Yeremiya 7:20 - Ala Wone Peenok Peebi Mbanak

²⁰ Yo'nege nagaarik, Aliku Itok Menggerak ALA nen yegerak nogo yi aret. “Nanini kani kunik pogom o yi paga wuppi woraminggirak paga aakumi ineebe inom, inaanggumi inom, inageyo inom, ineyabu yarak anggen mbanak inom, abok aret nenet nage logogin me, nogonogo puurak meek aret kaagun,” yegerak o.

Yeremiya 7:20 ပူးပေါင်းရင်းမြစ်များ

Yetaya 10:17

It Iterali Eya Eeginaka ti, kani kunik kwak age, Inogoba at Kikak Nakeelik Alik Leenak ti, kani wunuk ari menggi kwak age, Ee'nuk wage logonet, Aap eerit nage ti, alok-palok inom, iri'ngga ku'mbanak inom, kani ne ambit liingge nengge menggi kwak togop aret lek eerogo nagin o.

Yetaya 42:25

At anini kani kunik negen ninoba pinanege, Wim nen abu iya lombok ninoorit wagak yuwak nduk, eeppiige, Eereegerak o. Ti eerogo pinaneegerak nogo ti, kani omoonuk enggela'me negen wonogogurak kwe, niniki liippugwi, Kani nen nineebe nengge negen eeke nagagerak kwe, “Ndogop eekoorak paga ee'ninake,” mbakwi, Eeka'lek aret wonogogurak o.

Yetaya 66:24

It ti nen wundi nogo logomenggaarik, it aap an noone eeriyak ineebi mbaka nogo inoorak inowak nggininik inigen kogo logogun o. O time ineebe inoorak waalo ninggippunuk nunggwi nogo kangga'lek ineenik mban wonogwe, ndi, ineebe kani nengge nogo noguk yaga'lek wunuk mban ari, eeke kenok, it aakumi abok aret inigen kogo logonet, inamineeri ne agan nage logogin o,” yinuk, yegerak me, abu aret yagi o.

Yeremiya 11:16

Eyo tayitun abe kwit agan lagangge logonet, anggen abu obeelom mban yege menggi kwak, At Aliku ALA nen kinendage ti aret toonogo pinagareegerak kwe, O wiya nggwok alik negen wage logonet, Eyo kani wuninogo pege, eno'mbak kani wunuk agan nenet nage, eeke menggi kwak eerogo pinagagin o.

Yeremiya 12:4

It aakumi o yime wonogo menggaarak nogo nen inobaabut maluk aret wonogwe, Ndiimbu-nggwiya inom, yi towe ndi towe inom, abok lek aret ogwe, Ndi, it aakumi nen kunduk, “Nit eerit nugwi nogo at enegen niiga'lek,” mba'nuk eerit nugwi, Eekwi paga O nggween yi mbuk age logonet, ka'let-ndi'nduk eeke, Yi yabu ndi yabu yarak me iri'ngga-kale'ngga teebat neyo-neyo nage, Eeke kagak ne mande ari nagin o.

Yeremiya 14:16

Ndi, it aap agan nugwi ti, inoone abet mba'nuk wamenggaarak aap inom, inakuwi inom, inapuri wologwe-komologwe inom, mbi noogelo paga kanggwi, wooluwak paga inoorak kanggwi, eeremenggaarak ineebe nggween taambiyoorak aakumi lek me, o Yerutalem tu paga tu paga time aret mbo piyaagun o. Nit eekwi onggo eeppinanigi, mbaruwak nduk, inoba kwippiyaagin nogo ti aret o.

Yeremiya 17:27

an wone yoragagirak konembunuk nogo 6 yippunuk ko'lu paga alik leenogo pugwi lek, ne 7 ti paga inamendek luurik-maarak aago wonok o Yerutalem tu unggwi wogo menggam unggwi wogwe iinok, o Yerutalem tu unggwogo menggam time kani noguk yuurak lek mendek wuninogo piminggirak paga, aap inendagembogut inawi nggwok abe wurik abok aret kani pup eerogo nengge logogin, yegerak, yoret o,” yinuk, yo'negerak me, yokkiragi o.

Yeremiya 17:4

It ti eekwi paga nanini kani kunik negen eerogo panegaarak mondok-mondok wunuk ari logogin me, Yate kwak inanggween unde eeppiyareegirak nogo it eekwi paga aap alik unde eekkologwe, Inawim nen o it ineenggo'lek me time piya nanuk inayeloman eerogo piigwi, Eerugun o,” yinuk, yegerak.

Yeremiya 18:23

Kaliku ALA wae. It nen nenggaawak lek eerogo panuwok nduk koonogo pit nugwi nogo abok aret kat keenu o. It maluk eeriyak koonit nugwi ti, lek eerogo piige, Inomaluk eerit nugwi keenggi linggingge nogo kobak eerogo piige, Eeriyak mage o. Ata, inenggaawak lek aruwak nduk, mbo piige, Ndi, kanini eeppiyoorak eyom ari wage kenok, kanini eeppiige, Eerumunggun o.

Yeremiya 21:12

Aliku ALA nen ari logonet, It Ndawut paga wiganak mendek ti, Ko'lu-kii'me kubondendok eekaatak a'me nggelok mban inowak loonggwi, It aap tebenogo piinok, inamendek kolamenggaarak ineenggime wonage nogo ndinggologwe, Eeko logowak o. Eeka'lek iinok perak, maluk eerit nogo nagaarak paga kani wunuk yinuk, noguk yega'lek yi mendek ndi mendek nenet nage menggi kwak, An nanini togop aret mi'nage logonet, eeppiinet nage logogin o.

Yeremiya 42:18

At Omaawi Lombok Menggerak Iterali inogoba Aliku Ala nen yegerak nogo yi aret. It Yerutalem wonogogwaarak nogo nanini inom, niniki aagi inom, inoba piyareegi kwak, it o Metit namenggaarak wonogwe iigak, nanini inoba piyaagin o. Inoba piige neenok, Aakumi pulunik aret, yogwe, inamineeri ne agan nage iigwi, inendage kumbunuk pulunogo piigwi, meek eerogo piigwi, eeko logogun me, inanggween yi, inigen ambinom kaagun mondok lek,” yegerak me, yokkiragi o.

Yeremiya 44:6

an nanini kani kunik negen mi'nage logonet, o Yekura kota-kota inom, o Yerutalem tu paga tu paga inom, nanini kilirogo wuppit wagagirak paga o ti, aakumi wonogwe lek nggween mbuk eerogo pereegirak yogondak inigen kogwe ti aret o,” yinuk, yegerak o.

Yeremiya 6:11

Kat kanini it inoba piyoorak nogo an ninikime kani pogom kerek togon eerogo pani wage paga puk ariyak meek tit ee'nake agaarik o.” Yoge mbaki, at Aliku ALA nen, “Nanini kinikime wonage ti, Elege tu paga wonogwe nogo inoba piinet nage, It aap tawe kuwak aago nogo inoba piige, Eeke logot o. Eeppiinet nage keegak, kumi-aap inogonggelomini-inakuwi inom wogoren nogwe, Aap inanggok inom, it aakelo inom, abok piginakwi, Eerugun o.

Yeremiya 6:12

O it wonogwe me yime abok aret aaninggin inoba piyaakit nduk, neenggi nippege neenok, Inawi wurik inom, inakuwi inom, ineyabu aago inom, it aap alik unde eekkolaagun o,” yinuk, yegerak o.

Yeremiya 8:13

Aliku ALA nen ari logonet, “It an napuri nogo yabume anggen mbanogo kuwak eeko mengga kwak, kuwak eeppiyoorak kwe, Eyo anggur agaro paga anggen yega'lek wonage, Eyo wuli agaro paga anggen yugu lek wonage, Engga mbuk eerogo pit nagaarak wonage, Eerak wonage pogom napuri togop aret wonogwe me, Inanggween wogoragagirak nogo it aap inambik nen ndinogo unde eekkolaagun,” yegerak o.

Leendawi 4:11

Aliku ALA anini tayoppega'lek tek eerogo nappege, Anini kani kunik negen aakumi inoba kilirogo piinet nage, Eeke nagagerik, O Tiyon paga kani negen wuninogo pereegerak pup eerogo nenet nage logonet, nggween mban teppereegerak.

Yetikiyen 22:22

Mbuti kani worako menggam kani eyak nen mbuti perak nggalo-nggalo wangge menggi kwak, o kota aken time ineebe togop aret eerogo piyaagin me, Naliku an ALA nen aret nanini nggwik togon inoba piige nogo ineenu arugun o,” yinuk, yegerak me, yokkiragi o, yoragagirak.

Yetikiyen 7:12

Ti eeppiyoorak eyom ari wage, eeginaburak ne abu koonak nogo panggo ari, eeke agaarik o. Maluk onggo Naliku ALA nanini aakumi abok aret inoba kwippiyaakit nduk eeke me, it aakumi inoona kunggologwe nogo iniki ale'nggen mbakwi, ndi, aakumi kunggolaawak nduk, inamendek porogo wonogwe nen iniki wakkologwe, eerugwaarik o.

Yetikiyen 7:14

Nanini it abok inoba piyoorak koonak nogo muk ari wagaarak me, wim inom eeruwok nduk oone nggwok eeka trompet nogo oone pu eekwi, yi mendek ndi mendek wim eekak pipuk eekwi, eeremenggaarak kwe, aap ambit iluk ambi wim eeri unggugun mondok lek aret o,” yinuk, yegerak me, yoragagirak.

Ndaniyen 9:11

Nit Iterali mendek abok aret eeko logorak koone yugu nogo, Eeriyak nineebi o, yinuk, taganogo mbo pogoorak o. Kat kendage maluk eerogo pogo nogoorak me, Maluk eekwi iinok, pulunogo piige, maluk eekwi onggo aaninggin inoba piige, eerigin o, yinuk, kumbuk mbambunuk yoragagindak kat Ala kayeloman Muta liiru mbaneegerak nogo ndak-ndak nit ninoba kwippinanggendak o.

Ala Unde 26:28

an kunduk, nogogumbuk a'nuk nanini nen inomaluk onggo ne 7 kuli aret aaninggin inoba kwippiige logogin o.

Nakum 1:6

Aliku ALA anini nen eeppiige nogo, aap ta nen ko wappunuk, logogin mbakop? At anini kani kunik negen eeke kagak, aap ta nen ogogumbuk puk arigin mbakop? Lek aret o. At anini kani kunik negen yumbunogo wuppi wage nagaarik, Enegen kagak, puut-puut yanggu-yanggu wambit wage kagagirak o.

Tepaniya 1:2

“Yi mendek ndi mendek o nggween paga wonogwe abok aret an nen inenggaawak lek eerogo piyaagin o,” yinuk, Aliku ALA nen aret yegerak o.

Tepaniya 1:3

“Aakumi inom, yi mendek ndi mendek ineenik nggween paga nugu menggaarak anebunu lombok inom, inenggaawak lek eerogo piige, Yi towe ndi towe oolo ya'i wiganinuk nugu menggaarak inom, yi yikwe ndi yikwe niyo nggwok yenggenak laut inikime menggaarak inom, lek eerogo piige, It aap an noone ineebi mbaka inom, aakumi o nggween paga wonogwe abok aret inom, mondok lek eerogo piige, Eerigin o,” yinuk, Aliku ALA nen aret yegerak o.

Takariya 7:12

Iniki yugum moolingget kwak kumbunuk, eeko logorak wone yugu inom, at Omaawi Lombok Menggerak Aliku ALA yereegerak Aberiniki nen it aap Ala yorage kagak yoraga nen yoragak yuwak nduk, o aa'nduk yorogo nogogwaarak nogo inom, nen, “Koneniyak nineebi o,” yinuk, yereegwaarak me, at Omaawi Lombok Menggerak Aliku ALA nen anini iya lombok inoba kwippiyareegerak.

Maleyaki 4:1

At Omaawi Lombok Menggerak Aliku ALA nen ari logonet, “An nen aakumi eeppiya woroorak ne nogo ti, abet aret woraagin o. Yugum kani pugu wunuk ari menggi kwak, woraagin me, it aap iniki wogoppatit nega inom, maluk eeriyak mban mbaka inom, wiiringga kani nenet nage menggi kwak nenet nagin o. Ne ti paga kani nenet nage logonet, wiiringga owak inom, omanggen inom, pup eerogo nengge menggi kwak, togop aret eerogo nagin o.

Matiyut 3:12

Gandum anggen ndegeniyak nduk, tenggap at eenggime porogo wonage me, ndegengge menggim abu ndegembunuk, eebe kenok, kuwak eerogo tilaabaga pege, ndi, ameneno kenok, kani noguk ariilik wunuk mban ari menggim nappege, eerigin o,” yinuk, yoragagerak.

Wayu 14:10

anggur amburu niyo inom toolak lek, at mban toolak nonggo logonet ale ambik kogo mengga kwak, at Ala nen it aakumi ti, inabuwa mbaka'lek anini mondok alik negen inoba piige logonet, kani kunik yugum anggen inom kwippiige mbaremenggi, it Ala ake leenak menggaarak malayikat inom, at Ndomba Aagaluk inom, inigen iigak, Kani omoonuk eyak o. Yugum yugu andi o, yinuk, yagan yobak-nggolak wako logogun o,” yinuk, ari naruk konenggirak.