Yunut 3:10 - Ala Wone Peenok Peebi Mbanak

¹⁰ Eerogo wumbogo mbareegwa, Ala nen it maluk eekwi nogo mbo punuk, yungguninuk, at owagam wogwe maloppiige nagagerik, aaninggin inoba piyaakit mbareegerak nogo, “Eeppiyaagin lek o,” yinuk, inabuwa nen teppiyareegerak.

Yunut 3:10 ပူးပေါင်းရင်းမြစ်များ

1 Mbinineegwaarak 21:15

At Ala ayonggo malayikat nogo nen o Yerutalem pup eerogo puwak nduk, nappi wagagerak nogo, inoorit aap Yebut mendek endage Arawuna gandum agabolo mbelangge menggim taati ari wage mbareegi, aakumi mondok alik negen kambit nogwe nogo, at Aliku ALA iige nagagerik, iniki puru yinuk, at ayonggo malayikat aakumi inoorit nage nogo yoge logonet, “Abu aret me, keenggi awiikkolet o,” yinuk, yoreegerak.

Wundeegwaarak 32:14

Yoge mbareegi, Aliku ALA nen it aakumi Iterali aaninggin-paaninggin agago maluk eeppiyoorak mbareegerak nogo, eeppiyoolik mbo pereegerak.

Kini Wuppiige 28:13

Aap ambi nen omaluk kumaappatogo wonage paga at obeelom eekkolaga'lek aret wonage menggerak kwe, Aap ambi, “Maluk neebi o,” yinuk, paganogo mbo pege kenok perak, Ala abuwa nen teppege menggerak.

Yetaya 30:18

Togop kwe, at Aliku ALA nogo nen, “Obeelom eeppiyaakit lak, ao,” yinuk, tokkiige, Kinabuwa nen eeppinagakit nduk, pipuk aago wonage, Eeke agaarik o. At Aliku Ala a'me nggelok eeppiige menggerak me, “Eeppinanuwak o,” yinuk, It abok aret at tokkogwe nogo inale'nggen mbako logogun o.

Yeremiya 18:7

“Ne ambi eyom paga it aakumi ambi mendek ilik, it aap inabu'me piigo menggam ambi a, an nen eyo omanggen kwak kinogo wumbiige, o wurik kwak minogo piige, lek eerogo piige, eerigin o, yoraminggirak kwe,

Yeremiya 18:8

it aakumi ti nen, Nit maluk eeriyak nineebi o, yinuk, mbo pugwi iinok, an nen, Inomaluk onggo eeppiyaakit, mbakirak nogo eeppiiga'lek teppiyaagin o.

Yeremiya 36:3

An nen it Yekura mendek aaninggin-paaninggin abok aret inoba kwippiyoorak koonogo pigirak nogo inaruk konenggo logomenggaarik, it inalitak lombok maluk eerit nugwi nogo mbo pugun ilik, lek a? Ndi, abet aret mbo pugwi iinok, noone taganogo punuk eekwi inom, it maluk eekwi inom, lek eerogo pigin o,” yinuk, yoreegerak.

Yeremiya 42:10

Aaninggin inoba piige nagagirak nogo paga niniki wakkolage me, it o yime mondok logorak kenok, an nen it o minggwi kwak eerogo piyaagin lek, o wukwi kwak eerogo piige, ndi, alom kinogo wumbugwi kwak kinogo wumbiyaagin lek yi awi ndi awi yakwi kwak eerogo piige, eerigin o, yinuk, yegerak.

Yowen 2:13

Togop me, kinambogoyum nibinogo patiyak ti mage o. Ata, kiniki wakkologo logonip o. At Ala ti, oone yanggorogon yo'nirage, ninabuwa mbake, Iniki aan aganggenggwi lek liippunuk eeppinanege, Iniki kunik lombok ee'ninabit unggwage, Eekwi onggo aaninggin ninoba pinanege logonet, Yi eeppigi ao, yinuk, mbake, Eeke menggerak me, At ena koonogo pekkiige logomenggerik, kinabuwa nen ale'nggen nggwok lombok kinoba pinagage logonet, Gandum anggen yigirik ake puurak inom, anggur amburu ake kiliriyak inom, Kinogoba Aliku Ala nen wokkirage kagak eerukwak, Kinomaluk mbo punuk, kiniyokan yungguninuk kinogoba Aliku Ala owagam wa'nip o.

Amot 7:3

Yoge mbareegi, Aliku ALA nen eeppiyoorak mbareegerak nogo tayoppunuk, “Eeke kagandak ti, an nen eeppiyaagin lek o,” yinuk, Aliku ALA nen aret an yo'nege kagagirak.

Amot 7:6

Yoge mbareegi, at Aliku ALA nen inoba piyoorak mbareegerak nogo tayoppunuk, “Eeke kagandak ti kunduk, an nen eeppiyaagin lek o,” yinuk, Aliku Itok Menggerak ALA nen aret an yo'nege kagagirak.

Yunut 4:11

o kota nggwok Niniwe time aakumi nen, Yi op kagi, yi maluk kagi, maloppega'lek ineebe ambik lombok seratus dua puluh ribu wonogwe inom, inaanggumi ambik inom, wonogwe me, an nen o kota nggwok Niniwe nogo, inabuwa mbaka'lek nonggoti mbo piyoobok kenok, liippunuk eeppiyoorak koongge ti, meek nombake agandik ya?” yinuk, yoreegerak o.

Yunut 4:2

Anini mbake nagagerik, Aliku ALA yoge logonet, “Kaliku ALA wae. Kat koone yanggorogon yo'nirage, nit aakumi ninabuwa mbake, kiniki aanaganggenggwi lek liippunuk eeppinanege, kiniki kunik lombok ee'ninabit unggwage, eekwi onggo aaninggin ninoba pinanege logonet, Yi eeppigi ao, yinuk, mbake, eeke menggendak an neenu me, an yime waga'lek name awo logonet, Time yora naminggirak kwe, Ala nen maluk eeppiyaagin lek teppiyaagin mbaki o, yinuk, yagarak nogo lek a? Alom ti paga an mbet-mbet aret kole mbaganit o Taritit nagagerak nogo o.

Lukat 11:32

At Yunut ti, aap mbuuluk negen logonet, aakumi o Niniwe mendek Ala wone yorage mbareegi, it abok aret iniki koombunuk, inomaluk mbo pereegwaarak kwe, at ambi yime wonage yi perak, aap abu nggwok aret me, wone yokkirage nogo konembunuk, kinomaluk mbo puurak op aret kagak, kinogogumbuk wonogwe me, peebi aakumi inowak looniyak eyom paga it aap o Niniwe mendek nogo nen mi'na'nuk, kit yogondak wonogwe yi, Kinenggali a'nip o, yinuk, yokkirogwe iyaamunggup o,” yinuk, yoragagerak.

Lukat 15:20

Mbake nagagerik, o time mbo punuk, ogoba ka wagagerak. Ka wage nagagerik, awo wok yi wage me, ogoba nogo enegen nakkage nagagerik, abuwa nen nggare agan nanuk, linggik-kambuk eeppunuk, aleenggu maareegerak.