Yetaya 53:10 - Ala Wone Peenok Peebi Mbanak

¹⁰ At Aliku ALA kooneegerak paga awinde-obaande eeppugwi, Yagan wake logowak nduk eeppugwi, Eereegwaarak o. Ndi, it aakumi maluk eekwi lek eerogo piyaawak nduk, “At eebe waruwak o,” yinuk, kooneegerak paga wareegwaarak kwe, At paga wiganak enegen iige, At nda'nagagerak eyom nggorek ari nage, Aliku ALA nen at eeriyak mbareegerak nogo eerit nage kenok, abe age, Eerigin o.

Yetaya 53:10 ပူးပေါင်းရင်းမြစ်များ

Ndawi 110:3

Kat komaawi tiyak ari eyom paga It kawuri wim eeka nen inobaanggi-inobaangge abe lombok li'luk eekko'nok Inale'nggen paga kinom wim eeri unggwogwe, Kubondendok konaananggen luuri wage menggi kwak, “Ninom wim eeruwi o,” yinuk, kawuri aap tawe nogo kiyo'me ari wogwe, Eerugun o.

Ndawi 147:11

It aap at inagabiti ombakwi kenok perak, Aliku ALA nen inikilom mbake, Iniki kunik eeginabit wundi wage nogo Yi aap ndi aap iniki ti paga lunik wonogwe iinok, Ale'nggen inombake, Eeke menggerak o.

Ndawi 21:4

“Neenik logorak eeppanu o,” Yinuk, yokkege kenok eeppege, “Neenik nggorek mondok-mondok logokit nduk, Eeppanu o,” yinuk, nggino yokkege kenok eeppege, Eekendak o.

Ndawi 22:30

It aakumi wigannarit wundi wogo logogun nogo nen Kalut eeko logonet kake eekwi, It peebi nda'narit wundi wogo logogun nogo nen Kat nogoba Ala kabok yogwe nogo konenggwi, Eeko logomenggaarik,

Ndawi 22:31

“Wone ti, at abu aret eekerak me, at Ala abu obeelom mban eeke menggerak o,” Yinuk, it aakumi awo nda'naga'lek peebi nda'narugun nogo yorogo logogun o.

Ndawi 69:26

It aap kat nen aaninggin inoba kwippiige nogo, it ti nen abunuk piyak-payak eerogo piigwi, It aap kat nen andi-pandi kaawak nduk, eerogo piige nogo it ti nen inabok mbanit nugwi, Eeko menggaarak me,

Ndawi 72:17

At endage mondok-mondok ki aret wonage, Oonegen eya lek aga'lek wonage kagak, endage wiganinuk nage, Eeke logowak o. At eeppiinet nage paga Yi aakumi ndi aakumi abok nen inale'nggen kaagun me, “Kat kale'nggen at oba pege logot o,” yinuk, Ala yogo logogun o.

Ndawi 72:7

At wone lengganogo yorage kagak, It aap iniki abe koonak nogo wiganit wundi wogwe, Tut lek aga'lek wonage kagak Mbi ndonggok togon nunggo logonet, Iniki ugun tayenak wonogwe, Eeko logogun o.

Ndawi 89:29

At obaane'me ombowologwe nda'narit nawak nduk eeppege, Mbogut lek ageelik wonage menggi kwak, At wone lengganogo yorage menggim mondok logowak nduk eerogo pege, Eerigin o.

Yetaya 42:1

“An nen leenogo pateegirak niniki kunik eeke, Eerit nage kagak panggombege, Eeke minggirak nayeloman eeke logorak nogo yi aret. An Naberiniki at oba pege neenok, At nen yi aakumi ndi aakumi wone yugu nogo a'me nggelok eeko logowak nduk, yoranet nege logogin o.

Yetaya 46:10

Wone eeriyak nogo awo warengga'lek kagak, “Age yobok ndogop eeke kaamunggup o,” yinuk, yokkirage, Ee'nariyak nogo awo eeka'lek kagak aa'nduk togon abok yokkirage, Eeke minggirak o. An eeriyak koonogo pigitak ti, mbeyok arilik o. Ata, eeriyak niniki mbake ti, a'me lik togon aret eeke minggirak.

Yetaya 49:4

An nen ari logonet, “An anggon-panggon ee'nake kagak eeke nogo aanom warogo aret eeke, An nomaawi lik-lek eekkolage nogo ti, ambi koloorak lek we aret eeke, Eekirak mbake kwe, Eeppaniyak nogo ti, Aliku ALA obaalombok aret wonage, Ndi, onggo wo'niriyak nogo ti, nogoba Ala nen aret koongge, Eeke menggerak,” kagak yagarak o.

Yetaya 53:12

Togop me, it aakumi apit aret inomaluk wagangge, It wone yugu taganogo pereegwaarak nogo inake tamban eeke, Eeke logonet, Waruwok nduk eekwi iigak, eebe ili yikkoloolik teppege, It aap maluk eeka inom wonage ineenggi lingginiyak eebi mbaka'lek wonage, Eereegerak me, Aakumi inamendek ndinik nogo aap yo'nggok wogorage logonet, at inom wogoge, It aap wakaa'ngget aakumi inagugun wogo tumburirage logonet, at inom tumburege, Eerigin o,” yegerak o.

Yetaya 61:9

It paga wiganak nogo yi aakumi ndi aakumi inenggela'me nugwi iigak, It nogo aret nugu agaarik o, yinuk, liippiigwi, Inombowologwe nogo aakumi inanebunu lombok inenggela'me wonogwe iinok, It nogo aret o, yinuk, yogwe, Eeko logogun o. It aakumi abok nen it ti, inigen iigo logomenggaarik, It aakumi Aliku ALA ale'nggen inoba piige nogo mendek yi aret o, yinuk, yogo logogun,” yegerak o.

Yetaya 66:22

Aliku ALA nen ari logonet, “Mbogut ngget mendek eerogo pege, nggween ngget mendek eerogo pege, eerigin nogo ti, lek arigin lek mondok-mondok nenggaanom paga logogin ti kwak, kit paga wiganak mondok-mondok wonogwe, ndi, kit kinendage mondok-mondok ki aret wonage, eerak logogin,” yegerak o.

Yetaya 9:7

At wone lengganogo yorage logowam nggwok wiganinuk nage, Aakumi inom lambunik iniki ugun tayenak wonogwe nogo lek aga'lek kundugu wonage, Eeke logogin o. At Ndawut paga wiganak aret me, At wone lengganogo yorage menggim mi'na'nuk, At abu'me piige menggim wone lengganogo yorage logogin o. At obeelom mban eeppiinet nage, a'me nggelok mban inawone mbangge, Eeke logomenggerak paga At abu'me piige menggim akom kwippiige, Omaawi nu'lek eerogo pege, Eerogo pege kenok, Mondok-mondok aret logogin o. At Omaawi Lombok Menggerak Aliku ALA nen, “Mondok eerikit aret,” mbarit unggwage me, aret eeke logogin o.

Yeremiya 32:41

an nen it obeelom eerogo piyoorak niniki ale'nggen mbake, ndi, niniki ambit eeppunuk, yoragagirak nogo ndak-ndak o nggween yi, mondok-mondok logowak nduk eeppiige, eerigin ti aret,” yo'nereegerak.

Yetikiyen 33:11

yorage logomenggendik, ambi yorage logonet, It aap maluk mendek kanggwi iinok, an niniki ale'nggen mbakeelik o. Ata, ineenik logowak nduk it maluk eerit nugwi nogo mbo punuk, yungguninuk neya wogwe iinok perak, niniki ale'nggen mbake minggirak me, it Iterali mendek ti, iniyokan nowagam wogwe, it maluk eerit nugwi nogo mbo punuk, yungguninuk wogwe, eeko logowak o. It nonggop nduk, Kambuwok, mbako agaarik o? yinuk, neenik Nitok Minggirak Naliku an ALA nen aret yagi, yegerak yoret o.

Yetikiyen 37:25

Ti eeko logonet, nggween it inombomini wonogogwam nayeloman Yakup wogoreegim nogome wonogo logogun o. It inom, inapuri inom, inombowologwe inom, mondok-mondok time aret wonogwe iigak, nayeloman Ndawut nen inowe endagembogut mondok-mondok aret logogin o.

Ndaniyen 9:24

It aakumi kat mendek inom, kat kagota alik leenak nogo paga menggaarak inom, Ala wone yugu taganogo pit nogwe ti, Nineebi o, yuwak nduk eeppiige, Nit maluk eekwi nogo nineebi o, yinuk, mbo puwak nduk eeppiige, maluk eeko nogogwaarak nogo, aaninggin kaawak nduk, eeppiige, eekaatak onggo mondok a'me nggelok eeppiigak yuwak nduk mippiya wage, kabinggaanggo kagandak alom inom, Ala nen yorage kagak yoraga nen yorogo nogogwaarak inom, nogo ndak-ndak eeke, at abu alik leenak menggerak nogo amburu eerogo mippege, eeriyak eyom koonak nogo ti, tujuh puluh kali tujuh aret.

Mika 7:18

Keyate kwak kapuri kiniki kundugu ando yumbunik nogo, maluk eekwi iinok, inomaluk lek eerogo pege, Kat koone yugu taganogo pugwi iinok, mbo punuk, mari eerogo pege, Eeke menggendak kat Ala kwak ambi ta wonage? Lek aret o. Kanini mondok-mondok ninombaka'lek ninabuwa lombok ninombake logorak kinikilom mbake menggendak me,

Tepaniya 3:17

Aap wim wakaa'ngget nen inawuri inagap ndako mengga kwak, Aliku kogoba Ala kenggela'me logonet, kagap ndake, Iniki kunik lombok eekkake, Kabuwa mbake paga kiniki kwippagage, Kale'nggen nen ndawi wake, Eerigin o,” Yinuk, yogo logogun o.

Takariya 13:7

At Omaawi Lombok Menggerak Aliku ALA nen ari logonet, “Kat wooluwak yi wae. Nandomba ndegeninaka mippereegirak nogo wake, At nimbirak kunik wonage nogo, polok togon warogo pege, Eerenok nduk, Kat wooluwak yi, pilak yu o. Pilak yinuk, nandomba ndegeninaka wake keenok, it ndomba ti, ma'narugun o. An napurilogwe ndeyak mendek iigak kwe, inoorogo piyaagin,” yegerak o.

Matiyut 17:5

Wone awo yoge kagak, ameraakot abinak mendek nobappiya wage kagak, enggela'me nen oone ambi yorage logonet, “An naput niniki kunik nale'nggen ee'nake nogo yi aret me, at oone kinaruk liirogon konenggo logonip o.”

Matiyut 3:17

Kage mbareegi, mbogut paga nen oone ari logonet, “Napuluk niniki kunik lombok at yi aret me, niniki ale'nggen ee'nake kagi o,” yinuk, ari kagagerak.

Lukat 1:33

At Yakup ombowologwe wiganak inowe endagembogut logonet wone mondok-mondok lengganinake logogin o. Ndi, at abu'me piige menggim nogo, lek arigin lek mondok-mondok aret logogin o.”

Yaya 1:29

Nogo yinuk, ko'lu Yetut nogo, at Yaya owagam wage enegen kage nagagerik, it aakumi yorage logonet, “Aakumi nggween paga yime menggaarak inomaluk lek agago piige menggerak Ala andomba nogo wage yi kaanip o.

Yaya 12:24

Mbato awi nggween paga yakaatak agabolo nggonengga'lek kagak, ambit aret menggerak o. Ndi, agabolo nggonengge nagaatik, awi mbilangge kenok perak, anggen ambik aret yege menggerak o.

Yaya 13:32

An eeriminggirak paga nen Ala tiyappege neenok, at Ala eeremenggerak paga an kunduk, tiyappanigin o. Ndi, mbet-mbet aret tiyappanigin me nduk, yagi o.

Oroma 8:32

At Ala aput ambolom aret kwe, ili yuulik nit abok ninake waruwak nduk wuppi wagagerak nogo nen aput wo'niragagerak nogo ndak-ndak, yi mendek ndi mendek ngginu-ngginu eerogo wo'niraagin lek nduk yogo ogotik?

Oroma 8:8

It aakumi iniki maan mendek nen eeriyak aganake kenok mban eerit nugwi nogo nen Ala inikilom mbaruwak nduk ambi eeriyak meek aret o.

2 Korindut 5:21

At Ala nen nit Keritut ninom kunik niige logomenggerik, “Aap yi, iniki abe koonak aret kagi o,” yinuk, yo'niraawak nduk, Keritut maluk eeke logolik kwe, nit ninomaluk nogo at oba lenggenogo pereegerak.

Nggalatiya 3:13

Ndi, Ala wone mbanak paga nen ari logonet, “Aap ambi warogo eebe eyo karo-karo paga tugunogo pugwi kenok ti, Ala nen pulunogo pege menggerak o,” yinuk, yereegerak liiru mbanak ndak-ndak, wone Muta yoreegerak kagak alik eeko nogogurak ti paga, nit togon kambuwok nduk, pulunik aret wonogogurak kwe, lek aruwak nduk, Keritut ninobaane'me pulunogo pege mbareegi, eyo karo-karo paga tugunogo pereegwaarak ti paga, ninonggo mbambunuk, wondet eerogo pinaneegerak wonogo ogoorik o.

Epetut 1:5

Nit awo nda'naga'lek niigak, at Ala nen Yetut Keritut eeremenggerak paga, nit at apuri lombok logowok nduk wo'ninaburak inikilom mbareegerak nogo ndak-ndak, iniki kunik en, “Eeppiyaakit o,” yinuk, koonogo pereegerak nogo aret eeppinaneegerak.

Epetut 1:9

“Keritut nen togop eeppiyaawak o,” yinuk, inikilom mbake nagagerik, koonogo pereegerak kote kumaarak wonage nogo aret paganogo yo'niragagerak.

Epetut 5:2

Ala ake warogo kani kunggwi iinok, Ala nen obari obeelom kage menggi kwak, at Keritut ninabuwa nen, “Inake kambikit,” mba'nuk, ninake kambeegerak nogo ndak-ndak, nabuwa-kabuwa mbako logonet, at ambi obeelom eeppegak eeko logonip o.

2 Tetalonika 1:11

At ninogoba Ala nen obeelom eerit nogo logobagip nduk, kinayonggo pereegerak nogo ndak-ndak eerit nugwi kiinok, “Op eekotak o,” yinuk, yokkirage, kit obeelom eeriyak mbakwi nogo eerubagip nduk, omaawi eeppinagage, ndi, at abet mba'nuk eeriyak mbakotak nogo ndak-ndak eerubagip nduk, omaawi eerogo pinagage, eeke logowak nduk, kinake tamban mban eeko monggoorak.

Iberani 2:13

ndi, ambi ari logonet, “An niniki at paga panggonak wonage agarik o,” yinuk, yoge, ndi, ambi ari logonet, “Ala nen wo'nereegerak napuri ninom yime aret ogoorik o,” yinuk, yoge, eeke menggerak o.

Iberani 7:27

Ninake eeke logonet, it aap Lewi mendek Ala unde inoweewi nggwok nogo nen ko'lu-kii'me aakumi inake warogo Ala wogogo logonet, aa'nduk it maluk eekaatak nogo lek aruwak nduk, Ala wogogwi, ti'nuk, peebi aakumi ugun maluk eekaatak nogo lek aruwak nduk inake wogogwi, eeko mengga kwak, at togop eekeelik o. At Keritut perak, “It maluk eekwi nogo, lek eerogo piyaakit nduk inake kambikit o,” yinuk, Ala ake warogo wogogo nogogwa kwak, nit ninomaluk lek eerogo pinanikit nduk, at ne ambit mondok nggaruk togon ninake kambeegerak.

Iberani 9:14

Keritut amiya ti perak, iya lombok me, ninomaluk koo'ninaburak meek mbakop? Lek o. At mondok itok menggerak Aberiniki nen eeppege kagak, ndomba awinde-obande aago lek obeelom nogo pogom iniki nen at eebe aret nit ninake Ala wogoreegerak me, yogondak nit Ala mondok eenik itok menggerak nogo, ake eeko logowok nduk, wone aa'nduk aanom warogo mugurok nogwe niigak, ninomaluk lek aga'lek abe'nagak mban eeke kagak kambit nogo nogogurak nogo, at amiya paga lek eerogo punuk, mondok obeelom eerogo pinaniyak op aret mbako logowok o.

1 Peterut 2:24

It aakumi kanggaatak yabu eekulik nogo kwak, nit aa'nduk maluk eeko nogogurak nogo, yogondak ambinom eeka'lek obeelom mban eerit nogo logowok nduk, at eyo karo-karo paga kangge logonet, nit ninomaluk abok aret waganeegerak me, at agabolo nibik-nobak eerogo wareegwaarak nogo paga nit obeelom ee'ninabeegerak o.

Wayu 1:18

Neenik nitok minggirak an aret o. Aa'nduk kambeegirak kwe, yogondak perak, neenik mondok-mondok wonage yi neyet o. Kanggwi inom, kambunuk nogo menggam inom, imbirak an mban aret unde logonet, tu paaka kunci porogo minggirak o.