Ibrani 11:9 - O GIKIMOI AWI JAJI ma BUKU

⁹ Ma ngale awi piricaya so o tona kiaka o Gikimoi wijajaji unaka so una asa womasidiadoka, de wogoge maro ka o nyawa ma somoano moi. So awi dadaru ma dodalake lo ka o barono de kagena wogoge, de komagena lo to una awi ngopa de awi danoku o Ishak de o Yakub, ona lo yamake o jaji magena ka imaketero de o Gikimoi wahihike.

Ibrani 11:9 ပူးပေါင်းရင်းမြစ်များ

Dodadi 12:8

Dabolo de awi dodagi wadofa kali so una de awi nyawa yangodu gena yotagi yokahie o koresaraye o pido moi kagena de ma talaka. So kagena awi dadaru wosigokoye o Betel ma doku de o Ai ma doku ma risoaka. So igoge gena o Ai ma doku o wange ma nyonyiesa de o Betel ma doku o wange ma dumuko. Kagena lo o teto watopuye o nonako moi waaka kali ma ngale o Jou-ka wisuba de lo wigiliri.

Dodadi 13:18

Dabolo de gila-gila o Abram awi dadaru watuluru wokahika o Hebron ma dateka, so de o Mamreka manga seri ma riho o bi gota yomomodo imatekedalateku, so kagena maro o nonako moi o Jou-ka so o teto watolomu de watopuye.

Dodadi 13:3

De o Lot una lo kanaga de awi pedeka de awi gilalo ileleleani de awi duba, o kabi de lo o sapi. De ona gena yodupa yotagi de yomatotuluru o riho moika dabolo de yomatuluru kali o riho ma somoaka, de yogila-gila so yokahika o Betelka. Sidago ona imasidiado o Betel de o Ai ma risoaka, o riho moi gena idodoma kagena o Abram una masirete awi dadaru wosigokoka de o teto maro o nonako moi watopuka, ma ngale kagena o Jou wisuba de wigiliri kali.

Dodadi 17:8

Ngohi asa o Kanaan ma tona manena tinihike nginika, o tona magena kiaka o orasi manena ngona masirete nodogogeka, so koloko o nyawa itatagino. O tona gena dangodu idadi to ngona ani ngopa de ani dano manga pusaka ka sidutu ikakali, de Ngohi asa todadi to ona manga Gikimoi.

Dodadi 18:6

Una womatai-tai awi tahuka wowosa de ma pedekaka wotemo, “Taika! O terigu nadehe sutu ilamo bai gena o liter monahalo de sinoto la o roti noaka.”

Dodadi 18:9

So iodo dabolo de ona itemo, “So ani pedeka, ongo Sara gena, kiaka mahikaka.” De una wotemo, “Muna kadoke naga o dadaru ma rabaka.”

Dodadi 21:34

So daboloku de una magena wogoge ma dekano o Filistin ma nyawa manga dokuka.

Dodadi 23:4

“Baba-baba, ngohi manena o nyawa moi totatagino de ngini nia sidongirabaka togoge. Kodo! Nako daloha de nia tona sutu nihike la ngohi taija ma ngale ai pedeka aku tomipoosu o tona magenaku.”

Dodadi 25:27

Ipasaka, de o Ishak awi ngopa yasinoto magena ona yalamoka, de woriria o Esau gena awi manara wodidiha de wocawaro so wogoge lo ka o ponga ma pidoka. Duma wononongoru o Yakub una o nyawa moi awi sininga irihi so wodupa wogoge manga tahu ma rabaka.

Dodadi 28:4

De lo tanu Awi laha kia o Abrahamka iwisidumuka gena, komagena lo ngonaka sidago lo ani ngopa de lo ani galaweweku. La ma ngale ngona aku napareta o tona eko o doku kia ngona nogogoge magena maro ka o nyawa itatagino moi. O tona magena o Gikimoi iwihike dabolo o Abrahamka.”

Dodadi 31:25

Ma dongoho o Laban womasidiado o Yakubka gena, o Yakub awi dadaru waaka daboloka o Gilead ma tala ma dateka. Komagena so o Laban, de awi gianongoru, de to ona ma ngopa-ngopa lo asa o dadaru imagakali.

Dodadi 35:27

O Yakub wotagi ma bati ma baba o Ishakka wiado o Mamre o Kiryat-Arba ma dateka gena, o Hebron ma tonaka, kiaka idodoma o Abraham de o Ishak kagena igoge maro o nyawa itatagino.

Dodadi 36:7

Ma sababu to ona manga arata gena idala poli so yadogoge idadiwa. Sababu ma tona ipenetoka de lo manga haiwani yapopiara ka idala poli.

Dodadi 47:9

“Baba, ngohi manena o dunia ma bi dokuka totagi-tagi ma deka he o taungu 160-ka. O taungu ma dala magena ma rabaka kanaga ai susa de ai sangisara la ka idala, duma ai taungu ma dala gena yaado waasi dede to ngohi ai ete de ai topora manga oho ma deka.”

Ibrani 6:17

Komagena lo de o Gikimoi. Ma orasi Una idomaka wijaji o Abrahamka de lo awi ngopa de awi danoka, de Una magena wodupa wasinako itiai onaka Awi jaji gena akuwa itagali. Komagena so ma ngale Awi jaji gena wosiputuru so asa wosasi.