Yetaya 1:5 - Ala Wone Peenok Peebi Mbanak

^5-6 Kinanobak paga abok aret kinawin kunik mban wonogwe, Kinooke kagak, kiniki lek-lek eekkinake, Kiniyok ogut kuli nen nok kinanobak kuli, obeelom ambi wonogwe lek piirik-kunik aago mban wonogwe, Kinawinde-kinobaande aago wonogwe, Kinoba pirikut-parakut eerak wonogwe, Eerak nogo lek aruwak nduk, tubunogo wumbakwi, Wip amburu mburunogo punuk, nggerenggologwe, Eeka'lek aret wonogwe kiigak kwe, At nen ambinom kinoorikit nduk eeke, At nen yokkirage nogo, “Eeriyak nineebi,” mban mbakwi, Eekwi ti, Nonggop nduk eeko ogotik?

Yetaya 1:5 ပူးပေါင်းရင်းမြစ်များ

2 Endagembogut 1:13

Ti eeke mbareegi, ti'nuk, aap endagembogut nogo nen peebi aap ineegin warak inowe ambi awuri 50 inom at Eliya wonage me nippiyareegerak lagi nogo nogogwaarik, aap inowe nogo Eliya owagam endobanggun yindumbunuk, abuwa warak nggo-nggo logonet, at yoge, “Ala wone liirogon eeka yi wae. Kat kayeloman mini nawuri ineebe 50 ninom yi, aakumi aret me, ninoorugun o.

2 Mbinineegwaarak 28:22

Aap endagembogut Akat nogo nen Aliku ALA liirogon mugurok nage logolik, mbo pegak negen eereegerak kwe, aaninggin oba agak mban age ti paga abunuk mbo pereegerak.

Nekemiya 9:34

It ninoweewi inendagembogut inom, ninarum menggaarak ninoweewi inom, kat keebe unde ninogobamini inom, ninombomini inom, eeko logorak wone lengganogo yorage nagagindak nogo mugurok nogwe, Yogop ee'nu ndogop ee'nu, wone yugu inom, maluk eeppiige keyo kurumbi yorage nagagindak inom, liippega'lek wonogogwaarak.

Yetaya 1:23

Aap karum wonogwe nogo noone ineebi yogwe, It aap kiraaka inom nugwi, It apit aret wone mage yugu kagak wu wogorogwe iinok waganggwi, Wu inambe nggi-nggi agan nugwi, Elege moono inaana'le mbangga'lek mbo piigwi, Kumi togwe inawone liirogon koongga'lek teppiigwi, Eeko agaarik o.

Yetaya 31:6

Kit aakumi Iterali mendek yi wae. Maluk lombok eeko logonet, kineenggi paga nen mbuti perak paga, mbuti emas paga, kinagugiwak ogobakkigirogo pereegutak nogo, Ne ti eyom paga kinalitak lombok nen mbo pumunggup me, at Ala mbo punuk kiniki o nda ari nagaarak nogo yogondak aret yungguninuk kiniyokan at owagam wa'nip o.

Yetaya 33:24

It o Tiyon wonogwe nogo ambi nen, “An andi ee'nake o,” yinuk, ari logogin mondok lek o. Ndi, it aakumi time wonogwe nogo inomaluk lek eerogo piige logogin aret o.

Yetaya 9:13

Togop eeginabeegerak kwe, It aakumi ti nen iniki wakko'nok at inomaluk onggo eeppiiga nogo owagam wogwe, At Omaawi Lombok Menggerak Aliku ALA mugurok wogwe, Eeka'lek aret wonogo agaarik o.

Yetaya 9:21

Neyak-keyak yogo logonet, it aap Manate mendek nen Eparayim mendek inoorogo piigwi, Ndi, it Eparayim mendek nen it Manate mendek inoorogo piigwi, Eeko logonet, It imbirak lambunna'nuk, Yekura inom wim eerugun o. Togop eerugun kwe, at Ala anini inombake nogo lek aga'lek ambinom inoba pikit nduk, “Ndime eeri nanip o,” yinuk, eenggi titik irage agaarik o.

Yeremiya 13:23

It aap Kuti mendek inagabolo mili nogo inagabolo laambu ariyak op mbaken? Ndi, mba'ngge eeruwak tikkarok aago nogo alik eekkoloorak op mbaken? Nogo ndak-ndak kat maluk kunik mban eeke menggendak nogo obeelom eeriyak ti meek aret keegi o.

Yeremiya 17:9

Yi mendek ndi mendek obeelom eerogo puurak ti op aret kwe, Nit niniki ti nen perak, abu maluk lombok logonet, abe eeriyak kagak alik eeriyak yo'nirage menggerak me, Obeelom ariyak, ta nen liippunuk eeriyak mbakop? Meek aret o.

Yeremiya 2:30

Inapuri iniki koonnaruwak nduk aaninggin inoba piige nagagirak kwe, liirogon woolik me, We aanom warogo inoba piige nagagirak o. Singa at noorak abu nen oone nggwok agan nage menggi kwak, It aap an nen yorage neegak yoraga nogo abok aret inawooluwak paga nenet nagagerak o,” yinuk, Aliku ALA nen aret yegerak me, yokkiragi o.

Yeremiya 44:15

Yorage mbareegi, it aap Yekura mendek inakuwi Ala ake lek it inagugi ake obari abe kaga kani kunggwi ineenu nogo inom, it kumi ambik kuwak ari nogogwaarak taati wonogwe nogo inom, it aakumi o Metit niyo Nin eneeri-ambut wonogwe ineebe apit aago inom, nen Yeremiya yogo logonet,

Yeremiya 5:3

Kaliku nogoba ALA o! It aap iniki abu koonak logonet, li'lak eeko menggaarak nogo kenegen pegiinet nage menggendak nogo lek a? Yawi paga inookendak kwe, it nen andi kogwe, Aan lebenogo piigendak kwe, iniki koonnage, Eeka'lek aret agaarik o. It inanobak yugum pogom eeppatinuk, “Ninomaluk mbo puurak, Nineebi,” mba'nuk agaarik o.

Yeremiya 5:31

It aap an nen wone yorage neegak yoraga nogo nen, Ndogop eeke kaamunggup o, yinuk, we pilit pugunit nugwi, It aap an neebe unde nogo nen it iniki mbakwi mban mamuninabit nugwi, Ndi, it ti eekwi nogo it an napuri kunduk, inikilom mbako logonet konenggwi, Eekwi ti aret me, O age yobok panggoni wage kenok it nano eerugun o?” yinuk, yegerak me, yokkiragi o.

Yeremiya 5:5

Inoweewi perak, Aliku ALA eeke menggerak liippugwi, Inogoba Ala yereegerak wone yugu nogo ineenu ogwe, Eekwi nogo abet aret ineenu me, Iya nage logominggirik, yoraagin o,” Mbake nagarik, yora nagarak kwe, “Yum aaninggin kwak, Ala wone yugu aaninggin me ambinom eeriyak nineebi o, yinuk, nggoorogo mbo pugwi, Wone yugu paga nit keele maarak negen wonogwe nogo mbanogo mbo pugwi, Eeruwok o,” yinuk, Iniki ambit eeppunuk, muk mbo pegaarak iigirak o.

Yeremiya 9:3

Aliku ALA nen ari logonet, “It aakumi ti, inamili yigin agale wurik paga maale lumbunuk tekkoorak kwak logonet, Pilit pugunogo nappit noorak mban koonogo pugwi, It wone abet aret agan nugwi nogo o yime wiganogo pugwi lek pilit wone mban wiganogo pugwi, Ala ti, ninogoba aret o, yinuk, yaga'lek maluk ambi eekak mban eerit nugwi, Eeko menggaarak o,” yinuk, yegerak o.

Leendawi 5:17

Puut Tiyon ti, yi oone ndi oone lek o wogome mba'ngge mban nugwi iinok, Niniki andi lombok ee'ninake, Ninigen yumaak eerogo pinanege, Eeke agaarik o.

Yetikiyen 24:13

“Mili-mili oba lengge aago kwak nogo ti, at enggali lek amendek kin eerogo pit nage ti aret o. At mili-mili oba lenggenak wonage nogo, an nen inoba eyoongga nggoorogo nappogo mengga kwak, eereegirak kwe, oba lenggenak nogo lek ariyak eebi mbareegerak me, nanini nen eeppuurak nogo tayo yega'lek kagak oba mili-mili lenggenak aret logogin o.

Yetikiyen 34:16

It lek ogwe iinok, an nen kwaarinake, kobak aago nugwi iinok, wogoren piya wage, inawinde-inobaande aago iinok, nggerembiige, inomaawi lek iinok, inomaawi eerogo piige, eeke logonet kwe, ineeruwak anen pera-pera aago inom, inomaawi ambik wonogwe inom, ti lek eerogo piyaagin o. Nandomba unde wogonake logonet, it inobaabut eekwi ndak-ndak eeppiige logogin o.

Yetikiyen 34:4

It ti eeko logonet, inandomba ineebe ndeyak kenok inomaawi eerogo piigwi, ineebe andi kenok obeelom eerogo piigwi, inawinde-inobaande aago kenok nggerembiigwi, kobak agaatak wonogwe iinok wogoren piya wogwe, ineebe lek ogwe iinok kwaarinakwi, eeka'lek mbo piinok, inanini paga eeppiigwi, iniyok konden aan lebenogo piigwi, eeko logonet, ndegeninako menggaarak o.