Yetaya 53:6 - Ala Wone Peenok Peebi Mbanak

⁶ Nit abok aret ndomba kobak aago negen wonogo logonet, tu abe kagak alik paga nogwe, Ninalitik-ninalitak niniki koombunuk eerit nogwe, Eeko nogogurak paga Nit abok aret maluk eekwi onggo, “At nen aret mbanuwak o,” yinuk, Aliku ALA nen at oba pereegerak.

Yetaya 53:6 ပူးပေါင်းရင်းမြစ်များ

Wakkagagerak 22:6

Yorage nagagerik, at Abarakam nen Ala ake warogo kani kuniyak nduk, kani nggaganak nogo waganogo Itak uum paga pege nagagerik, at kani kunik inom, waruk inom, wonok imbirak aret nogogwaarak.

Ndawi 119:176

Ndomba kobak a'nuk tu nomoninuk nogo mengga kwak, An togop aret ee'nakerak kwe, Koone, “Yogop ee'nu ndogop ee'nu,” yugu nogo An nami ageelik porogo minggirak me, An kayeloman yi, kwaa'nabi mok o.

Ndawi 69:4

An neeruwak ambik wonage yi kwak lek It ineebe ambik lombok nen An eekirak lek kagak ineebi nombakwi, Alom lek kagak ninom wim mbanak ineebe ambik nen Nenggaawak lek eerogo paniyak eekwi, Inamendek woolik neegak inoone omaawi paga, “Ninamendek obaane'me awi ya'niyet o,” yo'nugwi, Eeko agaarik o.

Yetaya 40:2

It aakumi inayeloman mini eeppiirogo wonogwe me nen wondet eerogo piyoorak eyom muk panggoni wagaarak o. Maluk eeko nogogwaarak nogo lek eerogo piige, Inomaluk eeko nogogwaarak Naliku ALA onggo eeppiyareegirak nogo, Ne mbere eeppiyookwak, mondok nggwik togon inoba kwippiige, Eekirak nogo Abu aret eekirak me, Kat o Yerutalem mendek inabuwa nen koone yanggorogon yorage logot o,” yinuk, yo'negerak me, yagi o.

Yetaya 53:10

At Aliku ALA kooneegerak paga awinde-obaande eeppugwi, Yagan wake logowak nduk eeppugwi, Eereegwaarak o. Ndi, it aakumi maluk eekwi lek eerogo piyaawak nduk, “At eebe waruwak o,” yinuk, kooneegerak paga wareegwaarak kwe, At paga wiganak enegen iige, At nda'nagagerak eyom nggorek ari nage, Aliku ALA nen at eeriyak mbareegerak nogo eerit nage kenok, abe age, Eerigin o.

Yetaya 53:11

Andi yagan wappunuk, “Aakumi obeelom eerogo piyaakit nduk, eekirak kagi,” yinuk, iniki ndonggo yigin o. “At eeppereegwaarak paga at iniki abe koonak nayeloman nogo nen, Aap abe o, yinuk, aakumi apit aret obeelom eerogo piige, Inomaluk inoba luurik wonage nogo piyangge, Eerigin o.

Yetaya 53:12

Togop me, it aakumi apit aret inomaluk wagangge, It wone yugu taganogo pereegwaarak nogo inake tamban eeke, Eeke logonet, Waruwok nduk eekwi iigak, eebe ili yikkoloolik teppege, It aap maluk eeka inom wonage ineenggi lingginiyak eebi mbaka'lek wonage, Eereegerak me, Aakumi inamendek ndinik nogo aap yo'nggok wogorage logonet, at inom wogoge, It aap wakaa'ngget aakumi inagugun wogo tumburirage logonet, at inom tumburege, Eerigin o,” yegerak o.

Yetaya 53:5

Nit wone yugu taganogo pereegurak paga awinde-obaande eerogo pugwi, Nit maluk eereegurak paga at ndanuk togon wakwi, Eereegwaarak. Nit ninobaabut koonogo pinaniyak nduk yawi ninoorukwak ninobaane'me at aret wakwi, At awinde-obaande eerogo pereegwaarak paga nit nineebe obeelom eerogo pinanuwak nduk, at eeppugwi, Eereegwaarak.

Yetaya 53:7

At aaninggin oba pugwi, andi-pandi eerogo pugwi, eekwi iigak, “Eeppaniyak op aret o,” mba'nuk, puk aret agagerak. Ndomba aagaluk waruwok nduk wonok nogwe iigak, puk menggi kwak, at oone lek kagak wonok nogwe, Ndi, ndomba iyagalo eeruwak mbanggwi iigak, oone lek puk menggi kwak, at oone lek puk aret wonage, Eereegerak o.

Yetaya 55:7

It aap maluk mendek nen eerit nugwi nogo mbo pugwi, It aap iniki maluk nen eeriyak koonogo pit nugwi nogo teppugwi, Eeko logomenggaarik, Yungguninuk iniyokan Aliku ALA owagam woraawak o. Owagam wogwe iinok, Aliku ALA it inabuwa nen teppiige, Yungguk togon ninogoba Ala ka wogwe iinok, Ala nen inomaluk ambi teppigin lek abok aret mondok lek eerogo piige, Eerigin o.

Yetaya 55:8

Aliku ALA nen ari logonet, “An eeriyak koonogo pege minggirak ti, kit eeriyak koonogo pogo monggotak ndak-ndak lek o. Ndi, kit eerit nogo monggotak ti, an eerit nage minggirak ndak-ndak lek mban o,” yinuk, ari kagarak me, yagi o.

Yetaya 56:11

Nggeewo nen, “Abu nenggi o,” yinuk, mbaka'lek inaanogum andi lek lagap mban agan nugu mengga kwak, it aap ti togop aret wonogwe, It aap ndomba ndegeninaka nen inaanggumi ndegeninaburak kobak mengga kwak wonogwe, It abok aret eeriyak mbakwi nogo mban mugurok nogwe, Inalitik-inalitak ineenggi warak eekkoloorak mban kwaarit nugwi, Eeko menggaarak.

Yetaya 6:7

nambe paga mbaanggage logonet, “Kani kunik kambe paga pege yi ket o. Nambe mili, yagandak nogo yi paga koorogo paganuk, komaluk lek eerogo pagagi o,” yinuk, yo'nege kagarak.

Yetaya 66:3

It aap tapi ngguunok warogo nake kani kunggwi ti, aap wakwi kwak aret eekwi, Ndomba aagaluk warogo wo'nugwi ti, nggeewo enggaanok koguk wakwi kwak aret eekwi, Gandum anggen yigirik an wo'nugwi ti, wam amiya kilirogo an wo'nugwi kwak aret eekwi, Obari abe kaga kani kunggwi ti, kugi ogut alut eekwi kwak aret eekwi, Eeko menggaarak o. It aap ti, inalik iniki mba'nuk eeriyak miippunuk eerit nugwi, Ogole warak mendek mban eerit nugu logorak inikilom mbakwi, Eeko menggaarak me,

Yeremiya 50:6

It an napuri nogo ndomba kobak aago kwak nugwi, It ndegeninaka nen nomonogo tu alik paga piya nogwe, Puut-puut time iri'ngga kwaarogo nenet nugu logowak nduk, mbo piigwi, Eeko mbareegwa, Iname nogo yogo menggam woroorak kobak a'nuk, puut ambime nen puut ambime agak nugwi, Eerit nugwi me,

Yetikiyen 3:18

Aap maluk eeka ti, abet aret kambigin o, yokkege neenok, omaluk mbo punuk, eenik logowak nduk, kat nen kurumbi yoge, Komaluk mbo pu o, yinuk, koone nabek togon yoge, eeka'lek kenegen mbenaarogo mbo pemenggendak paga maluk eerit nage logonet kangge kenok, amiya ti, kat kobaalombok koba aret wonage, yokkirigin o.

Ndaniyen 9:5

Nit maluk aret eekwi, koone taganogo pugwi, eekoorak o. Nit abu maluk aret eekwi, Koone ari eeriyak nineebi o, yogwe, eeko logonet, wone, Yogop ee'nu ndogop ee'nu, yo'niragagindak inom, wone lengganogo yo'niragagindak inom, taganogo mbo pogoorak o.

Oroma 4:25

At Yetut nogo ti, nit Ala oone taganogo punuk, yiluk-maluk eekwi niinok, waruwak nduk punogo pege, ndi, “Kit aap yi, kinoba lek obeelom aret kiigi o,” yinuk, yuwak nduk, eenik eerogo mippege, eereegerak o.

Yakobut 5:20

Ala nen yokkirage logonet, “Aap ti, maluk eeke menggerak nogo mbo punuk, an noone woorak nduk, iniki yanggombunuk wonok wogotak paga, aap ti, kambunuk nogo menggam nage me, omaluk lek eerogo agap ndaruwak nduk, eekotak me, op aret eekotak o,” yinuk, yokkiraagin o.

1 Peterut 2:25

Kit aa'nduk ndomba kobak aago kwak ugun nugu nogogutak kwe, yogondak nen at kinarum wake, ndegengginake, eeka nogo abu'me logobagip nduk, ka wogogutak o.

1 Peterut 3:18

Nit maluk eekwi nogo abok aret lek eerogo pikit nduk, at Keritut ne ambit paga aret kambeegerak. At maluk eekeelik obeelom mban eeke menggerak nogo nen, nit obeelom eekwi lek maluk mban eekwi nogo, Ala abu'me pinanikit nduk at eebe aap aret age mbareegi, warogo pereegwaarak nit ninake aret kambeegerak kwe, Aberiniki nen eenik agago mippereegerak.

Owak Loongga 21:25

Ne ti eyom paga Iterali inenggela'me aap endagembogut ambi inarum wonage lek me, maluk aret kagak, “Yi obeelom aret eeko ogoorik o,” yinuk, inalitik-inalitak iniki koombunuk nen ugun eerit nogo nogogwaarak. 97