KOLOSE 2:6 - KITABI HABARI MOPIOHE

⁶ Mongo wutato malo lolimo li Isa Almasi odelo Eeya. Sababu uito mamusi timongoli tumumulo motituwau wo-Lio,

KOLOSE 2:6 ပူးပေါင်းရင်းမြစ်များ

YESAYA 2:5

Wuu, wali mai lei Yako, dulo ito monao̒ todelomo tilango Eeya!

MIKHA 4:2

timongolio ngoa̒amila mamoloi̒ya, “Dulo ito mobotula mola ode huludu Eeya ode Bele lo Allahu Taa̒ala lo Isirai̒lu! Eeya mamo ngaajali mai olanto wolo u musi pohutuwonto. Ito mamo dudua̒ dala-Lio sababu pongaajali lo Eeya meidungga mai monto Yerusalemu; monto Sion Eeya lotahuda ode umati-Lio.”

MATIUSI 10:40

“Taa u mololimo olimongoli, mamo lolimo ola-U̒. Wau taa u mololimo ola-U̒, mamo lolimo o-Lio talolao mai ola-U̒.

YAHYA 13:20

Otutu banali tahuda-U̒ botie: Tatoonu taa u mololimo tailawo-U̒, mololimo ola-U̒. Wau tatoonu tamololimo ola-U̒, mololimo o-Lio tamalolao mai ola-U̒.”

YAHYA 14:6

Tametao̒ li Isa, “Wau̒lo dalalo u pongo taawalo Allahu Taa̒ala wau poo̒tapulalo tutumulo. Diaaluo penu boli ngotaa mao̒ tamowali monao̒ ode Allahu Taa̒ala, wonu diila moli ola-U̒.

1 KORINTUS 1:30

Allahu Taa̒ala lohihilaolo tamohutu mai tilinggula Wutato motituwau woli Isa Almasi. Lotimbulude li Isa Almasi, ito pilowali molinepo. Wau lotimbulude o-Lio olo Allahu Taa̒ala lohutu mai olanto luli mopiiohe wolo batanga-Lio, lopowali olanto tolomodu umati-Lio, wau lolopato olanto.

2 KORINTUS 5:7

Sababu amiaatia tumutumulo patopatoa̒ to palacaya li Almasi, diila patopatoa̒ tou̒ wolo u oontonga,

GALATIA 2:20

Botia diilalo watia tatumu-tumulo, boti Almasi tatumu-tumulo todelomo batanga lowatia lohihilao. Tutumulo botie u tomimbihu tutumulo laatia botia yito tutumula lo iimani ode Walao̒ Allahu Taa̒ala talomonu mai olaatia wau tamalo pobake batanga-Lio ode laatia.

GALATIA 3:26

Sababu timongoli palacaya li Isa Almasi, yi timongoli lotituwau wo-Lio; wau masababu uito timongoli mowali mongo walao̒ Allahu Taa̒ala.

EPESUS 4:1

Uito sababuulio watia – tau ngota lotutupa, tau̒ tataahangi sababu hemomaya to Eeya – mohile lou̒ tio̒otutua olimongoli: poti tumulolo motuuu̒de wolo huhuloa̒a limongoli debo odelo taamaa tiliyango Allahu Taa̒ala.

PILIPI 1:27

Naa, u polohuna daa̒ botia yito deu̒ timongoli tumumulo motuuu̒de lou̒ wolo u pohile wolo moo̒ohuu̒ lo Habari Mopiohe pasali li Isa Almasi boito. Lou̒ odito, diila otaawa laatia donggo moo̒ dunggaya woli mongoli meaalo diila, watia mamo dungoheo̒ deu̒ timongoli molotolo motituwau wau mohipate pee̒-pee̒enta bo u makusudu tuwau wau tuwau ilohilaa; deu̒ito-yito to opopalacaya u motuuu̒de wolo Habari Mopiohe monto Allahu Taa̒ala boito.

KOLOSE 1:10

Lou̒ odito timongoli mowali tumumulo modudua̒ otohilaa lo Allahu Taa̒ala, wau laito moposanangi hilaa-Lio, tilinggula todelomo totoonulalo u hitua-tuawua timongoli moo̒wohi tilapulo to susuu-aliyaalo u mopiohe. Wau pongotota limongoli pasali lo Allahu Taa̒ala olo maa oduhenga mola olo.

KOLOSE 3:17

Ngoa̒amila wolo upohutuo meaalo loi̒ya limongoli, mamusi uito pohutuwola wau loi̒yaalo to tangguli Isa Eeya. Posukurulo mola ode Allahu Taa̒ala ti Paapa tou̒ wolo u pilohutu li Isa olimongoli.

1 TESALONIKA 4:1

Pulitio mao̒ Mongo wutato, amiaatia malongohi mai obaaya olimongoli tomimbihu woloolo mola timongoli musi tumumulo u moposanangi hilaa lo Allahu Taa̒ala. Memangi timongoli maa tilumumulo debo odelo uito. Bo botia tokawasa li Isa Eeya, amiaatia mohile lou̒ tio̒otutua olimongoli wau mohuntulai alihu timongoli lebe motolopani mao̒ todelomo sua̒li boito!

IBRANI 3:14

Ito ngoa̒amila yito tamani ngopo hipate woli Isa Almasi, asali ito demola pulitio modihu tio̒otutua oyoyakini u mililikinto tou̒ bohulio mai.

1 YAHYA 2:6

Titaalo tita moloi̒ya deu̒ tio tumutumulo motituwau wolo Allahu Taa̒ala, tio musi tumumulo modudua̒ liyodu li Almasi.

1 YAHYA 5:20

Otaawanto deu̒ Walao̒ Allahu Taa̒ala malei dungga mai wau malongohi pongotota to olanto, alihu ito motota lo Allahu Taa̒ala tao̒tutu. Ito tumutumulo motituwau wolo Allahu Taa̒ala tao̒tutu, wau tumutumulo motituwau wolo Wala-I̒o Isa Almasi. Utieelo Allahu Taa̒ala tao̒tutu, wau utieelo tutumulo u tutuulio tutu wau ohiheo-hiheolo mao̒.

YUDAS 1:3

Mongo wutato tao̒toliango! Watia tio̒otutua omakusudu moluladei tulade ode limongoli tomimbihu oa̒ahu upee̒-pee̒enta mai̒lo laasanto. Bo botia watia molaasa ilowuntula u monaseehati mai olimongoli wolo tulade botie alihu timongoli tulusi mohipate duo̒lo iimani u mapee̒enta yilohi mai lo Allahu Taa̒ala u ohiheo-hiheolo mao̒ ode umati-Lio.