MIKHA 5:2 - KITABI HABARI MOPIOHE

² Oditolio, Eeya mamopoluli umati-Lio kiluwaasa lo mumuu-suuwaalo limongolio tunggula taabua tatilantu u mowali tiilo lo takaawasa boito malo potutu mai o-Lio. Lapatao̒ uito tau-tauwalo ngobangusaalio tawoluo to polayahu mamuli potuwaulo wolo bangusa limongolio.

MIKHA 5:2 ပူးပေါင်းရင်းမြစ်များ

ILOOWALI 35:16

Lapatao̒ uito tei Yako wau polemboa̒lio lololaa mao̒ Betel. Tou̒ timongolio donggo molamingao̒ lonto Eprata, malei dungga saaa̒tilio ti Rahel u motutu. Bo walai̒o boito mototolo potutuolio mai.

ILOOWALI 35:19

Lapatao̒ ti Rahel yilate mao̒, mailobungio tio totili lodalalo udulu-dulunga ode Eprata, u masaatia ilunte Betlehemu.

ILOOWALI 48:7

Wau̒ lohutu mao̒ sua̒li boito odeli Rahel tiilamu. To delomo wuwalingiu̒ mai lonto Mesopotamia, tiilamu yilate tohuta lo Kanaa̒n diila molamingo monto Eprata.” (Masaatia Eprata otaawa odelo Betlehemu.)

ILOOWALI 49:10

Tei Yehuda mamodihu tunggudu lo bele biluloa̒ saaha li olongia, waliilio mola mamomalenta ohiheo-hiheolo mao̒. Babaa-ngusawalo mamodelo mai doi uwajibu pomayali odeli olongia, wau mosujudu wolo taa̒luku totalulio.

BOHULO TAWARI 2:54

Tei Salma tahe lopotihulao̒ kota Betlehemu yito loluuhuru taulo Netopa, taulo Atarot-Bet-Yoab, wau taulo Jor, deu̒yito-yito tala tuwau lo oluo kaumu tahi biluloa̒wa to Manahti.

JABURU 132:6

To Betlehemu ilodungohento pasali lo Bulua Daantia, tulusi ilodunggaalio tohuta datahu wau luasi lo Yaar.

JABURU 90:2

Tou̒ huhuu-ideyaalo diipo pilopowali mai, tou̒ huta wau dunia diipo pilohutu lo Eeya, Eeyaalo Allahu Taa̒ala tadebo ohiheo-hiheolo mao̒, diila o bohulio wau diila opulitio.

PILOTIMUA̒TA 18:21

Bo ngopohia mao̒ leeto yio̒ musi molulaotao̒ dengolo lota mongo lolai̒ tamolinepo, wau molantu mao̒ olimongolio mowali tau̒wa to tangolihu lota, ngohetuto lota, limo lopulu lota, wau mopulu lota. Timongolio musiilio tau-tauwalo tamoohe wau tamo dungohe to Allahu Taa̒ala, mowali palacayaalo wau diila mohuto mololimo doi sooloi̒.

PILOTIMUA̒TA 18:25

wau helo lulaotao̒ tau-tauwalo tahi tinepa towolota bangusa lo Isirai̒lu. Tio lolulaotao̒ olimongolio lowali tau̒wa to tangolihu lota, ngohetuto lota, limo lopulu lota, wau mopulu lota.

YESAYA 11:1

Wali mai li Olongia Dauda debo odelo batanga ayu u mailuwodu. Bo debo odelo monto tuodio mobutu tumbinga bohu, odieelo mola olo monto wali mai lei Dauda matumoodei ngotaalio li olongia.

YESAYA 53:2

Eeya mokahandaki wato-Lio boito debo odelo tumbuo̒, u mobutu tohuta u mohengu. Diaaluo u gaaga to olio u oontonganto; diaaluo u moa̒anga u otohilaanto.

YESAYA 55:4

Tutuulio tutu tio powaliyo-U̒ mai tau̒wa wau eyaanggu, sakusi monto kawasaa-U̒ ode babaa-ngusawalo.

YESAYA 7:14

Botia, Eeya lohihilao mamongohi mai tuoto olemu: Ngotaalio tadulahu tabanta-bantaala mamo potutu mai ngotaalio talolai̒ tau̒nteelio Imanuel.

YEREMIA 30:21

Olongia tamomalenta olimongoli asaliilio monto bangusaamu. Wolo beebasi tio mamohimbide ola-U̒ wonubolo tio tiango-U̒ mai motaalua wola-U̒. Sababu tatoonu tabuheeli motaalua wola-U̒ modudua̒ u otohilaalio lohihilao? Timongoli mamowali umati-U̒ wau Wau̒ mowali Allahu Taa̒ala limongoli. Wau̒, Eeya, talo tahuda mai uito.”

HOSEA 6:3

Sababu uito duloolo ito motolopani u tio̒otutua motota to Eeya. Tio tantu mamei dungga mai ode olanto debo odelo u mapobutua mai mato lodulahu, wau debo odelo didi u mopobata mai huta to pulito sembo lo polodidi.”

AMOS 9:11

Eeya lotahuda, “Mamei dungga wakutuulio Wau̒ moponguli yilaidia lei Dauda. Botia yilaidia boito malowali debo odelo bele u loloohubu. Bo didii-ngingaalo meeseliilio mapoo̒ piohu-U̒ wau muli bongulo-U̒ tilinggula mowali debo odelo u muloololio mai daa̒.

MIKHA 4:10

Wuu ulipu lo Yerusalemu, potirekadu lomola wau poi̒laalo lomola suusa debo odelo taabua tadonggo hemo potutu mai! Sababu, botia timongoli musi mololaa mao̒ kota wau motibiluloa̒ tohuta u datahu wau luasi. Timongoli musi monao̒ mola ode Babel, bo mola teto Eeya mamo lopata olimongoli monto mumuu-suumu.

JAKARIA 13:7

Eeya Taa Laba-labaalo kawasa lotahuda, “Pobongulo mola, wuu wamilo, wau tuhuwalo diiti tahe mokalaja duo̒lo-U̒! Pateaalo tio mate-mateelo mao̒, yi hihii-mbaawaalo mamo bubuua̒yawa. Wau̒ mamoluhu umati-U̒,

JAKARIA 9:9

Wuu ulipu lo Sion, poti wengahulo! Wuu ulipu lo Yerusalemu, pongiibodulo mola meengahu! Bilohilo! Olongiamu dungga-dungga mai wolo ohaama! Tio olongia aadili talodelo mai oa̒ahu. Bo lealeaatu odupapa lohilao tio meidungga tae̒tae̒ to kolodai, kolodai tuwau u buboto.

MATIUSI 2:1

Ti Isa pilotutulio tokota Betlehemu tolipu lo Yudea tomaasa li Olongia Herodes hemomalenta. Tou̒ boito dengolo lota ahali lopoliyama lonto tiimulu lonao̒ mai ode Yerusalemu.

MATIUSI 2:6

‘Yio̒ Betlehemu, tolipu lo Yehuda, yio̒ sama-samaata diila pulito ukikiio̒ towolota lo kokoo-tawaalo upolohuna daa̒ to Yehuda. Sababu monto olemu mamei dungga mai tau̒wa ngota tamamo titau̒wa to umati-U̒ Isirai̒lu.’ ”

MATIUSI 28:18

Ti Isa lohimbideo̒ olimongolio wau lotahuda mao̒, “Ngoa̒amila kawasa tosologa wau todunia mailudu-Lio mai ola-U̒.

LUKASI 23:2

Teto timongolio malo potulude o-Lio, “Timongolio loloi̒ya, Malotapu lami tau botie hemopo lapalo ulipu. Tio hemo popatu totau alihu diila momayali beya toli Kaisali, sababu heloi̒yaa-Lio deu̒ Tio yito Almasi, ngotaalio li olongia.”

LUKASI 23:38

Toitaato ayu salipu li Isa, tulatuladu tataa-heyaalo odie: “Tabotieelo Olongia Taulo Yahudi.”

YAHYA 7:42

Todelomo Kitabi tulatuladu deu̒ Olongia Tamoo-poa̒ahua yito wali mai lei Dauda wau mamei dungga monto Betlehemu, deu̒ito-yito kambungu pilohuluta loduhu lei Dauda.”

TINGULI 1:15

Sababu uito towolota lomongo tau̒wa tatulaotao̒ limongoli, dengolo lota tabiijaki wau opongalamani hamaa mao̒ lowatia u puduo̒lo motitau̒wa mao̒ olimongoli. Dengolo lota powaliyolo tau̒wa tou̒ ngolihu lota, tawewo tou̒ ngohetuto lota, tou̒ limo lopulu lota wau tou̒ mopulu lota. Watia olo momuduo̒ mongo tau̒wa wewo u mongulusi mao̒ susuu-kuwaalo limongoli.

KOLOSE 1:17

Tou̒ totoonulalo u hitua-tuawua dipoluo, ti Almasi maleimulo mai woluo. Wau sababu Tiolo olo yi totoonulalo u hitua-tuawua tinggai woluo to tambatilio.

IBRANI 13:8

Ti Isa Almasi debo tutuuwauwa, mopio muloolo, masaatia, wau tunggula ohiheo-hiheolo mao̒.

IBRANI 7:14

Ngoa̒amila tau motota deu̒ Eeyanto asalii-Lio mai lonto suku lo Yahuda; wau tei Musa diila pee̒enta mao̒ lolanggula suku boito tou̒ tio lobisala pasali lomongo iimamu.

1 YAHYA 1:1

Tuango tulade botie tomimbihu tahuda u mongohi tutumulo, deu̒ito-yito tahuda u mawoluo anggadu bohulio mai daa̒. Amiaatia maloo̒ dungoheo̒, wau maloo̒onto mao̒ uito wolo mato lamiaatia lohihilao. Amiaatia malo miloheo̒ wau malodihu mao̒ wolo uluu̒ lamiaatia.

WAHI 19:16

Tojumba-Lio wau to bungolopa-Lio tulatulade tanggulo utie, “Olongia totoonulalo olongia, wau Eeya totoonulalo tuani.”

WAHI 2:8

“To malai̒kati lojamaa̒ to Smirna, tulade mola odie: Utieelo tahuli monto o-Lio tabohulio wau tapulitio – tamailate wau luli tilumumulai.

WAHI 21:6

Lapatao̒ Tio lotahuda mai, “Mailapato! Wau̒lo tabohulio wau tapulitio; Wau̒lo Eeya monto Bohulio demola Pulitio. Timii̒du taa u mototoa̒ngo, mapelumo-U̒ wolo beebasi monto butu lotaluhu u mongohi tutumulo.

MONGO HAKIMU 17:7

Tou̒ boito olo woluo tabohulotau ngota lonto Lewi. Bohu-bohulio mai tio bilu-biluloa̒ to Betlehemu tomadala lo Yehuda.

RUT 1:1

To jamani muloololio mai tou̒ Isirai̒lu diipo o olongia ngota, lipu lo Kanaa̒n ilodungga lobaala polobiti. Tou̒ boito woluo talolai̒ ngota tai̒lunte Elimelekh. Tio lonto kaumu Eprata, wau bilu biluloa̒ to Betlehemu tomadala lo Yehuda. Sababu baala lopolobiti boito, yi tio lonao̒ ode Moab wolo dilelio, ti Nao̒mi, wau walai̒o talolai̒ duulota: tei Mahlon wolei Kilyon. Lapatao̒ timongolio lotibiluloa̒ mola teto. Tou̒ timongolio donggo mola teto,

RUT 4:11

Tahimuloa lo ulipu wau taa wewo tawoluo teto malo loi̒ya, “Joo, amiaatia sakusiilio. Pohileaala dua̒ Eeya mopowali todilemu boito debo odelo ti Rakhel woli Lea tahe lopototutu mai walao̒ dadaata odelei Yako. Pohileaala dua̒ yio̒ maa̒amulu towolota lotau-tauwala lonto kaumu Eprata wau pohileaala dua̒ yio̒ mowali masa-masaahulu to Betlehemu.

BOHULO SEMUEL 10:19

Wau̒ malo lopata olimongoli lonto tilolahepalo u suukali wau polodutolo, bo botia timongoli malo potouli ola-U̒, Allahu Taa̒ala limongoli, sababu timongoli hipohilea alihu Wau̒ molantu mao̒ olongia ngota ode limongoli. Naa, ooo̒, potia̒mbulo mai totalu-U̒, Eeya limongoli, modudua̒ suku wau maraga limongoli.’ ”

BOHULO SEMUEL 17:12

Tei Dauda yito walae̒e Isai taulo Eprata, lonto Betlehemu to Yehuda. Tei Isai owalao̒ mongo lolai̒ walu lota, wau tojamani pamalenta lei Saul, tei Isai mapanggola daa̒.

BOHULO SEMUEL 17:18

Delowalo olo keju botie mopuulo botu, odeli kamudangi lo pasuukani. Yintua mao̒ woloolo mola owowoluwoa lomongo hulangumu, wau delowa mai bukutiilio ode olau̒ deu̒ yio̒ malo dunggaya woli mongolio wau timongolio todelomo owowoluwoa u mopiohe.

BOHULO SEMUEL 23:23

Oditolio palakisailo wolo ulintapo gogoowaalo u mapee̒enta lowali tambati pilo tituua̒lio, wau muli pohualingai odia u mopodulohe olau̒. Lapatao̒ wau̒ mamonao̒ pee̒-pee̒enta woli mongoli, wau wonu tio donggo woluo tomadala boito, tantu malolohuu̒, penu boli musi anta-antangou̒ mao̒ ngoilanggubu Yehuda!”

BOHULO SEMUEL 8:12

Ngotayadu bilintai̒o lowali polowila ode tangolihu lota. Ti olongia boito mamo makusa mongo walau̒mu momadeo̒ halabolulio, mohimoa̒ tilapulo sembolio, mohutu titii-ngoloolio wau pakaakasi lokaleta popaatealio.