Yeremiya 9:24 - Ala Wone Peenok Peebi Mbanak

²⁴ Ata, aap ambi nen wone tiyappuurak mbake kenok, wone eebe tiyappuurak nogo yi aret. O nggween paga yime aakumi inabuwa mbakwi, Eekaatak a'me nggelok eeppiigwi, obeelom mban eeppiinet nugwi, Eekwi paga ninikilom mbake minggirak Naliku ALA neebe at eenu wonage, Ndi, an eeke minggirak liippanege, Eeke logorak ti aret o,” yinuk, Aliku ALA nen aret yegerak o.

Yeremiya 9:24 ပူးပေါင်းရင်းမြစ်များ

Ndawi 20:7

It ando inanggweendo paga iniki panggombugwi, It ando inaguda paga iniki panggombugwi, Eeko menggaarak kwe, Nit perak, niniki Aliku ninogoba Ala oba panggonak ogoorik o.

Ndawi 34:2

At Aliku ALA eeppanege paga An niniki ale'nggen mbake, Eeke minggirak o. Kit aakumi tebenak wonogwe nogo, Kinaruk konembunuk kinale'nggen mbakwi,

Ndawi 34:3

“Aliku ALA iya!” yinuk, ninom alut eekwi, Kit an ninom at endage tiyappugwi, Eeko logowok o.

Ndawi 44:8

Kat Ala eeke paga Kubondendok nen nok oonikiya ari nage kagak, Nit wogoppagagwi, kendage mondok-mondok alut eekwi, Eeko logogun o.

Ndawi 44:9

Togop aret kwe, Kat nen nit mbo pinanege, Ninenggali aruwak nduk eeppinanege, Nawuri wim eeka ninom wundi nogwe niigak, Kat ambinom ninom naga'lek puk age, Eeke agandik o.

Ndawi 51:1

Nogoba Ala wae. Aakumi inabuwa lombok mbarit wundi wage menggendak ndak-ndak an nabuwa mbake, Aakumi kiniki kunik aganake menggendak me, Wone yugu taganogo punuk maluk eekirak yi, Lek eerogo panege,

Ndawi 91:14

At Aliku ALA nen ari logonet, “At aap ti, iniki kunik ee'nake me, agap ndake, Ala ti, an nogoba aret o, yinuk, ari me, arum wonage,

Ndawi 99:4

At endagembogut mondok tiyanak wonage, Eekaatak a'me nggelok eeppiigo logorak inikilom mbake, Ndak-ndak eeppiinet nogo logorak wone lengganogo pege, Obeelom mban eerit nugwi wone inom, Eekwi a'me nggelok eeppiigwi wone inom, It Yakup paga wiganak eeko logowak nduk, Lengganogo yorage, Eereegerak o.

Yetaya 20:5

It aakumi o Kuti iniki panggombunuk wonogwe nogo inom, O Metit ti iya o, yinuk, wogoppiigwi nogo inom, nen iniki ma'nogwe, inenggali ogwe, eerugun o.

Yetaya 41:16

Ameneno wambit nage kenok, o wiya nen wonok nage, Wiya omaawi nabuninuk wage logonet, ameneno wonok nggarek ari, Eeke menggi kwak Togop aret eerogo piyaamunggup kwe, kit perak, Naliku ALA eeppinagage paga kinale'nggen nggwok nombakwi, An Kikak Nakeelik Nalik Leenak kinogoba nendage tiyappanugwi, Eeko logomunggup o,” yinuk, yorage kagarak o.

Yetaya 45:25

It Iterali paga wiganak nogo perak, abok aret Aliku ALA nen, “Aakumi yi iniki abe koonak aret o,” yinuk, eeppiige paga at endage tiyappogo logogun o.

Yetaya 61:8

Aliku ALA nen ari logonet, “Aakumi tebenogo piinok inamendek waganggwi, maluk mban eerit nugwi, eekwi ti, An Naliku ALA nen neebi lombok mbake, Ndi, eekaatak a'me nggelok eeppiigo logorak ti, ninikilom mbake, Eeke minggirak me, It togop eekwi ti, onggo liirogon aret eeppiige logonet, Wone mondok-mondok eeko logorak ninom koonogo pigin o.

Yeremiya 22:16

It aap ineenggi lek inom, it ambi eekkoloorak meek tebenak mendek inom, Inawone amburu liirogon mbanogo inowak looninake nagagerak ti paga endage obeelom wonagagerak o. It aap an Naliku ALA liippanugwi iinok, togop aret eeko menggaarak nogo lek a?

Yeremiya 4:2

Ndi, Nit a'me nggelok mban eeppiinet nugwi, Obeelom mban eerit nugwi, Pilit lek abet aret eeko logogun o, yinuk, Neenik Minggirak Naliku ALA nendage kunogo kumbuk mbanggwi, Eekwi iinok, It aakumi inanebunu lombok nen, It eekwi ti, nit togop aret eeko logowok o, yinuk, Nale'nggen-kale'nggen yogo logonet, nendage tiyappanogo logogun o,” yinuk, yegerak me yokkiragi o.

Mika 6:8

Nit aakumi yi, obeelom eeko logorak ti, Aliku ALA nen muk yo'niragagerak o. Ndi, Aliku ALA nen eeko logorak ninombake nogo ti, ngge o? Lek o. Nit eeko logorak ninombake nogo ti, a'me nggelok eeppiinet nugwi, Aakumi inabuwa mbako logorak ninikilom mbakwi, Niniki tebeppatinuk, ninogoba Ala mugurok nogwe, Eeko logorak ninombake ti aret o.

Mika 7:18

Keyate kwak kapuri kiniki kundugu ando yumbunik nogo, maluk eekwi iinok, inomaluk lek eerogo pege, Kat koone yugu taganogo pugwi iinok, mbo punuk, mari eerogo pege, Eeke menggendak kat Ala kwak ambi ta wonage? Lek aret o. Kanini mondok-mondok ninombaka'lek ninabuwa lombok ninombake logorak kinikilom mbake menggendak me,

Matiyut 11:27

Yoge nagagerik, ambinom yora-ge logonet, “An nogoba nen yi mendek ndi mendek abok aret an unde logokit nduk, eeppaneegerak. Ndi, Ala aput yi ti, it aakumi mondok ineenggo'lek nogoba alik mban eenu menggerak. Ndi, nogoba ti, aakumi mondok ineenggo'lek at aput an nalik mban neenu minggirak. Ala aput an lombok nen, It aakumi nogoba ineenu aruwak nduk, paganogo yoraakit, mba'nuk, yorage neenok mban ineenu ogo menggaarak.

Lukat 10:22

Yoge nagagerik, “An nogoba nen yi mendek ndi mendek abok aret an unde logokit nduk, wo'nereegerak. Ala aput ti ta o? It aakumi ineenggo'lek nogoba alik mban eenu menggerak. Ndi, nogoba ti ta o? Ti, at aput an nalik mban neenu minggirak. Ndi, aput an nen it aakumi nogoba ineenu aruwak nduk, paganogo yoroorak mbake neenok, it kunduk, ineenu ogo menggaarak o,” yinuk, yoragagerak.

Yaya 17:3

It aakumi mondok-mondok ineenik logorak nogo ti, kat Ala abet aret kalik menggendak inom, ndi, kat nen nappani wagagindak an Yetut Keritut inom, ineenu ogwe ti aret o.

Oroma 5:11

Ti eereegerak paga mban ninale'nggen mbako logorak lek o. Ata, ambi nit ninowe Yetut Keritut eereegerak nogo paga Ala ninom lambunogo pinaneegerak me, “Ala wa,” yinuk, ninale'nggen mbako logowok o.

1 Korindut 1:31

Togop me, “Aap ambi nen wone tiyappuurak mbake kenok, ninowe eeppinanege menggerak wone nogo mban tiyappogo logowok o,” yinuk, yereegerak liiru mbanak ndak-ndak at mban wogoppogo logonip o.

2 Korindut 10:17

“Kit ambi nen wogoppatiyak mbakwi kenok, Ala nen eeppinagage kagak, eeko monggotak me, at mban wogoppogo logonip o.”

2 Korindut 4:6

At Ala nen ari logonet, “O apit me eya aruwak o,” yinuk, eya eereegerak nogo inom, ndi, Ala mondok tiyanak, “Wi!” ugwi nogo, Keritut enete liippunuk, yelok kogo logowok nduk, ninikime eya ee'ninabeegerak nogo inom, ti eebe ambit Ala nen mban aret eereegerak o.

Nggalatiya 6:14

Ndi, an perak, ninowe Yetut Keritut eyo karo-karo paga kambeegerak wone nogo abet mba'nuk, waganeegirak ti paga, it nggween paga mendek nen eeko menggaarak ti, aap kanggaatak inoone yogolik nogo pogom me, it eekwi nogo an ambi eeke logokit nduk, yo'niriyak meek aret o. Ndi, an kunduk kambeegirak negen aret me, it nen an yo'nugwi nogo kunduk, koneniyak meek me, an eeke minggirak paga wogoppatiyak lek o. Ata, ninowe Yetut Keritut eyo karo-karo paga kambeegerak wone nogo mban tiyappege agarik o.

Pilipi 3:3

“Neebe ndogop eeppaneegwaarak o,” yinuk, niniki ti paga panggombunuk, tiyappugwi lek o. Ala Aberiniki nen ninikime yo'nirage kagak, Ala alut eekwi, Keritut Yetut ee'ninabeegerak nogo tiyappugwi, eeko monggoorak nogo ti, ninagabolo abe mbanak nit aret o.

1 Yaya 5:20

At Ala aput wambi wage nagagerik, Ala ambit alik lombok menggerak nogo nit liippuwok nduk nineenu eeppinaneegerak o. Ndi, at alik lombok menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at alik lombok menggerak Ala nogo aret me, nineenik mondok logorak unde eeppinanege menggerak alom at aret o.

1 Tamuwen 15:22

Yoge mbareegi, at Tamuwen nen wone onggo yoge logonet, “Kambin-ndomba Aliku ALA ake warogo kani kunggwi inom, We iniki ale'nggen mbaruwak nduk, wogogwi inom, Ti Aliku ALA inikilom nggwok mbake, Ndi, at oone konembunuk eekwi ti, inikilom mbuuluk mbake, Eeke menggerak mbaken? Kambin-ndomba warogo ALA wogogwi ti, op aret kwe, At oone konembunuk ndak-ndak eekwi ti perak, mondok iya lombok o. Ndi, kambin-ndomba ngguunok amok warak ti, obeelom aret kwe, At oone liippunuk, ndak-ndak eekwi ti perak, abu alik mondok iya lombok aret o.