Matius 13:52 - O GIKIMOI AWI JAJI ma BUKU

⁵² Kagena de Una lo wotemo onaka, “Nako komagena, de kanaga o ade-ade moili komanena: Nakoso o guru agama moi kanaga wogolo la o dodoto ma ngale o Gikimoi Awi pareta gena widoto, de o guru agama magena aku wisitero maro o tahu ma duhutu moi, ena gena awi kaya eko awi arata magena ma ngihino wosisupu de wasikelelo awi arata damomuane de lo awi arata idodoma.”

Matius 13:52 ပူးပေါင်းရင်းမြစ်များ

Matius 12:35

O nyawa la kanaga de manga sininga daloha, manga siningano asa o loha isupu, sababu manga siningaka o loha yadiahika. De o nyawa la kanaga de manga sininga datorou, manga siningano asa o dorou isupu, sababu manga siningaka o dorou yadiahika.

Matius 13:51

Dabolo de o Yesus Awi muri-muri wasano wotemo, “Idodooha Ai ade-ade dangodu magena ngini nisihodaka.” Ona itemo, “Miosihodaka bolo.”

Matius 13:53

O Yesus o ade-ade magena wosijarita daboloka, de womajobo

Matius 23:34

Ngini nia ete de nia topora idodoma kanaga o bi nyawa itotiai yadadala gena yatoomaka, ma nonoma magena o Habel, una o nyawa moi idodomaka gena o moi-moi o kia itotiai gena waaaka, sidago ma duduuru o Zakharia, o Berekhya awi ngopa, una gena niwitooma o Gikimoi Awi Tahu ma lolohaka, kiaka o tahu o gaso yatutupu ma riho gena ma soaka. So ngini o bi nyawa o orasi manena o bi nabi gena Ngohi lo asa tasulo bilasu itagi nginika, ona magena icocawaro de Ai dodoto gena aku inidoto. Ma binuka ngini asa niatooma, ma binukali asa niasangahadi, de lo ma binuka asa nia puji ma bi tahuka niangangapo de ma binukali asa niaginihi so o bi doku nisigeto kiaka ona ilodaka. Ma dodoguka ngini o bi nyawa o orasi manena nia ete de nia topora, kiaka idodoma o nyawa itotiai yatotoomaka, to ona manga sala asa niamoku.

Matius 28:19

So nitagi ma bati o bi bangsa o dunia ma ngoguka niaado de o bi nyawa yangodu niadoto la ona idadi to Ngohi Ai nyawa imomote. Niaosi ona de o Baba Gikimoi, de ma Ngopa, de lo o Gurumi Datetebi to Ona Manga ronga.

Lukas 11:49

Komagena so o Gikimoi de Awi demo icocawaro wotemo, ‘O bi nabi de lo o bi sosulo Ngohi asa tasulo bilasu itagi ona magenaka, de Ai dodoto la aku inidoto. Ma binuka ngini asa nitooma, de ma binukali asa nisangisara.’

Yohanes 13:34

De kanaga o sulo ma demo damomuane moi tinihike nginika, ena gena ngini bilasu nimatekedodara moi de moika. La imatero maro Ngohi tinidodara nginika, komagena lo ngini bilasu nimatekedodara moi de moika.

2 Korintus 6:10

Kanaga ngomi gena mia sininga ipeleso, duma kanaga o orasi isigeto-geto lo ngomi mia sininga ka danali. Kanaga ngomi gena o nyawa isususa, duma kanaga lo ma ngale ngomi o Gikimoi Awi laha gena misihabari o nyawa yadadalaka, so ona aku idadi maro ikakaya. De kanaga lo ngomi gena maro o kia-kiawa miamake, duma kanaga ngomi lo o bi moi-moi dangodu de maena o Gikimoi womisitodihike so daboloku idadi ka to ngomi masirete.

Efesus 3:4

De nakoso o kia naga talelefo magena ngini niabaca, de ngini asa nianako igogou ngohi tosihoda dabolo o Gikimoi Awi ngale kiaka ma Kristus wosiganapuka.

Efesus 3:8

Nako ngohi de o Gikimoi Awi nyawa ma binuka, de igogou ona magena foloisi yolamo de ngohi. Ngaroko komagena, duma ngohi gena o Gikimoi Awi laha so asa woihike o manara la o habari daloloha tosihabari ngini o Yahudika ma nyawa nisowo. O habari ma ngale gena ma Kristus Awi laha foloisi ilalamo kekiaka paakuwa patuga.

Kolose 3:16

De nakoso igogou o Gikimoi Awi laha ma lamo gena niososininga, so ma ngale Una ninyanyi la niwigiliri, de ngini de nia mazmur de nia giliri lo nisinyanyi, de lo o nyanyi magena Awi Gurumino so tanu nimacocawaro la nimakodoto de nimatekesitiari. La tanu o dodoto ma ngale ma Kristus magegena ngini aku foloisi nianako igogou de daloha.

1 Timotius 3:6

De lo una magena idadiwa wopopareta nakoso o Jou Yesus iwipiricaya iteka waasi, sababu nako komagena done una asa womacaralamo ifoloi de wotemo dangodu ka wanako, de ma duuru o Gikimoi asa wisisala. Magena imatero de o Iblis lo idomaka asa womacaralamo so o Gikimoi iwisisala.

Titus 1:9

Manga bobareta una magena bilasu wopiricaya igogou o habari daloloha ma ngale o Yesus Kristus maro o kia ngohi dede ngona powidotoka. La una o dodoto itotiai o nyawa ipipiricayaka wadoto womatoguwa, de wasiduduga so ona asa yamote. Una magena bilasu awi piricaya daputuru o Yesuska la igogou una lo wobarani wasidapano o nyawa nagoona o dodoto itotiai yahoholu, so ona asa yanako igogou ona masirete isala.