Yetaya 9:6 - Ala Wone Peenok Peebi Mbanak6 Elege ambi nit ninake muk nda'nage, Wulaga ambi muk aret wo'nirage, Eereegerak me, At wone lengganogo yo'nirage logorak ti, at obaalombok aret logogin o. At endage ti, Wone Kooninaka Mondok Iya, Omaawi Lombok Menggerak Ala, Ninogoba Kanggeelik Mondok Eenik Menggerak, Aakumi Lambuninaka Endagembogut o, yinuk, yogo logogun. အခန်းကိုကြည့်ပါ။ |
Yetaya 9:6
82 ပူးပေါင်းရင်းမြစ်များ
At Aliku kogoba Ala nen inikilom kombake logonet, aakumi Iterali inowe kendagembogut logonet wone lengganogo yorage logonok nduk, mippagareegerak me, endage tiyappogo logowok o. At Aliku ALA nen it Iterali mondok-mondok iniki kunik eeginake menggerak me, it abe mban koonggwi, li'lak mban eekwi, eekwi iigak, inarum logonok nduk, kendagembogut mippagareegerak o,” yinuk, yoreegerak.
It inamiya kilireegerak onggo at Yowap inom, at apuri-ombowologwe inom, mondok-mondok inoba luurik aret wonage logogin kwe, at Ndawut inom, ombowologwe inom, aaganapuri inom, endagembogut logonet wone lengganogo yorage menggim inom, at Aliku ALA nen iniki ugun tayenak mondok-mondok logowak nduk, eerogo piige logogin o,” yoreegerak.
Togop aret me, Ala ninogoba o. Kat komaawi ambik kendage abu tiyanak nit aakumi nen, Iya! yinuk, ninagabiti kombakwi nogo, kiniki kunik ee'ninake logonet, eeppinaniyak koonogo pereegindak nogo nggirik-nggerok porogo menggendak me, aa'nduk aap o Atiyut mendek inoweewi inendagembogut nen aaninggin ninoba pinanit wogogwaarak nok, yogondak kuli ninoweewi inendagembogut inom, ninarum menggaarak ninoweewi inom, kat keebe unde ninogobamini inom, kat koone yo'niraga inom, ninombomini inom, kapuri miirinabeegindak inom, abok aret aaninggin ninoba pinaneegwaarak nogo ti, kat nen, Meek aret eeppiyareegwaarak o, yinuk, ninombariyak ti, mage o.
At Ndawut paga wiganak ambi kin ari wage logomenggerik, At wone lengganogo yorage menggim logonet, Aakumi inabuwa mbake, Liirogon aret wone lengganogo yorage, Eeke paga At abu'me piige logowam mondok omaawi aret arigin o. At aakumi inowak loongge logonet, a'me nggelok inowak loongge paga aakumi obeelom eekwi nogo Mbet-mbet aret wiganinuk nage logogin o.
At Aliku ALA kooneegerak paga awinde-obaande eeppugwi, Yagan wake logowak nduk eeppugwi, Eereegwaarak o. Ndi, it aakumi maluk eekwi lek eerogo piyaawak nduk, “At eebe waruwak o,” yinuk, kooneegerak paga wareegwaarak kwe, At paga wiganak enegen iige, At nda'nagagerak eyom nggorek ari nage, Aliku ALA nen at eeriyak mbareegerak nogo eerit nage kenok, abe age, Eerigin o.
Nit wone yugu taganogo pereegurak paga awinde-obaande eerogo pugwi, Nit maluk eereegurak paga at ndanuk togon wakwi, Eereegwaarak. Nit ninobaabut koonogo pinaniyak nduk yawi ninoorukwak ninobaane'me at aret wakwi, At awinde-obaande eerogo pereegwaarak paga nit nineebe obeelom eerogo pinanuwak nduk, at eeppugwi, Eereegwaarak.
At Aliku ALA nen yegerak yi aret o. “Niyo nggwok porok ari lek nage mban menggi kwak, eebe obeelom nu'lek logowak nduk, eeppi wage, Niyo wuketak ilin-unggut ee'nuk wage menggi kwak, aakumi inanebunu lombok inamindik-inamendek wonok iri woraawak nduk nappi wage, Eerigin me, At elak kuninake, ayum paga yonggorinake, kilirogo piinok leeninake, Eerigin o.
It aap inendagembogut a'nuk wone lengganogo yorogwe ti eyom paga at mbogut unde menggerak Ala nen aap ambi aakumi abu'me piinok logowak nduk mondok-mondok omaawi lombok eerogo pigin me, aakumi nen lek eerogo pugwi, aakumi inambik nen unde eekkologwe, eerugun lek o. At abu'me piinok logowam mippemenggerak nogo nen it aakumi eegu inabu'me piinok menggam abok aret tebenogo piige, lek eerogo piige, eerigin kwe, at abu'me piinok logowam mippemenggerak ti perak, mondok aret logogin o.
Pi wogo mbaka, at ayuk warak logonet, wone lengganogo yorage logowak nduk eerogo pege, endage tiyappege, endagembogut logonet unde logowak nduk eeppege, eeke mbaki, yi aakumi ndi aakumi inom, aakumi inanebunu lombok yi o ndi o wonogwe inom, aakumi inoone alitak inom, abok aret at abu'me tebe yinuk, alut eekwi iigirak o. At ayuk warak logonet, wone lengganogo yorage logorak ti, lek arigin lek mondok-mondok yorage, ndi, at abu'me piinok menggim ti, tebenogo pugun lek mondok omaawi wonage, eeke kagarak o.
Nomaawi Lombok Minggirak Naliku ALA nen, An nawi aa'nduk wurik nogo ti, mbuuluk iya negen wurik wonagagerak kwe, yogondak wukwi yi perak, mondok iya lombok wuremenggaarak me, an nawi wurik me yime nen iniki ugun tayenak logowak nduk, eerogo piyaagin o, yinuk, Nomaawi Lombok Minggirak Naliku an ALA nen aret yagarak me yoret o,” yinuk, ari mbareegi, yoragagerak.
Yoge nagagerik, ambinom yora-ge logonet, “An nogoba nen yi mendek ndi mendek abok aret an unde logokit nduk, eeppaneegerak. Ndi, Ala aput yi ti, it aakumi mondok ineenggo'lek nogoba alik mban eenu menggerak. Ndi, nogoba ti, aakumi mondok ineenggo'lek at aput an nalik mban neenu minggirak. Ala aput an lombok nen, It aakumi nogoba ineenu aruwak nduk, paganogo yoraakit, mba'nuk, yorage neenok mban ineenu ogo menggaarak.
Ti kenok, at Ala nen Keritut Yetut ninom kunogo pinaneegerak me, ninom kunik logonet, at Keritut eereegerak paga yi wone ndi wone nineenu eeppinanege agaarik o. Niniki obeelom eerogo pinanege, Ala apuri at ake logowok nduk, leenogo pinanege, ndi, nit keele maarak negen wonogogurak nogo, ninonggo mbanogo punuk, wondet agago pinanege, eereegerak nogo ti, Keritut aret o.
Ndi, at Aliku kinogoba Ala ti, yi kugi ndi kugi at obaane'me punuk, alut eekwi nogo abok aret at abu'me iigak, at Ala alik aret irimbaga wonage o. Ndi, yi aap ndi aap yo'nggok tebenak iigak, at Aliku ALA alik tiyanak aret wonage o. At mondok tiyanak omaawi ambik mondok iya lombok me, at ambi iya, ambi meek mbake, ndi, at ambi eeppinanuwak nduk, wu wogogwi iinok wagangge, eekeelik o.
Nit Ala wone abet mba'nuk waganggo monggoorak kote kumaarak lombok wonagagerak nogo yi o. “At aap aret kin ari wage mbareegi, Yi Ala aput, mbaruwak nduk, Aberiniki nen kin eeppereegerak. Kin eeppege mbareegi, it malayikat nen at eebe inigen kogwe, Ala wone ineenggo'lek mendek wonogome yoranet nogwe, it aap abok aret at abet mbakwi, eeko mbareegwa, Wi, ugwi iigak, wonok laganeegerak o,” yinuk, yogo menggaarak nogo mondok abet aret kogo o.
Ndi, yogondak abu aret o, noreewi. Nit niniki ugun tayenak ale'nggen logowok nduk eeppinanege menggerak Ala nogo nen wone koonogo yo'niragagerak nogo, “Mondok-mondok eerigin o,” yinuk, abet mbako logowok nduk, ndomba mondok liirogon ndegenninake menggerak ninowe Yetut nogo, ninake amiya kili'nage mbareegi, kambunuk nogo menggam nen eenik agago mippereegerak me,
At Ala aput wambi wage nagagerik, Ala ambit alik lombok menggerak nogo nit liippuwok nduk nineenu eeppinaneegerak o. Ndi, at alik lombok menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at alik lombok menggerak Ala nogo aret me, nineenik mondok logorak unde eeppinanege menggerak alom at aret o.
ကြော်ငြာတွေ