KOLOSE 2:13 - KITABI HABARI MOPIOHE

¹³ Muloololio mai, timongoli mailate delo dudelo lorohu kalana timongoli odusa, wau kalana timongoli diila tiluuna delo dudelo lahiri. Bo botia Allahu Taa̒ala lopotumulai olimongoli pee̒-pee̒enta woli Almasi. Allahu Taa̒ala malo ngambungu mai totoonulalo dusaanto,

KOLOSE 2:13 ပူးပေါင်းရင်းမြစ်များ

JABURU 119:50

Uti-utieelo u loliyango olaatia todelomo dudutolo watia, deu̒ danti lo Eeya boito longohi mai olaatia tutumulo.

JABURU 32:1

Jaburu lei Dauda. Lahu pongaajali. Potisanangilo tutu taa u dusaalio ilambangu, wau totalaalio milaa̒apu.

JABURU 71:20

Eeya helongohi mai olo watotia polodutolo dadaata u mobuheeto, bo Eeya mamo ponguli mai lotolo watotia wau muli mopotumulai watotia monto kuubulu.

YESAYA 1:18

Eeya lotahuda mai, “Dulo ito mopobelesi palakala botie. Eleponu timongoli meela jingga sababu duduu-sawaalo limongoli, timongoli mabuboa̒a-U̒ mowali moputio̒ belesi debo odelo pini. Eleponu duduu-sawaalo limongoli dadaata wau mobuheeto, timongoli maa ambunguwo-U̒ lealeaatulo mao̒.

YESAYA 55:7

Maamusi taa moleeto mopoo̒piohu tutumulio, wau molomelo dalalo pikiilangilio. Huliilo mao̒ tio muli mohualinga ode Eeya, alihu moo̒toduo odehu hilaa lo Eeya. Maamusi tio mopalinga ode Allahu Taa̒alanto, sababu Eeya mongambungu mai wolo muura lohilao.

YEREMIA 31:34

Diilalo palalu penu boli ngotaa mao̒ monto olimongolio mongaajali timongotalio u motota to Eeya. Sababu timongolio ngoa̒amila, kikiio̒ udaa̒, mamotota ola-U̒. Ngoa̒amila totala limongolio malipato-U̒, duduu-sawaalo limongolio maa̒mbunguo-U̒. Wau̒, Eeya, malo tahuda mai.”

LUKASI 15:24

Sababu walau̒uu̒ botie mailate, masaatia luli tilumumulai; tio mailooli masaatia luli lotapu mai.’ Tulusi timongolio malohutu potihunggu.

LUKASI 15:32

Bo ito wajibu mohutu potihunggu wau motiwengahu, sababu wutatumu tawali-yali boito mailate, bo botia luli tilumumulai; tio mailooli, bo botia luli lotapu mai.’ ”

LUKASI 9:60

Ti Isa lolametao̒, “Huliimao̒ taamate molobungo taa matelio lohihilao. Bo yio̒, ponao̒lo wau pololade mota habari deu̒ Allahu Taa̒ala malo lumulo lomalenta.”

YAHYA 5:21

Allahu Taa̒ala boito mopobongu mai taamate, wau mongohi olimongolio tutumulo ututuulio tutu wau ohiheo-hiheolo mao̒; odito olo Walao̒ mongohi mai tutumulo u ohiheo-hiheolo mao̒ totaa mohuto wohia-Lio tutumulo.

YAHYA 6:63

Tamohutu mai manusia tumumulo yito Rohullah. Olootolo manusia diaaluo hunalio. Tataa-heyaalo upilo tahuda-U̒ mai olemu botie tataa-heyaalo Rohullah wau tataa-heyaalo u mongohi tutumulo.

ROMA 4:17

Sababu Allahu Taa̒ala lotahuda odie odelei Abraham, “Wau̒ malo powali olemu tiyamo ode dadaata bangusa.” Odieelo mola Allahu Taa̒ala longohi mai danti boito odelei Abraham, wau tei Abraham palacaya to o-Lio. Tiolo Allahu Taa̒ala tamopo tumulai taa mate; Tiolo olo Allahu Taa̒ala u wolo tahuda-Lio wambao̒ helohutu mai wolo udipo pee̒enta woluo lowali woluo.

ROMA 6:13

Diila mao̒ wudua olo pongawaa̒ lo batangamu ode kawasa lodusa u pohunaalo ode totoonulalo makusudu u moleeto. Bo wuduwalo mola batanga limongoli ode Allahu Taa̒ala odelo tamaa yilimbato lonto opopate ode tutumulo. Wuduwalo mola batanga limongoli lealeaatulo mao̒ to Allahu Taa̒ala alihu pohunaalo u mohutu kahandaki lo Allahu Taa̒ala.

ROMA 8:11

Wonu Rohullah, talo potumulai li Almasi lonto opopate, tumutumulo todelomo batangamu, yi Tio talo potumulai li Almasi lonto opopate boito, mamo potumulai olo wawau̒mu u mowali mate boito. Tio mohutu mai uito wolo Rohu-Lio u tumutumulo todelomo wawau̒mu.

1 KORINTUS 15:36

Mohulode daa̒! Wonu Wutato mopomulo bili todelomo huta, bili boito diila tamobutu, wonu bili boito diipo mateepo.

1 KORINTUS 15:45

Todelomo Kitabi tulatulade odie, “Manusia tabohulio, yito tei Adamu, lowali mahaluku tatumu-tumulo,” bo tei Adamu tapulitio yito Rohu u mongohi tutumulo.

2 KORINTUS 3:6

Tiolo talo pomambo olamiaatia lowali tamomayawa ode tuwaulio lo daantia u bohu; daantia u motiwunela to Rohullah, diila tobutoo̒ u tulatulade. Sababu u tulatulade boito modelo ode mautu, hiambola Rohullah boito mongohi tutumulo.

2 KORINTUS 5:19

Amiaatia helo pohabari deu̒ lotimbulude li Almasi, Allahu Taa̒ala lohutu mai manusia luli lopiiohe wolo batanga-Lio. Allahu Taa̒ala lohutu mai lou̒ diila lopoilaalo suusa totoonulalo totala u mapilohutu lomanusia ode batanga-Lio. Wau amiaatia maa tilugasia lo Allahu Taa̒ala u lopohabari habari boito.

EPESUS 2:1

Muloololio mai timongoli yilate odelo dudelo lorohu sababu timongoli odusa wau lolambanga papaa-lentawalo Allahu Taa̒ala.

EPESUS 2:11

Mongo wutato tadiila taulo Yahudi! Eelai mola owowoluwoa limongoli tou̒ muloololio mai: Timongoli iluntelio “taa diila otuuna”, lo taulo Yahudi talongaku batangalio matiluuna (makusudulio tamaa loo̒tapu mao̒ tuoto upilohutu lomanusia tobatanga limongolio).

EPESUS 5:14

Sababu ngoa̒amila u mowali oontonga wolo mopatato, deu̒ito-yito mobaango. Uitolo sababuulio loi̒loi̒ya “Pobongulo, wuu yio̒ tatuutuluhu, wau pobongulo monto opopate! Ti Almasi mamotinelai toitaatumu.”

KOLOSE 2:12

Sababu tou̒ timongoli yilihualio, timongoli yilobungio pee̒-pee̒enta woli Almasi; wau wolo popolihu boito olo, timongoli lodudua̒ luli pilotumu-Lio mai pee̒-pee̒enta woli Almasi karana timongoli palacaya tokawasa lo Allahu Taa̒ala tamalo potumulai li Almasi lonto opopate.

1 TIMOTIUS 5:6

Bo janda taa ohilaa tumumulo motisana-sanangi, mailate penu boli tio donggo tumutumulo.

1 TIMOTIUS 6:13

Wau botia totalu lo Allahu Taa̒ala talongohi mai nyawa ode totoonulalo u hitua-tuawua, wau totalu li Isa Almasi talongohi sakusi u otutu tolei Pontius Pilatus, pohileu̒ utie monto olemu:

IBRANI 6:1

Sababu uito, duloolo ito molaia̒ ode totoonulalo pongaajali u wumbutio mola leeto pasali omoontapo tutumulo lo Nasara, wau diila bo wambao̒ mopoo̒tuoto dadaa-saliyalo bohulo pongaajali lo agamanto. Diilalo mao̒ wuliyonto dasali lo pongaajali deu̒ tau musi mohuheli mohutu susuu-aliyaalo udiila ohuna wau musi palacaya to Allahu Taa̒ala,

IBRANI 9:14

Naa, wonu duhu wau peaahuo̒ boito moo̒ pobelesi onajisi lo tau-tauwalo boito, tidiyolo mao̒ duhu li Almasi! Lotimbulude to Rohu ubakaa ti Almasi lopodewo batanga-Lio lohihilao ode Allahu Taa̒ala odelo bake wimu-wimumuto tutu. Duhu-Lio lopobelesi hilaa u maloo̒tapu tinelo Eeya de olanto lonto upacala lo agama udiila ohuna, alihu ito mowali momaya Allahu Taa̒ala tatumu-tumulo.

YAKOBUS 2:17

Oditolo olo wolo iimani, wonu diila poi̒laalolo wolo huhutu, yi iimani boito diila ohunalio.

YAKOBUS 2:20

Timongoli mohulode daa̒! Wolo palalu pobukutiyolo olemu deu̒ diila ohunalio o iimani lou̒ diila wolo huhutu?

YAKOBUS 2:26

Naa, debo odelo batanga diila o rohu yito batanga uilate, odito olo iimani diila ohuhutu yito iimani uilate.

1 YAHYA 2:12

Watia loluladei olimongoli, Mongo walao̒, sababu dusa limongoli maa ilambungu sababu ti Almasi.