Yeremiya 6:20 - Ala Wone Peenok Peebi Mbanak

²⁰ It nen obari abe kaga o Tiyeba nen wonok nake pi wogwe, En weeri amburu aberogon o nda nen wonok niri wogwe, Eekwi ti, Nano ake eeko agaarik? Ti we aanom warogo aret! Warogo nake kani kunggwi ti, ninikilom mbake, Warogo wo'nugwi ti, nale'nggen mbake, Eekeelik mban aret o,” yinuk, yegerak me yokkiragi o.

Yeremiya 6:20 ပူးပေါင်းရင်းမြစ်များ

2 Tamuwen 15:12

Inom aret nogo nogogwaarik, at Abatalom nogo Ala ake warogo wogoge logonet, aap Nggilo mendek endage Akitoben Ndawut inom wone koongga nogo, ame o Nggilo time wonage me, woraawak nduk, ayeloman mini yonggo nappiyareegerak. Togop eereegerak paga Ndawut tebenogo puwok nduk iniki ambit eeppunuk, koonogo pereegwaarak nogo, nggwok aret age mbareegi, aakumi apit at Abatalom inom mban aret ogogwaarak.

1 Endagembogut 10:10

Yoge nagagerik, mbuti emas aaninggin empat ribu inom, yi mendek ndi mendek ombat abe eeka apit aret inom, yugum abinak ambik onggo nggwok mendek inom, aap endagembogut nogo wogoreegerak. At kwe nggwok Tiyeba mendek nen yi mendek ndi mendek ombat abe eeka at endagembogut Talomo wogori wagagerak nogo ti, ambik mondok iya lombok wogori wagagerak me, peebi aap ambi nen at togop wogori woroolik aret o.

Ndawi 40:6

Kat kake warogo wokkugwi inom, yi mendek ndi mendek kake pugwi inom, Kat keebi mbake logonet kwe, Koone konengge logokit nduk, An naruk paarogo panegendak o. Kake warogo kani kunggwi inom, Ninomaluk lek aruwak nduk, Kake warogo wokkugwi inom, “Nonggop nduk nake puulik o,” yinuk, Yo'niraamunggun lek kwe,

Ndawi 66:3

Kinogoba Ala yogo logonet, “Kat iya tit eerit nage paga ninamineeri ne agan nage, Komaawi ambik lombok menggendak paga Kawim inagabiti nen yipik agan kabu'me ari wogwe,

Wundeegwaarak 30:23

“Obari obeelom eeka amburu toolak aaninggin 6 inom, eyo nggami aaninggin kenagan inom, en amburu aaninggin kenagan inom,

Kini Wuppiige 15:8

Aap maluk mendek nen ake warogo Aliku ALA wogogwi nogo, at eebi lombok mbake menggerak kwe, Aap iniki koonak nen tamban eekwi iinok perak, koneniyak inikilom mbake menggerak.

Kini Wuppiige 21:27

It aap maluk mendek nen Aliku ALA ake warogo wogogwi iinok, eebi lombok mbake menggerak me, Iniki maluk ambi koombunuk ake warogo pit wogwe iinok perak, abunuk eebi lombok mbake menggerak o.

Yetaya 1:11

Aliku ALA nen ari logonet, “It inaanggumi apit-apat warogo wo'nugwi ti, ta ake warogo wogogo agaarik? It ndomba ngguunok inoorogo nake kani kunggwi, Tapi inaagalogwe inooppunuk, inamok leenogo wo'nugwi, Eekwi ti, Pekkoorak woobut ee'nake, Tapi ngguunok inom, ndomba aagalogwe inom, kambin ngguunok inom, Inamiya an ninikilom mbakeelik neebi lombok ee'nake, Eeke agaarik o.

Yetaya 60:6

It o Miriyan nen, o Epa nen, unta awologwe apit aret wonok iri woraagun me, Anggween enete lek eerogo unta mban nugwi, Aakumi Tiyeba nen abok aret mbuti emas inom, obari abe kaga inom, wonok wogo logonet, Naliku ALA nendage tiyappit wogwe, Eeko logogun o.

Yetaya 66:3

It aap tapi ngguunok warogo nake kani kunggwi ti, aap wakwi kwak aret eekwi, Ndomba aagaluk warogo wo'nugwi ti, nggeewo enggaanok koguk wakwi kwak aret eekwi, Gandum anggen yigirik an wo'nugwi ti, wam amiya kilirogo an wo'nugwi kwak aret eekwi, Obari abe kaga kani kunggwi ti, kugi ogut alut eekwi kwak aret eekwi, Eeko menggaarak o. It aap ti, inalik iniki mba'nuk eeriyak miippunuk eerit nugwi, Ogole warak mendek mban eerit nugu logorak inikilom mbakwi, Eeko menggaarak me,

Yeremiya 14:10

It aakumi yi, eekwi iinok, Aliku ALA nen yegerak nogo yi aret. “It aakumi yi, yagak-ndagak nugu logorak inikilom mbakwi, Iniyok teberogon logorak meek age, Eeko menggaarak me, Naliku ALA nen nale'nggen inombaka'lek logonet, it maluk eerit nugwi nogo abeke, It inomaluk onggo aaninggin inoba piige, Eerigin o,” yinuk, yegerak o.

Yeremiya 14:12

It nen inambe mage negen logonet, Yeenggwa niret o, yinuk, nggino yo'nirimenggaarak kwe, inoone yogwe an naruk konengge, ndi, ndomba warogo nake kani kunggwi, gandum anggen yigirik niri wogwe, eeremenggaarak kwe, nale'nggen nen wagangge, eerigin lek o. Ata, wooluwak paga, mbi noogelo paga, kugilingga paga, ineebe lek eerogo piyaagin o.”

Yetikiyen 20:39

It Iterali mendek ti perak, Naliku Nitok Minggirak an ALA nen wone ambi yoroorak yokkege nogo yi aret. It Iterali mendek ti, inalitik-inalitak lombok nen inagugi ogut eerak ayuk wurit nogo logowak o. Togop eerit nogo logomenggaarik, irip paga an noone inaruk konembunuk, inagugi inake pugwi, aanggo warogo wogogwi, eekwi paga an nendage abe alik leenak maluk eerogo pugwi nogo ambinom maluk eerogo pugun lek o.

Yetikiyen 27:22

It Tiyeba mendek inom, Arayema mendek inom, at inom onggo-onggo eeko logonet, yi mendek ndi mendek ombat abe eeka abu abe lombok inom, yugum kere'li-kere'lo eerak enete alik-alik onggo iya nogo inom, mbuti emas inom, nogo paga amendek onggo kunggola wogwe,

Oteya 8:13

An nake pugu nogo, it nen warogo wo'nugwi, Nake warak nogo enggaanggum it nunggwi, Eeko menggaarak kwe, Naliku ALA nen ninikilom mbakeelik aret agarik o. It maluk eekwi ti, an niniki aberak logonet, onggo aaninggin inoba kwippiyoorak nogo ti, Iniyokan o Metit nappiyaagin ti aret!

Oteya 9:4

Kit o time logonet, Aliku ALA ake anggur amburu kilirogo pumunggup lek o. Ndi, at ake warogo wogogwi nogo kunduk, ale'nggen nen waagin lek mban. Ake warogo wogorumunggup ti, aakumi kanggwi iinok, inabugo laago larogo nonggo mengga kwak aret me, Nunggwi kiinok, maluk eerogo patumunggup o. Kit at ake pi wogwe nogo, at waagin lek kit kinalik kinake aret me, Aliku ALA awi wurik me pi unggugup o.

Maleyaki 1:10

“An nake warogo kani kunggo menggam it we aanom warogo kani kunggwi iyo, it inenggela'me time aap ambi nen nawi wurik me tu narogo puwak lak, ao, mbake agarik o. It eekwi ti, an abu neebi lombok mbake me, an nake warogo wo'nugwi ti, an waagin lek aret o,” yinuk, at Omaawi Lombok Menggerak Aliku ALA nen aret yegerak me yokkiragi o.