Yetaya 52:8 - Ala Wone Peenok Peebi Mbanak

⁸ It aap keebe karum menggaarak nogo nen Aliku ALA iyokan o Tiyon wage inigen abet nen kogo logonet, inoone tiyarogon yogwe, Ambugwi aret inale'nggen paga keekok yogwe, Eekwi ti, karuk konenu o.

Yetaya 52:8 ပူးပေါင်းရင်းမြစ်များ

Ndawi Iya 3:3

Kage nagarik, awo kwaarit nage me, it aap o kota arum waka nen tum warit nogo logonet, neego mbaka, an nen it yorage logonet, “At niniki kunik eeke nogo kinigen kogotak ilik?” yoraanuk,

Ndawi Iya 5:7

Awo eerit nage me, it aap o kota yengget-wangget tum waka nen kwaa'neego nagaarik, An nookwi, namiya timbo eerogo panugwi, It o kota yugum pak wurik arum waka ti nen yum nanobak paga nobakkolaga nogo ndinggologwe, Eekaarak o.

Yetaya 24:14

It aap teppiyaagin nogo nen inoone nggwok yogwe, Iniki ale'nggen nen ndawi piyanggwi, It aap oonegen kilu yi nage menggim pa'nggwe nen, “Aliku ALA iya o,” yinuk, pi warit nugwi, Eekwi iinok,

Yetaya 26:1

Ne ti eyom paga it Yekura wonogo menggam ndawi wako logogun nogo yi aret. Nit ninawi kota mondok omaawi aret wonage agaarik o. Yugum pak wurik eyak panggonak ti paga ninagap ndarak logowok nduk, ninogoba Ala nen eerogo pinanege me,

Yetaya 27:2

Ne ti eyom paga “Anggur anggen abe mendek yaremenggerak wonage logogin me, at Ala nen ndawi paga anep pogo logonip o, yigin nogo yi aret.

Yetaya 30:26

At Aliku ALA nen at apuri inamiyayilik-inamiyayelok eerak wonogwe nogo nggerenogo piige, inawinde-inobaande aago nogo obeelom eerogo piige, eeke eyom paga tut abinak nogo oonegen abinak kwak age, ndi, oonegen nogo ti, ne ambit paga wundi wage ti eya mbuuluk kwe, nogo ambit paga ne 7 kuli lambunik wundi wage kenok, eya mondok alik negen eerogo pege menggi kwak aret age, eerigin o.

Yetaya 35:10

It aap Aliku ALA nen wondet eerogo piyamenggerak nogo iname o Tiyon tu ti paga unggwi wogwe, Eeko logogun o. Unggwi wogo logonet, inale'nggen nen keekok piyanggogwe, Iniki ale'nggen mondok logorak mendek inikime nggelok ari logonet, inete yanggu aago wonogwe, Eeko logogun o. Iniki puru yogwe, iniki wakkologwe, eekwi nogo mondok lek age kagak Obaane'me inale'nggen alik negen aganake, Iniki kani moonuk negen nggelok ari, Eeke logogin o.

Yetaya 40:9

Wone obeelom wone wonok nega kit Tiyon mendek yi wae. Puut nggorek paga lagi nogwe, Wone obeelom wone wonok nega kit Yerutalem mendek yi wae. Kinoone mondok omaawi yorogwe, Kinagabiti mbaka'lek kuum-keek yorogwe, “Kinogoba Ala ti kaanip o,” yinuk, it kota-kota Yekura wonogwe nogo yorogwe, Eeko logonip o.

Yetaya 48:20

Kit o Mbaben nen wundi woraanip o. Kit Mbaben mendek ineenggime nen kole mbaganip o. Wone yi, kinikime nggelok ari kenok, kuum-keek agan nugwi, Wone yi wonok o irip-irip time yoranet nugwi, “Aliku ALA nen ayeloman mini nit Yakup paga wiganak nogo wondet eerogo pinanegi o,” yinuk, agan nugwi, Eeko logonip o.

Yetaya 56:10

Iterali inarum waka nogo ti, inigen mbuk kwak wonogwe, Yi wone ndi wone ineenggo'lek wonogwe, Nggeewo nggwak yogolik iniki apit mengga kwak wonogwe, Nogo yuurak inikilom nen nogo yit nugwi, inabi mban kanet nogwe, Eeko menggaarak.

Yetaya 58:1

At Aliku ALA nen ari logonet, “Eeppiyoorak wone yokkege yi, koone mbuuluk paga ari mage o. Ata, koone mondok nggwok paga ari, Oone nggwok eeka trompet oone eeke menggi kwak koone ari, Aliku ALA nen yokkirage nogo, Eeriyak nineebi, yogwe ti, nonggop nduk yogwe o? yinuk, an napuri yorage, Kit maluk ndogop aret eeko ogotik o, yinuk, it Yakup paga wiganak nogo yorage, Eeke logot o.

Yetaya 62:6

Kat Yerutalem yi wae. Kobak wurik paga aap tum logowak nduk piigirak me, It nen liingge inom, oonikiya inom, tum wako logonet, inoone lek puk logogun lek o. Aliku ALA o Tiyon eeppuurak yegerak aberogo yoga kit yi wae. Kurumbi yoraga'lek ugun puk logorak mage o.

Yeremiya 31:12

Wogo logomenggaarik, puut Tiyon paga ari wa'nuk, inale'nggen nen keekok yogwe, Naliku ALA an nen obeelom eeppiige logonet, Gandum inom, anggur amburu ngget toolak inom, tayitun amburu inom, kambin-ndomba inaagalogwe inom, lembu-tapi inaagalogwe inom, Yi mendek ndi mendek abok aret mondok nggwik togon wogoraminggirak paga Iniki ale'nggen nen i'ndok nggi yogwe wonogwe, Eeko logogun o. Ineebe logorak nogo ti, kom yarak me niyo mbininogo mambi wagaatak me, abe kwit agan lagangge menggi kwak aret logogun me, Le yogo nogogwa kwak ambinom yogo logogun lek o.

Yeremiya 32:39

It inom, inapuri ndaganabemenggaarak inom, obeelom mban wonogo logonet, an paga mondok-mondok inagabiti mbakwi, ndi, iniki ambit eeppunuk, eerit nogwe, eeko logowak nduk, eeppiyaagin o.

Yeremiya 33:11

aakumi inale'nggen nen yogwe, iniki ale'nggen nggelok yi unggwage logonet noone-koone yogwe, kwe aap imbirak lambunggo logonet inoone yogwe, ndi, it aakumi iniki ale'nggen nen, At Aliku ALA abu obeelom aret o. At iniki kunik ee'ninake nogo ti, lek aga'lek mondok-mondok aret ee'ninake menggerak me, At Omaawi Lombok Menggerak Aliku ALA, Wa! yogo logowok o, yinuk, an nake wo'niri wogo logonet yogwe, eekwi nogo ambinom inaruk konenggo logogun, yegerak o. Aliku ALA nen ari logonet, O aa'nduk obeelom lombok wonagagi kwak eerogo pigin o, yinuk, yegerak me nduk yagi o.

Yeremiya 33:7

It Yekura inom, Iterali inom, keele maageren nogogwam nen wogoren piya wa'nuk, aa'nduk wonogogwa kwak eerogo piyaagin o.

Yeremiya 6:17

Inarum logowak nduk, aap mippiinok, Oone nggwok eeka trompet oone pu ari kenok inaruk liirogon konenggo logowak o, yinuk, yoragagirak kwe, It nen, Ninaruk koneniyak nineebi o, yinuk, yogwe, Eereegwaarak nogo o.

Yetikiyen 3:17

“Aakumi nen ndarak yi wae. It Iterali mendek kenegen wogonake logonok nduk kat aret mippagagirak me, noone yokkege karuk konengge logomenggendik, Aliku ALA nen ndogop yegerak o, yinuk, kurumbi yorage logomunggun o.

Yetikiyen 33:7

Aakumi nen ndarak yi wae. An nen it aakumi Iterali mendek inarum waka logonok nduk, mippagareegirak o. Mippagareegirak me, it yoroorak noone ari nogo karuk konembunuk, Ala nen ndogop eeppinagagin o, yinuk, kurumbi yorage logomunggun o.

Tepaniya 3:9

Ti eeppiinok, it yi aakumi ndi aakumi abok aret Naliku ALA an mban nendage kumbunuk yo'nugwi, It iniki ambit eeppunuk, an mban nalut eekwi, Eeko logowak nduk, Wone wunako nogogwaarak paga inambe maluk agagerak nogo, obeelom eerogo piyaagin o.

Takariya 12:8

Ne ti eyom paga Naliku ALA nen it Yerutalem wonogwe nogo, inarum wonage logonet, it aakumi inomaawi lek abu ndeyak wonogwe nogo, at Ndawut omaawi wonagagi kwak eerogo piige, ndi, at Ndawut paga wiganak nogo ti, Ala kwak, Aliku ALA ayonggo malayikat inaa'nduk a'nuk, nogo nogogwa kwak, eerogo piige, eerigin o.

Nappiigak 2:1

Ne Pendakota eeriyak eyom age mbareegi, it abet mbareegwaarak mendek nogo abok aret ambit me kuwak eeppunuk,

Nappiigak 4:32

It abet mbareegwaarak nogo abok aret iniki ambit eeppunuk wonogo logonet, inamindik-inamendek nogo, “Yi kat mendek o. Yi an mendek o,” yaga'lek, we, “Nit abok ninamendek o,” yogo nogogwaarak.

1 Korindut 1:10

Noreewi o. Kit ogoorik-ogoorak eekkologwe nogo mbo punuk, kiniki-kinoone ambit eeppunuk, mondok lambunik logonet, eerit nogo logobagip nduk, “At ambi ari konen-konen yogo logonip o,” yinuk, ninowe Yetut Keritut endage paga yokkiragi o.

1 Korindut 13:12

Nit yogondak wukagi yumaak me, pekkogo logonet, ninetenggen liirogon kogolik nogo pogom, ninogoba etenggen agalu'mok mban kogo monggoorak kwe, peebi at eebe ninom lambumbunuk perak, at etenggen ninigen lik togon aret kaagun o. Yogondak an ando mban neenu minggirak kwe, at nen an eeke minggirak abok aret liippaninuk eenu menggerak nogo ndak-ndak, an peebi at eeke nogo abok neenu arigin o.

Iberani 13:17

It kinogobamini nogo ti, “Aakumi nonggop inarum wonogotak o, yinuk, Ala nen yo'niraagin,” mba'nuk, liirogon aret kiniki arum wonogwe me, inabu'me logonet, wone yokkirogwe nogo, liirogon aret konenggo logonip o. It inoone konengga'lek wonogwe kiinok, inale'nggen lek logonet, kinarum liirogon wonogwe lek paga maluk aret eekwi kiyoorak me, iniki ale'nggen paga kinarum logowak nduk, inoone liirogon aret konenggo logonet, obeelom eeppiigo logonip o.

Wayu 18:20

Eekwi iigak, at oone yo'nege nogo ambinom yo'nege logonet, “Kat mbogut yi, wae. Kale'nggen mbake, Kit Ala apuri ake leenak inom, obeelom wone yoranet nugu nogogutak nappiigak inom, Ala nen yokkirage kagak yoraga inom, Kit abok aret kwe yawukak nogo pogom o Mbaben yi nen eeppinagage nagagerak nogo onggo Ala nen aret eeppege me, kiniki ale'nggen mbakwi, Eeko logonip o,” yinuk, ari naruk konenggirak.

Wayu 19:4

it mbogut paga wonogwe inoweewi ineebe 24 inom, aakumi nen iigulik mendek ineebe 4 nogo inom, at wone lengganogo yorage menggim Ala time kwi'ndak wonage kagak abu'me tebe yinuk, alut eeko logonet, “Ninogoba wa, wa,” yinuk, “Amin,” yogwi naruk konenggirak.