16 So magena dangodu o deru ma rabaka iwosaka, maro o kia o bi moi-moi o Gikimoi wosusuloka. O Nuh de ona yangodu ma rabaka yowosaka, de ma ngora magena o Jou waperesuka.
Done ma orasi o tahu ma duhutu womomi de wahika o ngoraka de magena waperesu, de nakoso ngini kanaga o ngora ma duduka nimaokoye, de asa ngini niaso-aso, ‘Jou, kodo! O ngora nomibelenga ngomika.’ Duma una magena asa winisango wotemo, ‘Igogou, ma ngale ngini gena kiano ngohi tininakowa.’
So yofufuma magena yotagi o gososo imaija. So ona yotagi de wokakawi womasidiadoka. Yococawaro yamotoha ona magena, ma ngale manga silo yosidailakoka, so jai-jai ona de wokakawi yowosa imakomote o rarame ma tahuka, de ma ngora he yaperesuka.
De ngone lo powigiliri o Gikimoika la ma ngale ngini gena niwipiricaya o Yesuska, so Una asa ngini winipalihara Awi buturu ma rabaka, sidago ma orasi Una winisalamatika. Magena wosidailako dabolo la done wosikelelo de waaka o orasi ma dodoguka.
So kagena ma deka o wange moruha de o taufani magena itogu-toguwa, so o ake magena idola ifoloi ilamo, sidago lo o deru ilalamo magena lo aku yatide ikuruye.