Yeremiya 51:53 - Ala Wone Peenok Peebi Mbanak

⁵³ “It aakumi Mbaben mendek nen aakumi tebenogo wuppiya woroobok me, mbogut paga lagi nanuk, O time wuppunuk, pak omaawi lombok wurogo pemenggaarak kwe, Tebenogo wuppiya woraawak nduk, it aap o maluk eerogo pega nogo time aret nappiya woraagin o,” yinuk, Aliku ALA nen aret yegerak.

Yeremiya 51:53 ပူးပေါင်းရင်းမြစ်များ

Ayup 20:6

Inendage mbogut paga tiyak agan nggwok ari lagangge, Inanobak ndugwi paga ari lagangge, Eeremenggaarak kwe,

Yetaya 13:17

It mbuti perak koloorak mbakwi, Mbuti emas inikilom mbakwi, Eekulik Aakumi Marayi mendek nen it inoori woraawak nduk, inikime nggaganogo piyaagin mbako logonip o.

Yetaya 41:25

O omarip paga pa'nggwe nen aap ambi woraawak nduk inikime eeppigirak me, at muk wage, Oonegen lagi wage menggim pa'nggwe nen nendage kunit wage, Eeke agaarik o. Aap nggabok paga togolowak ogobakkigika nen togolowak ogobakkigirikit nduk iyok paga nggabok amok mbangge menggi kwak, At aap nogo wage logonet, togop aret it inendagembogut nogo iyok paga aambirak-mbirak eerogo piige logogin o.

Yetaya 47:5

Ala nen ari logonet, “It Mbaben mendek inaagaluk kat yi wae. Koone ambi yaga'lek kwi'nage, Koone lek aret o akem yumaak aago me time unggwi nage, Eeru o. Yi aap ndi aap inabu'me piigo menggam unde ninagalo kwe nggwok kat yi aret o, Yinuk, ambinom yokkogo logogun lek o.

Yetaya 47:7

Kat nen, An kwe nggwok wonage nogo lek aga'lek mondok-mondok aret logogin, yagandak kwe, Eeppagarak yagarak yi, kiniki liippege, Ti eeke neenok, ndogop eeppanigin, mbake, Eeka'lek aret keegi o.

Yeremiya 49:16

Aakumi inaganak waruwak nduk eerogo piige, Iniki wogoppatit nage, eeke nagagerak paga, at aret ambokan lagambatinuk, Yugum eraanu-eraanu me time wonage, puut-puut tiyarogon time unde eeppatinuk wonage, eeke menggerak ti, Towe pen ware kwak at awi tiyarogon wurit wonage kwe, An nen minogo wuppi woraagin o,” yinuk, yegerak me, yokkiragi o.

Yeremiya 50:21

“O Meratayim nanuk wim eeri unggwogwe, Aakumi o Pekot wonogwe nogo ineebe inoorogo piigwi, Eeruwak o. Inoorogo piigwi, ineebe lek eerogo piigwi, Yoragarak ndak-ndak aret eekwi, Eeko logowak o,” yinuk, Aliku ALA nen aret yegerak me yokkiragi o.

Yeremiya 50:25

Nomaawi Lombok Naliku Nitok Minggirak an ALA nen aakumi o Mbaben wonogo menggam ambi eeriyak agaarak me, An neegin-nomaale pege minggim tu paarogo punuk, nanini nen eeppiyoorak ndak-ndak waganogo wunabi wagarak me,

Yeremiya 50:45

Togop aret me, at Aliku ALA nen o Mbaben eeppuurak nogo koonogo pege, Ndi, it o Mbaben wonogwe eeppiyoorak nogo koonogo pege, Eekerak yi, Konenggo logonip o. Ndomba aagalogwe kwak, inapuri elege-aabologwe nogo niik eerogo wumbiige, Ndi, ndomba inagari'ngga nenet nogo menggam kwak it wonogo menggam time abu maluk eerogo pege, Eerigin o.

Yeremiya 51:11

“Naliku an ALA nen it Mbaben mendek eereegwaarak nogo onggo eeppiige, Ndi, an nawi wurik maluk eerogo pereegwaarak nogo onggo eeppiige, Eeriyak koonogo pereegirak nogo eeppiige logonet, o Mbaben pup eerogo piyaawak nduk, It Meriya mendek inoweewi inendagembogut kini wuppiige logonet, Inawuri wim nambuka nen inomaale ngget mbulunggwi, inarin pipuk eerogo pakwi,

Yeremiya 51:25

“At o Mbaben ti, puut nen aakumi aambiranogo piige menggi kwak aakumi o nggween paga abok aret lek eerogo piiga nawim aret me, At lek eerogo pikit nduk, an neenggi titik ege, Puut paga nen yugum langgunogo nappogo mengga kwak eerogo pege, Puut kani wunuk ari nagaatik noguk ari menggi kwak eerogo pege, Eerigin o,” yinuk, at Aliku ALA nen aret yegerak me yokkigi o.

Yeremiya 51:48

It aap o maluk eerogo pega o omarip paga pa'nggwe nen wogo logomenggaarik, O Mbaben lek eerogo pugwi ti eyom mbogut inom, nggween inom, yi mendek ndi mendek it paga wonogwe nogo inom, abok aret nen, O Mbaben nogo lek aga o, yinuk, inale'nggen nen keekok yogo logogun o,” yinuk, Aliku ALA nen aret yegerak o.

Yeremiya 51:56

Naliku ALA ti, eekaatak ndak-ndak onggo eeppiige minggirak an Ala aret o. An nen o Mbaben eekerak ndak-ndak onggo oba kwippigin me, It o maluk eerogo pega nogo o Mbaben wogo logomenggaarik, maluk eerogo pogo logonet, At awuri wim eeka nogo piginakwi, ineegin kalenogo pugwi, Eerugun o.

Yeremiya 51:58

At Omaawi Lombok Menggerak Aliku ALA nen yegerak nogo yi aret. “O Mbaben yugum pak wurik ambe wiganak nogo yigirogo kobak-kobak eerogo pugwi, Tungga pak tiyarogon mbanak nogo kani nawak nen paarogo pugwi, Eerugun me, It aakumi inanebunu lombok nen inomaawi lik-lek eereegwaarak ti, aanom warogo aret eekwi, Ndi, yi aakumi ndi aakumi yabu ta'liila eereegwaarak ti, kani noorak ake aret eerogo pugwi, Eereegwaarak kaagun o,” Yinuk, yegerak o.

Ndaniyen 4:30

“An nendagembogut minggim o Mbaben mondok tiyanak lombok wonage yi, an nomaawi paga pippunuk logonet, eerogo pit nage, nayuk warak neenok, Endage tiyanak wonage me iya! yuwak nduk eerogo pege, eereegirak yi aret nogo lek a?”

Amot 9:2

It kole aakumi kambunuk nogo menggam nggween ogu kabunit wambi nanuk wonogwe iigak kwe, time nen aret an neenggi omaawi paga yabonogo nippiya wage, It kole mbogut paga lagi namenggaarak kwe, time nen aret yabonogo nggween paga wuppiya wage,

Amot 9:4

It inawim nen kugun wogoren mbo piya nogwe iinok, Kinawooluwak paga inoorogo piyaanip o, yinuk, yorage, Eerigin o. An nenegen wogoren nege logogin nogo ti, obeelom eerogo piyaakit nduk lek o. Ata, maluk eerogo piyaakit nduk, nenegen wogoren nege logogin o,” yinuk, ari kagagirak o.

Abakuk 2:9

Neebe op logokit nduk, nawi tiyarogon wurogo patikit o, mba'nuk, Aakumi wi-wi aganake logonet, inamendek wamenggerak paga at paga wiganak ineenggi warak eerogo piige nogo, abuwa o!