MIKHA 1:5 - KITABI HABARI MOPIOHE

⁵ Ngoa̒amila boito mamotoduo sababu taulo Isirai̒lu odusa wau lomintaa̒ tingolo ode Allahu Taa̒ala. Tatoonu taloo̒ sababu Isirai̒lu ilodusa? Diila maa Samaria tiilo lokotaalio lohihilao? Tatoonu taloo̒ sababu Yehuda lolubo balaahala? Diila maa Yerusalemu lohihilao?

MIKHA 1:5 ပူးပေါင်းရင်းမြစ်များ

BOHULO MONGO OLONGIA 11:7

Toitaato hui̒dee ambahu tiimuru lo Yerusalemu, tio lopo tihulao̒ tambati polubowalo Kamos, dewa taulo Moab, wau ode Molokh, dewa taulo Amon – duduuluwolo dewa umoo̒ toitupo.

BOHULO MONGO OLONGIA 13:32

Wolo umai loi̒yaalio to palenta mai lo Eeya ode mesba to Betel boito wau ode ngoa̒amila tambati lo ibaadati to kokoo-tawaalo Samaria tantu mamotodua mai.”

BOHULO MONGO OLONGIA 16:24

Bo lapatao̒ tio lotali mao̒ hui̒dee tuwau ngohalaga wolomo lihu doi talaa̒ lonto tahingota-ngotawa tai̒lunte Semer. Lapatao̒ tio lomongu mao̒ kota tuwau tohui̒dee boito wau longunte mao̒ Samaria, lodudua̒ tanggulee Semer, bakasi taa ohuu̒wo lohui̒dee boito.

OLUO TAWARI 34:3

Lapatao̒ walu lotaunu mola lowali olongia, to umulu humula daa̒, tei Yosia lolumula loi̒baadati to Allahu Taa̒ala tahe tuboo li Olongia Dauda loluuhurulio. Wopato taunu mola lapatio mao̒ tio helo ngantulu tambati polubowalo balaahala, bubuu-iyaalo Dewi Asyera, wau babaa-laahalaalo wewolio.

OLUO TAWARI 34:4

Bubuu-iyaalo wau babaa-laahalaalo boito hetilyopu lo tahidudua̒ olei Yosia tulusi peaahui̒o hepilo muo̒yadio toitaato kuubulu lotau-tauwalo tahe lopodewo bake ode babaa-laahalaalo boito. Memees-bawaalo Baal wau memees-bawaalo dupa uwoluo teto heilolohubi mongolio.

YESAYA 7:9

Isirai̒lu diila lebe molotola wolo Samaria, tiilo lokotaalio, wau Samaria diila lebe molotola woli Olongia Pekah. Wonu timongoli diila tio̒otuta yakini to Olau̒, tantuulo mao̒ timongoli diila moo̒ taahangi.”

YEREMIA 2:17

Yio̒ lohihilao taloo̒ sababu ngoa̒amila u helo toduo mai to batangamu, sababu tou̒ yio̒ dilelo-U̒ lonao̒, yio̒ helo bulemenga ola-U̒, Eeya Allahu Taa̒alamu.

YEREMIA 2:19

Ololeetomu lohihilao helo hukuumani batangamu, yio̒ leisikisa sababu helo bulemenga ola-U̒, Allahu Taa̒alamu. Botia laasailo malo odito paa̒ato wau suukali lohilao wonu Wau̒ bulemengamu wau diila hurumatiyomu. Wau̒, Eeya Allahu Taa̒alamu malo tahuda mai; Wau̒ulo Eeya Allahu Taa̒ala Laba-labaalo molanggato wau Laba-labaalo kawasa.”

YEREMIA 23:13

Dusa lomongo nabi lo Samaria maa iloontonga-U̒. Timongolio helo bisala to tanggulo Baal, wau helo polapalo Isirai̒lu, umati-U̒.

YEREMIA 23:14

Bo to Yerusalemu Wau̒ loo̒onto mongo nabi helohutu wolo ulebe moleetao̒ poli. Timongolio hemohimbulo wau hemojina, boli hemomantu taa u hipohutua u moleeto, tilinggula diaaluo penu boli ngotaa mao̒ tamohuto molilihu. To Olau̒ timongolio ngoa̒amilalo moleeto debo odelo ulipu lo Sodom wau Gomora.”

YEREMIA 4:18

Yehuda, yio̒ lohihilaolo talo podungga mai baala ode batangamu. Dudelo lo tutumulumu wau totoonulalo huhutuumu loo̒sababu ngoa̒amila polodutolo boito heloluhi hilaamu.

YEREMIA 5:25

Bo duduu-sawaalo limongoli boitolo u longabuto ngoa̒amila u mopiohe boito tilinggula diila ilolaasawa mao̒ limongoli.

YEREMIA 6:19

Poo̒tuotalo, wuu dunia! Umati-U̒ diila mohuto mololimo pongaajali-U̒ wau diila modungohe to Olau̒. Odelo akiibati lo lanjana limongolio Wau̒ mamopo dungga mai baala ode limongolio.

HIYONGO MOPOILAALO SUUSA 5:16

Obobangga lamiaatia madiduu̒, amiaatia tilopotala sababu mai̒lodusa.

YEHESKIEL 16:46

Tikakaamu yito Samaria totilayo wolo ngoa̒amila kambungulio. Wau waliyalimu yito Sodom to huliaalio wolo ngoa̒amila kambungulio.

HOSEA 7:1

Eeya lotahuda mai, “Timii̒du Wau̒ ohilaa mopoo̒luli mai umati-U̒ Isirai̒lu wau moponguli mao̒ owowoluwoa limongolio, yi u iloontonga-U̒ bo ololeeto wambai̒o wau dusa limongolio. Timongolio tinggai hemo hihiimbuloa, timongolio tumuwotao̒ ode bele lotau u motao̒, wau timongolio hemo lambata to dadaa-lalaala.

AMOS 6:1

Matilopotala timongoli tatumu-tumula hisanangia to Sion, wau timongoli tamolaasa aamani to Samaria – timongoli wuu tahi otanggulawa todelomo ulipu bangusa lo Isirai̒lu tapolu-polutuo̒ botie, timongoli tabiasaalio henao̒o mai lo lipu u mei̒tulungi!

AMOS 7:9

Tataa-mbatiyalo u pilomake lo wali mai lei Isihaka u potabiaalo maa̒ntuluolo. Tataa-mbatiyalo mantali taulo Isirai̒lu maloohubuolo. Wau̒ mamo poo̒pulito wali mai li Olongia Yerobeam.”

AMOS 8:14

Tau-tauwalo talo tadia domi balaahala lo Samaria helo loi̒ya, ‘Domi dewa bangusa lo Dan,’ meaalo ‘Domi Dewa Bersyeba’ – mamodehu wau diilalo mopobongu-bongu mai.”

MIKHA 1:13

Timongoli ulipu lo Lakhis, poluliaalo mao̒ wadala tokaleta lo popaatea! Timongoli loo̒baaya duduu-sawaalo u pilohutu to Isirai̒lu tunggula loo̒sababu Yerusalemu olo ilodusa.