Yeremiya 51:13 - Ala Wone Peenok Peebi Mbanak

¹³ It aap ineenggi warak niyo nggwok nage aa'nggi paga menggaarak inendage tiyanak wonogwe nogo Inendage lek ariyak eyom ari wage, Obeelom mban logowok, mbakwi nogo lek ariyak eyom panggoni wage, Eeke agaarik o.

Yeremiya 51:13 ပူးပေါင်းရင်းမြစ်များ

Wakkagagerak 6:13

aap Nu nogo yoge logonet, “It aakumi maluk eerit nugwi paga o nggween paga yi awi ndi awi abok aret inanini ambik agaarak me, ambinom ineenik logowak nduk teppiyaagin lek o. Aakumi tigitogon lek eerogo piige, ndi, o nggween yi mondok lek eerogo pege, eerikit o, yinuk, wone abuk nggaruk togon yokkigi o.”

Ndawi 137:1

Nit niyo Mbaben aa'nggi paga time kwi'na'nuk, O Tiyon nonggop wonage nogo Oba abeppunuk le nggwok yogwe,

Yetaya 43:14

At Kikak Nakeelik Alik Leenak Wondet Eerogo Pinagaga kit Iterali kinogoba Aliku ALA nen yegerak nogo yi o. “It wondet agago piyaawak nduk, aap ineegin warak o Mbaben nappiige neenok, It aakumi Mbaben mendek nogo inayumoogi mban nggerok inayiiro abe ogobakkigirik kenok iniki tiyappatit nugwi nogo paga unggwi nanuk kole mbaganugun o.

Yetaya 45:3

Iterali inogoba Naliku ALA nen kat kendage kunogo wiigigirak keenu arenok nduk, Yi mendek ndi mendek oome aken time kumaarogo pegaarak nogo wokkege, Yi aap ndi aap ineenggi warak inamendek kumaarogo pakaarak wonage nogo pelenogo wokkege, Eerigin o.

Yetaya 57:17

Yi mendek ndi mendek koloorak mban uugwe mbarit nogwe paga nanini lombok inombake, Aaninggin inoba pege logonet, nanini nen nambot wogorage, Eeke neegak, Inanobak yugum kwak eeppatinuk, tu alik paga nomoninuk nogo nogogwaarak o.

Yeremiya 17:11

Aap ambi aakumi wi-wi aganake logonet, eenggi warak eekkolage nogo ti, Towe at ako lek alik ambi ako kagak tebeni unggwage nagaatik, tubungge menggi kwak aret menggerak o. At nda'nagagim obate paga kagak amindik-amendek unde agaarak nogo lek age, Ndi, at nda'nagagim abu ari nage kagak, at eeremenggerak paga, “Aap yi, wi yuundurak kwak wonage o,” yinuk, aakumi ineenu ogwe, Eeko logogun o.

Yeremiya 50:27

Ndi, tapi ngguunok inili yaga'lek inenggaanok mbanuwak nduk wonok nogo mengga kwak, Inawuri ineegin warak wakaa'ngget nogo teppiyoorak lek tigitogon inoorogo piigwi, Eeruwak o. It aakumi Mbaben mendek eeppiyoorak eyom ari wage, Eereegwaarak onggo inoba kwippiyoorak eyom muk panggoni wage, Eekerak me, inabuwa o!

Yeremiya 50:31

At Omaawi Lombok Menggerak Aliku nogoba Ala nen ari logonet, “At iniki wogoppaka ti, abet aret nawim nimbirak ogoorak me, At eeppuurak eyom panggoni wage, Eekerak onggo aaninggin oba kwippuurak eyom ari wage, Eekerak me,

Yeremiya 50:37

Wooluwak nen it inaguda inom, inanggweendo inom, yigirogo piige, Wooluwak nen it aap at awuri ineegin warak inenggela'me nenggelak-kenggelak wonogwe nogo kumi kwak eerogo piige, Wooluwak nen amindik-amendek onggo nggwok kuwak eerogo pugu nogo, kugun wonok nawak nduk, eerogo piige,

Yeremiya 51:36

Togop aret me, Aliku ALA nen yegerak nogo yi aret. “An nen napuri Iterali inawone mbanogo piige, It maluk eeppiigwi onggo eeppiige, O Mbaben aniyo laut yenggenak nogo woloonogo pege, Aniyo eneeri nogo poronogo pit nage, Eeke neyaagun o.

Leendawi 4:18

Tu nugwi niinok, ninom ogoorak nen inigen wo'niren nugu nogogwaarak me, Ninawoore'nggam nen wundi naga'lek puk aret wonogogurak o. Nit nda'nogogurak eyom abu aret lek arit nage, Nineenik logorak kuli abu aret ari nage, Ndi, nit kambuurak eyom panggoni wage, Eereegerak me,

Ndaniyen 5:26

Ndi, wone yi alom nogo ti, yi aret. MENE ti, kat nogoba kendagembogut logonet wone lengganogo yorage keegak, Ala nen muk eenggi lingginogo pereegerak me, age yobok muk panggoni wagaarak wonage agaarik o.

Amot 8:2

Titi'nege logonet, “Amot wae. Kat nano mendek kenegen kagan o?” Yo'nege mbareegi, “Muun yarak me, anggen kole agaarak mbanak yonggolak kagi o.” Yoge mbareegi, Aliku ALA nen an yo'nege logonet, “It an napuri Iterali eeppiyoorak eyom nogo muk panggoni wagaarak me, an nen ambinom inili eerogo teppiyaagin lek eeppiyaagin aret o,” yinuk, yo'nege kagagirak.

1 Peterut 4:7

O age yobok paga eeriyak abu koorok panggo yi wagaarak me, tamban eeko logobagip nduk, kiniki kwi'ndak nu'lek logonet, kinagaket paga logonip o.

2 Peterut 2:3

It aap mamuniraga ti nen ambi kolaawok nduk, kinambokan laganggo logonet, inoone ugun pilit pugunogo yokkirogo logogun o. Togop yokkirogo logomenggaarak kwe, it eekwi paga at inowak loombunuk maluk inoba piyoorak maan koonogo pereegerak Ala nogo ti, we ugun maanggo yugu logonet nogo lumok ari wonage lek o. Ata, ineebe lek eerogo piyoorak nduk abu li'luk eerak aret wonage agaarik o.

Wayu 17:1

Ti yogwi iige nagarik, wonage me, it malayikat ineebe 7 Ala anini toolak 7 porogo wonagaarak nogo, ambi an nowagam wage nagaarik, yo'nege logonet, “O kota Mbaben niyo kunit wage menggim nogobak-kogobak paga o wurik nogo ti, kwe yawukak lombok pogom me, yi aap ndi aap inendagembogut nen maluk eeppi wogwe, ndi, yi aakumi ndi aakumi nggween paga menggaarak abok aret amburu nenok kumili-kumili negen agan nogo mengga kwak, kwe nogo pekka ungguwok nduk, nili-kili yogwe, eekwi me, at Ala nen kwe nogo maluk onggo oba kwippege kaanok nduk, omok o,” yinuk, yo'nege kagarak.

Wayu 17:15

Yo'nege nagaarik, ambinom yo'nege logonet, “Yi niyo ndi niyo kunit wage menggim nogobak-kogobak paga kwe yawukak kwi'ndak wonage kagandak nogo ti, yi aakumi ndi aakumi inanebunu lombok inom, aakumi ugun inom, inagabolo alitak inom, inoone alitak inom, ineebe ti aret iigendak o.

Wayu 18:19

wun inanobak paga yumbunogo wuppako logonet, “O kota nggwok abe menggendak yi, kabuwa o. Aakumi inanebunu lombok abok aret inamindik-inamendek yi awi ndi awi nen yiiro paga wonok wogwe iinok, Kunggologo logonet, ineenggi warak eeppiige nagandak kwe, Ne ambit 1 jam paga aret lek agandak me, kabuwa o,” yinuk, ale yogwe, aleenggu maakwi, eekwi iigirak.