JAKARIA 1:3 - KITABI HABARI MOPIOHE

³ Bo botia Wau̒ motahuda mai ode olemu: Pohualingolo mai ode Olau̒, yi Wau̒ olo mamuli mohualingai ode olemu.

JAKARIA 1:3 ပူးပေါင်းရင်းမြစ်များ

OLUO TAWARI 15:2

tilinggula tio lonao̒ lodunggaya woli Olongia Asa, wau loloi̒ya mao̒, “Wuu Olongia Asa, wau ngoilanggubu ulipu lo Yehuda wau Benyamin! Dungohilo mai! Eeya modudula woli mongoli wonu timongoli modudula wolo Eeya. Wonu timongoli mohile mola potuhata to Eeya, Eeya mamongohi mai. Bo wonu timongoli diila momandungi to Eeya, yi Eeya olo diila momandungi mai olimongoli.

OLUO TAWARI 15:4

Bo tou̒ timongolio todelomo usuukali, timongolio helei̒ tulungi to Eeya Allahu Taa̒ala lo Isirai̒lu. Timongolio helohile potuhata lonto Eeya wau Eeya longohi mai.

NEHEMIA 9:28

Bo tou̒ lipulio luli ilaamani, timongolio luli hua̒a ilodusa. Yi heiludu lo Eeya olo timongolio tomusu tahe lodeehe olimongolio. Bo, tou̒ timongolio iliinsapu helolee̒e tio̒otutua, timongolio helo ngiibode ode Eeya lei̒ poa̒ahu mai. Yi lonto sologa Eeya lodungohei, wau he tilulungia lo Eeya wuwuulia, sababu Eeya molaasa momonu to limongolio wau malo molaasa momonu.

AYUBA 22:23

Pohualingolo ode Eeya wolo dupadupapa lohilao u moleeto to belemu patutilio yinggilomu.

YESAYA 31:6

Eeya lotahuda, “Bangusa lo Isirai̒lu, timongoli malo luwali ola-U̒ wau ilodusa to Olau̒. Bo botia pohualingolo mai ode Olau̒!

YESAYA 44:22

Totalaamu yinggilo-U̒ debo odelo heengo, dusaamu pilopolahi-U̒ debo odelo heengo wanto-wantohe taluhu. Pohualingolo mai ode Olau̒, sababu Wau̒ malo polopata olemu!”

YEREMIA 12:15

Bo lapatao̒ mopolualao̒ olimongolio, Wau̒ mamuli momonu mao̒ olimongolio; timii̒du bangusa mamuli deloo-U̒ ode lipulio lohihilao.

YEREMIA 25:5

Timongolio helo poa̒hu olimongoli mololaa dudelo tutumuli mongoli u moleeto, wau ngoa̒amila huhutu u odusa, alihu timongoli debo mowali motibiluloa̒ tolipu botie u mailohi mai lo Eeya ode limongoli wau ode loluuhuru limongoli odelo miliki pusaka.

YEREMIA 3:1

Eeya lotahuda mai, “Wonu bolo ngotaalio taabua bua̒yawa lo dilelio, lapatao̒ taabua boito mowali dile lotaa wewo, yi bakasi lodilelio diila mowali muli mohama olio odelo dile, sababu sua̒li boito mamo poo̒leeto lipu botie. Yio̒ Isirai̒lu, mai̒lo tilantahu dadaata daa̒, diila pongalo aakali yio̒ botia mohuto muli mohualingai ode Olau̒!

YEREMIA 3:22

Wuu timongoli ngoa̒amila tamalo lolaa mao̒ to Eeya, muli pohualingolo mai! Eeya maa mopoo̒luli olimongoli, wau mopowali olimongoli tatapu wau molotolo hilao. Timongoli moloi̒ya, “Ooo̒, botia ami monao̒ mai ode Eeya, sababu Tio Allahu Taa̒ala lamiaatia.

YEREMIA 35:15

Diila obuntoolio Wau̒ helolao mai ode limongoli ngoa̒amila wato-U̒ mongo nabi, wau timongolio malo nasehati olimongoli u mopoo̒piohe pii̒limu wau mohuheli mohutu u moleeto. Timongolio helo pe̒elao̒ olimongoli alihu u diila molubo ila-ila wewo wau diila momaya toli mongolio, alihu timongoli mowali tulusi motibiluloa̒ tolipu botie u mailohi-U̒ mai olimongoli wau loluhuuru limongoli. Bo timongoli diila mohuto mopoo̒tuoto wau diila mohuto modungohe ola-U̒.

YEREMIA 4:1

Eeya lotahuda mai, “Umati lo Isirai̒lu, wonu timongoli ohilaa mohualinga, pohualingolo mai ode Olau̒. Tapilapo ngoa̒amila balaahala u diila otohilaa-U̒ boito, wau potatapulo wau molotolo hilao to Olau̒.

YEHESKIEL 18:19

Bo otanu woluo taa u mohintu yilongola walao̒ boito diila modudua̒ momanta duduu-sawaalo liyamolio. Tametio yito, sababu walao̒ boito mopiohu wau motulidu hale. Tio modungohe ngoa̒amila butoo̒o-U̒ wau mohutu mao̒ wolo tatapu wau molotolo hilao, yi tio debo tumutumulo.

YEHESKIEL 18:31

Pohuhelia mao̒ totoonulalo u moleeto u hepohutuo limongoli wau huliilo mao̒ hilao wau pikiilangimu mowali bohu. Yilongola timongoli musi mate?

YEHESKIEL 18:32

Wau̒ diila sanangi wonu tahingota-ngotawa mate. Tolailo duduu-sawaalo limongoli alihu timongoli debo tumutumulo. Wau̒ Eeya Taa Laba-labaalo molanggato malo tahuda mai.”

YEHESKIEL 33:11

Polelea mao̒ olimongolio deu̒ domi Wau̒, Allahu Taa̒ala tatumu-tumulo, Eeya Taa Laba-labaalo Molanggato, Wau̒ diila sanangi wonu taa moleeto mate; bolii̒o mao̒ Wau̒ motohilaa tio mololaa mao̒ duduu-saalio alihu tio debo tumutumulo. Wuu bangusa lo Isirai̒lu, pohuhelilo mohutu u moleeto! Yilongola timongoli ohilaa mate?

HOSEA 14:1

Samaria musi hukuu-maniyolo sababu lomintaa̒ tingolo loluwali ola-U̒. Ulipulio maamate todelomo popaatea; mongo walai̒o unge malihitolio, wau mongobua tahi ombodaa̒wa butao̒ lio ombongio.”

HOSEA 14:4

Asyur diila taa mowali mopoa̒ahu mao̒ mongowatotia, wau wadala lo popaatea diila moo̒bantu olo mongowatotia. Mongowatotia diilalo moloi̒a ode bubuui̒aala huhutu lo mongowatotia lohihilao deu̒ timongolio Allahu Taa̒alo lo mongowatotia. Yaa Eeyaa, Eeya momonu tau-tauwala taa o diila penu boli olita taa mowali pomangga limongolio.”

HOSEA 6:1

Tau-tauwalo Isirai̒lu loloi̒ya, “Dulo ito muli mohualinga ode Eeya. Eeyaalo talopo ngongoto olanto, bo Tio tamamo poo̒luli. Tio talomali olanto, bo Tio olo tamamo moloobani papaa-liinto.

YOEL 2:12

Eeya lotahuda mai, “Bo masaatia botie, muli pohualingolo mai ode Olau̒ wolo lealeaatu lohilao, sambela hipuasawa, he hilimutawa wau he hiyonga.

MALEAKHI 3:7

Debo odelo loluuhurumu muloololio mai, timongoli ngoa̒amila malo lambanga lonto bubuu-too̒o-U̒ wau diila tatapu wau molotolo hilao̒ moponao̒ mao̒. Muli pohualingolo mai ode Olau̒, yi Wau̒ olo mamuli mohualingao̒ ode limongoli. Bo timongoli hemohintu, ‘Wolo u musi pohutuo lo mongowatotia u muli mohualinga ode Eeya?’