Dodadi 21:2 - O GIKIMOI AWI JAJI ma BUKU

^2-5 Ma orasi gena he yaadoka, maro o Gikimoi wododedemo o Abrahamka, so o Abraham wiperekika, de ma pedeka ongo Sara gena mitilibu de ma roka awi umuru he o taungu ratu moika asa mosibuo o ngopa yanau moi. So ma baba awi ngopa una magena wisironga o Ishak. De ma ngale wamote o Gikimoi Awi bobita wosusuloka, so ma orasi awi ngopa ma umuru o wange tupaange yaadoka de gila-gila una magena wisuna.

Dodadi 21:2 ပူးပေါင်းရင်းမြစ်များ

Dodadi 17:19

Duma o Gikimoi gena unaka wotemo, “Upa komagena. Ani pedeka ongo Sara done asa o ngopa yanau moi mowisibuo de ngona asa nowisironga o Ishak. Ngohi Ai jaji tacoho tagogou dede ani ngopa una magena de lo to una awi ngopa de awi danoku gena ma bati sidutu ikakali, la ma ngale Ngohi manena gena asa todadi to una awi Gikimoi.

Dodadi 17:21

Duma imaterowa de to Ngohi Ai jaji ani ngopa o Ishakka, gena igogou tacoho so una magena o taungu ma simaka, de ma orasi maro komanena de done asa ongo Sara mowisibuo.” (Nako o bahasa Ibrani ma demo “Ishak” gena ma beto he imatero de o demo moi de ma ngale gena wodohe.)

Dodadi 18:10

De ona manga sidongirabano moi wotemo, “O taungu ma simaka, de ma orasi maro komanena de igogou done asa tokahino kali. De o orasi magena ani pedeka ongo Sara done o ngopa yanau moi mamake.” Kagena o nyawa ona magena kanaga ma pedeka misitatabidudu so manga dadaru ma ngoraka momaokoye, de o demo magena moise.

Dodadi 18:14

Ngohi manena o Jou de kanaga o kia naga moi lo akuwa nitemo taaka taakuwa. O taungu ma simaka, de Ngohi asa tahino kali, de o orasi magegena done asa ani pedeka ongo Sara o ngopa yanau moi mowisibuo.”

Lukas 1:36

He! Nanako ani ria ongo Elisabet muna magena, ngaroko miperekika de o nyawa miaso ami ngopa ihiwaka, duma morohe he o ngoosa butanga dabolo. Igogou, muna lo done asa o ngopa yanau moi mowisibuo.

Rasul 7:8

So kagena de o Gikimoi wojaji o Abrahamka, de wotemo nako o Abraham awi nyawa la imasunaka, magena o nonako moi yaakaka ma ngale o jaji magena ona lo yodupa. So o Abraham awi ngopa o Ishak wisibuoka, de asa wisuna ma orasi awi umuru o wange tupaangeka. So komagena lo awi ngopa de awi dano o nonako magegena yacoho, ena gena o Ishak wisuna awi ngopa o Yakub de lo o Yakub wasuna awi ngopa yamogiowo de sinoto, ona magena to ngone nanga ete de nanga topora.

Roma 9:9

Hika ngini nimasininga ma orasi o Gikimoi wijaji o Abrahamka, de Una wotemo, “O taungu ma simaka de ma orasi maro komanena, de igogou done Ngohi asa tokahino kali. De o orasi magena ani pedeka ongo Sara done o ngopa yanau moi mamake.”

Galatia 4:22

Walefoka, o Abraham kanaga de to una awi ngopa gena yanau yasinoto. Awi ngopa woriria gena awi ronga o Ismael de wononongoru awi ronga o Ishak. Nako woriria gena, ma pedeka ongo Sara ami nyawa moi momigogilalono ongo Hagar muna magena mowisibuo, de nako wononongoru gena, ma pedeka ma duhutu muna magena mowisibuo.

Ibrani 11:11

Ma ngale ongo Sara ami piricaya, so ngaroko miperekika, duma ka maakusi o ngopa mamake. Komagena idadi, sababu manakoka o Gikimoi Awi jaji asa wosiganapu so igogou Una gena aku mowipiricaya.