Yetaya 66:23 - Ala Wone Peenok Peebi Mbanak

²³ Aliku ALA nen, “Tut ngget ambi penenggak eeke, nogo 6 yippunuk, ko'lu yonggonggologwe nogo ari wagak eeke, eeke kagak, it aakumi abok aret nabu'me tebe yi wa'nuk, nayuk wuko logogun o.

Yetaya 66:23 ပူးပေါင်းရင်းမြစ်များ

2 Endagembogut 4:23

Yoge mbareegi, ogonggelo nogo nen akwe nogo yoge, “O yogondak yi, tut ngget penengge, nogo 6 yippunuk, ko'lu paga tat yonggonggologwe, eeko menggam lek me, nonggop nduk pekka noorak yagan?” Yoge mbareegi, at kwe nogo nen, “Age kaanok nduk, kiniki ugun logot o.”

Ndawi 65:2

Nit tamban eekwi karuk konengge menggendak me, Yi aap ndi aap abok aret kowagam kuwak ari woraagun o.

Ndawi 65:3

Maluk eeko nogoorak paga Aaninggin lombok ninoba kwi'ndak wonage nogo Nit piyaniyak meek me, kat nen waganogo mbo nappegendak o.

Ndawi 86:9

Nogoba o. Kat Ala kalik aret wonage, Abu nggwok lombok wonage, eerubok mendek eeke, Eeke menggendak me, Yi aakumi ndi aakumi ogobakkigirogo piyareegindak nogo Abok aret wogo logomenggaarik, Kat kabu'me tebe yinuk, kalut eekwi, Kat kendage kunogo tiyappagit nugwi, Eeko logogun o.

Yetaya 19:21

Aliku ALA nen aakumi Metit mendek at eeke menggerak ineenu aruwak nduk, nigiya wage kenok, ne ti eyom paga it nen, “Aliku ALA ti, nit ninogoba aret o,” yinuk, alut eeko logonet, ake warogo wogogwi, yi mendek ndi mendek wogogwi, “Yogop eeko logowok o,” yinuk, Aliku ALA endage paga kumbuk mbanggwi, ndi, kumbuk mbanemenggaarak nogo ndak-ndak aret eekwi, eeko logogun o.

Yetaya 19:23

Ne ti eyom paga o Metit nen o Atiyut nogo logorak tu nggwok arigin me, it Atiyut mendek nen o Metit nogwe, ndi, it o Metit mendek nen o Atiyut wogwe, eeko logonet, it Metit mendek inom, Atiyut mendek inom, inom a'nuk, Ala alut eeko logogun o.

Yetaya 2:2

O age yobok paga Yi puut ndi puut tebenak kagak Aliku ALA awi puut paga wurik nogo mondok tiyanak wonage kogwe, Puut-puut mbuulogwe nogo tebenak kagak, puut ti nogo tiyappugwi, Eekwi iinok, It aakumi inanebunu lombok abok aret time kuwak ari wogo logogun o.

Yetaya 27:13

Ndi, ne ti eyom paga mban oone nggwok eeka trompet nogo oone pu nggwok eeke kenok, it aakumi Iterali mendek o Atiyut kobak ogogwaarak nogo inom, o Metit mbo nappiya nogogwaarak nogo inom, puut alik leenak Tiyon kota Yerutalem nogome kuwak ari wogo logomenggaarik, Aliku ALA alut eeko logogun o.

Yetaya 49:7

It aakumi nen, Ogole o, yinuk, abu meek ombakwi, It aap o maluk age kero pipporogo wonogwe, Eekwi inayeloman logonet inake eeke nagagerak nogo At Kikak Nakeelik Alik Leenak Wondet Eerogo Piiga Iterali inogoba Aliku ALA nen yegerak nogo yi aret. “An li'lak eeka Naliku ALA nen, Iterali inogoba Kikak Nakeelik Nalik Leenak Minggirak nen, Kat leenogo pagareegirak me, Aap inendagembogut nen kat wage inigen keenok mi'nogwe, It nagawan-nagawan nen kat eeke inigen keenok kayuk wukwi, Eeko logogun o,” Yinuk, yo'negerak o.

Yetikiyen 20:40

An nabuut alik leenak Iterali wonogo menggam abu tiyanak time it Iterali mendek abok aret an nalut eeko logogun o. Ndi, time aret nake pi wogwe iinok, nale'nggen nen wagangge logogin o. It an nake warogo wo'nugwi inom, anggen iyaalok mbanak nake pugwi inom, nake alik leenogo punuk, wo'nugwi inom, o time aret nake pi wagak eeko logorak, yoraagin o, yinuk, Naliku Nitok Minggirak an ALA nen aret yagi o.

Yetikiyen 45:17

It Iterali mendek inale'nggen logonet laago lakwi, tut ngget penengge kenok lakwi, nogo 6 yippunuk ko'lu paga eekwi, laago lako logorak koonak ti abok aret eekwi iinok, aap endagembogut nen aret warogo kani kuniyak ake inom, anggen yigiremenggaarak puurak ake inom, amburu kilirogo puurak ake inom, koonogo pege logowak o. It aakumi Iterali mendek inomaluk lek eerogo piinok an ninom lambunik logowok nduk, inomaluk lek eerogo piyoorak ake inom, anggen yigiremenggaarak puurak ake inom, warogo kani kuniyak ake inom, ninom lambunik logorak ake inom, aap endagembogut ti nen aret koonogo pege logowak o,” yinuk, ari kagagirak.

Yetikiyen 46:1

Aliku Itok Menggerak ALA nen yegerak nogo yi aret. “Oore'nggam akem time ungguwok nduk, tu unggwogo logowam oonegen lagi wage menggim pa'nggwe wonage nogo, narak wonage kagak, ne 6 paga yabu eeko logorak kwe, nogo 6 yippunuk, ko'lu yonggonggologo logorak nogo paga inom, tut ngget penengge kenok eeko logorak nogo paga inom, ti, tu paarak logowak o.

Yetikiyen 46:6

Tut ngget penengge kenok eeko logorak ne ti eyom paga at nen tapi ngguunok awooluk inom, ndomba aagalogwe 6 inom, ndomba ngguunok ambit inom, abok aret ti, awinde-obaande eerak lek mban warogo wo'niruwak nduk, pi woraawak o.

Takariya 14:14

It Yekura mendek kunduk, it Yerutalem mendek inom wim nambuko logogun o. It aakumi inaagan-inambokan wonogwe nogo abok aret inamendek mbuti emas inom, mbuti perak inom, yum inom, ineenggi lingginiyak meek mondok iya lombok kuwak eekkologo logogun o.

Takariya 14:16

Togop aret eeke kenok, it yi aakumi ndi aakumi o Yerutalem wim eeri unggwogo logonet, yumbunogo piyamenggaarak wonogwe nogo, abok aret nen yi tahun ndi tahun paga inowe endagembogut at Omaawi Lombok Menggerak Aliku ALA nogo alut eekwi, inawooliya wurit wogogwaarak aberogo laago lariyak nogo lakwi, eeko logogun o.

Takariya 14:18

Ndi, it Metit mendek nogo inom laago lari wogwe lek iinok, it menggam kunduk mayu waga'lek aret logogin mban. It yi aakumi ndi aakumi nen it Iterali mendek inawooliya wurit wogogwaarak aberogo laago lariyak o Yerutalem wogwe lek iinok, Aliku ALA nen kugilingga inoba kwippiyaagin nogo, o Metit mendek kunduk inoba kwippiyaagin o.

Takariya 14:19

Ti eerogo piyaagin nogo ti, it Metit mendek inom, yi aakumi ndi aakumi abok aret inom, Iterali mendek inawooliya wurit wogogwaarak aberogo laago lariyak nogo, inom lari wogwe lek iinok, aaninggin inoba kwippiyoorak nogo ti aret.

Maleyaki 1:11

“Oonegen lagi wage menggim nen nok, kilu yi nage menggim kuli, yi aakumi ndi aakumi inenggela'me abok aret an nendage mondok tiyanak logogin o. Aakumi inanebunu lombok inenggela'me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale'nggen nen wagangge nogo mendek wo'nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.

Yaya 4:23

It aakumi nen ninogoba abet aret alut eekwi ti, at Aberiniki, Ala ndogop menggerak, yo'nirage nogo nen yorage kagak alut eeko logorak eyom peebi kwe, yogondak muk wagaarak o. At ninogoba Ala nen, It aakumi togop aret nalut ee'nako logowak, mbake menggerak o.

Wayu 15:4

Ninogoba o. It taani nen kayuk wukwi, kendage tiyappagagwi, eeka'lek logogun mbaken? Lek aret o. Kat maluk eekeelik kalik leenak obeelom mban menggendak o. Kat mondok a'me nggelok mban inowak loongge menggendak ineenu me, It aakumi inanebunu lombok abok aret kowagam tebe yi wogo logomenggaarik, kalut eeko logogun o,” yinuk, ndawi wakwi iigirak.