Yetaya 66:12 - Ala Wone Peenok Peebi Mbanak

¹² At Aliku ALA nen yegerak yi aret o. “Niyo nggwok porok ari lek nage mban menggi kwak, eebe obeelom nu'lek logowak nduk, eeppi wage, Niyo wuketak ilin-unggut ee'nuk wage menggi kwak, aakumi inanebunu lombok inamindik-inamendek wonok iri woraawak nduk nappi wage, Eerigin me, At elak kuninake, ayum paga yonggorinake, kilirogo piinok leeninake, Eerigin o.

Yetaya 66:12 ပူးပေါင်းရင်းမြစ်များ

Yetaya 14:2

Aakumi alik mendek nen it Iterali inanggween wonogogwam iniyokan wogoren piya woraagun o. Piya wogwe iinok, It Iterali Naliku ALA nanggween paga time logonet, Kumi inom, aap inom, inayeloman eeppiinok mengga kwak, It aakumi alik mendek nen togop aret eerogo piigwi, It keele maageren nogogwaarak nogo aret maarogo piigwi, It tebenogo piyareegwaarak nogo aret tebenogo piigwi, Eerugun o,” yinuk, ari kagarak o.

Yetaya 26:3

Aap ambi Aliku ALA oba panggonak wonage kenok, iniki nu'lek wonage nogo, Iniki ugun mondok tayenak logowak nduk, Aliku ALA nen eeppege menggerak o.

Yetaya 33:21

O time Aliku ALA ninom logonet, omaawi lombok paga ninili ari logogin o. Niyo mondok nggwok lombok wage, niyo eneeri abe wundi wage, Eeke menggi kwak, O ti togop aret logogin me, Ninawim mendek nogo eyo mbanak ndoonak paga alelo mbanit wunda wogwe, Yiiro kole paga wunda wogwe, Eeko logogun mondok lek o.

Yetaya 45:14

At Aliku ALA nen yegerak nogo yi aret. “It Metit mendek yabu eeka inom, it Kuti mendek yi mendek ndi mendek kungga inom, It aap yerek-nggorek Tiyeba mendek inom, Iterali inowagam ari wogo logomenggaarik, Ninogobamini o, yinuk, It nogwe me, keele maarak negen inambokan nogwe, It inabu'me tebe yi unggwogwe, Eeppunuk yorogo logonet, At Ala ti, alik ambi lek, at alik mban kinom wonage o. At alik ambi imbirak tabonak wonage mondok lek aret kogo o, yinuk, Yorogo logogun o,” yinuk, yegerak me, yagi o.

Yetaya 48:18

An, Yogop ee'nu ndogop ee'nu, yorage nogo liippogo logorak me eekaarak, ao! Lippogo logonetak en, niyo wage porok arilik wage mban menggi kwak iniki ugun tayenak wonogwe, Niyo laut puk aga'lek kilanogo wunabi wagak mban eeke menggi kwak, it obeelom mban eerit nogwe,

Yetaya 54:13

Aagalogwe wologwe abok ti, Naliku ALA an aret mamunirage logogin. Inambi-inambiingga abe mendek mban nunggo logonet, iniki ugun tayenak aret logogun o.

Yetaya 59:19

Aliku ALA ambe aagi wumbegetak paga niyo wu'nuk wage menggi kwak wage kenok, Aakumi oonegen kilu yi nage menggim pa'nggwe wonogwe nen Aliku ALA endage tiyanak nogo wage kenok inagabiti mbakwi, It oonegen lagi wage menggim pa'nggwe wonogwe nen at obaanggi-obaangge li'luk eekko'nok wage kenok, ayuk wukwi, Eerugun o.

Yetaya 60:16

Kwe ambi aagaluk elak wogoge menggi kwak yi aakumi ndi aakumi inamindik-inamendek at wogogwi iinok kolage, It aap inendagembogut nen ndegenggo logonet, abe mendek wogogwi iinok, wagangge, Eeke logogin o. Ti eeke kenok, Agap Ndaka, Wondet Eerogo Pega, Yakup ogoba Nomaawi Lombok Minggirak ti, Naliku ALA an aret eenu arigin o.

Yetaya 61:6

“Aliku ALA unde it yi aret o,” yinuk, yokkirogwe, “Ninogoba Ala ayeloman mini yi aret o,” yinuk, yokkirogwe, Eeko logogun o. Yi aakumi ndi aakumi inamindik-inamendek nunggwi, It inamindik-inamendek wokkirogwe ti paga kinale'nggen ambik mbakwi, Eeko logomunggup o.

Yetaya 66:11

At elak amburu abe nenok kiniki yamu ari, Elagalom nggwok me, ndonggorogon nenok, kinale'nggen eekkinake, Eerigin o.

Yetaya 9:6

Elege ambi nit ninake muk nda'nage, Wulaga ambi muk aret wo'nirage, Eereegerak me, At wone lengganogo yo'nirage logorak ti, at obaalombok aret logogin o. At endage ti, Wone Kooninaka Mondok Iya, Omaawi Lombok Menggerak Ala, Ninogoba Kanggeelik Mondok Eenik Menggerak, Aakumi Lambuninaka Endagembogut o, yinuk, yogo logogun.

Yetaya 9:7

At wone lengganogo yorage logowam nggwok wiganinuk nage, Aakumi inom lambunik iniki ugun tayenak wonogwe nogo lek aga'lek kundugu wonage, Eeke logogin o. At Ndawut paga wiganak aret me, At wone lengganogo yorage menggim mi'na'nuk, At abu'me piige menggim wone lengganogo yorage logogin o. At obeelom mban eeppiinet nage, a'me nggelok mban inawone mbangge, Eeke logomenggerak paga At abu'me piige menggim akom kwippiige, Omaawi nu'lek eerogo pege, Eerogo pege kenok, Mondok-mondok aret logogin o. At Omaawi Lombok Menggerak Aliku ALA nen, “Mondok eerikit aret,” mbarit unggwage me, aret eeke logogin o.

Yeremiya 33:6

Togop aret eerogo piyaagin kwe, o kota yi inom, it ineebe inom, obeelom eerogo piige, ndi, it aakumi an napuri ineebe obeelom eerogo piyaminggirak paga iniki mondok nu'lek ugun tayenak inale'nggen mban logowak nduk, eerogo piige, eerigin o.

Agayi 2:9

Nomaawi Lombok Minggirak Naliku ALA nen, An nawi aa'nduk wurik nogo ti, mbuuluk iya negen wurik wonagagerak kwe, yogondak wukwi yi perak, mondok iya lombok wuremenggaarak me, an nawi wurik me yime nen iniki ugun tayenak logowak nduk, eerogo piyaagin o, yinuk, Nomaawi Lombok Minggirak Naliku an ALA nen aret yagarak me yoret o,” yinuk, ari mbareegi, yoragagerak.