Lukas 6:23 - O GIKIMOI AWI JAJI ma BUKU

²³ Komagena lo idomaka to ona manga ete de manga topora o bi nabi yasangisaraka. So hika ninali de nia more ilamo. Sababu nia fanggali daloha icarawa gena o Gikimoi wosidailako dabolo kadaku o sorogaka.

Lukas 6:23 ပူးပေါင်းရင်းမြစ်များ

Matius 5:12

Komagena lo idomaka o bi nabi yasangisaraka. So hika ninali de sininga ifoloi isanangi. Sababu nia fanggali daloha icarawa gena o Gikimoi wosidailako dabolo kadaku o sorogaka.”

Lukas 1:41

De komagena ami salam gena ongo Elisabet moise, de to muna ami ngopa ami roheka magena imahiti, de o Gurumi Datetebi Awi kuasa daasu-asu asa iwosa munaku de wopareta.

Lukas 1:44

Ato ani salam toise, de o ngopa ai poko ma rabaka gena imahiti de ma nalika.

Lukas 6:35

Ngaroko he upa komagena! Duma o nyawa nidodoosa ona gena lo bilasu niadodara de lo niaaka daloha. Nagoonaka bato o kia naga niasibau, de upa he niongongano done aku isigiliho kali nginika, de nia manara magena o Gikimoi wafanggali gena foloi ilamo. Nako komagena, de ngini gena niaaka imatero de nia Baba o sorogaka Awi ngopa-ngopa. Sababu Una Awi sininga ma loha gena ma meta o nyawa yananakowa manga sukuru yatide de ma meta lo o bi nyawa manga sininga datotorouka.

Rasul 14:10

so wiaso womaili-ili wotemo, “Nomaoko nomabobolowoye!” De o nyawa una magena womasitudu de gila-gila wotagika.

Rasul 3:8

so womasitudu womaoko de wosolano wositagika. Komagena dabolo una wowosa dede ona o Gikimoi Awi Tahuka, so wotagi womasitutudu de awi nali de awi more o Gikimoi iwigiliri.

Rasul 5:41

So o bi rasul ona magena o Mahkamah Agamano isupu de manga nali de manga more, sababu o Gikimoi wasitatapu so ma ngale o Yesus bilasu o sangisara de o totadi yamake.

Roma 5:3

De komagena lo ngone inanali, nakoso ma ngale o Jou Yesus powipiricayaka, so kanaga ngone inasisangisara. Sababu ngone panako nakoso inasangisara, so nanga piricaya asa foloisi idadi daputuru so o sangisara gena pamoku.

2 Korintus 12:10

So nakoso ngohi ai buturu ikurangi, de ngohi gena asa tosanangi. Ngohi tosanangi nakoso ai ronga ma dorou yogaka eko ngohi de ai kurangi, de lo nakoso ngohi o sangisara de o susa ma rabaka ma ngale ma Kristus gena towipiricaya daputuru. Sababu nakoso ngohi kanaga de ai buturu sutu ikurangi, de ma Kristus Awi kuasa asa ngohi isiputuruka.

Kolose 1:24

Igogou, ngohi asa inali nakoso ma ngale ngini so ngohi aku isangisara. Ena gena, o gogobu yangodu magena maro ma Kristus Awi rohe masirete, la ma ngale ona gena imatero de idomaka Una iwisangisaraka, komagena lo ngohi o orasi manena ai rohe isangisara gena aku ona tariwo maro to Una Awi dagali moi.

2 Timotius 2:12

De nakoso ngone o sangisara pamoku daputuru, asa o nyawa ngone lo popareta dede Una. Duma nakoso ngone potemo Una powinakowa, asa Una lo wotemo ngone wonanakowa.

Ibrani 11:26

Una o arata o Mesir ma tonaka gena woholu wamake de waetoka ifoloi daloha wosangisara, sababu imatero de o Salamati ma Kolano, kiaka o orasi ma simaka asa Una womasidiado. Sababu una o Musa gena womasosininga awi piricaya ma fanggali o sorogaka done o orasi ma duuruka de wamake.

Ibrani 11:6

Ka idadiwa o Gikimoi powisisanangi, hitilahi ngone powipiricaya. Sababu o nyawa la kanaga yodupa imasidate o Gikimoika, ona magena bilasu yopiricaya igogou o Gikimoi kanaga, de lo yopiricaya igogou Una wafanggali daloha o nyawa iwisasari la iwinakoka.

Yakobus 1:2

Ai dodiao nipipiricaya, ngaroko o sangisara eko o susa kia bato niamake, hika ngini ka ninali.

1 Petrus 4:13

So ngini gena upa niohairani duma bilasu ka ninali de nia moreka, sababu maro ma Kristus wisangisaraka komagena ngini lo kanaga nisangisara. La done ma orasi Una wahino kali de Awi mulia gena o Gikimoi wosikelelo, de ngini nia nali gena foloisi ilamo.

Gogelelo 2:17

He! Ngini nakoso de nia ngauka, tanu niise o kia Ngohi de o Gurumi Datetebi so mitemo o bi gogobu-gogobuka. O nyawa nagoona nakoso o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura, so ona magenaka asa Ngohi tahike o ino manna yaiihu, ena gena o kia yadodiahi o sorogaka de lo tahike o teto daaare moi. O teto magenaka kanaga yalefo o ronga damomuane de magena o nyawa nagoona lo yanakowa ka cawali ona masirete yamamake asa yanako.”

Gogelelo 2:26

O nyawa nagoona nakoso ona o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura de to Ngohi Ai demo lo yaaka sidago o orasi ma dodoguka, ona magenaka asa Ngohi o kuasa tahike la ona asa o bi bangsa dangodu yapareta.

Gogelelo 2:7

He! Ngini nakoso de nia ngauka, tanu niise o kia Ngohi de o Gurumi Datetebi so mitemo o bi gogobu-gogobuka. O nyawa nagoona nakoso o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura, so ona magena asa Ngohi tasimaha o oho ma gota ma sopo, kiaka o Gikimoi Awi goge daloloha (eko o Firdaus) ma rabaka, yadehe la yaodo so yooho ka sidutu ikakali.”

Gogelelo 21:7

De lo o nyawa nakoso ona o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura, de ona magena asa Ngohi o bi moi-moi dangodu tahike onaka. De lo Ngohi asa todadi to ona manga Gikimoi, de ona asa yodadi to Ngohi Ai ngopaka.

Gogelelo 3:12

Sababu nakoso o nyawa la o dodoto ikokulai yaholu de Ngohi ipiricaya daputuru maro o prajurit moi imakudubu sidago lo watura, de ona magena asa Ngohi tasitatapu, maro idadi o Gikimoi Awi Tahu ma didiki. De ona magena asa o riho magena yadongosa kawa. De ona magenaka lo asa Ngohi talefo o Gikimoi Awi ronga de Awi kota ma ronga, gena o Yerusalem damomuane o Gikimoi Awi pareta ma rabaka gena o sorogaku asa iuti. De asa lo to Ngohi Ai ronga damomuane moi manga bioka talefo.

Gogelelo 3:5

O nyawa nagoona nakoso ona o dodoto ikokulai yaholu de Ngohi ipiricaya daputuru, ona maro o prajurit moi imakudubu sidago lo yatura so ona magena asa o baju daaare yasitibaka. Komagena so Ngohi to ona magena manga ronga upa tapiki o oho ma buku ma rabaka, ena gena o nyawa ioho ka sidutu ikakali ma bukuka, de Ai Baba de lo Awi malaikat-malaikat manga simaka asa tosibicara totemo igogou ona magena lo to Ngohi Ai nyawa.