Yeremiya 51:19 - Ala Wone Peenok Peebi Mbanak

¹⁹ At Yakup iniki kunik mbake nogo perak, togop lek o. At nen yi mendek ndi mendek abok aret wakkage nagagerik, Eyate kwak inanebunu Iterali mendek warak eerogo piyareegerak nogo ti, Endage, Omaawi Lombok Menggerak Aliku ALA aret o.

Yeremiya 51:19 ပူးပေါင်းရင်းမြစ်များ

Ndawi 115:3

Nit ninogoba Ala ti, mbogut paga wonage, At eeriyak mbake nogo aret eerit nage, Eeke menggerak kwe,

Ndawi 16:5

Kaliku ALA wae. Yate kwak mogonogo wo'nege, Togolowa'na amburu abe toolak kwak eeppanege, Eeke menggendak kat aret. An ee'naburak nogo abok aret Kat mban koongge menggendak.

Ndawi 33:12

It aakumi inanebunu ambi nen, “Aliku ALA ti, nit ninogoba Ala aret o,” yinuk, yogwe, “Neyate kwak logowak o,” yinuk, Aap anebunu ambi at leenogo pateegerak wonogwe, Eekwi nogo Inale'nggen aret mbako logowak o.

Ndawi 73:26

An neebe inom, niniki inom, abu ndeyak ee'nabit unggwage kwe, Nayugum lunik kwak an niniki Ala kat paga panggonak wonage, Neyate kwak kat paga niniki mondok lunik wonage, Eeke agarik o.

Ndawi 74:2

O maan aa'nduk togon it aakumi Kat kapuri lombok logowak nduk leenogo piige, Keyate kwak kat mendek logowak nduk, wondet eerogo piige, Eereegindak nogo abeke, Ndi, kat wonagaginom puut Tiyon nogo abeke, Eeru o.

Yetaya 47:4

Wondet Eerogo Pinanega endage Omaawi Lombok Menggerak Aliku ALA ti, Kikak Nakeelik Alik Leenak Iterali inogoba aret o.

Yetaya 51:13

O nggween yi alom kwippege, mbogut mbiganogo pege, Eeke nagagirik, Kineebe ogobakkigirogo pinagareegirak Naliku ALA kobak eerogo panugwi, It aakumi maluk eerogo piyoorak mbako menggaarak nogo inanini nen maluk eeppinanugwi iyo, yinuk, O kuubondendok nen nok oonikiya ari nage paga kinaganak warit nugwi, Eekwi yi, taani o? It inanini nen maluk eeppinagarak nogo ineebe nggeeme wonogo agaarik? Lek aret o.

Yeremiya 10:12

At Ala eenggi omaawi paga o yi ogobakkigike, Iniki warak nen o nggween yi, ena koonogo pege, At eenu paga mbogut mbiganogo nappege, Eereegerak o.

Yeremiya 10:16

At Yakup iniki kunik mbake nogo perak, togop lek o. At yi mendek ndi mendek apit aret wakkage nagagerik, Eyate kwak inanebunu Iterali mendek warak eerogo piyareegerak nogo ti, Endage, Omaawi Lombok Menggerak Aliku ALA aret o.

Yeremiya 33:2

“O nggween yi ogobakkigirogo pege, o yi nenaarogo pit nage, nggween alom kwippege, eereegerak endage Aliku ALA aret me, Aliku ALA nen an yo'nege logonet,

Yeremiya 50:11

“It an neyate kwak niniki kundugu nogo maluk eerogo piigwi nen inale'nggen mbakwi, Ale'nggen inikime nggelok ari logonet, noone-koone agan nugwi, Tapi aagalogwe iri'ngga mili nenet nugu logonet, ineeruwak anen pera eerogo piige kwak eerak nugwi, Kuda ngguunok inoone ku agan nugwi kwak eekwi, Eerit nugwi me,

Yeremiya 50:34

Togop eerogo piinok wonogwe kwe, an Wondet Eerogo Piiga ti, nomaawi wonage, Nendage ti, Nomaawi Lombok Minggirak Naliku ALA aret o. An nen aret it Iterali inanggween paga wonogo logonet, inabolok lek logorak eerogo piige, Ndi, it o Mbaben wonogwe perak, inabolok mban yogo logorak eerogo piige, Eeruwak nduk, Iterali inawone liirogon amburu mbanogo piige logogin,” yegerak o.

Yeremiya 51:5

It Iterali inom, Yekura inom, wonogogwam time maluk lombok ndak warak wonage nogo An Kikak Nakeelik Nalik Leenak Iterali inogoba nenegen kage kwe, An Nomaawi Lombok Minggirak inogoba Naliku Ala nen it mbo piyaagin lek nduk, yagi,” yegerak o.

Leendawi 3:24

An niniki nen mbake logonet, “Yate kwak niniki kundugu ti, Aliku ALA aret me, At nen eeppaniyak nogo mban niniki lunik aret agaarik o,” yinuk, ari minggirak o.

1 Peterut 2:9

kit perak, o apit me wonogwe nogo mbo punuk, o eya iya lombok kenok, aakumi nen, “Wi!” ugo menggam nogome logobagip nduk, Ala nen kinayonggo pereegerak nogo at eeke menggerak mendek paganogo yorogo logobagip nduk, “Kit an mendek aret o,” yinuk, miirogo pinagage, “Kinendagembogut logonet, an neebe unde logorak kit aret o,” yinuk, mippinagage, “Kit an napuri maluk eeka'lek nake leenak logomunggup o,” yinuk, leenogo pinagage, ndi, “Kit an napuri lombok aret o,” yinuk, eekkinake, eereegerak o.