Yetaya 17:13 - Ala Wone Peenok Peebi Mbanak

¹³ Yi wurik oone pu nage menggi kwak, Yi aakumi ndi aakumi togop agan nugwi kwe, Ameneno puut paga wonage o wiya nen wonok nage menggi kwak, O wiya omaawi nombok-kombok wage logonet, wola yugu wonok nage menggi kwak, Ala nen it mbaarage kenok, kole o nda time mbaganugun o.

Yetaya 17:13 ပူးပေါင်းရင်းမြစ်များ

Ayup 21:18

Wiiri anggen o wiya nen wonok nage menggi kwak, Eyoongga menenak nombok-kombok wonok nage kwak, it togop aganake, Eeke menggerak nogo ti, Kuluk aret aganake menggerak mbakop?

Ayup 38:11

Yi kuli woroorak op kwe, Yi kuli nen kat time noorak mage o, yoge, Eeke neyaawak o, yinuk, yi kuli mban kilaarak-mogonik eekkolage logomunggun o, yoge, Eeke neegak, Kat ngga wonagagindak?

Ndawi 1:4

It aap maluk eeka ti togop lek o. O wiya nen wiiri anggen wonok nage menggi kwak It aap ti togop aret wonogwe o.

Ndawi 35:5

Aliku ALA ayonggo malayikat nen mugogo nappiige kagak, Wiya nen iri'ngga ameneno wonok nage menggi kwak, Togop aret aruwak o.

Ndawi 65:7

Niyo nggwok yenggenak laut oone wo ari, Kilaarak-mogonik eerogo nippit wage, Eeke nogo abolok lek eerogo pege, Aakumi noone-koone agan nogwe ti, inoone mbanogo piige, Eereegindak o.

Ndawi 65:8

O irip-irip wonogwe abok aret eerubok eeke menggendak inigen kenok, “Ia!” yinuk, inagabiti mbakwi, Oonegen lagi wage menggim alom me nen nok, irip me Oonegen kilu yi nage menggim wonogwe abok aret kat eeke inigen kogo logomenggaarik, Inale'nggen nen keekok yogwe, Eeko menggaarak o.

Ndawi 9:5

Kat nen yi aakumi ndi aakumi mberirage, It maluk eeka nogo lek eerogo piige, Inendage mondok-mondok lek logowak nduk, kagaarogo piige, Eekendak o.

Yetaya 14:25

It Atiyut mendek an nanggween paga wonogwe nogo lek eerogo piige, It an nabuut paga wonogwe nogo niyok aan lebenogo piinet nage, Eyo aaninggin tapi uut paga kwippugu kwak it an napuri aaninggin inoba wonage nogo mbo pege, Aaninggin inuum paga wonok nogo mengga kwak inoba wonage nogo an waganogo mbo pege, Eerigin abet aret yagi o,” yinuk, kumbuk mbangge kagarak o.

Yetaya 22:18

Lawi agabolo abu omaawi perenogo punuk, O nda nggween nggwok aagome nogome mbo nappogo mengga kwak, kat togop aret nappagamenggerak me, Time aret kangge, ndi, time aret kanggweendo abu abe nogo mbo pege, Eeremenggendak paga Kowe endagembogut endage maluk aret eerogo pumunggun o.

Yetaya 27:1

Ne ti eyom paga Aliku ALA ambuti wooluwak paga maluk onggo eeppiige, Ambuti wooluwak mondok nggorek ngget penak maarak omaawi mendek nogo wonok wage logomenggerik, At waalo kole Lewiyatan tu agan nage, Waalo nggwok komaarak tuk togon nage, Eeke menggerak Niyo nggwok laut paga menggerak abu ogole warak nogo, warogo pege, eerigin o.

Yetaya 29:5

It aap kinom wim mbanak abok aret wun kwak ogwe, It aap wim eeka inogogun mbuk ineebe ambik aago wogwe ti, O wiya nen iri'ngga ameneno wonok nggarek ari menggi kwak ogwe, Eerugun o. O ngguurubu oone ari, mi ndipuk ari, oone nggwok ari, O wiya warit wage, wiya nombok-kombok eeke, kani pup eerogo nenet naga nogo wunuk agan wage, Eeke kagak, At Omaawi Lombok Menggerak Aliku ALA aberak lek me ndamban yi woraagin o.

Yetaya 30:28

Niyo wurik paga aap inenggaanok kuli ari lagangge kenok, ke'mbogonik yogo mengga kwak, Ala anini ke'mbogonik ari, Maluk kenok leenogo punuk, lek eerogo piyaawak nduk, at nen yi aakumi ndi aakumi piyak-piyak aganake, Yi aakumi ndi aakumi mbutigeele inogobak me pugunogo piinok, wogoren nage, Eerigin o.

Yetaya 40:15

Niyo ne ambit puk togon yiwa'na to'nage kwak, Liirubu aaninggin wakkagak paga wonage kwe, aaninggin ari nage menggim ari naga'lek kwak, Yi aakumi ndi aakumi ti, togop aret wonogwe inombake, Ndi, niyo oolome nggween kup mbanogo pit nagagim aaninggin wakkage ti, liirubu aaninggin kwak aret mbake, Eeke menggerak o.

Yetaya 40:24

Awi awo yakwi, anggen awo yumbunggwi, Omanggen yaruwak nduk, mbanogo nggween me awo tebenggwi, Eekwi iinok, At ambe aagi pu eeremenggerak paga teebat eerogo punuk, ameneno kwak aremenggerak me, o wiya warit wage logonet, wonok ma'nage menggi kwak aap ti, togop aret eeginabigin o.

Yetaya 41:11

It aakumi abok aret nen inanini kinombakwi nogo inenggali a'nuk inendage maluk age, Kit tebenogo pinagarak mbakwi nogo, it ambi eeriyak lek aret inenggaawak lek ogwe, Eerugun o.

Yetaya 8:7

Niyo Eparat wu'nuk wage logonet, ambet paga kilu-kilu wundit nage, Elaganggen paga linogo pit nage, Niyo mban uwe ndenit yi mendek ndi mendek taanogo pit nage, Yenggenit aakumi inenggaanok kuli ari lagangge logonet o irip-irip ndak wa'narit nage, Eeke menggi kwak, It Atiyut inowe endagembogut, Wi, ugwi iigak, eerit wage menggerak nogo nen Inogoba Imanuwen an nanggween o Yekura togop aret aan mbelenggabi unggwi woraawak nduk, nappi woraagin o,” yinuk, yo'nereegerak.

Ndaniyen 2:35

Iyok ti, yigirogo pege nagaarik, ambulok mbuti owak paga aago inom, aanogum-omarip mbuti tembaga paga eerak inom, amiguwak-obaak mbuti perak paga aago inom, ndi, anobak mbuti emas paga ogobakkigirik inom, ambugwi aret yigirik-noonom eerogo pegerak me, gandum anggen mbanak mbelanggo menggam age paga nenenggo logonet, ameneno leenogo pugu nogo eegu-ando pegeelik o wiya nen wonok mondok lek aret eerogo pege menggi kwak, yigirik nogo ando puulik abu lek eerogo pegerak kwe, yugum yelek togon wanggerak nogo perak, puut kole eerogo pege logonet, o nggween abok aret enete lek eerogo pit nage kagandak o.

Oteya 13:3

Togop aret me, o wege paga tit nake nagaatik, lek age, Oonikiya konaananggen luurogo pege nagaatik, kubondendok lek age, Yi mendek ndi mendek menenggwi iigak, o wiya nen ameneno kabe'nuk nggarek ari, Kani kunggaatak ka'luk yarugu-parugu lagangge, Eeke menggi kwak, It togop aret arugun o.

Tepaniya 2:2

At Aliku ALA anini kinoba pi wage logonet, iri'ngga wiirik o wiya nen wonok lek age menggi kwak, Kit togop aret lek eerogo pinagarak eyom koonak nogo, awo ari waga'lek kagak, Aliku ALA anini kani kunik negen eeppinagarak eyom panggoni waga'lek kagak, Aliku ALA mi'nage logonet, anini kinoba kwippinagarak ne nogo awo ari waga'lek kagak, Kinanggena luk togon kuwak ari wa'nip o.