Ibrani 4:2 - O GIKIMOI AWI JAJI ma BUKU

² Sababu ngone lo o habari daloloha gena poiseka, ka imatero de nanga ete de nanga topora ona magena idomaka. Duma o habari kiaka yoiiseka gena ona magena asa yopiricayawa, so ma faida ihiwa onaka.

Ibrani 4:2 ပူးပေါင်းရင်းမြစ်များ

Rasul 13:46

Kagena de o Paulus de o Barnabas foloi yobarani so ibicara itemo, “O Gikimoi Awi demo bilasu idoma kasi minidedemo ngini o Yahudika. Duma ngini niopiricaya niholu so komagena isikelelo, ngaroko itiaiwa ma ngale niamake o oho ikokakali. Mutuwade o orasi manena ngomi minidohaka la ma ngale mitagi o Yahudika ma nyawa yasowoka.

Rasul 3:26

Ma ngale komagena o Gikimoi o Yesus wihiri maro Awi Leleani moi, so wahino wodomano ma ngale ngini o Yahudika, la komagena o Gikimoi Awi laha winisidumu nginika la ngini ningodu aku nimatoba de niodongosa nia manara moi-moi datotorou magena.”

Roma 2:25

Ai edekati gena komanena: Ma ngale ngini o Yahudika ma nyawa o Gikimoi Awi nyawa masirete so ngini gena nimasunaka. De magena ma faida ilamo nakoso Una Awi bobita gena niaaka. Ngaroko komagena, duma nakoso ngini o bobita gena niaakawa, de ngini gena asa nidadi maro Una Awi nyawa dasowo so imatero maro o nyawa imasuna waasi.

Roma 3:3

So nagala o nyawa kanaga itemo kali, “Igogou, o Yahudika yamuruo naga o Gikimoi Awi demo gena yaakawa. Ngaroko komagena, ma ngale ihiwa, Una Awi jaji upa wosiganapu.”

1 Korintus 13:3

De lo ngaroko ngohi kanaga ai arata dangodu tahike o nyawa isususaka de lo ma ngale o Jou Yesus towipiricaya so ngohi ai rohe tahike la o nyawa aku yatupu, duma ai dodara o nyawaka gena he ihiwa, de ngohi ai oho gena asa ma faida ka ihiwa.

Galatia 3:2

So komagena ngohi todupa ngini niosininga o Gurumi Datetebi niamake gena, upa nitemo ma sababu o Yahudika manga bobita o Gikimoino niamote ma ngale niaaka nia sininga itotiai, duma ma sababu ngini asa o habari daloloha niiseka de ma Kristus niwipiricayaka.

Galatia 3:8

De lo idomaka o Gikimoi Awi Bukuka isilefo done o nyawa o Yahudika yasowo, nako Una wipiricayaka, done Una asa to ona manga sininga waaka itiai. De idodoma Una o habari daloloha asa o Abraham wisingangasuka wotemo, “Sababu ma ngale ngona done Ngohi asa o bangsa yangodu o duniaka Ai laha gena tasidumu.”

Galatia 4:13

Ngini niosininga de nianako igogou, kanaga ngohi ai siri ma rabaka so ngini nia dokuka bilasu totulu de o habari daloloha asa tinisihabari nginika.

1 Tesalonika 1:5

Ngomi mianako komagena, sababu ma orasi o habari daloloha ngomi minisingangasu nginika de iniado nia sidongirabaka, upa cawali de ka o demo so ngini asa o habari magena niadehe. Duma ngini niadeheka, sababu ma orasi o Gikimoi Awi nonako ihahairani de Awi kuasa winisikelelo nginika, de lo o Gurumi Datetebi asa winisiputuru sidago niopiricaya o habari magegena igogou de itiai. Komagena lo ma orasi ngomi kagena ngini kasi, de ngini nianako idodooha maro to ngomi mia oho de lo mia bicara nginika ma ngale ngomi miniriwo daloha.

1 Tesalonika 2:13

De lo mia sumbayang ma rabaka dangodu kanaga lo mitemo, “Ya, Jou! Ani laha ka ilamo poli.” Sababu ma orasi o Gikimoi Awi demo minisihabari so niise gena, ngini niadehe daloha, sababu nianako o demo magena to nyawa manga demowa, duma ngini nianako igogou-gogou magena to Gikimoi Awi demo, de Awi demo magena imanara to ngini nipipiricaya nia sininga ma rabaka.

1 Timotius 4:8

Sababu o demo ma duuruka manena, gena igogou so bilasu o nyawa inangodu padehe daloha, ena gena, “O nyawa la cawali manga rohe isiputuru gena ma faida ka ma cunu, duma o nyawa la yaaka daloha maro o Gikimoi wodudupa gena, ma faida foloisi ilamo. Magena ma faida ilamo, sababu o orasi manena o Gikimoi asa Awi laha wosidumu onaka de o orasi ma simaka ona asa yamake o oho ka sidutu ikakali.”

Ibrani 11:6

Ka idadiwa o Gikimoi powisisanangi, hitilahi ngone powipiricaya. Sababu o nyawa la kanaga yodupa imasidate o Gikimoika, ona magena bilasu yopiricaya igogou o Gikimoi kanaga, de lo yopiricaya igogou Una wafanggali daloha o nyawa iwisasari la iwinakoka.

Ibrani 3:12

Ai dodiao nipipiricaya, hika nimasidodiahi. Upa sidago ngini moi lo de nia sininga ma dorou so nipiricaya kawa komagena, sidago o Gikimoi wooohoka gena niwidongosa.

Ibrani 4:6

So ona gena Una wisigisewa, so wasimahawa la yowosa de yogogewa dede Una. Ngaroko komagena, duma to Una Awi ngale de maenasi, ena gena bilasu o nyawa lo kanaga ma binuka aku yogoge dede Una.

Yakobus 1:21

Komagena so o dorou moi-moi dangodu la kanaga nia sininga ma rabaka ioho gena, bilasu niaumo, maro o dumule la nia doroka ioho de magena bilasu niatumule. De o Gikimoi Awi demo la nia sininga ma rabaka wosingosaka, magena maro o gisisi o doroka podato. So Awi demo magena upa niaholu to ngini nia sininga ma rabaka, duma hika de nia sininga damuudu niodupa nisigise daloha. Sababu de o Gikimoi Awi demo ma buturu gena aku o dorouno ngone inasalamati de pamake o oho ka sidutu ikakali.

1 Petrus 1:12

Ona magegenaka o Gikimoi wasingangasu, la Awi demo kiaka ona isingongangasu magena ma meta gena ona kawa, duma ma ngale ngini manenaka gena inileleani. De Awi demo isingongangasu magena, o orasi manena naga asa inisingangasu nginika, ma orasi Awi sosulo-sosulo o habari daloloha isihabari gena, de o Gurumi Datetebi Awi kuasa gena o Gikimoino. Awi laha winisidudumu nginika, magena o bi malaikat lo manga dupa foloi daputuru la tanu yatailako.