu lohihilao deu̒ timongoli diila paatuti mololimo tutumulo utuutu wau ohiheo-hiheolo mao̒. Wau botia ami mamololaa mao̒ olimongoli wau monao̒ ode bangusa wewo.

WUNGGULI LOMONGO RASULU 16:9

Huilio mao̒, to Troas, tei Paulus loo̒onto tuwaulio lobibilohu. Todelomo bibilohio boito tio loo̒onto taulo Makedonia ngota tihutihula totalulio sambela hemohile lou̒ tio̒otutua alihu tio monao̒ ode Makedonia mola motulungi olimongolio.

WUNGGULI LOMONGO RASULU 9:15

Bo Eeya lotahuda mai odelei Ananias, “Wambao̒ ponao̒lo! Sababu Wau̒ malo lulaota olio u momaya ola-U̒, alihu tio mopohabari pasalii-U̒ ode babaa-ngusawalo wewo tadiila o agama Yahudi wau ode mongo olongia wau ode umati lo Isirai̒lu olo.

ROMA 10:20

Tei Yesaya lebe buheli mao̒ poli. Tio loloi̒ya, “Odieelo mola tahuda lo Allahu Taa̒ala, ‘Tau-tauwalo tadiila mololohe ola-U̒, maloo̒ dungga ola-U̒; wau Wau̒ lopobilohe batanga-U̒ olimongolio tadiila helohintu pasali-U̒.’ ”

ROMA 11:12

Sababu bangusa lo Yahudi ototala wau diila lodudua̒ otohilaa lo Allahu Taa̒ala, yi babaa-ngusawalo wewo bilalakatia lo Allahu Taa̒ala. Tidiyolo mao̒ wonu wumbuta bangusa lo Yahudi wolo Allahu Taa̒ala muli mowali mopiohe; tantu lebe udaa̒ poli balakati u mawohi lo Allahu Taa̒ala.

ROMA 9:30

Oditolio, pulito lo huhamaalio duu̒ito-yito utie: Babaa-ngusawalo wewo tadiila Yahudi diila helo tolopani alihu wumbuta limongolio wolo Allahu Taa̒ala muli mowali mopiohu. Bo sababu timongolio palacaya, yi Allahu Taa̒ala lopowoluo mai wumbuta limongolio wo-Lio luli lowali lopiohu.

1 KORINTUS 3:6

Watia tamopomulo wau tei Apolos tamomuhuto, bo Allahu Taa̒ala lohihilaolo tamopowali pilomulolio boito mobutu.

TINGULI 32:2

Hinta pongaajaliu̒ motuhuta debo odelo didi, wau loloo-iyaau̒ humeheto debo odelo wambulo, debo odelo didi hipele-pelea toitaato huo̒yoto, wau didi moo̒ohuu̒ toitaato pipii-lomulowalo.

MONGO HAKIMU 6:36

Lapatao̒ tei Gideon loloi̒ya ode Allahu Taa̒ala, “Yaa Eeya, Eeya malo tahuda mai deu̒ Eeya ohilaa momake olo watotia mopo lopato umati lo Isirai̒lu.