KOLOSE 2:11 - KITABI HABARI MOPIOHE

¹¹ Sababu lotituwau woli Almasi, timongoli matiluuna, diila wolo tuuna upilohutu lomanusia, bo wolo tuuna u pilohutu li Almasi, talopo lopato olimongoli lonto kawasa lo watade u odusa.

KOLOSE 2:11 ပူးပေါင်းရင်းမြစ်များ

YEREMIA 4:4

Dihumaalo dantimu wola-U̒, Eeyaamu, wau potolomodua mao̒ batangamu ode Olau̒, wuu ulipu lo Yehuda, wau Yerusalemu. Wonu diila, yi omulukaa-U̒ mawali-walihuhu wau momobu debo odelo tulu udiila mowali pateelo penu boli lo tatoonu. Ngoa̒amilalo boito mamolemba batangamu sababu totoonulalo huhutuumu u moleeto.”

MARKUSI 14:58

“Amiaatia loo̒dungohe tau botie loloi̒ya, ‘Wau̒ mamopo lohubu Bele lo Allahu Taa̒ala botie u pilohutu lomanusia, wau lapatao̒ todelomo utolo hui mola, Wau̒ mamuli momongu uwewo udiila pilohutu lomanusia.’ ”

LUKASI 2:21

Tou̒ tutumu-Lio mawalu hui, Walao̒ boito tilunaalio. Wau timongolio longunte mao̒ o-Lio Isa, tanggulo uilohi lo malai̒kati o-Lio tou̒ Tio diipo bilanta liilo-Lio.

WUNGGULI LOMONGO RASULU 17:24

Allahu Taa̒ala tamalo powali mai dunia botie wolo totoonulalo tuangio, Tiolo Eeya lohulungo wau dunia. Tio diila bilu-biluloa̒ todelomo bebee-leyaalo lobui̒ u pilohutu lomanusia.

WUNGGULI LOMONGO RASULU 7:48

Bo Allahu Taa̒ala Taa Laba-labaalo molanggato diila lotibiluloa̒ tobele upilohutu lomanusia; sababu todelomo Buku linabi tulatuladu odie mola,

ROMA 2:29

Bolii̒o mao̒, ngotaalio lo Yahudi u pulua yito taa u hilaalio ojiwa Yahudi; wau tuuna u tutu yito tuuna tohale u kilalaja lo Rohullah, diila u tulatulade todelomo buku. Taa debo odelo uito mamololimo poi̒laalo momuji monto Allahu Taa̒ala, diila monto manusia.

ROMA 6:6

Otaawanto deu̒ watadento udeedelo odelo manusia mapilate yila-yilateelo mao̒ pee̒-pee̒enta woli Almasi toa̒yu salipu alihu kawasa lo watadento u odusa boito antuluwolo; lou̒ odito ito diilalo pilowato lodusa.

ROMA 7:24

Naa, odieelo mola owowoluwoa lobatanga laatia; watia modungohe tobutoo̒ lo Allahu Taa̒ala wolo aakali wau watade lowatia, bo wolo pii̒li lomanusia wambao̒, watia taa̒luku todusa. Donggo boli topotalalio watia botie! Tatoonu tamohuto mopoa̒ahu olaatia monto batanga botie u modelo olaatia ode opopate? Sukuru ode Allahu Taa̒ala! Tio mohuto mopoa̒ahu mai olaatia lotimbulude li Isa Almasi.

2 KORINTUS 5:1

Sababu otaawa lamiaatia deu̒ wonu bele – deu̒ito-yito batanga – u biluloa̒anto todunia botie onggalolio, Allahu Taa̒ala mamopohetu olanto bele ngowale tosologa, upilohutu lo Allahu Taa̒ala lohihilao wau moo̒ tahangi ohiheo-hiheolo mao̒.

2 KORINTUS 5:17

Taa umalo tituwau woli Almasi, mowali manusia bohu sama-samaata. U deedelo madiduu̒ – ngoa̒amilalo malowali bohu.

GALATIA 2:20

Botia diilalo watia tatumu-tumulo, boti Almasi tatumu-tumulo todelomo batanga lowatia lohihilao. Tutumulo botie u tomimbihu tutumulo laatia botia yito tutumula lo iimani ode Walao̒ Allahu Taa̒ala talomonu mai olaatia wau tamalo pobake batanga-Lio ode laatia.

GALATIA 5:24

Tau-tauwalo tamalowali miliki li Isa Almasi, tau-tauwala boito malo popate pii̒li lo manusialio wolo totoonulalo napusu wau u otohilaalio.

EPESUS 4:22

Sababu uito yinggila mao̒ manusia deedelo wolo pohuli tutumulo deedelo udonggo herusaalio lou̒ totoonulalo ilohilaalio umopo lapalo.

TINGULI 10:16

Oditolio tumulalo mai botia timongoli musi modungohe to Eeya wau diilalo potibaa̒ngi poli.

TINGULI 30:6

Timongoli wau wali mola limongoli mawohiya-Lio hilaa u moduduo̒, tilinggula timongoli motolia̒nga to Eeya Allahu Taa̒ala limongoli wolo lealeaatu lohilao wau mowali tulusi motibiluloa̒ tolipu boito.

PILIPI 3:3

Lebe-lebe pomao̒ itolo tau-tauwalo tamaa lololimo tuuna u tutuulio-tutu, diila timongolio. Ito lolubo Allahu Taa̒ala lou̒ dilelo lo Rohullah lohihilao, wau ito losukuru sababu ito tumutumulo lotituwau woli Almasi Isa. Ito diila lotiwunela tou̒ uu̒upaa-calawalo u osipati lahiri.

KOLOSE 3:5

Sababu uito, pateilo mao̒ totoonulalo otohilaa lodunia u laito mopoo̒suusa batanga limongoli, debo odelo polohuloto, susuu-aliyaalo udiila paatuti, ohilaa moo̒huu̒, ohilaa u moleeto, wau ololanggamu (sababu ololanggamu yito tutuuwauwa wolo molubo balaahala).

IBRANI 9:11

Boti Almasi malei dungga mai odelo Iimamu Daa̒ lonto susuu-aliyaalo u mopiohe u mawoluo. Kema lo Eeya tou̒toonu Tio loponao̒ lotuugasi-Lio odelo Iimamu Daa̒ yito kema ulebe udaa̒ wau lebe wimu-wimumuto tutu. Uito diila pilohutu lomanusia; bolilio mao̒ asaliilio mai diila lonto dunia u pilopowali botie.

IBRANI 9:24

Sababu ti Almasi diila tilumuwoto ode Huwali Leidaa̒ Mantali huhutu lomanusia, u bo mopo bayahei Mantali u otutuulio mao̒. Ti Almasi tilimuwota mola ode sologa tutuwau; mola teto Tio masaatia lotahudeo̒ ode Allahu Taa̒ala ode polohuna daa̒ olanto.