Yetaya 26:7 - Ala Wone Peenok Peebi Mbanak

⁷ It aap iniki abe koonak nogo tu mot-mot mban nogo menggaarak me, Kat kiniki abe koonak yi wae. It aakumi iniki abe koonak nogo logorak inaru tiyak-tebek kenok ndenenogo pit nage menggendak o.

Yetaya 26:7 ပူးပေါင်းရင်းမြစ်များ

1 Mbinineegwaarak 29:17

Nogoba Ala o. Aakumi inabut mbangge, it iniki abe paga kiri wogwe iinok, kinikilom inombake, eeke menggendak neenu me, yi mendek ndi mendek kuwak eerogo pi wagarak yi, niniki abe paga ale'nggen logonet, kake pege, ndi, it aakumi kat kapuri yi kunduk, iniki ale'nggen paga inamendek kuwak eerogo pi wogwe iige nagarik, an togon niniki ale'nggen mbake, eeke agarik o.

Ayup 31:6

Aaninggin abu abe wakkogo mengga kwak, At Ala nen an liippaninuk, maluk eerulik aret neyaagin o.

Ndawi 1:6

It aap iniki abe koonak nen eerit nogwe nogo, Aliku ALA nen enegen wogonake menggerak kwe, It aap maluk eeka nen eerit nogwe nogo, Lek eerogo piige menggim time aret nogo menggaarak o.

Ndawi 11:4

Aliku ALA nogo at awi wurik alik leenak menggim nogome wonage, Ndi, Aliku ALA ti, wone lengganogo yorage menggim mbogut paga kwindak wonage, Eeke logonet, aakumi abok aret enegen wogonake, It eekwi nogo at enegen liippiige, Eeke menggerak.

Ndawi 11:7

At Aliku ALA liirogon obeelom mban eeke, It a'me nggelok eekwi nogo inikilom mbake, Eeke menggerak me, It aap iniki koonak nogo nen At enete inigen kogo logogun o.

Ndawi 25:4

Kaliku ALA wae. Kat eeke menggendak neenu eeppangge, “An naru yi aret o,” yinuk, titi'nege, Eeru o.

Ndawi 25:5

Kat nogoba Ala nen nagap ndake keenok, Niniki kat paga mban lunik neegak, o kiip age, weege, eeke menggerak me, “Wone yi abe o,” yinuk, ari menggendak nogo Eeke logokit nduk, pi'neren nage, Liirogon mamunnake, Eeke logot o.

Ndawi 27:11

Togop me, Kaliku ALA wae. It tebenogo paniyak eekwi ineebe ambik wonogwe me, Tu kat eerit nage nogo titi'nege, Tu koonak paga pi'neren nage, Eeru o.

Ndawi 5:9

It inoone yogwe nogo abe ambi yogwe mbakulik o. Inikime obari maluk mendek mban yagabit aago wonage, Inale'lok ti, aakumi nggween taanak ambe paganak a aago menggi kwak wonogwe, Ndi, inoone pilit mban pugunit nugwi, Eeko menggaarak o.

Kini Wuppiige 11:5

It aap maluk inoba lenggenggulik obeelom mban eerit nugwi kenok, Tu koonak paga nogo menggaarak kwe, it aap maluk mendek nogo perak, maluk eekwi ti nen yigeebu wuppiige menggerak.

Kini Wuppiige 20:7

Aap iniki abe koonak nogo nen maluk eeka'lek abe mban eerit nage logomenggerak paga Obaane'me apuri wiganak nogo inale'nggen aret mbako logogun o.

Kini Wuppiige 21:8

It aap maluk eekwi inaru ti, yelok-nggolok nugu menggaarak kwe, It maluk eeka'lek obeelom mban eerit nugwi nogo perak, inaru koonak paga aret nogo menggaarak.

Kini Wuppiige 3:6

Ala nen eeriyak kombake nogo, “Eerikit o,” yinuk, yi eekak ndi eekak eerit nage keenok, At nen eeriyak abok aret karu koonogo pagage logogin o.

Kini Wuppiige 4:18

It aap iniki abe koonak eerit nugwi nogo perak, Oonegen kemeninuk lagi woraakit nduk, eya mbuuluk eeke nagaatik, ti'nuk, Eerit-eerit o liingge paga eya ndak warogo pege kwak aret menggaarak kwe,

Yetaya 30:18

Togop kwe, at Aliku ALA nogo nen, “Obeelom eeppiyaakit lak, ao,” yinuk, tokkiige, Kinabuwa nen eeppinagakit nduk, pipuk aago wonage, Eeke agaarik o. At Aliku Ala a'me nggelok eeppiige menggerak me, “Eeppinanuwak o,” yinuk, It abok aret at tokkogwe nogo inale'nggen mbako logogun o.

Yetaya 35:8

O time tu nggwok wonage logogin me, tu endage, “Aap Iniki Kikak Naka'lek Nogo Menggam,” yogo logogun o. It aakumi inabin koorak lek maluk eeko menggaarak kenok, tu ti paga nogo logogun lek o. Ata, it tu ti paga noorak uugwe mbakwi kenok mban nogwe, It aap iniki yuundurak kwe, tu kin aret me, kobak aga'lek nogwe, Eeko logogun o.

Yetaya 42:16

It inigen mbuk negen wonogwe nogo tu ineenggo'lek me tu nigiren nage, It tu nogolik nogo paga wogoren nage, Tu apit aago paga nogwe iyo, nambokan wogwe iigak an naa'nduk tu eya eerogo pit nage, Tu tiyak-tebek paga nogwe iyo, an kagaarogo pit nage, Eerigin o. It inake eeriyak nogo ti aret. An mbo piyaagin lek abet aret eerigin o.

Yetaya 52:12

At Aliku ALA kinaame a'nuk aa'nduk wage, Iterali inogoba Ala kinage mbanit peebi aret age, Eerigin me, Kit mbet-mbet wundi wogwe, Kole mondok mbe agan wogwe, Eerumunggup lek o.

Yetaya 57:2

It aap iniki koonak logonet eerit nugwi nogo iniki ugun tayenak menggam unggwogwe, Kanggo nagaatik, yonggonggologo menggam yonggonggola unggwogwe, Eeko menggaarak o.

Yeremiya 10:23

Kaliku ALA wae. Ko'lu ee'ninaburak nit aakumi nineenggo'lek ti, neenu aret o. Ndi, ko'lu eerit noorak kunduk, nineenggo'lek mban aret.

Oteya 14:9

An wonage neegak, it Eparayim ti, inagugi inom wone mbanggo logorak op ya? Lek me, Yeenggwa niret o, yo'nugwi iinok, an nen aret wone onggo yorage, An nen aret inarum wake, Eeke logogin o. An ti, eyo kilu-kilu engga mili lubu ari menggi kwak minggirak me, An paga kunik logonet, anggen yogo logogun o, yinuk, yegerak me, yokkiragi o,” yoragagirak.

Tepaniya 3:5

Aliku ALA at enggela'me wonage logonet, maluk ambi eeppiigeelik obeelom mban eeppiige, At puk aga'lek ko'lu-kii'me o kubondendok nen inawone amburu mbanogo punuk, a'me nggelok mban eeppiige, Eeke menggerak kwe, It aap maluk eeka iniki nggolawe nogo, inenggali mbaka'lek maluk mban eerit nugu menggaarak o.

1 Korindut 4:5

Ti kenok, it aakumi inowak looniyak koonogo pereegerak eyom awo panggoni waga'lek kagak, kit nen aakumi maluk ugun-ugun inoba lenggenogo piigo logorak mage o. Ata, ninowe wage logomenggerik, nit aakumi ninikime kote koonggwi kumaarak wonage nogo kin paga pege, ndi, ninikime, “Alom ngge eeriyak,” mba'nuk, koonggwi nogo nggwok paga paganogo yo'nirage, eeke kenok, Ala nen ninalitik-ninalitak eeko logomonggoorak nogo ndak-ndak ale'nggen ninoba pinanigin me, waga'lek kagak aakumi ugun-ugun maluk inoba lenggenogo piigo logogup o.

2 Korindut 1:12

Nit eerit nogo logonet, liippunuk eerit nogo monggoorak kwe, kit kinenggela'me logonet perak, mondok iya lombok eeko nogogurak nogo, abeko logonet, it aakumi nggween paga mendek iniki koombunuk agan nugwi kwak agan nugwi, kinamendek kolaawok nduk, wone eegu nobat yokkirogwe, ti eeko logolik o. Ata, Ala niniki kunik nen omaawi eeppinanege kagak, mondok abet kenok mban kenom paganogo yokkirogo nogogurak nogo mban abe'nage kenok, “Op eekoorak me, ia!” yinuk, niniki ale'nggen mbako ogoorik o.

Epetut 2:10

Ala nen aret ogobakkigi'ninabeegerak me, nit at amendek aret ogoorik o. Nit nda'naga'lek niigak obeelom eerit nogo logorak Ala nen maan kooneegerak nogo, Keritut Yetut ninom kunik logonet eerit nogo logowok nduk, ogobakkigi'ninabeegerak.

1 Yaya 3:10

Ala apuri inom, Tile apuri inom, nano paga nineenu ariyak nogo yi aret. It aakumi obeelom eeka'lek maluk mban eekwi, inowe-inawot iniki kunik eekwi lek ineebi mbakwi, eekwi iinok ti, Ala apuri lek aret yelok iigo monggoorak.

1 Yaya 3:7

Napuri niniki kunik yi, wae. It aakumi ugun nen kit nomonggiren nogwe iyo, liippogo logonip o. Aap ambi maluk eeka'lek obeelom mban eeke kenok, at Keritut maluk eekeelik mondok obeelom mban wonage nogo pogom aret menggerak o.