Yeremiya 9:16 - Ala Wone Peenok Peebi Mbanak

¹⁶ It inom, inombomini inom, aakumi abu ineenggo'lek mendek ineenggime mak eerogo piige, ineebe inooruwak nduk, nappiya woraminggirak muguren nogwe iigak, an nen inenggaawak lek eerogo piige, eerigin,” yegerak o.

Yeremiya 9:16 ပူးပေါင်းရင်းမြစ်များ

Nekemiya 1:8

Kat nen ari logonet, It an noone yorage nogo liippunuk, eeka'lek iinok, ineebe abok aret yi aakumi ndi aakumi inenggela'me mak eerogo piyaminggirak kwe, iniki yungguk togon nowagam woraanuk, Yogop ee'nu ndogop ee'nu, wone yugu nogo mugurok nogwe iinok, yi o ndi o irip-irip time mbo piyaminggirak wonogwe me nen kuwak eerogo, o an nendage ki logowam leenogo pateegim nogome wogoren piya woraagin o, yinuk, kayeloman Muta wone lengganogo yoreegindak nogo aberu o.

Wone Alom Kibingga 12:5

Tu tiyarogon nugu logorak inagabiti mbariyak eyom aga'lek kagak, Tu nggwok paga noorak inagabiti mbariyak eyom aga'lek kagak, Eyo mbogombi ambit-mbit wariyak eyom aga'lek kagak, Wurin nabuk-kabuk noorak eyom aga'lek kagak, Iniki aganggen aganake lek ariyak eyom aga'lek kagak, Kame mondok-mondok logowam noorak eyom aga'lek kagak, Kerabun ndooniyak eyom awo ari naga'lek kagak, At ogobakkigirogo pagareegerak nogo abeke logot o.

Yeremiya 13:24

At Aliku ALA nen ari logonet, “At an neebe ami age nagagerik, abe eeppuurak lek kagak kugi ti paga iniki panggombereegerak me, O wiya karume nen oone pu wage logonet, gandum arinon wonok mappege menggi kwak, mak eerogo pigin o. An nen at eerogo puurak koonogo pereegirak ti aret me, ti aret eeppege neyaagin o.

Yeremiya 24:10

An nen wooluwak paga inooruwak nduk nappiya wage, mbi noogelo inoba piige, kugilingga inoba kwippiige, eeke neegak, it inombomini inom o nggween wogoragagim nogome ambiriluk ambi logogun lek inenggaawak mondok lek aret arugun o,” yinuk, Aliku ALA nen yo'nege kagagirak.

Yeremiya 25:27

Nogo wogoge mbaki, Aliku ALA nen an yo'nege logonet, “Amburu toolak nogo wogorage logomenggendik, it yorage logonet, at Omaawi Lombok Menggerak Iterali inogoba Aliku Ala nen yegerak nogo yi aret. Amburu toolak yi ti, wooluwak paga inooruwak nduk, nappiya woraminggirak inookwi kwak aret me, nonggo logowak o. Nenok kumili kunggwi, peyak wukwi, eeppunuk, ngginnarit namenggaarak mi'narugun abu lek aret, yegerak, yoret o.

Yeremiya 29:17

At Omaawi Lombok Menggerak Aliku ALA nen abet aret yegerak nogo yi o. “An nen wooluwak paga inooruwak nduk, nappiya wage, mbi noogelo inoba piige, kugilingga inoba kwippiige, eeriminggirak paga eyo wuliinggen abu pili agaatak aakumi nunggulik kwak aganabigin o.

Yeremiya 44:27

An nen obeelom eerogo piyaakit nduk eekeelik maluk eerogo piyaakit nduk nenegen wogoren nege me, it aap Yakuri mendek o Metit paga wonogwe nogo, wooluwak paga inoorak kanggwi, mbi noogelo paga kanggwi, eerit-eerit irip paga inenggaawak lek eerogo patugun o.

Yeremiya 7:29

Naliku ALA nanini it aakumi yogondak ndarak yi, inoba agaarak wonage nogo, Neebi o, yinuk, mbo piigirak me, ineeruwak mbanogo mbo punuk, puut puluk ko aago paga lagi nanuk, le ndawi piyanggo logowak, yegerak, yoret o,” yinuk, yo'negerak o.

Yeremiya 8:19

It an nowe-nawot o nda nen le yogo logonet, “Aliku ALA o Tiyon wonage ilik lek a? O kota time inowe endagembogut wonage ilik?” Yinuk, inoone nggwok paga yogwe nogo karuk konenu o. Yoge mbaki, at Aliku ALA nen, “An niniki wariyak it nonggop nduk inagugi ogut eerogo pugwi, Nonggop nduk it aap inambik inagugiwak aanom warogo kagak mippit nogwe, Eekaarak?”

Yetikiyen 11:17

Neebe aret me, Aliku Itok Menggerak ALA nen wone yegerak nogo yi o, yinuk, yoroorak nogo yi aret o. An nen yi aakumi ndi aakumi wonogwe me nen ambit me lambunogo piige, mak eerogo piyareegim yi awi ndi awi wonogwe me nen kuwak eerogo piige, eeke logominggirik, wogoren inanggween lombok o Iterali unde logowak nduk piya woraagin o.

Yetikiyen 12:15

Yi aakumi ndi aakumi inenggela'me nappiige, yi awi ndi awi abok aret mappiige, eeke neenok, Naliku ALA an aret ineenu arugun o.

Yetikiyen 14:17

Aakumi nen wooluwak wonok woraawak nduk, nappiya wage logonet, O yime kinawooluwak paga inoorogo piinet nanip o, yoraminggirak wonok nogwe iigak, an nen aakumi inom, inaanggumi inom, abu lek eerogo piinet nage logonet,

Yetikiyen 20:23

Inogobamini inagugi ogut mugurok noorak uugwe lombok mbako logonet, eeko logorak noone yoragagirak nogo eeka'lek mbo pugwi, wone lengganogo yoragagirak nogo taganogo pugwi, nogo 6 yippunuk, ko'lu paga yonggonggologo logorak leenogo pateegirak nogo maluk eerogo pugwi, eereegwaarak me, it yorage logonet, Yi aakumi ndi aakumi inenggela'me nappinagage, yi o ndi o abok aret mappinagage, eerigin o, yinuk, o karume time yorage nagagirik, wone ti, abet mbaruwak nduk, kumbuk mbaneegirak o.

Yetikiyen 27:2

“Aakumi nen ndarak yi wae. O Tirut eeppuurak nogo, leendawi ambi tiyangge logot o.

Yetikiyen 5:12

O kota Yerutalem inikime time at aagalogwe ando mogonak kugilingga paga nen ilik, mbi noogelo paga nen a, kanggwi, kota pak wurik endekem ando mogonak wooluwak paga inoorak kanggwi, ndi, ando mogonak o wiya irip-irip warit nage menggi kwak mappiige logominggirik, nawooluwak nutik muguren nage neenok kanggwi, eerugun o.

Yetikiyen 5:2

Mogonogo punuk, o kota oba kwi'nari ungguurak wakkagak eeke logonet, Nogo ndogop yuurak o, yugu nogo abu aret age kenok, keeruwak mbanak ambi mogonak nogo, o kota ogut eerak eraanu kani kungge, ambi mogonak nogo, o kota enaagan-ambokan waruk ti paga mbanogo wuppit nage, ndi, ambi mogonak nogo, o wiya wage paga mak eerogo nappege, eerumunggun o. Ndi, o wiya wage paga mak eerogo nappemenggendak nogo, an nen wooluwak nutik muguren nage logogin o.

Ala Unde 26:33

Inom wim mbanak nen aakumi Iterali iname nen mugogo wumbiinok, muguren inoorit nogwe iinok, yi aakumi ndi aakumi inanebunu alitak lombok inenggela'me ma'narit nawak nduk, inom wim mbanak yonggo piyaminggirak eeppiya wogwe iinok, Iterali inawi kota abe wurik ti lek age, ndi, inanggween nogo ti, we o wogo wonage, eeke logogin o.

Amot 5:16

At Omaawi Lombok Menggerak nogoba Aliku Ala nen yegerak nogo yi aret. “It aakumi inawi kota-kota wonogwe nogo leenggu maarit nogwe. It aap tu paga tu paga wonogwe nogo nen le agan nogwe, Le yi woraanip o, yinuk, it aap yabu eeka wiirogwe, Ndi, it leendawi tiyangga nen leendawi tiyani woraawak nduk, inayonggo piigwi, Eerugun o.

Mika 2:4

Ne ti eyom paga it aakumi nen, Op togon eeppinagagi, yinuk, yorogo logogun o. Nineebe lek eerogo pinanege, ninanggween mbanogo wogorage, Ndinggolage nagagerik, it aap tebenogo pinanugwi nogo wogorage, eereegerak o, Yinuk, yogwe nogo inomaani mbanggo logonet, Kayik a! yinuk, le ndawi paga inanep pogo logogun o,” yinuk, Aliku ALA nen yegerak me, yokkiragi o.

Takariya 7:14

O wiya nombok-kombok warit wage logonet, yi mendek ndi mendek wonok mappege menggi kwak, it ineebe togop aret yi aakumi ndi aakumi inambik inenggela'me mappiyareegirak. Mappiige mbareegi, it wonogo menggam inanggween paga time o wogo eerogo pereegwaarak me, aakumi ambiriluk ambi yinggwi-unggwogwe eeka'lek aret agaarik o. O abe aret kwe, o wogo aret eerogo pereegwaarak nogo ti aret o,” yinuk, an yo'nereegerak.

Pelaareegerak 28:25

Kit nen kinawim inooriyak nduk tu ambit eeppunuk nogwe me, at Aliku ALA nen tebenogo pinagage kenok, kinawim nen kinoorit wogwe iigak, kit tu 7 paga kinalitak lombok mbaganit namunggup o. Mbaganit nogwe it yi aakumi ndi aakumi inabu'me piigo menggam o nggween paga yime menggaarak abok aret nen inigen kiigo logomenggaarik, Yi eeginakerak mbaganggwi iya, yinuk, kinabok mbanggo logogun o.

Pelaareegerak 28:36

At Aliku ALA nen kit inom, kinowe endagembogut mippumonggotak inom, it aakumi inanebunu alik kinombomini kinom kineenggo'lek nogo mendek wonogwe me, wokkiren pinagi nage kenok, time wonogo logonet, Ala alut eekwi obaane'me eyo paga inom, yugum paga inom, kinagugi ogut ogobakkigirogo mippunuk, tiyappit nugwi

Pelaareegerak 28:64

At Aliku ALA nen kit o nggween alom me nen nggween irip me yi aakumi ndi aakumi wonogwe inenggela'me time mak eerogo nappinagamenggerak time wonogo logonet, kit inom, kinombomini inom, kugi kineenggo'lek mendek ogut eyo paga a, yugum paga a, ogobakkigirogo Ala obaane'me mippogo logomonggotik, alut eeko logomunggup o.

Pelaareegerak 32:26

An Ala nen, It mak eerogo piige, Aakumi inenggela'me inendage aberak logokwak, kobak eerogo piige, Eerigin, yereegirak kwe,

Pelaareegerak 4:27

At Aliku ALA nen aakumi inanebunu alik mendek inenggela'me logomunggup nduk, mak eerogo pinagamenggerak inenggela'me wonogo logonet, it ando kambit nogwe iigak, kit ando mbereeluk mban kineenik aret logomunggup o.

Yakobut 1:1

Kit Yakuri kinanebunu 12 mendek yi o ndi o mbaganit nogogutak nogo, an Yakobut nen ninogoba Ala ninowe Yetut Keritut imbirak inayeloman logonet, keyage wappinagagi o.