Lukas 9:20 - O GIKIMOI AWI JAJI ma BUKU

²⁰ So kagena de o Yesus wosano onaka, “Duma nako ngini masirete, Ngohi manena naguuna.” O Petrus wotemo, “Baba, Ngona manena o Salamati ma Kolano, kiaka o Gikimoi wojajika.”

Lukas 9:20 ပူးပေါင်းရင်းမြစ်များ

Matius 22:42

“Nako o Salamati ma Kolano Una magena, to ngini nia dakolo idodooha. To Una Awi aheli naguunano.” Ona yosango, “Una magena Awi sihino o Daud awi ahelino.”

Matius 26:63

Duma Una womarihika bato. La ma Imam Wilalamo wisano kali Unaka, “De o Gikimoi woooho Awi ronga, nosingangasu ngomino! Igogou, Ngona o Salamati ma Kolano de o Gikimoi ma Ngopa?”

Matius 5:47

De nakoso ngini niahoromati de ka cawali nia dodiaoka gena, foloisi daloha hiwa bai! Ce! O bi nyawa o Gikimoi wipipiricayawa lo aku yaaka maro komagena.

Markus 14:61

Duma Una womarihika bato, dangodu wabisangowa. La ma Imam Wilalamo wisano kali Unaka, “Igogou, Ngona o Salamati ma Kolano de o Gikimoi Wilalamo ma Ngopa?”

Markus 8:29

So kagena de o Yesus wosano onaka, “Duma nako ngini masirete, Ngohi manena naguuna.” O Petrus wotemo, “Baba, Ngona manena o Salamati ma Kolano.”

Lukas 22:67

Ona magena wisano Unaka, “Nomisingangasu ngomika, igogou Ngona manena o Salamati ma Kolano?” Una wosango, “Ngaroko lo Ngohi tinisingangasu nginika, duma ngini asa nipiricayawa.

Lukas 9:19

De ona isango itemo, “Kanaga ma binuka itemo o Yohanes Wooosi, de ma binukali itemo o ma nabi Elia, de o nyawa ma somoali itemo Ngona o nabi idodoma moi so kanaga wooho kali.”

Yohanes 1:41

De o Simon wihiwa so o Yesus wikurumi dabolo, de o Andreas una cai-cai awi ria wisari. So wimakeka, de gila-gila awi ria o Simonka wotemo, “He! To ngone nanga Salamati ma Kolano gena ngomi miwikeleloka.” (Gena o bahasa Ibrani itemo o Mesias, imatero de o bahasa Yunani itemo o Kristus, gena ma ngale Una o Gikimoi wijajajika so asa wonasisalamati.)

Yohanes 1:49

Kagena de o Natanael wotemo, “Wewe! Baba Guru, so Ngona ka noinako bai! Igogou-gogou, Ngona gena o Gikimoi ma Ngopa. Ngona manena o Israelka ma nyawa manga Kolano.”

Yohanes 11:27

“Iya, Jou! Tagogou ngohi ifoloi tonipiricaya, Ngona gena o Salamati ma Kolano o Gikimoi Awi Ngopa, gena o Gikimoi wojajajika wotemo Una done asa wouti o duniaku.”

Yohanes 20:31

So o nonako ihahairani waaaka magena, ngaroko dangoduwa, duma asa isilefoka, la ma ngale ngini aku niopiricaya igogou o Yesus Una magena o Salamati ma Kolano de lo Gikimoi ma Ngopa. De nakoso ngini asa niwipiricaya Unaka, de ma sababu ma ngale Una magegena so aku niamake o oho ma duhutu.

Yohanes 4:29

de motemo, “Niahinosi! La potagi nanga sumuka de kagena o nyawa moi niwikelelo. Ngaroko ngohi woinako waasi, duma Una aku ka wanako to ngohi ai manara moi-moi idodoma taaakaka, so magena dangodu woisingangasu ngohika. Igogou, Una magena o Salamati ma Kolano, eko idodooha.”

Yohanes 4:42

De ona asa o ngopedeka magena imidedemo itemo, “Ma sababu ma nonoma gena ngona nomisingangasu so Una miwipiricaya, duma o orasi manena ngomi Una miwipiricaya sababu ngomi masirete lo asa miwikelelo de miise ka Unano. So ngomi aku mianako igogou Una asa o bi nyawa o dunia manena ma dokuka manga dorouno wasisalamati.”

Yohanes 7:41

Kanaga ma binukali itemo, “Nagala Una gena o Salamati ma Kolano.” Duma ma binukali kanaga itemo, “Dadoohaso o Salamati ma Kolano de o Galileano ma nyawa moi.

Rasul 17:3

Ena gena, una wadoto o Gikimoi Awi buku ma demo, de igogou o demo magena ma ngale o Salamati ma Kolano Una magena bilasu wosangisara de wosone, duma asa wooho kali, de o Paulus wotemoli, “O Yesus ngohi tinisihohabari gena, Una magena o Salamati ma Kolano.”

Rasul 8:36

Ona itagi yamote o ngeko magena, de imasidiado o riho moika de ma akeka. La o Etiopia ma nyawa una magena wotemo, “He! O ake lo madahe! Hino pouti, la kagena de noiosi.” [

Rasul 9:22

Duma o Saulus awi kuasa ma buturu idogo so ma orasi wasihabari manga siningaka ifoloi yadahe, de lo una wosinako itiai o Yesus Una magena o Salamati ma Kolano sidago o Yahudika ma nyawa o Damsyikka igogogoge gena ka isango lo waali.

1 Yohanes 5:1

Nakoso kanaga o nyawa la yopiricaya igogou o Yesus Una magena manga Salamati ma Kolano, de ona yangodu igogou o Gikimoi Awi ngopa-ngopaka. De lo nakoso o Gikimoi Awi ngopa ona magena la kanaga yodupa ma Baba o Gikimoi widodara, de ona manga dodiao ma binuka lo, ma Baba Awi ngopa-ngopa, ona magena bilasu yadodara.