Dodadi 17:7 - O GIKIMOI AWI JAJI ma BUKU

⁷ De Ngohi manena gena todadi to ngini nia Gikimoi de to Ngohi Ai jaji magena asa tacoho tagogou dede ngona, de komagena lo ani ngopa de ani danoka gena itagi gila-gila ka sidutu ikakali.

Dodadi 17:7 ပူးပေါင်းရင်းမြစ်များ

Dodadi 15:18

De o orasi magena dabolo de o Jou Awi jaji wosingangasu o Abramka, so wotemo, “Ngohi tonijaji gena done asa tinihike to ngona ani ngopa, de ani dano, de lo ani galaweweku o tona manena, gena ma bati isolano o Mesir ma dokuka de itagi sidago lo o Efrat ma Selera ilalamoka.

Dodadi 17:13

Ngini moi-moi gena bilasu nimasuna kasi, la magena aku idadi nia nonako moi nia roheka de isidumu gena igogou Ai jaji magena ikakali.

Dodadi 17:19

Duma o Gikimoi gena unaka wotemo, “Upa komagena. Ani pedeka ongo Sara done asa o ngopa yanau moi mowisibuo de ngona asa nowisironga o Ishak. Ngohi Ai jaji tacoho tagogou dede ani ngopa una magena de lo to una awi ngopa de awi danoku gena ma bati sidutu ikakali, la ma ngale Ngohi manena gena asa todadi to una awi Gikimoi.

Dodadi 26:24

So o putu magena de o Jou Gikimoi womasimane o Ishakka de wotemo, “Ngohi manena ani baba o Abraham awi Gikimoi so upa ngona nimodo, sababu Ngohi asa kanaga dede ngonaka de Ai laha tonihike ngonaka, komagena lo taaka sidago ani ngopa de ani dano asa dala icarawa, sababu magena to Ngohi Ai jaji moi Ai nyawa woisigogise o Abrahamka.”

Dodadi 28:13

De wikelelo o Jou lo Awi simaka de wotemo, “Ngohi manena ani ete de nitopora o Abraham awi Jou Gikimoi de lo o Ishak awi Jou Gikimoi. O tona kiaka ngona nomaiiduka o orasi manena gena done asa tonihike ngonaka, de lo ma bati ani ngopa de ani dano, sidago lo ani galaweweku.

Dodadi 6:18

Ka cawali ngona gena asa Ngohi tonijaji, so hika ngona notagi o deru magenaka nowosa, ngona de ani pedeka de lo ani ngopa-ngopa de manga pedeka.

Dodadi 9:16

Magena to Ngohi Ai jaji ma nonako moi o bi moi-moi iooho o duniaka ma bati o orasi ma dodoguka. So ma orasi o ngawate takelelo de Ai jaji gena asa tosiningaka. Sidago kanena.”

Matius 22:32

‘Ngohi manena dabolo o Abraham awi Gikimoi, o Ishak awi Gikimoi, de o Yakub awi Gikimoi.’ So bilasu o demo magena niasahe o Abraham, o Ishak, de lo o Yakub ngaroko idodomaka yosone, duma ona ka yooho. Sababu upa o nyawa isosone la o Gikimoi wisuba, duma o nyawa iooho gena ka wisuba-subasi.”

Markus 10:14

Ma orasi o Yesus wakelelo o hali magena, Una wongamo de wotemo onaka, “Niadohaka, la o bi ngopa ona magena yahino Ngohino. Upa lo niafati de lo niasimahawa. Sababu o bi nyawa imatero maro o ngopa ona manena asa yaaku iwosa o Gikimoi Awi paretaka.

Rasul 2:39

Sababu o Gikimoi Awi jaji done asa o Gurumi Datetebi wahike gena, ma meta nginika sidago nia ngopa de nia danoku de lo ma meta o bi nyawa yangodu kanaga manga riho ikukuruka, ena gena nagoona bato nanga Jou Gikimoi wodupa waaso so ona yahino Unaka.”

Roma 9:4

Hika ngini nimasininga o Israel awi ngopa de awi danoku, ona magegena o Gikimoi wotemo maro to Una Awi ngopa masirete, de onaka lo Awi mulia masirete wosimaneka o tona ibobeleuka. Ona de Una lo imatekekajajika, de kagena o Sinai ma Talaka de Awi bobita onaka wahikeka. De ona wadotoka ma ngeko idodooha ona wisuba Unaka, de wajaji Awi laha lo done asa wasidumu onaka.

Efesus 2:2

O orasi magenaka ngini o wange isigeto-geto niamote o ngeko datotorou gena maro de o nyawa o Gikimoi wihoholu so o dorou yodupa yaaka, ena gena kanaga ngini lo niaaka o Iblis awi dupa. O Iblis gena o kuasa datotorou o ngawa-ngawaka wapopareta, de lo sidago o orasi manena nagasi o nyawa o Gikimoi wisigogiisewa to ona manga siningaka womanara.

Ibrani 11:16

Duma igogou ona kanaga foloisi yososininga o tona moi daloloha, ena gena kadaku o sorogaka. Komagena so o Gikimoi asa wimadewa nakoso ona wiaso Una to ona manga Gikimoi, sababu igogou Una o doku moi o sorogaka wosidailako lo daboloka.

Ibrani 8:10

So manena o jaji kiaka done o orasi ma simaka de Ngohi asa taaka o Israel ma nyawaka: Ngohi Ai bobita gena asa to ona manga sininga ma rabaka tahado so ona aku yosihoda de igogou yanako. Ngohi asa todadi to ona manga Gikimoi masirete de ona asa yodadi to Ngohi Ai nyawa.