IBRANI 3:1 - KITABI HABARI MOPIOHE

¹ Mongo wutato timongota lo Nasara tamaa tiliango olo lo Allahu Taa̒ala! Nte pikiilangia mola tio̒otutua tomimbihu li Isa botie! Allahu Taa̒ala lolao mai o-Lio tolomodu u mowali Iimamu Daa̒ todelomo agama u hedudua̒nto.

IBRANI 3:1 ပူးပေါင်းရင်းမြစ်များ

JABURU 110:4

Wolo tadia Eeya malodanti, Eeya diila tamuli momantangao̒, “Eeyaalo iimamu u ohiheo-hiheolo mao̒, debo odelo tei Melkisedek.”

YESAYA 1:3

Sapi moo̒onuhe taa ohuu̒wolio, kolodai moo̒onuhe tambati lo ua̒alo pilopo dapato lituanilio. Bo umati-U̒ Isirai̒lu diila; timongolio diila mongalati.”

YESAYA 41:20

Yi ngoa̒amila tau mamotota wau moo̒onto mao̒ deu̒ Wau̒, Eeya, tamoponao̒ mai. Timongolio mamo poo̒tuoto wau mongalati, Allahu Taa̒ala mantali lo Isirai̒lu mohutu uito motoduo mai.”

YESAYA 5:12

To popoo-tihunggumu otingohu kocapi, gaambusi, rabana wau tulali boli minumani lo angguru. Bo timongoli madiila pandungi to huhutu lo Eeya wau wolo u pilohutu-Lio.

YEHESKIEL 12:3

Sababu uito, wuu manusia panaa, tou̒ donggo dulahu podapataalo babaa-langimu todelomo boolula tuwau debo odelo u biasalio hepohutuo lotaa hepilolayahu. Tou̒ hui diipo meidungga tolailo mao̒ belemu lou̒ diila tuua̒ao̒-tuua̒ao̒ debo odelo taa u deloolio ode polayahu. Pohutua mao̒ huwango to dingingo meeseli lo belemu wolo sakusia mao̒ lokaumu tamoo-malakalawa boito, wau delowalo boolula u tuatuanga babaa-langimu boito ode bulemengio molibaya huwango boito. Potaalaalo boolula boito toitaato binggungumu. Pomanggotolo mota tou̒ hui u modio̒lomo; tau̒bilo matomu tilinggula diila oontongamu dalalo u polibayamu. Poluliaalo mao̒ ngoilanggubu bangusa lo Isirai̒lu moo̒onto ngoa̒amila u pohutuomu boito, alihu mowali poe̒ela olimongolio. Otanu timongolio mamongalati deu̒ timongolio yito tamoo-malakalawa.”

YEHESKIEL 18:28

Tio malo ngalati totoonulalo huhutuulio tulusi lohuheli lohutu dusa. Lou̒ odito tio diila taamate, bo debo tumutumulo.

HAGAI 1:5

Ntali, poo̒tuotilo mao̒ owowoluwoamu!

HAGAI 2:15

Eeya lotahuda, “Ntali, poo̒tuotilo wolo u malo toduo tou̒ diipo todulahee botie, deu̒yito-yito tou̒ diipo Belee-U̒ botie piloo̒piohu! Woloolo mola owowoluwoamu tou̒ boito?

YAHYA 17:3

Uti-utieelo tutumulo ututuulio tutu wau ohiheo-hiheolo mao̒; alihu tau motota li Paapa, tuwa-tuwaulo Allahu Taa̒ala tabanali, wau moo̒onuhe li Isa Almasi tailao mai li Paapa.

YAHYA 20:21

Lapatao̒ ti Isa pee̒entapo lotahuda mao̒ olimongolio, “Salamu moa̒ahu olemu. Debo odelo ti Paapa-U̒ lolao mai ola-U̒, odito olo Wau̒ mamolao olimongoli.”

YAHYA 20:27

Lapatao̒ ti Isa lotahuda odelei Tomas, “Bilohilo mai uluu̒u-U̒, wau podutua mai tingoongoa lo uluu̒mu teea. Wudua mai uluu̒mu wau podutua to tutua̒lobe-U̒. Diila mao̒ polingu poli, bo pomalacayalo!”

WUNGGULI LOMONGO RASULU 1:15

Todulahu tuwau, tou̒ timongolio donggo hia̒mbua – maito tanu ngohetuto dulo pululota tahi hadilia – tei Petrus tilimihulo u lobisala mao̒. Tio loloi̒ya,

ROMA 11:17

Ngotayadu tataa-ngowaalo bungo loa̒yu jaituni – deu̒ito-yito tau-tauwalo Yahudi – mai̒loyodio. Wau tobakasi oyodio boito piloo̒mbitio mao̒ tango loa̒yu jaitun udiila topalihala, deu̒ito-yito Mongo wutato tadiila Yahudi. Wutato piloo̒mbitio teto alihu Wutato moo̒laasa mao̒ ngoa̒amila u mopiohe monto tutumulo rohu lotau-tauwalo Yahudi.

ROMA 15:27

Wolo hilaa sanangi timongolio malolantu u mohutu mao̒ uito. Memangi otutuulio mao̒ paatuti timongolio momantu mongo wutato tamosikini to Yerusalemu boito; sababu monto tau-tauwalo Yahudilo tau-tauwala tadiila Yahudi boito malo lolimo babaa-lakatiyalo lonto Allahu Taa̒ala. Oditolio, tau-tauwala tadiila Yahudi boito paatuti olo motulungi tau-tauwalo Yahudi wolo babaa-lakatiyalo upango.

ROMA 15:8

Sababu, eelai mao̒ deu̒ ti Isa Almasi malomaya taulo Yahudi u lopobilohe deu̒ Allahu Taa̒ala tatapu wau molotolo hilao todelomo lopoo̒polu totoonulalo danti-Lio odeli nenemoyanto.

ROMA 9:24

Ito-itolo tamaa tilia-Ngio, diila bo wambao̒ bangusa lo Yahudi, bo monto babaa-ngusawalo wewo olo.

1 KORINTUS 10:17

Masababu bo woluo roti ngobotu, wau ito ngoa̒amila molamela monto roti u ngobotu boito olo, yi ito taa dadaata botie debo odelo ngobatanga.

1 KORINTUS 9:23

Ngoa̒amila boito pilohutu lowatia duo̒lo Habari Mopiohe monto Allahu Taa̒ala boito, alihu watia olo pee̒-pee̒enta balakatia-Lio.

2 KORINTUS 1:7

Amiaatia laito yakini wau diila pee̒enta mao̒ molingu tomimbihu Wutato, sababu otaawa lamiaatia deu̒ timongoli modudua̒ modutolo wolamiaatia. Wau sababu uito timongoli olo modudua̒ poo̒-lotoloolo pee̒-pee̒enta wolamiaatia.

2 KORINTUS 9:13

Wau monto hitua-tuawua umopodungga mai opopiohu u pobiloheo̒ limongoli boito, dadaata taulo Nasara to Yudea mamomuji mola Allahu Taa̒ala sababu timongolio moo̒onto otatapu wau olootolo hilaamu to Habari Mopiohe pasali li Almasi tahe dudua̒ limongoli boito. Wau olo, timongolio momuji mola Allahu Taa̒ala, sababu timongoli muura daa̒ lohilao u molaya-layadeo̒ olimongolio wau ode ngoa̒amila taawewo wolo uwoluo tolimongoli.

EPESUS 3:6

Hitua-tuawua u milakusudu hetuuo̒lo boito yito utie: motimbulude to Habari Mopiohe boito, tadiila taulo Yahudi modudua̒ moo̒laasa totoonulalo balakati lo Allahu Taa̒ala u muloololio mai pilohetu bo ode taulo Yahudi. Tau-tauwalo diila taulo Yahudi malowali pongawaa̒ lobatanga u tutuuwauwa, wau lodudua̒ lololimo wolo upilo danti mai lo Allahu Taa̒ala lotimbulude li Isa Almasi.

EPESUS 4:1

Uito sababuulio watia – tau ngota lotutupa, tau̒ tataahangi sababu hemomaya to Eeya – mohile lou̒ tio̒otutua olimongoli: poti tumulolo motuuu̒de wolo huhuloa̒a limongoli debo odelo taamaa tiliyango Allahu Taa̒ala.

EPESUS 4:4

Bo woluo batanga tuwau, wau Rohu tuwau. Odito olo timongoli tiliyango duo̒lo tuwau halapani u tutuuwauwa.

PILIPI 3:14

Uito sababuulio watia tumeteo̒ tulusi motidulunga ode patuju pulitio umoo̒ toduo ohohaama, deu̒ito-yito tutumulo tosologa; woleeto boitolo Allahu Taa̒ala lotianga olanto lotimbulude li Isa Almasi.

KOLOSE 1:12

wau wolo lapali oduo̒lo odeli Paapa. Sababu ti Paapa boitolo talohutu mai olimongoli paatuti mololimo wolo upilo dapato lo Allahu Taa̒ala ode umati-Lio todelomo yilaidia-Lio u mobaango.

KOLOSE 1:22

Bo botia, wolo opopate lo Wala-I̒o, Allahu Taa̒ala lohutu mai wumbuta limongoli wo-Lio lowali luli lopiohe. Wolo dudelo boito timongoli lowali dilelo-Lio lotaalua Allahu Taa̒ala todelomo owowoluwoa u mantali, belesi wau diila oa̒abu.

KOLOSE 3:12

Wutato yito umati lo Allahu Taa̒ala. Allahu Taa̒ala lomonu olimongoli wau lolulaota olimongoli u tolomodu lowali miliki-Lio. Uitolo sababuulio timongoli musi mopo biloheo̒ modehu hilao, timongoli musi ohilaa mopiohe, motidupapa lohilao, molumboyoto lohilao, wau tahangi modutolo.

1 TESALONIKA 2:12

Amiaatia monaseehati mai olimongoli, amiaatia mongohi mai sumangati olimongoli wau amiaatia mohuntulai alihu timongoli tumumulo odito rupalio tunggula moo̒ sanangi hilaa lo Allahu Taa̒ala. Sababu Allahu Taa̒ala malo tianga olimongoli u lowali walaga Dunia Bohu lo Allahu Taa̒ala wau moo̒laasa odudua̒-Lio.

1 TESALONIKA 5:27

Tokawasa lo Eeya, pohile laatia lou̒ tio̒otutua alihu timongoli mopobaca mao̒ tulade botie ode ngoa̒amila wutato tango-iimani.

2 TESALONIKA 1:11

Uitolo sababuulio amiaatia laito hipo dua̒awa mola olimongoli. Amiaatia helodua̒ mola alihu Allahu Taa̒ala mopowali olimongoli paatuti u tumumulo modudua̒ kahandaki-Lio; ode ui-uitolo Tio motianga olimongoli. Pohileaala dua̒ Allahu Taa̒ala, wolo kawasaa-Lio mopoo̒polu mai u otohilaa limongoli u mohutu mopiohe wau mopo wimumuto ngoa̒amila kalaja u hepohutuo limongoli sababu palacaya li Almasi.

2 TESALONIKA 2:14

Woleeto boitolo Allahu Taa̒ala lotianga olimongoli lotimbulude to Habari Mopiohe u pilohabari mai lamiaatia olimongoli. Allahu Taa̒ala lotianga olimongoli, sababu otohilaa-Lio alihu timongoli modudua̒ moo̒laasa mao̒ odudaa̒ lo Eeyanto Isa Almasi.

1 TIMOTIUS 6:12

Pohipatelo tio̒otutua u tumumulo odelo taulo Nasara alihu yio̒ moo̒wahu pahala lo tutumulo u tutuulio tutu wau ohiheo-hiheolo mao̒. Sababu woleeto boitolo Allahu Taa̒ala motianga olemu tou̒ yio̒ momasisi mao̒ totalu lotaa dadaata deu̒ yio̒ palacaya li Almasi.

1 TIMOTIUS 6:2

Mongo wato u tituanilio taulo Nasara, diila mowali mopoleme oli tuanilio sababu timongolio tinggai taulo Nasara. Tumbao̒ timongolio wajibulio momaya oli tuani limongolio boito wolo lebe mopioheo̒, sababu tituani tabilaya lou̒ mopiohe boito yito pee̒-pee̒nta taa palacaya tapilonua. Ngoa̒amilalo botie mamusi pongaajalimu wau ponasehatia mao̒.

2 TIMOTIUS 1:9

Allahu Taa̒ala lopoa̒ahu olanto wau lomonu olanto alihu mowali umati-Lio lohihilao. Tio lohutu mai uito diila patopatoa̒ tou̒ wolo umaa kilalajanto, bo patopatoa̒ to lanjana-Lio lohihilao wau odehu hilaa-Lio. Tio longohi mai odehu hilaa-Lio lotimbulude li Isa Almasi tou̒ dunia botie diipo pilowali-Lio mai.

2 TIMOTIUS 2:7

Toloe̒elai mola wolo u tiloo̒woliu̒ mai boito, sababu Eeya mamongohi mai olemu owalia u mongalati ngoa̒amilalo.

IBRANI 10:19

Naa, Mongo wutato, wolo opopate li Isa boito ito botia buheli tumuwoto ode Huwali Leidaa̒ Laba-labaalo mantali.

IBRANI 10:21

Wau ito masaatia o ngotaalio iimamu tau̒daa̒, tatihu-tihula duo̒lo Bele lo Allahu Taa̒ala.

IBRANI 10:23

Mamusi ito motidihu tio̒otutua to halapani upilo ngakuwanto, sababu Allahu Taa̒ala mowali palacayalo wau Tio mamoe̒elai danti-Lio.

IBRANI 13:22

Watia mohalapu alihu timongoli mopoo̒ tuotao̒ nanaa-sehatiyalo laatia botie lou̒ sabali, sababu tuladu lowatia botie diila boti hayahayao̒.

IBRANI 2:11

Ti Isa lopo belesi manusia lonto duduu-sawaalo limongolio; wau Tio talo pobelesi, wau timongolio tapilo belesi boito pee̒-pee̒enta o Allahu Taa̒ala tuwa-tuwaulo. Uitolo sababuulio ti Isa diila loolito longaku olimongolio boito odelo mongo wuta-Tio.

IBRANI 2:17

Utie boliilio deu̒ Tio musi mowali motutuwau wolo mongo wuta-Tio todelomo totoonulalo sua̒li. Wau woleeto boito Tio mowali Iimamu Daa̒ taatatapu wau molotolo hilao wau odehu hilao. Wolo bubayaa-Lio boito dusa lomanusia lowali ilambungu.

IBRANI 3:12

Mongo wutato, poo̒daha-dahaalo mao̒ diila bolo woluo to wolotamu ngotaalio tahilaalio odito leetio wau diila o iimani, tilinggula tio mobale wau mohalahe monto Allahu Taa̒ala tatumu-tumulo!

IBRANI 3:14

Ito ngoa̒amila yito tamani ngopo hipate woli Isa Almasi, asali ito demola pulitio modihu tio̒otutua oyoyakini u mililikinto tou̒ bohulio mai.

IBRANI 6:20

Ti Isa malomuo̒ dalalo ode tambati boito olanto, wau maa tilumuwota mola odito lowali Iimamu Daa̒ olanto u ohiheo-hiheolo mao̒, debo odelo ti Iimamu Melkisedek.

IBRANI 7:26

Oditolio, ti Isa boitolo ti Iimamu Daa̒ tapalaa-luwonto. Tio mantali, to o-Lio diila odungga totala meaalo penu boli dusa wolo. Tio pilohalahu lonto tahi oduusawa, wau pilobotulo demola tambati ulebe molanggato wolo ngoa̒amilalo hulungo.

IBRANI 7:28

Butoo̒ agama lo Yahudi momuduo̒ tau udiila wimu-wimumuto tutu daa̒ iimamu molamahu. Bo lapatio mao̒ lobutoo̒ boito, Allahu Taa̒ala lohutu mai danti wolo tadia deu̒ Tio momuduo̒ odelo Iimamu Daa̒, Walao̒ tamaa pilowali Tamoo-poa̒ahua tawimu-wimumuto tutu u ohiheo-hiheolo mao̒.

IBRANI 9:11

Boti Almasi malei dungga mai odelo Iimamu Daa̒ lonto susuu-aliyaalo u mopiohe u mawoluo. Kema lo Eeya tou̒toonu Tio loponao̒ lotuugasi-Lio odelo Iimamu Daa̒ yito kema ulebe udaa̒ wau lebe wimu-wimumuto tutu. Uito diila pilohutu lomanusia; bolilio mao̒ asaliilio mai diila lonto dunia u pilopowali botie.

IBRANI 9:15

Uitolo sababuulio ti Almasi lowali Pilo timbulude ode tuwaulio lodaantia u bohu, alihu taa umaa tiliyango Allahu Taa̒ala moo̒ tolimo babaa-lakatiyalo ubakaa umaa pilodanti mai lo Allahu Taa̒ala. Ngoa̒amilalo boito mowali motoduo sababu mailoluo tailate, deu̒ito-yito ti Almasi; wau opopate-Lio boito helo polopato tau lonto totoonulalo totala u pilohutu limongolio tou̒ dantia ubohulio donggo pohupohutu.

1 PETRUS 2:9

Bo timongoli yito bangusa tatilulaoto, mongo iimamu tamomaya li olongia, bangusa tamantali, tolomodu duo̒lo Allahu Taa̒ala, umati lo Allahu Taa̒ala lohihilao. Allahu Taa̒ala lolulaota olimongoli wau lotianga olimongoli yilumuwalo lonto u modio̒lomo u tumuwoto ode delomo baa-Ngio ulaba-labaalo mobaango, wolo makusudu alihu timongoli mopololadu habari pasali lo totoonulalo huhutuu-Lio upolu-polutuo̒.

1 PETRUS 3:5

Wolo dudelo utieelo tojamani muloololio mai mongobua o agama tahemo halapu to Allahu Taa̒ala helo poo̒gaaga batangalio lou̒ taa̒luku todile limongolio.

1 PETRUS 5:1

Pohile laatia tomongo tau̒wa lojamaa̒ limongoli mopoo̒ tuotao̒. Watia loluladei tulade botie odelo tamani sama-sama tau̒wa wau odelo taa umalo sakusi lohihilao polodutolo lo Almasi, wau tamamo dudua̒ olo poudaa̒alo, wonu bolo odudaa̒ Almasi pobilohulo ode manusia. Pohile laatia lou̒ tio̒otutua

1 PETRUS 5:10

Bo lapatio mao̒ timongoli modutolo ngopee̒ mola, Allahu Taa̒ala lohihilao mamohutu mai olimongoli mowali wimu-wimumuto tutu. Tio mamopo tihula wau mopoo̒ lotolo olimongoli wau mopotoheto olimongoli. Sababu Tio yito Allahu Taa̒ala tamopiohe daa̒ hilaa-Lio, tamalo tianga olemu u lodudua̒ helolaasa odudaa̒a-Lio ubakaa lotimbulude toli Almasi.

1 YAHYA 1:3

Wolo umaa iloontonga wau ilodungohe lamiaatia, uitolo olo u pohabario mai lamiaatia olimongoli, alihu timongoli pee̒-pee̒enta wolamiaatia modudua̒ molaasa hitua-tuawua todelomo hilao to tutumulo motituwau woli Paapa wau wolo Wala-I̒o Isa Almasi.

YUDAS 1:1

Mongo wutato tamaa tiliango wau tapilonua daa̒ lo Allahu Taa̒ala ti Paapa, wau dilaaha duo̒li Isa Almasi. Odelo wato li Isa Almasi watia – Yudas – wutatee Yakobus,

WAHI 17:14

Timongolio mamopaatea moluwali Walao̒ Himba boito. Bo Walao̒ Himba boito wolo tahidudua̒ o-Lio utatapu wau molotolo hilao tamaa tiliya-Ngio wau tilulao-Tio boito mamo poo̒laaheo̒ mongo olongia boito, sababu Tiolo Eeya lou̒ totoonulalo tuani, wau Olongia lou̒ totoonulalo olongia.”

WAHI 18:20

Wuu sologa, poti wengahulo mola to oa̒antulu lokota boito! Wuu umati lo Allahu Taa̒ala, mongo rasulu, mongo nabi, poti wengahulo mola! Sababu Allahu Taa̒ala malo hukuumani mai olio odelo toli tou̒ wolo umaa pilohutulio limongoli!