Yetaya 61:1 - Ala Wone Peenok Peebi Mbanak

^1-3 It aakumi tebenogo piinok wonogwe nogo wone obeelom wone yorage logokit nduk, Aliku ALA nen amburu eerogo mippanegerak me, Aliku Itok Menggerak ALA Aberiniki noba panegerak wonage agaarik o. It iniki wakkologwe nogo iniki teeluk eerogo piige, It keele maarak wonogwe nogo, “Muk wondet eerogo pinagagerak o,” yinuk, yorage, It keele maarogo piigo menggam piyareegwaarak wonogwe nogo, “Wumbiya wa'nip o,” yorage, “Aliku ALA nen obeelom eeppinaniyak tahun nogo yi aret aga o,” yinuk, agan nage, “Ninogoba Ala maluk onggo eeppiyoorak ne nogo yi aret o,” yinuk, yoranet nege, It aakumi apit aret iniki puru yogwe wonogwe nogo iniki eyak wappiige, O Tiyon le yogo logonet, purok inanobak paga yikut eerak obaane'me inabetagi ngget mendek yirippiige, Iniki puru aago wonogwe nogo obaane'me nggiraanak eeppiinet nage, It iniki aaninggin ndugu aago wonogwe nogo inale'nggen nen ndawi wako logowak nduk eeppiige, Eeruwak nduk, Nappani wagaarak o. It aakumi ti, at Aliku ALA abu tiyanak, “Wi!” ugwi nogo, aakumi inigen kogo logowak nduk, Awi luurogo punuk, yappereegerak aakumi nen, “Eyo teno kwak Obeelom Mban Eeka,” yinuk, yogo logorak nogo it aret o.

Yetaya 61:1 ပူးပေါင်းရင်းမြစ်များ

Ndawi 147:3

Iniki wakkologwe nogo obeelom eerogo piige, Inawin kunik nogo nggerenogo piige, Eeke agaarik o.

Ndawi 2:6

“At endagembogut logorak leenogo pigirak nogo Nabuut leenak Tiyon nogo paga mippigirak o,” Yinuk, yegerak o.

Ndawi 22:26

Aap ineenggi lek nogo inambi ndonggorogon nunggwi, It Kaliku ALA mukkeren nogo menggaarak nogo It aap ti mendek mondok-mondok aret logogun me, kalut eekwi, Eeko logogun o.

Ndawi 25:9

It aap iniki tebenak menggaarak nogo Tu obeelom paga wogoren nage, Kat kiniki mbake nogo mamunirage, Eeke menggendak.

Ndawi 34:18

Aakumi iniki wakkologwe wonogwe iinok, Aliku ALA inom koorok aret wonage, Iniki aan mbele aago wonogwe iinok, at pilanogo piige, Eeke menggerak o.

Ndawi 45:7

It obeelom eekwi iinok ti, kinikilom mbake, Ndi, maluk eekwi iinok ti, keebi lombok mbake, Eeke menggendak me, At Ala ti, kat kogoba Ala aret me, Iniki ale'nggen kombake logonet, Amburu kilirogo pagareegerak paga Koreewi tebenak iigak, inirimbaga tiyappagaregerak o.

Ndawi 51:17

Kake warogo wokkugwi kwak nogo ti, Aap ambi nen, “An maluk aret eeki o,” yinuk, Iniki wakkolage ti aret o. Aap ambi iniki wakkolage logonet tebeppake nogo ti, Kat Ala nen, “Aap yi, we aret eeke o,” yinuk, Yumunggun lek o.

Ndawi 68:7

Ala wae. Kapuri wundi wogwe iinok, Kat kaa'nduk a'nuk wage, Aakumi lek me karume kapuri wogoren wage, Eeke keegak,

Ndawi 69:32

It aap tebenak wonogwe nogo nen inoone yokkugwi iinok, Kaliku ALA konengge, Kapuri keele maarak kat mbo piigeelik inabuwa mbake, Eeke menggendak me, It aap tebenak menggaarak nen An andi logonet, kendage tiyappege, Kogo logomenggaarik inale'nggen aret mbakwi, It aap kat mukkeren nogo menggaarak abok aret inale'nggen logonet eerit nugwi, Eeko logogun o.

Wundeegwaarak 28:41

Penggaarogo piigwi iinok, koweeluk Karun apuri inom yirippiige logomenggendik, it an neebe unde logonet, nake eeko logowak nduk, amburu inanobak paga kilirogo piinok, leenogo mippiyaamunggun o.

Wundeegwaarak 29:7

Eeke logomenggendik, aap mippiigo logonet, amburu kilippiigak toolak nogo wagangge logomenggendik, anobak paga kilirogo wuppi woraamunggun o.

Yetaya 29:19

It aap tebenak wonogwe nogo Aliku ALA paga inale'nggen mbako nogogwa kwak, peebi inale'nggen mbakwi, It aap ineenggi lek nogo at Kikak Nakeelik Alik Leenak Iterali inogoba paga iniki ale'nggen mbakwi, Eeko logogun o.

Yetaya 30:19

Kit aakumi o Tiyon mendek kota Yerutalem monggotak yi wae. “Yeenggwa niret o,” yogwi kiinok, at abet aret kinabuwa nen yeenggwa kirage logogin me, kit le ambinom yogo logomunggup lek o. Kinoone nggwok paga at nggino yogwi ti eyom paga aret at konembunuk, onggo yokkiraagin o.

Yetaya 30:26

At Aliku ALA nen at apuri inamiyayilik-inamiyayelok eerak wonogwe nogo nggerenogo piige, inawinde-inobaande aago nogo obeelom eerogo piige, eeke eyom paga tut abinak nogo oonegen abinak kwak age, ndi, oonegen nogo ti, ne ambit paga wundi wage ti eya mbuuluk kwe, nogo ambit paga ne 7 kuli lambunik wundi wage kenok, eya mondok alik negen eerogo pege menggi kwak aret age, eerigin o.

Yetaya 32:7

It wi-wi aganaka nen eeppiinet nugwi ti, maluk aret o. It aap tebenak mendek nogo nen, “Nit ndogop eekoorak o,” yinuk, abet aret yogwi iigak, It aap ti nen, “Pilit-pilit inoba piigwi niinok, inoone lek aruwak o,” yinuk, inikime koonit nugwi, Eeko menggaarak kwe,

Yetaya 40:9

Wone obeelom wone wonok nega kit Tiyon mendek yi wae. Puut nggorek paga lagi nogwe, Wone obeelom wone wonok nega kit Yerutalem mendek yi wae. Kinoone mondok omaawi yorogwe, Kinagabiti mbaka'lek kuum-keek yorogwe, “Kinogoba Ala ti kaanip o,” yinuk, it kota-kota Yekura wonogwe nogo yorogwe, Eeko logonip o.

Yetaya 42:1

“An nen leenogo pateegirak niniki kunik eeke, Eerit nage kagak panggombege, Eeke minggirak nayeloman eeke logorak nogo yi aret. An Naberiniki at oba pege neenok, At nen yi aakumi ndi aakumi wone yugu nogo a'me nggelok eeko logowak nduk, yoranet nege logogin o.

Yetaya 42:7

Aakumi inigen mbuk wonogwe nogo inigen paganogo piige, Keele maarak wonogwe nogo piinogo wumbiige, Ndi, it aakumi o apit me keele maarak negen wonogwe nogo keele piinogo wumbiya wage, Eeke logonok nduk, An panggonggake logonet, karum logogin o.

Yetaya 48:16

“Togop me, koorok panggorogon neya woraawak o. Koorok panggorogon neya wogwe iinok, wone yorage neegak, koneniyak nogo yi aret. O aa'nduk lombok nen wone it yorage nagagirak nogo kote kiraarogo yorage logolik. Ndi, wone yorage nogo arit wage kagak an kunduk wonage mban minggirak o,” yinuk, yegerak me, At Aliku Itok Menggerak ALA nen at Aberiniki noba panege nagaarik, nappani wagaarak o.

Yetaya 52:7

It aap wone obeelom wone wonok wogwe, Lambumbagarak wone agan wogwe, Obeelom eeppagarak wone yokkiri wogwe, Kagap ndariyak wone yokkiri wogwe, Kogoba Ala ti, endagembogut aret o, yinuk, kat o Tiyon yokkugwi, Eekwi nogo Puut paga kin ari wogwe iinok, kiniki ale'nggen alik negen nggelok yigin me, iya o!

Yetaya 52:9

Aliku ALA nen at apuri iniki eyak wappiige, Kat Yerutalem wondet eerogo pagage, Eekerak me, Yigirik-noonom eerogo pagagaarak kat Yerutalem yi wae. It kinom abok aret kiniki ale'nggen nen keekok yogo logonip o.

Yetaya 57:15

At endage Kikak Nakeelik, Alik Leenak, Abu Tiyanak, Ayuk Warak, Mondok Itok Menggerak nen ari logonet, “An o abe alik leenak abu tiyanak minggim wonage minggirak kwe, It aap, An maluk eekirak, ao, mbakwi nogo iniki ale'nggen eerogo piige, Iniki tebenak wonogwe iinok, iniki eyak wappiige, Eerikit nduk, It aap, An maluk eekirak, ao, mbakwi inom, iniki tebenak inom, ninom wonage minggirak o.

Yetaya 57:18

Eerit nogwe nogo an iige nagagirak kwe, Obeelom eerogo piige, tu obeelom paga wogoren nage, Iniki tayenak logowak nduk, aa'nduk wonogogwa kwak eerogo piige, Eerigin o.

Yetaya 59:21

At Aliku ALA nen ari logonet, “Ndi, an nen ninom wone koonogo pigin nogo yi aret. An Naberiniki kinoba pinagage logonet, noone kinambe paga pinagaminggirak nogo kobak aga'lek kinapurilogwe mamunirogwe, it kinapurilogwe nen it inapuri mamunirogwe, ndi, it inapurilogwe nen inombowologwe peebi ndaganabugun nogo mamunirogwe, eerit wundi wogwe iigak, yogondak nen nok, peebi nda'narugun abok aret yoranet wundi wogo logogun o,” yinuk, Aliku ALA nen aret yegerak o.

Yetaya 66:2

Yi mendek ndi mendek ogobakkigirik yi, an nen mban ogobakkigireegirak me, Aret wonage menggerak nogo lek a?” yinuk, Aliku ALA nen yegerak o. “It aap iniki tebenak wonogwe, Maluk eekirak, ao, mbakwi, noone ari neenok inaganak wake, Eekwi iinok, An liippiige minggirak kwe,

Yeremiya 34:8

At aap endagembogut Terekiya nen it aakumi Yerutalem wonogwe nogo abok aret inayeloman mini wondet eerogo piigo logorak inom wone koonogo pogo mbareegwa, Aliku ALA nen at Yeremiya wone yoreegerak.

Yeremiya 52:33

Eeke mbareegi, at Yoyakin nogo keele maarak logonet, ayum yirik wonagagerak nogo mbo punuk, abe mendek yikko'nok, aap endagembogut inom mbi nonggo menggam nogome, inom nengge kagak, kambuurak kuli aret ari nagagerak.

Ndaniyen 9:24

It aakumi kat mendek inom, kat kagota alik leenak nogo paga menggaarak inom, Ala wone yugu taganogo pit nogwe ti, Nineebi o, yuwak nduk eeppiige, Nit maluk eekwi nogo nineebi o, yinuk, mbo puwak nduk eeppiige, maluk eeko nogogwaarak nogo, aaninggin kaawak nduk, eeppiige, eekaatak onggo mondok a'me nggelok eeppiigak yuwak nduk mippiya wage, kabinggaanggo kagandak alom inom, Ala nen yorage kagak yoraga nen yorogo nogogwaarak inom, nogo ndak-ndak eeke, at abu alik leenak menggerak nogo amburu eerogo mippege, eeriyak eyom koonak nogo ti, tujuh puluh kali tujuh aret.

Oteya 6:1

“It nen yogo logonet, At nen nibik-nobak eerogo pinaneegerak kwe, obeelom eerogo pinanege, At nen yawi ninooreegerak paga ninawin agagerak nogo nggerenogo pinanege, Eerigin me, Ninomaluk mbo punuk, niniyokan at Aliku ALA mugurok nawok o.

Ala Unde 7:35

Yi mendek ndi mendek Aliku ALA ake pugu nogo kani kunggo logonet, ando mogonogo Karun apuri inom wogorogo logorak yereegerak ti, Aliku ALA unde logowak nduk, mippiigo logomenggaarik, wogorogo logowak nduk, yereegerak o.

Mika 3:8

Togop kwe, an perak, it Yakup mendek Ala wone taganogo pit nugwi, It Iterali mendek maluk eerit nugwi, eekwi nogo Inaruk wake logokit nduk, Aliku ALA Aberiniki paga nomaawi lombok eerogo panege, A'me nggelok eeppiinet nage logonet, nagabiti lek yoranet nage logokit nduk, eeppanege, Eeke agaarik o.

Matiyut 11:5

Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggaatak ineenik agago mippiige, ndi, inamendek lek nogo obeelom wone yorage, eeke kogotak yi, yori nanip o.

Matiyut 3:16

“E o,” yinuk, yiime wuppege mbareegi, Yetut yiime nen awo wundi wage kagak, mbogut keyaappege mbareegi, Aberiniki towe puume pogom wiga agan Yetut oba nabi wage kagagerak.

Lukat 7:22

Nogogwaarak nogo nen wone nogo Yetut yogo mbareegwa, at Yetut nen, “Eeke kinigen kogotak inom, agan nugwi kinaruk konenggotak inom, ti, kiniyokan Yaya yori nanip o. Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggaatak ineenik agago mippiige, ndi, aap inamendek lek nogo obeelom wone yorage, eeke nogo yori nanip o.

Yaya 1:41

At nogo nen oweeluk Timon mbet-mbet kwaakkage nagagerik, yoge logonet, “Timon wae! Mesias nogo muk wagaarak ninigen kogoorak o,” yinuk, yoreegerak. (Mesias, yoreegerak nogo ti, nit ninoone paga Ala nen leenogo mippereegerak Keritut aret nduk yoreegerak.)

Yaya 3:34

At Ala nen nappi wagagerak ti, Ala wone mban ari menggerak. Ala nen at Aberiniki wogoge logonet, ambi eeriyak kenok, abok endak mban eeke logowak nduk, wogoreegerak.

Nappiigak 10:38

At Ala nen Yetut Nataret mendek Aberiniki oba wuppi wage nagagerik, leenogo mippege, omaawi wogoge, eeke nagagerik, Ala imbirak logonet me, obeelom eeginake, it kugi Ibilit aakumi inikime logonet molok iranet nege menggerak nogo, mugogo wumbiige, eerit nege nagagerak nogo o.

Nappiigak 26:18

It o apit negen wonogwe nogo mbo punuk eya me unggwage, ndi, at Ibilit abu'me piyareegim nen wundi nanuk, Ala abu'me piige menggim unggwogwe, Eeruwok o, yinuk, yuwak nduk, nappagagin o. It nogo iniki noba panggombunuk abet nombakwi iinok, inomaluk Ala nen lek agago piinok, at apuri leenogo piyareegim nogome inom nabenogo piyaawak nduk, nappagagin o, yinuk, yo'nereegerak o,” yoragagerak.

Nappiigak 4:27

Yereegerak nogo, o kota yime it Keroret togon, Pondiyut Pilatut togon, it endekem mendek inom, it Iterali mendek inom, nen at kikak nakeelik alik leenak, kat kayeloman leenogo mippereegindak Yetut nogo, at waruwok nduk abet aret o kota yime kuwak eekaarak o.

2 Korindut 3:17

“Ninowe o,” yagarak nogo ti, Aberiniki aret me, yagarak o. Ndi, aap ninowe nen nappi wagagerak Aberiniki nogo inikime wonage kenok ti, iniki ugun tayenak wondet aago aret nugu menggaarak o.

2 Korindut 7:6

it aakumi iniki wakkologwe iinok, iniki eyak wappiige menggerak Ala nogo nen, nit niniki eyak wappinanuwak nduk, aap Titut nappi wagaarak.

Iberani 1:9

It obeelom eekwi iinok ti, kinikilom mbake, Ndi, maluk eekwi iinok ti, keebi lombok mbake, Eeke menggendak me, At Ala ti, kat kogoba Ala aret me, iniki ale'nggen kombake logonet, Amburu kilirogo pagareegerak paga koreewi tebenak iigak, inirimbaga tiyappagareegerak o,” yinuk, yoge nagagerik,